ທ່ານ ພົນເອກ ຊັດໄຊ ສາລິກັນຍະ, ລັດຖະມົນຕີວ່າການກະຊວງພານິດ, ໄດ້ອະທິບາຍວ່າ ເນື່ອງຈາກຂ່າວນັກລົງທຶນຕ່າງປະເທດມີຄວາມກັງວົນກ່ຽວກັບການທົບທວນ ພະຣາຊະບັນຢັດການປະກອບທຸລະກິດຂອງຄົນຕ່າງປະເທດ ພ. ສ 2542, ແລະ ໄດ້ມີຕາງໜ້າສະຖານທູດ, ສະພາການຄ້າຕ່າງປະເທດ ລວມເຖິງນັກລົງທຶນຕ່າງປະເທດ ຂໍພົບປະກັບຜູ້ບໍລິຫານກະຊວງພານິດຢ່າງຕໍ່ເນື່ອງ ເພື່ອແຈ້ງຂໍ້ກັງວົນ ແລະ ຂໍຂໍ້ມູນຈາກກະຊວງພານິດ. ດັ່ງນັ້ນ, ກະຊວງພານິດ ຈຶ່ງໄດ້ຈັດກອງປະຊຸມຂຶ້ນ ເພື່ອເປັນການອະທິບາຍຂໍ້ມູນ ແລະ ເປີດໂອກາດໃນການຕັ້ງຄຳຖາມ ໃຫ້ຄວາມກະຈ່າງແຈ້ງ ແລະ ເຂົ້າໃຈຕໍ່ບັນຫາດັ່ງກ່າວ.
ທ່ານລັດຖະມົນຕີວ່າການກະຊວງພານິດໄທ ໄດ້ເນັ້ນວ່າການສືກສາທົບທວນ ພະຣາຊະບັນຢັດການປະກອບທຸລະກິດຂອງຄົນຕ່າງປະເທດ ຕ້ອງເປັນໄປຕາມນະໂຍບາຍຂອງລັດຖະບານດ້ານການລົງທຶນຈາກຕ່າງປະເທດ ຄື: 1) ການສົ່ງເສີມການລົງທຶນ; 2) ການຫຼຸດຂັ້ນຕອນໃນການເຮັດທຸລະກິດ; 3) ການອໍານວຍຄວາມສະດວກການຄ້າ ແລະ ການລົງທຶນ. ໃນປະຈຸບັນນີ້, ປະເທດໄທ ຢູ່ລະຫວ່າງຂະບວນການປະຕິຮູບ ເພື່ອເພີ່ມສັກກະຍະພາບໃນການແຂ່ງຂັນ, ສົ່ງເສີມການຄ້າ ແລະ ການລົງທຶນ ເຊິ່ງການປັບປຸງລະບຽບກົດໝາຍແມ່ນເປັນສ່ວນໜຶ່ງພາຍໃຕ້ຂະບວນການປະຕິຮູບ. ສໍາລັບພະຣາຊະບັນຢັດວ່າດ້ວຍການປະກອບທຸລະກິດຂອງຄົນຕ່າງປະເທດ ແມ່ນຢູ່ພາຍໃຕ້ຄວາມຮັບຜິດຊອບຂອງກະຊວງພານິດ ເຊິ່ງໄດ້ຖືກນໍາໄປສຶກສາຄົ້ນຄວ້າ ເພື່ອເຮັດໃຫ້ສອດຄ່ອງກັບການປະຕິບັດຂອງສາກົນ, ໂດຍບໍ່ໃຫ້ກະທົບຕໍ່ບັນຍາກາດການລົງທຶນ ເພື່ອໃຫ້ບັນຍາກາດການລົງທຶນເປັນໄປໃນທິດທາງທີ່ທຸກຄົນໄດ້ຮັບຜົນປະໂຫຍດຮ່ວມກັນ.
ໃນການສຶກສາ ການສົ່ງເສີມ ພະຣາຊະບັນຢັດການປະກອບທຸລະກິດຂອງຄົນຕ່າງປະເທດ ທີ່ຈະມີຜົນສະຫຼຸບໃນເດືອນທັນວານີ້ ຈະສະຫຼຸບຄວາມເຫັນວ່າມີຂໍ້ປະເດັນໃດ ທີ່ສອດຄ່ອງກັບນະໂຍບາຍການລົງທຶນຕ່າງປະເທດ ແລະ ສາມາດດຳເນີນການໄດ້ໃນຊຸດລັດຖະບານປະຈຸບັນ.
ແຫຼ່ງທີ່ມາ: ຂ່າວສານກະຊວງພານິດໄທ
| # | ຫົວຂໍ້ | ດາວໂຫຼດ |
|---|---|---|
| 1 | Ministry of Commerce of Thailand organized a briefing session on the review of the Foreign Business Act B. E. 2542 |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.