ທ່ານ ດຣ. ສຸພັນ ແກ້ວມີໄຊ, ເຈົ້າແຂວງ ແຂວງສະຫວັນນະເຂດ ກ່າວວ່າ: ການເປີດນຳໃຊ້ຮຸບແບບການກວດກາ ປະຕູດຽວ-ຄັ້ງດຽວ ຫຼື ຈຸດດຽວ ປ່ອງດຽວ ຢູ່ດ່ານສາກົນແຫ່ງນີ້ ໄດ້ທົດລອງເປີດນຳໃຊ້ ໃນວັນທີ 25 ທັນວາ 2014 ເປັນຕົ້ນມາ ໂດຍມີໜ່ວຍງານທີ່ກ່ຽວຂ້ອງໄດ້ບັນຈຸເຂົ້າໃນການຈັດຕັ້ງປະຕິບັດຢູ່ດ່ານແຫ່ງນີ້ ເປັນຕົ້ນແມ່ນເຈົ້າໜ້າທີ່ພາສີ, ອາກອນ, ຕຳຫຼວດກວດຄົນເຂົ້າເມືອງ, ສັດຕະວະແພດ, ກັກກັນພືດ ແລະ ວີຊ່າກັບດ່ານ ມາຢູ່ຈຸດດຽວກັນ ທັງດ່ານເບື້ອງລາວ ແລະ ຫວຽດນາມ. ການກວດກາຜ່ານປະຕູດຽວ-ຄັ້ງດຽວ ຈະເຮັດໃຫ້ການຈໍລະຈອນສິນຄ້າສະດວກຂຶ້ນ, ຍົກລະດັບຊີວິດການເປັນຢູ່ຂອງປະຊາຊົນທີ່ອາໄສຕາມສາຍທາງແລວເສດຖະກິດຕາເວັນອອກ-ຕາເວັນຕົກ ໂດຍສ້າງໂອກາດ ແລະ ສ້າງລາຍໄດ້ໃຫ້ແກ່ປະຊາຊົນໃນຂົງເຂດນີ້ ມີວຽກເຮັດງານທຳ ມີໂອກາດໃນການດຳເນີນທຸລະກິດ, ການບໍລິການ.
ການກວດກາຜ່ານປະຕຸູດຽວ-ຄັ້ງດຽວ ຈະເປັນການກວດກາການຂົນສົ່ງສິນຄ້າໃນຮູບແບບດຽວກັນ ລວມໄປເຖິງບັນດານິຕິກຳກ່ຽວກັບການຂົນສົ່ງໂດຍສະເພາະລົດບັນທຸກທີ່ແລ່ນຜ່ານສາຍທາງເລກ 9 ເຊິ່ງເປັນເສັ້ນທາງແລວເສດຖະກິດຕາເວັນອອກ-ຕາເວັນຕົກ, ແລະ ສັນຍາວ່າດ້ວຍການຂົນສົ່ງຜ່ານແດນທີ່ໄດ້ລົງນາມຮ່ວມກັນແລ້ວນັ້ນ ຈະນຳໄປສູ່ການສົ່ງເສີມ ການຂົນສົ່ງສິນຄ້າ, ການລົງທຶນ ແລະ ການບໍລິການໃຫ້ເພິ່ມສູງຂຶ້ນ.
ແນວໃດກໍຕາມ ການເປີດກວດກາປະຕູດຽວ-ຄັ້ງດຽວ ຍັງມີຄວາມທ້າທາຍບໍ່ໜ້ອຍ ເນື່ອງຈາກລະບຽບກົດໝາຍຂອງລາວ ແລະ ຫວຽດນາມ ຍັງມີຄວາມແຕກຕ່າງຫຼາຍດ້ານ ໃນການປະຕິບັດບັນດາຂໍ້ຕົກລົງກ່ຽວກັບການຂົນສົ່ງຜ່ານແດນລະຫວ່າງປະເທດ. ລະດັບການພັດທະນາພື້ນຖານໂຄງລ່າງ ແລະ ຄວາມພ້ອມທັງດ້ານຊັບພະຍາກອນມະນຸດສຳລັບຮອງຮັບການພັດທະນາການຂົນສົ່ງຍັງແຕກໂຕນກັນ.
ທ່ານ ຫງວຽນຊວນຟຸກ ກ່າວວ່າ: ການເປີດນຳໃຊ້ບໍລິການປະຕູດຽວ-ປ່ອງດຽວໃນດ່ານແຫ່ງນີ້ ເປັນການຮ່ວມມືຂອງສອງລັດຖະບານ ລາວ-ຫວຽດນາມ ເພື່ອອຳນວຍຄວາມສະດວກໃນການຂົນສົ່ງສິນຄ້າຕາມແລວເສດຖະກິດຕາເວັນອອກ-ຕາເວັນຕົກ ອອກສູ່ 4 ປະເທດ ເຊິ່ງມີເສັ້ນທາງຍາວກວ່າ 1,500 ກິໂລແມັດ ຈະເປັນການປະກອບສ່ວນເຮັດໃຫ້ເສດຖະກິດເສດຖະກິດຂອງສອງປະເທດດີຂຶ້ນ.
ໃນໂອກາດດັ່ງກ່າວ ທ່ານ ສົມສະຫວາດ ເລັ່ງສະຫວັດ ໄດ້ກ່າວວ່າ: ການກວດກາປະຕູດຽວ-ຄັ້ງດຽວ ເປັນນິມິດໝາຍທີ່ດີ, ຮຽກຮ້ອງໃຫ້ເອົາໃຈໃສ່ໂຄສະນາ ໂດຍໃຫ້ສື່ມວນຊົນ ແລະ ສື່ໂຄສະນາຕ່າງໆເພື່ອໃຫ້ປະຊາຊົນ ແລະ ຜູ້ປະກອບການ ຕະຫຼອດຮອດນັກທ່ອງທ່ຽວໄດ້ຮັບຮູ້ເຂົ້າໃຈຢ່າງເລິກເຊິ່ງ. ພ້ອມນັ້ນ, ທ່ານຍັງໄດ້ຮຽກຮ້ອງໃຫ້ທັງສອງຝ່າຍຈົ່ງປະຕິບັດໜ້າທີ່ດ້ວຍຄວາມຮັບຜິດຊອບສູງ, ເອົາໃຈໃສ່ອຳນວຍຄວາມສະດວກໃນການຂົນສົ່ງ, ຕະຫຼອດຮອດນັກທ່ອງທ່ຽວຜູ້ຜ່ານດ່ານແຫ່ງນີ້ໃຫ້ດີເພື່ອເປັນຕົວແບບໃນການເປີດບໍລິການດ່ານສາກົນອື່ນໆ ລະຫວ່າງລາວ ແລະ ຫວຽດນາມ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.