ກອງປະຊຸມໄດ້ນຳສະເໜີບັນດາເນື້ອໃນທີ່ສຳຄັນ ຄື: 1. ສະຫຼຸບວຽກງານທີ່ໄດ້ຈັດຕັ້ງປະຕິບັດໃນໜຶ່ງປີຜ່ານມາ (ສົກປີ 2014-2015) ວ່າ ກ່ຽວກັບຜົນສໍາເລັດ ແລະ ມີຈຸດດີ-ຈຸດອ່ອນຄືແນວໃດ; 2. ລາຍງານຄືນກ່ຽວກັບການສັງລວມມາດຕະການ ແລະ ການປະເມີນຂໍ້ມູນໃນເບື້ອງຕົ້ນ; 3. ປຶກສາຫາລືວ່າ ຈະຄັດເລືອກເອົາມາດຕະການໃດເພື່ອເປັນຕົວຢ່າງໃນການທົບທວນ; 4. ເປັນການນຳສະເໜີແຜນວຽກຂອງສົກປີຕໍ່ໄປ (ສົກປີ 2015-2016).
ໃນໄລຍະຜ່ານມາ, ກຂອ ໃນນາມຜູ້ຮັບຜິດຊອບຫຼັກວຽກງານທົບທວນມາດຕະການ NTMs ໄດ້ຈັດຝຶກອົບຮົມ ແລະ ເຜີຍແຜ່ກ່ຽວກັບມາດຕະການດ້ານການຄ້າທີ່ບໍ່ແມ່ນພາສີ (NTM) ແລະ ວຽກງານທົບທວນມາດຕະການ NTMs ໃຫ້ແກ່ບັນດາຂະແໜງການກ່ຽວຂ້ອງໃນຂັ້ນສູນກາງມາແລ້ວຫຼາຍຄັ້ງ ເພື່ອສ້າງຄວາມຮັບຮູ້ ແລະ ເຂົ້າໃຈ ກ່ຽວກັບຄວາມສຳຄັນຂອງວຽກງານດັ່ງກ່າວ.
ຕະຫຼອດໄລຍະການຈັດຕັ້ງປະຕິບັດວຽກໃນໄລຍະ 1 ປີຜ່ານມາ, ກົມ ຂອ ໄດ້ສົມທົບກັບຂະແໜງການກ່ຽວຂ້ອງໃນການ ສັງລວມບັນດາມາດຕະການ NTMs ແລະ ໄດ້ຈັດປະເພດຂອງບັນດາມາດຕະການດັ່ງກ່າວ ຕາມມາດຕະຖານຂອງສາກົນທີ່ຖືກຮັບຮູ້ ແລະ ນຳໃຊ້ຫຼາຍໃນທົ່ວໂລກ (UNCTAD) ຊຶ່ງມາຮອດປະຈຸບັນທີມງານ NTM ໄດ້ລະບຸ ແລະ ຈັດປະເພດມາດຕະການດັ່ງກ່າວໄປແລ້ວ 238 ມາດຕະການ ແລະ ໄດ້ຮັບການເຫັນດີໃຫ້ເຜີຍແຜ່ລົງໃນເວັບໄຊທ໌ Lao Trade Portal.
ສໍາລັບແຜນວຽກຂອງສົກປີ 2015-2016 ຂອງກິດຈະກຳ NTM ແມ່ນການກຳນົດໜ້າວຽກບູລິມະສິດທີ່ຈະເອົາເຂົ້າ ເປັນແຜນທົດລອງປັບປຸງ ແລະ ຫຼຸດຜ່ອນຂັ້ນຂອດຕ່າງໆ ແລະ ຮ່ວມເຮັດວຽກກັບຂະແໜງການພາກລັດ, ທຸລະກິດ ໃນຂອບເຂດທົ່ວປະເທດ ເພື່ອເຜີຍແຜ່ກ່ຽວກັບມາດຕະການ NTMs, ຄວາມຈຳເປັນ ແລະ ເຫດຜົນທີ່ຕ້ອງໄດ້ມີການປັບປຸງໃຫ້ມີຄວາມງ່າຍດາຍຂຶ້ນ ແລະ ຮັບປະກັນຄວາມສອດຄ່ອງກັບລະບຽບການຂອງສາກົນ ຕາມພັນທະສັນຍາຂອງ ສປປ ລາວ ທີ່ມີຕໍ່ອົງການການຄ້າໂລກ ກໍ່ຄືອາຊຽນ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.