ກອງປະຊຸມລັດຖະມົນຕີ ອົງການການຄ້າໂລກ ແມ່ນກອງປະຊຸມທີ່ມີອໍານາດການຕັດສິນໃຈສູງສຸດຂອງອົງການການຄ້າໂລກ ເຊິ່ງຈັດຂື້ນທຸກໆ 2 ປີ. ກອງປະຊຸມດັ່ງກ່າວນີີ້ແມ່ນມີອໍານາດຕັດສິນໃຈກ່ຽວກັບທຸກບັນຫາພາຍໃຕ້ຂອບການຄ້າຫຼາຍຝ່າຍ. ສໍາລັບ ກອງປະຊຸມລັດຖະມົນຕີ ອົງການການຄ້າໂລກ ສະໄໝສາມັນຄັ້ງທີ 10 ນີ້ ໄດ້ມີການປຶກສາຫາລືກັນໃນຫຼາຍຫົວຂໍ້ຄື: ຖະແຫຼງການຂອງຜູ້ອໍານວຍການອົງການຄ້າໂລກຕໍ່ສື່ມວນຊົນ; ກະສິກໍາ; ການນໍາເຂົ້າ; ການຕ້ານການທຸ້ມຕະຫຼາດ, ມາດຕະການປົກປ້ອງ, ມາດຕະການອຸດໜູນ; ຝ້າຍ; ການແກ້ໄຂຂໍ້ຂັດແຍ່ງ; ອີ-ຄອມເມີສ; ສະພາບແວດລ້ອມ; ສັນຍາການຈັດຊື້ຂອງລັດຖະບານ; ສັນຍາຂໍ້ມູນຂ່າວສານ-ເທັກໂນໂລຊີ; ຊັບສິນທາງປັນຍາ; ບັນດາປະເທດດ້ອຍພັດທະນາ; ການເຂົ້າສູ່ຕະຫຼາດຂອງສິນຄ້າທີ່ບໍ່ແມ່ນກະສິກໍາ; ສັນຍາການຄ້າພາກພື້ນ; ການບໍລິການ; ແລະ ການອໍານວຍຄວາມສະດວກທາງດ້ານການຄ້າ.
ໃນກອງປະຊຸມຄັ້ງນີ້ ທ່ານ ນາງ ເຂັມມະນີ ພົນເສນາ, ລັດຖະມົນຕີວ່າການ ກະຊວງອຸດສາຫະກຳ ແລະ ການຄ້າ ຂອງ ສປປ ລາວ ໄດ້ລາຍງານຄວາມຄືບໜ້າ, ຜົນສຳເລັດ, ຜົນປະໂຫຍດ ແລະ ຂໍ້ຄົງຄ້າງ ຂອງ ສປປ ລາວ ໃນການຈັດຕັ້ງປະຕິບັດພັນທະຕ່າງໆທີ່ມີຕໍ່ກັບອົງການການຄ້າໂລກ ນັບແຕ່ ສປປ ລາວ ໄດ້ໃຫ້ສັດຕະຍາບັນເຂົ້າເປັນສະມາຊິກຂອງອົງການການຄ້າໂລກຢ່າງເປັນທາງການໃນປີ 2013. ສປປ ລາວ ໄດ້ໃຫ້ສັດຕະຍາບັນແກ່ສັນຍາອໍານວຍຄວາມສະດວກດ້ານການຄ້າໃນເດືອນກັນຍາ 2015 ທີ່ຜ່ານມາ, ສັນຍາດັ່ງກ່າວ ກວມເອົາ 38 ມາດຕະການກ່ຽວກັບການຄ້າ. ຄາດວ່າ ສປປ ລາວ ຈະສາມາດດຶງດູດການຊ່ວຍເຫຼືອຈາກສະມາຊິກອົງການການຄ້າໂລກທີ່ພັດທະນາແລ້ວ ຕື່ມໃນການຝຶກອົບຮົມວິຊາການ, ປັບປຸງບາງຂໍ້ທີ່ຍັງຄົງຄ້າງ, ຊຸກຍູ້ຫົວໜ່ວຍທຸລະກິດ ແລະ ອື່ນໆ.
ກອງປະຊຸມຄັ້ງນີ້ ປະເທດສະມາຊິກອົງການການຄ້າໂລກຈໍານວນ 23 ປະເທດ ໄດ້ບັນລຸຂໍ້ຕົກລົງກ່ຽວກັບການຍົກເລີກພາສີນໍາເຂົ້າຜະລິດຕະພັນເຕັກໂນໂລຊີການສື່ສານ ຈໍານວນຫຼາຍກວ່າ 200 ລາຍການເປັນ 0% ໃນຈໍານວນ 65% ຂອງສິນຄ້າທັງໝົດແມ່ນມີຜົນທັນທີຕັ້ງແຕ່ວັນທີ 1 ກໍລະກົດ 2016 ແລະ ທີ່ເຫຼືອຄ່ອຍປັບຫຼຸດເປັນ 0% ພາຍໃນ 5 ປີ. ການຫຼຸດອັດຕາພາສີດັ່ງກ່າວນີ້ຈະຊຸກຍູ້ໃຫ້ມູນຄ່າການຄ້າເພີ່ມຂື້ນເຖິງ 1.3 ຕື້ໂດຣາຕໍ່ປີ ຫຼື ປະມານ 7% ຂອງອັດຕາການຄ້າທັງໝົດທົ່ວໂລກ ເຊິ່ງຈະສ້າງໂອກາດໃຫ້ແກ່ບັນດາສະມາຊິກອົງການການຄ້າໂລກ ແລະ ຈະຊ່ວຍເລັ່ງການຂະຫຍາຍຕົວຂອງການຄ້າດ້ານເທັກໂນໂລຊີ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.