ທ່ານ ສຽວສະຫວາດ ສະແຫວງສຶກສາ ກ່າວໃນທີ່ປະຊຸມວ່າ: “ວຽກງານອຳນວຍຄວາມສະດວກທາງດ້ານການຄ້າ ເປັນວຽກງານໜຶ່ງ ທີ່ລັດຖະບານໃຫ້ຄວາມສຳຄັນ ແລະ ໄລຍະຜ່ານມາ ກອງເລຂາອຳນວຍຄວາມສະດວກທາງດ້ານການຄ້າ (ກຂອຄ) ໄດ້ເຮັດສໍາເລັດຫຼາຍວຽກງານເພື່ອບັນລຸຄາດໝາຍຍຸດທະສາດອຳນວຍຄວາມສະດວກທາງດ້ານການຄ້າ ເຊິ່ງໜຶ່ງໃນສິ່ງທ້າທາຍນັ້ນກໍແມ່ນ ການຈັດລຳດັບສາລະບານວຽກງານການຂົນສົ່ງ (Logistic Performance Index) ຂອງອົງການການຄ້າໂລກ ຊຶ່ງ ສປປ ລາວ ຈັດຢູ່ໃນລຳດັບ ທີ 131 ຈາກ 160 ປະເທດ ໃນປີ 2014, ເພີ່ມຂີື້ນຈາກລໍາດັບທີ 109 ຈາກ 155 ປະເທດ ໃນປີ 2012”
ກຂອຄ ໄດ້ຕິດຕາມບັນຫາຫຍຸ້ງຍາກຂອງພາກທຸລະກິດ ທີ່ຕິດພັນກັບການອຳນວຍຄວາມສະດວກທາງດ້ານການຄ້າ ຢ່າງໃກ້ຊິດ ແລະ ຕໍ່ເນື່ອງ ແລະ ໃນໄລຍະຜ່ານມາກໍ່ມີຫຼາຍໆບັນຫາທີ່ສະເໜີມາໃຫ້ພາກລັດພິຈາລະນາແກ້ໄຂປັບປຸງ. ໃນຕົ້ນປີ 2015 ກອຄ ກໍ່ໄດ້ຮັບການລາຍງານສະພາບຄວາມຫຍຸ້ງຍາກຂອງພາກທຸລະກິດນຳເຂົ້າ - ສົ່ງອອກ ຢູ່ແຂວງພາກເໜືອຄື ແຂວງ ຫຼວງພະບາງ, ໄຊຍະບູລີ, ຫຼວງນໍ້າທາ, ອຸດົມໄຊ, ຜົ້ງສາລີ ແລະ ບໍ່ແກ້ວ ເນື່ອງຈາກມີການໃຫສໍາປະທານແກ່ບໍລິສັດ ດຳເນີນການໃຫ້ບໍລິການ ດ້ານເອກະສານສົ່ງອອກສິນຄ້າກະສິກຳ ບາງປະເພດ ເຊັ່ນ: ໝາກໂມ, ໝາກກ້ວຍ, ໝາກສາລີ, ແລະ ໝາກເດືອຍ ໄປ ສປ ຈີນ.
ພາຍຫຼັງທີ່ໄດ້ຮັບການສະເໜີບັນຫາ ດັ່ງກ່າວ, ກຂອຄ ກໍ່ໄດ້ມີການຕິດຕາມເກັບກຳຂໍ້ມູນ ແລະ ວິເຄາະຜົນໄດ້ ຜົນເສຍ ອອກມາຢ່າງເປັນຫຼັກການ ແລະ ໄດ້ຈັດກອງປະຊຸມນີ້ຂື້ນ ເພື່ອເປັນການ (1) ລາຍງານສະພາບລວມຂອງບັນຫາການບໍລິການເອກະສານການສົ່ງອອກກະສິກໍາຢູ່ແຂວງພາກເໜືອ; (2) ຮັບຟັງສະພາບການຈັດຕັ້ງປະຕິບັດ ການສົ່ງອອກໃນໄລຍະຜ່ານມາ ຢູ່ແຂວງພາກເໜືອ; (3) ປຶກສາຫາລື ເພື່ອຫາທາງອອກຕໍ່ກັບບັນຫາທີ່ປະກົດຂຶ້ນໃນປະຈຸບັນ ຕໍ່ກັບ ຜົນກະທົບ ການບໍລິການເອກະສານການສົ່ງອອກສິນຄ້າກະສິກໍາບາງປະເພດ ໄປ ສປ ຈີນ ຢູ່ແຂວງພາກເໜືອ.
ກອງປະຊຸມໄດ້ຮັບຟັງລາຍງານສະພາບຂໍ້ສະດວກ-ຂໍ້ຫຍຸ້ງຍາກ ຈາກການບໍລິການເອກະສານການສົ່ງອອກສິນຄ້າກະສິກໍາ ຂອງບັນດາແຂວງພາກເໜືອ, ມີການຈັດກຸ່ມປຶກສາຫາລື ເພື່ອລະດົມແນວຄວາມຄິດ ໃນການສະເໜີແນະວິທີທາງແກ້ໄຂບັນຫາໂດຍແບ່ງອອກເປັນ 2 ກຸ່ມຄື ພາກລັດ ແລະ ພາກທຸລະກິດ ເຊິ່ງກໍໄດ້ຮັບຄວາມຮ່ວມມືເປັນຢ່າງດີ. ຫຼັງຈາກນັ້ນ ແມ່ນຈະໄດ້ຮວບຮວມຂໍ້ມູນໂດຍການປຶກສາຫາລືກັບພະແນກອຸດສາຫະກໍາ ແລະ ການຄ້າ ແຂວງ, ສະພາການຄ້າ, ເຈົ້າໜ້າທີ່ປະຈໍາດ່ານ ແລະ ຂໍ້ມູນຕົວຈິງທີ່ເກັບກຳໄດ້ຈາກບໍລິສັດ ມາເຮັດການປະມວນຜົນ ເພື່ອສັງລວມຜົນກະທົບຂອງການບໍລິການເອກະສານດັ່ງກ່າວ ແລ້ວສະເໜີລາຍງານຜົນການວິເຄາະ ແລະ ວິທີແກ້ໄຂ ເປັນລໍາດັບຕໍ່ໄປ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.