ກະຊວງ ໂຍທາທິການ ແລະ ຂົນສົ່ງ (ກະຊວງ ຍທຂ) ໄດ້ເປີດເຜີຍເຖິງແຜນນະໂຍບາຍບໍລິການທາງຜ່ານດ້ານຄົມມະນາຄົມ-ຂົນສົ່ງຂອງລາວ ເຊື່ອມຕໍ່ກັບນາໆປະເທດໃນໂລກເພື່ອ ສ້າງ ສປປ ລາວ ຈາກປະເທດທີ່ບໍ່ມີຊາຍແດນຕິດກັບທະເລ ໃຫ້ກາຍເປັນປະເທດບໍລິການທາງຜ່ານດ້ານຄົມມະນາຄົມ-ຂົນສົ່ງ. ໂດຍໃນໄລຍະຜ່ານມາ ລັດໄດ້ສຸມທຶນຮອນຢ່າງມະຫາສານເຂົ້າໃນການພັດທະນາພື້ນຖານໂຄ່ງລ່າງໄປພ້ອມໆກັບການສ້າງນິຕິກຳດ້ວຍການລົງນາມໃນສັນຍາຂົນສົ່ງສອງຝ່າຍ ແລະ ຫຼາຍຝ່າຍກັບເກືອບໝົດທຸກປະເທດໃກ້ຄຽງ. ປະຈຸບັນ, ລັດໄດ້ກຳນົດເອົາ 9 ຈຸດທົ່ວປະເທດເປັນເຂດໂລຈິສຕິກສາກົນ ເພື່ອເປັນບ່ອນເຕົ້າໂຮມ ແລະ ແຈກຢາຍສິນຄ້າ ພາໃຫ້ເກີດມີການຂົນສົ່ງທີ່ມີລາຄາຖືກລົງ, ຜູ່ຊື້ໄດ້ຮັບສິນຄ້າຖືກຕ້ອງຕາມກຳນົດເວລາ, ສ້າງຄວາມເຂັ້ມແຂງໃຫ້ກຳລັງການຂົນສົ່ງຂອງລາວສາມາດແຂ່ງຂັນກັບສາກົນໄດ້ໃນຕໍ່ໜ້າ.
ທ່ານ ວຽງສະຫວັດ ສີພັນດອນ, ຫົວໜ້າກົມຂົນສົ່ງ, ກະຊວງ ຍທຂ ກ່າວໃນພິທີເປີດເຂດໂລຈິສຕິກ ທີ່ແຂວງສະຫວັນນະເຂດວ່າ: ໂດຍເຫັນໄດ້ຄວາມສຳຄັນທາງດ້ານທີ່ຕັ້ງຍຸດທະສາດຂອງປະເທດ, ພັກ ແລະ ລັດ ໄດ້ວາງຍຸດທະສາດຫັນເອົາ ສປປ ລາວ ທີ່ບໍ່ມີຊາຍແດນຕິດກັບທະເລໃຫ້ກາຍເປັນປະເທດບໍລິການທາງຜ່ານດ້ານຄົມມະນາຄົມຂົນສົ່ງ (Transit Services) ຫຼື ກາຍເປັນສູນກາງການບໍລິການພະລາທິການຂົນສົ່ງ (Logistics Hub) ຂອງພາກພື້ນ. ສະນັ້ນ, ລັດຖະບານຈຶ່ງໄດ້ໃຊ້ງົບປະມານຈຳນວນມະຫາສານເຂົ້າໃນການພັດທະນາ ແລະປັບປຸງໂຄງລ່າງຄົມມະນາຄົມ-ຂົນສົ່ງ ເພື່ອເຊື່ອມຈອດກັບບັນດາປະເທດອ້ອມຂ້າງ.
ນອກນີ້, ທາງດ້ານນິຕິກຳແມ່ນໄດ້ລົງນາມໃນສັນຍາຂົນສົ່ງກັບເກືອບທຸກປະເທດໃກ້ຄຽງ ເປັນຕົ້ນລາວ-ກຳປູເຈຍ, ລາວ-ຈີນ, ລາວ-ຫວຽດນາມ ແລະ ລາວ-ໄທ ຍົກເວັ້ນລາວ-ມຽນມາ ແມ່ນກຳລັງກະກຽມເຈລະຈາ. ພ້ອມດຽວກັນນັ້ນ ຍັງມີສັນຍາຂົນສົ່ງໃນຂອບການຮ່ວມມືຫຼາຍຝ່າຍເຊັ່ນ: ສາມຝ່າຍລາວ-ຫວຽດນາມ-ໄທ, ລາວ-ຫວຽດນາມ-ກຳປູເຈຍ, ອະນຸພາກພື້ນແມ່ນ້ຳຂອງ (GMS CBTA) ແລະ ອາຊຽນ (ASEAN Framework Agreement). ໃນພາກປະຕິບັດຕົວຈິງ ມີພຽງແຕ່ສັນຍາຂົນສົ່ງສອງຝ່າຍໄດ້ຖືກຈັດຕັ້ງປະຕິບັດຢ່າງເປັນທາງການ ໂດຍສ່ວນໃຫຍ່ແມ່ນນຳໃຊ້ພາຫະນະຂົນສົ່ງຂອງປະເທດໃກ້ຄຽງເພື່ອດຳເນີນການຂົນສົ່ງສິນຄ້າ, ສ່ວນພາຫະນະຂົນສົ່ງຂອງລາວເອງຍັງບໍ່ທັນມີຄວາມອາດສາມາດພຽງພໍໃນການຂົນສົ່ງໄລຍະໄກເພື່ອໃຫ້ໄປຮອດທ່າເຮືອຂອງປະເທດໃກ້ຄຽງໄດ້.
ຢ່າງໃດກໍຕາມ ການພັດທະນາ ແລະ ປັບປຸງໂຄງລ່າງພື້ນຖານໃນໄລຍະຜ່ານມາເປັນຕົ້ນແມ່ນເສັ້ນທາງ, ຂົວ, ສະໜາມບິນ, ທ່າເຮືອ ແລະ ອື່ນໆ ໂດຍສາມາດອຳນວຍຄວາມສະດວກໃຫ້ແກ່ການຂົນສົ່ງໄປມາຫາສູ່ ແລະ ການຄ້າໄດ້ໃນລະດັບໃດໜຶ່ງເທົ່ານັ້ນ ຊຶ່ງ ຍັງບໍ່ທັນຕອບສະໜອງ ແລະ ຮັບໃຊ້ນະໂຍບາຍໃນການຫັນ ສປປ ລາວ ຈາກປະເທດທີ່ບໍ່ມີຊາຍແດນຕິດກັບທະເລໃຫ້ກາຍເປັນປະເທດບໍລິການທາງຜ່ານດ້ານຄົມມະນາຄົມ-ຂົນສົ່ງໄດ້ຢ່າງສົມບູນເທື່ອ. ເພາະວ່າຖ້າຫາກເຮົາມີແຕ່ໂຄງລ່າງທີ່ບໍ່ມີການບໍລິການທາງດ້ານໂລຈິສຕິກ, ປະເທດໃກ້ຄຽງໃນພາກພື້ນຈະຜ່ານຂ້າມໄປມາປະເທດເຮົາລ້າໆ ຊຶ່ງຈະບໍ່ໄດ້ຮັບຜົນປະໂຫຍດຫຍັງຫຼາຍ ແລະ ຍັງສ້າງພາລະອັນໜັກໜ່ວງໃນການບູລະນະສ້ອມແປງບັນດາໂຄງລ່າງຄົມມະນາຄົມ-ຂົນສົ່ງເຫຼົ່ານີ້ອີກດ້ວຍ.
ຕໍ່ກັບສະພາບຄືແນວນັ້ນທ່ານຫົວໜ້າກົມຂົນສົ່ງເປີດເຜີຍໃຫ້ຮູ້ຕື່ມວ່າ ກະຊວງ ຍທຂ ຈຶ່ງໄດ້ຮ່າງຍຸດທະສາດການພັດທະນາໂລຈິສຕິກການຂົນສົ່ງສິນຄ້າ ແລະ ໄດ້ຖືກຮັບຮອງຈາກລັດຖະບານໃນປີ 2015 ພ້ອມທັງໄດ້ເຂົ້າເປັນພາຄີສົນທິສັນຍາສະຫະປະຊາຊາດວ່າດ້ວຍທ່າບົກ (Dry Port) ຊຶ່ງ ສປປ ລາວ ໄດ້ກຳນົດເອົາ 9 ຈຸດທີ່ເປັນເຂດໂລຈິສຕິກສາກົນຄື: 1. ຫ້ວຍຊາຍ ແຂວງບໍ່ແກ້ວ, 2. ນາເຕີຍ ແຂວງຫຼວງນໍ້າທາ, 3. ເມືອງໄຊ ແຂວງອຸດົມໄຊ, 4. ແຂວງຫຼວງພະບາງ, 5. ທ່ານາແລ້ງ ນະຄອນຫຼວງວຽງຈັນ, 6. ຫຼັກຊາວ ແຂວງບໍລິຄຳໄຊ, 7. ທ່າແຂກ ແຂວງຄຳມ່ວນ, 8. ເຊໂນ ແຂວງສະຫວັນນະເຂດ ແລະ 9. ວັງເຕົ່າ ແຂວງຈຳປາສັກ. ໃນຈຳນວນທັງໝົດ 9 ຈຸດນັ້ນມີພຽງ 2 ຈຸດທີ່ພວມຈັດຕັ້ງປະຕິບັດຄື ທ່ານາແລ້ງກຳລັງເຈລະຈາຮ່ວມທຶນກັບຍີ່ປຸ່ນດ້ວຍກົນໄກ PPP ແລະ ສະຫວັນນະເຂດທີ່ເປີດບໍລິການແລ້ວ.
ໂດຍການຈັດຕັ້ງປະຕິບັດການບໍລິການເຂດໂລຈິສຕິກ ທ່ານ ວຽງສະຫວັດ ສີພັນດອນ ຢ້ຳວ່າ ມັນເປັນການຈັດຕັ້ງປະຕິບັດຍຸດທະສາດການພັດທະນາໂລຈິສຕິກການຂົນສົ່ງສິນຄ້າຂອງລາວ ທັງເປັນການປະຕິບັດພັນທະສົນທິສັນຍາສາກົນແລະ ມີຄວາມຈຳເປັນອັນຮີບດ່ວນທີ່ສຸດ ເພາະຈະມີບ່ອນສຳລັບເຕົ້າໂຮມ ແລະ ແຈກຢາຍສິນຄ້າຊຶ່ງເຮັດໃຫ້ລາຄາຂົນສົ່ງຖືກລົງ ສາມາດແກ້ໄຂບັນຫາການຈອດລົດຂົນສິນຄ້າຊະຊາຍຕາມທາງຫຼວງ ເຮັດໃຫ້ເສັ້ນທາງເປ່ເພ ແລະ ບໍ່ປອດໄພ, ປະກອບສ່ວນເຂົ້າໃນການບໍລິການທາງຜ່ານດ້ານຄົມມະນາຄົມຂົນສົ່ງຢ່າງແທ້ຈິງ. ສິ່ງສຳຄັນ ກໍແມ່ນຈະຊ່ວຍສ້າງລາຍຮັບຢ່າງແທ້ຈິງໃຫ້ແກ່ການຂົນສົ່ງຜ່ານແດນ. ຄຽງຄູ່ກັນນັ້ນ ກໍຈະເປັນການດຶງດູດການລົງທຶນ, ການຜະລິດໃຫ້ຫຼາຍຂຶ້ນ ເນື່ອງຈາກວ່າ ຜູ້ລົງທຶນໃສ່ການຜະລິດມີຄວາມສະດວກໃນການຂົນສົ່ງສິນຄ້າຂອງເຂົາເຈົ້າໄດ້ຖືກຕາມກຳນົດເວລາໄປເຖິງຈຸດໝາຍປາຍທາງ ແລະ ມີລາຄາສົມເຫດສົມຜົນ.
ແຫຼ່ງທີ່ມາ: ໜັງສືພິມເສດຖະກິດ-ສັງຄົມ ແລະ ໜັງສືພິມວຽງຈັນທາມ໌ ສະບັບທີ 66 (ວັນທີ 18 ມີນາ 2016)
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.