ໃນວັນທີ 30 ກັນຍາ 2014, ທີ່ ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມຂື້ນ ໂດຍການເປັນປະທານຂອງ ທ່ານ ນາງ ບານສະຕິ ເທບພະວົງ, ຫົວໜ້າ ກົມການນໍາເຂົ້າ ແລະ ສົ່ງອອກ, ຮອງຫົວໜ້າກອງເລຂາອຳນວຍຄວາມສະດວກທາງດ້ານການຄ້າ. ກອງປະຊຸມຄັ້ງນີ້ ໄດ້ຍົກສອງບັນຫາເພື່ອມາປຶກສາຫາຫຼື ເຊິ່ງກ່ຽວກັບ ການສົ່ງອອກຜະລິດຕະພັນໄມ້ສຳເລັດຮູບ ແລະ ການຜະລິດຖ່ານຂາວ. ໂດຍກອງປະ ຊຸມດັ່ງກ່າວນີ້ ທາງພາກລັກ ແລະ ພາກທຸລະກິດ ໄດ້ເຫັນດີເປັນເອກະພາບໂດຍພື້ນຖານ ບົນເນື້ອໃນຈິດໃຈຂອງ ບົດສະຫຼຸບກອງປະຊຸມດັ່ງ ນີ້:
ການປຶກສາຫາລື ກ່ຽວກັບ ບັນຫາການສົ່ງອອກຜະລິດຕະພັນໄມ້ສຳເລັດຮູບ ແມ່ນເພື່ອແນໃສ່ຫຼຸດຜ່ອນຂັ້ນຂອດ ແລະ ຫຼຸດຜ່ອນເອກະ ສານປະກອບໃນການຂໍອະນຸຍາດສົ່ງອອກ, ການຈັດຕັ້ງປະຕິບັດບັນດານິຕິກຳທີ່ພາກລັດວາງອອກ ໃຫ້ສອດຄ່ອງກັບການສົ່ງອອກຕົວ ຈິງຂອງພາກທຸລະກິດ ແລະ ເພື່ອແນໃສ່ສົ່ງເສີມການສົ່ງອອກຜະລິດຕະພັນໄມ້ສຳເລັດຮູບ ຂອງ ສປປ ລາວ ເຊັ່ນວ່າ: ຜະລິດຕະພັນໄມ້ທີ່ນໍາໄປວາງສະແດງຢູ່ສູນການຄ້າຕ່າງໆ ທີ່ມີຈຳນວນບໍ່ຫຼາຍໃນ ສປປ ລາວ ແມ່ນຈະໄດ້ສົມທົບກັບຂະແໜງການກ່ຽວຂ້ອງ ເພື່ອໃຫ້ສາມາດດໍາເນີນເອກະສານການສົ່ງອອກກັບທີ່ ແລະ ແຈ້ງເອກະສານພາສີໄດ້ເລີຍ ໃນເວລາທີ່ລູກຄ້າຕ່າງປະເທດຕ້ອງການຊື້.
ບັນຫາການປັບປຸງຂັ້ນຕອນການສົ່ງອອກຜະລິດຕະພັນໄມ້ສໍາເລັດຮູບທົ່ວໄປ ຫຼື ທີ່ເປັນຈໍານວນຫຼາຍ ປະຈຸບັນແມ່ນລໍຖ້າການປັບປຸງຄຳ ສັ່ງຂອງນາຍົກລັດຖະມົນຕີ ເລກທີ 17/ນຍ, ລົງວັນທີ 22 ກັນຍາ 2008 ແລະ ຂໍ້ຕົກລົງຂອງນາຍົກລັດຖະມົນຕີ ເລກທີ 32/ນຍ, ລົງວັນທີ 06 ມີນາ 2012. ຈົນກວ່າຈະສຳເລັດ ແລະ ປະກາດໃຊ້.
ການກຳນົດຮູບແບບ ແລະ ຂະໜາດຜະລິດຕະພັນໄມ້ ເພື່ອສົ່ງອອກ ແມ່ນສືບຕໍ່ປະຕິບັດຕາມ ຂໍ້ຕົກລົງຂອງ ລັດຖະມົນຕີວ່າການກະຊວງ ອຸດສາຫະກຳ ແລະ ການຄ້າ ວ່າດ້ວຍຮູບແບບ ແລະ ຂະໜາດ ຜະລິດຕະພັນໄມ້ ສະບັບເລກທີ 1415/ອຄ.ກຂອ, ລົງວັນ: 28/08/2008 ຈົນກວ່າຈະມີການປັບປຸງໃໝ່.
ນອກນັ້ນ, ໃນກອງປະຊຸມກໍ່ ເປັນເອກະພາບກັນສະເໜີໃຫ້ ກົມທະບຽນ ແລະ ຄຸ້ມຄອງວິສາຫະກິດ ປະສານໄປຍັງ ບັນດາແຂວງຕາມສາຍ ຂອງຕົນ ເພື່ອກວດກາບັນດາຫົວໜ່ວຍທຸກິດຜະລິດຖ່ານຂາວ ວ່າມີການຂຶ້ນທະບຽນ ແລະ ມີການເຄື່ອນໄຫວດໍາເນີນທຸລະກິດຖືກຕ້ອງ ຕາມລະບຽບຫຼັກການແລ້ວ ຫຼື ບໍ່ ເປັນຕົ້ນບັນດາຫົວໜ່ວຍທຸລະກິດ ທີ່ຕ່າງປະເທດມາລົງທຶນໂດຍຂຶ້ນ ທະບຽນອອກຊື່ເປັນຄົນລາວ ແລະ ການນໍາໃຊ້ແຮງງານຕ່າງປະເທດຢູ່ໃນໂຮງງານ. ພ້ອມກັນນັ້ນ, ໃຫ້ປະສານກັບຂະ ແໜງກະສິກໍາ ແລະ ປ່າໄມ້ ກ່ຽວກັບ ການອອກທະບຽນວິ ສາຫະກິດ ໃຫ້ແກ່ບັນດາໂຮງງານ ເພື່ອຮັບປະກັນການຕອບສະໜອງດ້ານວັດຖຸດິບ.
ສະເໜີໃຫ້ ກົມປ່າໄມ້, ກະຊວງກະສິກໍາ ແລະ ປ່າໄມ້ ກວດກາເບິ່ງຄືນການແບ່ງໂກ້ຕາຂຸດຄົ້ນວັດຖຸດິບໃຫ້ບັນດາໂຮງງານ. ພ້ອມກັນນັ້ນ, ຊ່ວຍປະສານໄປຍັງບັນດາແຂວງຕາມສາຍຂອງຕົນ ກ່ຽວກັບ ການເຫັນດີອະນຸຍາດດໍາເນີນທຸລະກິດຖ່ານຂາວ ຄວນຈະກວດເບິ່ງຄືນຄວາມສາມາດຕອບສະໜອງທາງດ້ານແຫຼ່ງວັດຖຸດິບ, ກວດຄືນບັນດາໂຮງ ງານທີ່ມີຢູ່ແລ້ວເປັນແນວໃດ ຄວນຈະມີການກໍານົດມາດຕະຖານໃຫ້ບັນດາໂຮງງານ ແລະ ຄວນຈະເຫັນດີອະນຸຍາດໃຫ້ສ້າງຕັ້ງໂຮງງານໃໝ່ເພີ່ມອີກ ຫຼື ບໍ ເພື່ອຮັບປະກັນໃຫ້ຜູ້ດໍາເນີນທຸລະກິດຖ່ານຂາວເຄື່ອນໄຫວສະດວກ ແລະ ຍືນຍົງ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.