ໃນພິທີຮ່ວມລົງນາມຄັ້ງນີ້ ຕາງໜ້າຈາກຂະແໜງການພາສີ ແມ່ນທ່ານ ອາດສະພັງທອງ ສີພັນດອນ ຫົວໜ້າກົມພາສີ ແລະ ຕາງໜ້າບໍລິສັດ ບຣູໂລເວີລິຕັສ ແມ່ນທ່ານ Frederic Lamy ພ້ອມດ້ວຍຄະນະ.
ການເຊັນສັນຍາດັ່ງກ່າວ ແມ່ນເພື່ອຜັນຂະຫຍາຍສັນຍາແມ່ ທີ່ລັດຖະະບານໄດ້ຕົກລໍົງອະນຸມັດ ແລະ ເຊັນສັນຍາໃນວັນທີ: 15-17 ມັງກອນ ປີ 2013. ສະນັ້ນ, ກະຊວງການເງິນ ຈຶ່ງໄດ້ດຳເນີນການມອບຮັບໃຫ້ກົມພາສີ ເປັນຜູ້ຕາງໜ້າເຊັນສັນຍາເພີ່ມເຕີ່ມດັ່ງກ່າວ ເຊີ່ງໃນສັນຍາເພີ່ມເຕີ່ມ ໄດ້ແບ່ງອອກເປັນ 2 ພາກຄື:
· ກຳນົດໜ້າວຽກໂດຍລວມ, ໜ້າວຽກທາງດ້ານເຕັກນິກ, ວັດຖຸອຸປະກອນ ແລະ ມາດຕະການຕ່າງໆ ໃນການຈັດຕັ້ງປະຕິບັດ.
· ວຽກງານການເງິນ ເຊີ່ງກຳນົດອັດຕາຄ່າບໍລິການ, ຄ່າພາກຫລວງ, ການເຊື່ອມໂຍງກັບຂະແໜງການອື່ນ, ການແລກປ່ຽນຂໍ້ມູນຂ່າວສານ, ກຳນົດເວລາ ແລະ ການຖືຫຸ້ນສ່ວນຂອງລັດ.
ລະບົບແຈ້ງພາສີປະຕູດຽວ ແມ່ນລະບົບແຈ້ງເອກະສານ ທີ່ກ່ຽວຂ້ອງກັບການຄຸ້ມຄອງການ ນຳເຂົ້າ - ສົ່ງອອກ ແລະ ການຂົນສົ່ງສິນຄ້າຜ່ານແດນ ຜ່ານລະບົບແບບເອເລັກໂຕຣນິກ ເຊິ່ງເຮັດໃຫ້ຂະແໜງການລັດ ແລະ ພາກສ່ວນທຸລະກິດ ສາມາດແລກປ່ຽນຂໍ້ມູນ ແລະ ເອກະສານ ເພື່ອດຳເນີນຂັ້ນຕອນອະນຸມັດຕາມລະບຽບກົດໝາຍ. ຊຶ່ງຜູ້ປະກອບການ ສາມາດດຳເນີນຂັ້ນຕອນດ້ານເອກະສານຜ່ານຈຸດດຽວ ແລະ ໄດ້ຮັບການແຈ້ງຕອບຈາກພາກສ່ວນທີ່ກ່ຽວຂ້ອງຜ່ານຈຸດດຽວ; ເປົ້າໝາຍສູງສຸດຂອງການສ້າງລະບົບແຈ້ງພາສີ ປະຕູດຽວແຫ່ງຊາດ ແມ່ນເພື່ອເພີ່ມທະວີການອຳນວຍຄວາມສະ ດວກທາງດ້ານການຄ້າສາກົນ, ຍົກຂີດຄວາມສາມາດໃນການແຂ່ງຂັນດ້ານການຄ້າ ແລະ ສ້າງເງື່ອນໄຂເຊື່ອມໂຍງ ເຂົ້າເກັບເສດຖະກິດກັບພາກພື້ນ ແລະ ສາກົນ.
ແຫຼ່ງຂໍ້ມູນ: ກົມພາສີ, ກະຊວງການເງິນ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.