ເພື່ອແນໃສ່ຍົກລະດັບບັນດາໜ້າວຽກສິ່ງອຳນວຍຄວາມສະດວກ ໃຫ້ແກ່ຮູບແບບການຈັດຕັ້ງປະຕິບັດການກະກຽມວຽກງານກວດກາສິນຄ້າຜ່ານປະຕູດຽວ, ຈຸດດຽວຮ່ວມກັນຢູ່ທີ່ດ່ານສາກົນແດນສະຫວັນລາວບາວລະຫວ່າງ ແຂວງສະຫວັນນະເຂດ ແລະ ກວາງຈິ ດັ່ງນັ້ນ ມາໃນວັນທີ 20 ຕຸລາ 2014 ນີ້, ຢູ່ເມືອງເຊໂປນ ແຂວງສະຫວັນນະເຂດ ໄດ້ຈັດກອງປະຊຸມໜ່ວຍປະຕິບັດງານຂັ້ນແຂວງ ກ່ຽວກັບການກະກຽມຮູບແບບການຈັດຕັ້ງປະຕິບັດການກວດກາປະຕູດຽວ, ຄັ້ງດຽວ ທີ່ດ່ານສາກົນແດນສະຫວັນລາວບາວຄັ້ງທີ 2 ຂຶ້ນ.
ເຂົ້າຮ່ວມໃນພິທີຄັ້ງນີ້, ຝ່າຍລາວນຳ ໂດຍທ່ານ ດຣ. ຄຳເຜີຍ ຜັນທະຈອນ ຮອງເຈົ້າແຂວງໆສະຫວັນະເຂດ ແລະ ຝ່າຍຫວຽດນາມນຳໂດຍທ່ານ ຫງວຽນ ຫວຶ ຢຸ່ງ ຮອງປະທານຄະນະກຳມະການປະຊາຊົນແຂວງກວາງຈິ, ນອກຈາກນີ້ ກໍມີພາກສ່ວນຕ່າງໆທີ່ກ່ຽວຂ້ອງທັງຂັ້ນແຂວງ ແລະ ເມືອງຂອງສອງແຂວງເຂົ້າຮ່ວມຢ່າງພ້ອມພຽງ.
ໂອກາດນີ້ ທັງສອງຝ່າຍໄດ້ຜັດປ່ຽນກັນຂຶ້ນລາຍງານ ກ່ຽວກັບຄວາມຄືບໜ້າໃນການຈັດຕັ້ງປະຕິບັດການກະກຽມ ວຽກງານກວດກາສິນຄ້າຜ່ານປະຕູດຽວ, ຈຸດດຽວຮ່ວມກັນຢູ່ທີ່ດ່ານສາກົນແດນສະຫວັນ-ລາວບາວ ໃນໄລຍະຜ່ານມາ ຊຶ່ງສອງຝ່າຍໄດ້ເປັນເອກະພາບກັນລາຍງານບາງເນື້ອໃນ ເພື່ອເລັ່ງຊຸກຍູ້ໃນການສ້າງເງື່ອນໄຂທີ່ຈຳເປັນແນໃສ່ຈັດຕັ້ງປະຕິບັດບັນດາຂັ້ນຕອນຮູບແບບກວດກາປະຕູດຽວ, ຄັ້ງດຽວໃຫ້ສຳເລັດກ່ອນວັນທີ 1 ມັງກອນ 2015.
ໃນກອງປະຊຸມຍັງໄດ້ປືກສາຫາລືຫຼາຍບັນຫາກ່ຽວກັບວຽກງານກວດກາປະຕູດຽວ, ຄັ້ງດຽວ ໂດຍໄດ້ຕົກລົງເຫັນດີຮັບຮອງເອົາບົດບັນທຶກກອງປະຊຸມໜ່ວຍສະເພາະກິດຂອງສອງປະເທດລາວ-ຫວຽດນາມ ທີ່ໄດ້ລົງນາມໃນວັນທີ 25 ມິຖຸນາ 2014 ທີ່ນະຄອນດົງຮ່າ ແຂວງກວາງຈິ ຊຶ່ງອຳນາດການປົກຄອງ ແຂວງສະຫວັນນະເຂດຕົກລົງເຫັນດີໃຫ້ພະແນກໄປສະນີໂທລະຄົມມະນາຄົມ ແລະ ການສື່ສານຮ່ວມກັບບໍລິສັດສະກາຍລາວ ເປັນຜູ້ຮັບຜິດຊອບໃນການຕິດຕັ້ງສາຍກາບໃຍແກ້ວ ເພື່ອສ້າງລະບົບການເຊື່ອມຕໍ່ອິນເຕິເນັດຂອງຂະແໜງຕຳຫຼວດກວດຄົນເຂົ້າເມືອງ, ຫົວໜ້າດ່ານສາກົນແດນສະຫວັນມີໜ້າທີ່ອຳນວຍຄວາມສະດວກໃຫ້ບັນດາຂະແໜງການທີ່ກ່ຽວຂ້ອງຂອງແຂວງກວາງຈິ ໃນການຂໍອະນຸຍາດເໜັ່ງສາຍກາບໃຍແກ້ວໄປຍັງອາຄານກວດກາຮ່ວມ (CCA) ໃຫ້ສຳເລັດກ່ອນວັນທີ 15 ພະຈິກ 2014, ສ່ວນລັດວິສາຫະກິດລາວ ໂທລະຄົມເປັນຜູ້ຮັບຜິດຊອບໃນການຕິດຕັ້ງຂອງຂະແໜງການອື່ນໆໃຫ້ສຳເລັດກ່ອນວັນທີ 1 ມັງກອນ 2015.
ຄະນະຊີ້ນຳທັງສອງແຂວງ ເຫັນດີເປັນເອກະພາບໃຫ້ຫ້ອງວ່າການປົກຄອງທັງແຂວງສະຫວັນະເຂດ ແລະ ແຂວງກວາງຈິ ເປັນຈຸດໃຈກາງໃນການປະສານງານການຜັນຂະຫຍາຍຮູບການກວດກາປະຕູດຽວ, ຄັ້ງດຽວ, ສ່ວນກອງບັນຊາການທະຫານຊາຍແດນແຂວງກວາງຈິຍິນດີຊ່ວຍເຫຼືອກະກຽມເຄື່ອງມືອຸປະກອນຮັບໃຊ້ ໃຫ້ແກ່ເຈົ້າໜ້າທີ່ ກວດກາຄົນເຂົ້າ-ອອກເມືອງແຂວງສະຫວັນນະເຂດທີ່ດ່ານສາກົນລາວບາວ, ເຈົ້າໜ້າທີ່ກວດກາຄົນເຂົ້າ-ອອກ ເມືອງແຂວງສະຫວັນນະເຂດມີໜ້າທີ່ຮັບຕິດຕັ້ງ ແລະ ນຳໃຊ້ ເພື່ອຮັບໃຊ້ວຽກງານກວດກາປະຕູດຽວ, ຄັ້ງດຽວໃຫ້ ສອດຄ່ອງ ແລະ ມີປະສິດທິຜົນ.
ນອກນັ້ນ ຄະນະຊີ້ນຳທັງສອງແຂວງຍັງເຫັນດີຈັດກອງປະຊຸມໜ່ວຍສະເພາະກິດລາວ-ຫວຽດນາມ ແລະ ກອງປະຊຸມລັດຖະມົນຕີຊ່ວຍວ່າການກະຊວງການຕ່າງປະເທດລາວ-ຫວຽດນາມ ໃນເດືອນທັນວາ 2014 ທີ່ແຂວງກວາງຈິ, ສສ ຫວຽດນາມ ເພື່ອກະກຽມໃຫ້ແກ່ການເປີດນຳໃຊ້ຢ່າງເປັນທາງການໃນເດືອນມັງກອນ 2015.
ທີ່ມາ: ໜັງສືພິມເສດຖະກິດ-ສັງຄົມ http://www.sedthakid.la/home/khao/20904.html
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.