ກົມພາສີ, ກະຊວງການເງິນແຫ່ງ ສປປ ລາວ ຈັດຕັ້ງປະຕິບັດໂຄງການອໍານວຍຄວາມສະດວກທາງດ້ານພາສິ ແລະ ການຄ້າ (CTFP) ນັບແຕ່ເດືອນຕຸລາ 2008 ພາຍໃຕ້ການສະໜັບສະໜຸນທາງດ້ານການເງິນຂອງສະມາຄົມພັດທະນາສາກົນ (IDA). ໂຄງການນີ້ມີຈຸດປະສົງເພື່ອປັບປຸງຄວາມອາດສາມາດ ແລະ ປະສິດທິພາບຂອງການຄຸ້ມຄອງວຽກງານພາສີ ແລະ ຫຼຸດຜ່ອນຂັ້ນຕອນທາງດ້ານພາສີ. ບົດລາຍງານຄວາມຄືບໜ້າຂອງທະນາຄານໂລກກ່ຽວກັບ CTFP ໄດ້ສະແດງໃຫ້ເຫັນວ່າມາເຖິງເດືອນສິງຫາ 2015, ລະບົບແຈ້ງພາສີອັດຕະໂນມັດໄດ້ຖືກນໍາໃຊ້ຢູ່ 21 ດ່ານ, ກວມເອົາ 99 ສ່ວນຮ້ອຍຂອງການຄ້າທັງໝົດຢູ່ ສປປ ລາວ. ນອກຈາກນີ້, ກໍ່ຍັງມີ 8 ດ່ານທີ່ໄດ້ຕິດຕັ້ງລະບົບການຈ່າຍພາສີແບບອັດຕະໂນມັດ (SmartTax) ເຊິ່ງເຊື່ອມຕໍ່ລະບົບແຈ້ງພາສີອັດຕະໂນມັດ ກັບ ທະນາຄານ ເພື່ອປັບປຸງລະບົບການຈ່າຍພາສີ ແລະ ອາກອນ ແລະ ຍັງເຊື່ອມຕໍ່ລະບົບແຈ້ງພາສີອັດຕະໂນມັດ ກັບລະບົບຂໍ້ມູນການຄຸ້ມຄອງທາງດ້ານການເງິນຂອງລັດຖະບານຢ່າງທັນສະພາບການ. ລະບົບອັດຕະໂນມັດນີ້ ໄດ້ກໍາຈັດຂັ້ນຕອນທີ່ໃຊ້ເວລາດົນ ແລະ ບໍ່ມີປະສິດທິພາບ ຈາກການເຮັດບົດລາຍງານກ່ຽວກັບລາຍຮັບປະຈໍາວັນດ້ວຍລະບົບເຈ້ຍສໍຢູ່ບັນດາດ່ານ.
ດາວໂຫຼດ: ການຈັດຕັ້ງປະຕິບັດໂຄງການອໍານວຍຄວາມສະດວກດ້ານພາສີ ແລະ ການຄ້າ ໃນ ສປປ ລາວ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.