ທ່ານ ດຣ. ບຸນເຖິງ ເພັງທະວົງສາ ຫົວໜ້າຫ້ອງການກະຊວງພະລັງງານ ແລະ ບໍ່ແຮ່ ເປີດເຜີຍວ່າ: ການປະຕິບັດແຜນຍຸດທະສາດ 5 ປີ 2011-2015 ສະເພາະຂົງເຂດບໍ່ແຮ່ ລວມຍອດມູນຄ່າການຜະລິດບັນລຸ 66.746 ຕື້ກີບ, ສະເລ່ຍເພີ່ມຂຶ້ນໃນລະດັບ 6,97% ຕໍ່ປີ, ທຽບໃສ່ແຜນການ 5 ປີ ຄັ້ງທີ VI ເພີ່ມຂຶ້ນ 184,18%.
ໃນ 5 ປີຜ່ານມາ(2011-2015)ການສົ່ງອອກແຮ່ທາດ ບັນລຸ 8.459 ລ້ານໂດລາສະຫະລັດ ຈາກ 2.561 ລ້ານໂດລາສະຫະລັດຂອງສົກປີ2006-2010, ເຊິ່ງມູນຄ່າການສົ່ງອອກກວມ ປະມານ 60% ຂອງຍອດການສົ່ງອອກທົ່ວປະເທດ. ໃນນັ້ນ, ສິ່ງທີ່ພົນເດັ່ນໃນຂົງເຂດການຄຸດຄົ້ນບໍ່ແຮ່ທີ່ມີການຂະຫຍາຍຕົວໄວວາແມ່ນ: ໂຄງການຄຳ-ທອງ ເຊໂປນ ແຂວງສະຫວັນນະເຂດ, ໂຄງການຄຳ-ທອງ ພູເບ້ຍ ແຂວງໄຊສົມບູນ, ການຂຸດຄົ້ນຖ່ານຫີນລິກໄນ ຮັບໃຊ້ການຜະລິດພະລັງງານໄຟຟ້າຄວາມຮ້ອນ ແຂວງໄຊຍະບູລີ, ເກືອໂປຕາດ ແລະ ການຂຸດຄົ້ນແຮ່ທາດອື່ນໆ.
ພ້ອມນັ້ນ, ດຣ. ບຸນເຖິງ ເພັງທະວົງສາ ຍັງໄດ້ກ່າວຕື່ມວ່າ ມາຮອດປະຈຸບັນສາມາດຜະລິດ ທອງຝຸ່ນ ຈຳນວນ 1.536.692 ໂຕນ, ທອງແຜ່ນ ຜະລິດໄດ້ 420.914 ໂຕນ, ໂລຫະຄຳປະສົມ ຜະລິດໄດ້ 79.534 ກິໂລ, ຫີນກາວ 2.961.317 ໂຕນ, ຖ່ານຫີນ 1.500.725 ໂຕນ. ການເພີ່ມຂຶ້ນຂອງການສົ່ງອອກຜະລິດຕະພັນແຮ່ທາດໄດ້ນຳເອົາທຶນຮອນເຂົ້າງົບປະມານແຫ່ງຊາດ, ຂັບເຄື່ອນການເຕີບໂຕເສດຖະກິດຂອງຊາດ, ເຮັດໃຫ້ຄ່າເງິນກີບໝັ້ນຄົງ ແລະ ຊຸກຍູ້ການຂະຕົວຂອງຂະແໜງການອື່ນອີກດ້ວຍ.
ແຫຼ່ງທີ່ມາ: ໜັງສືພິມເສດຖະກິດ-ການຄ້າ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.