ກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ ໃນນາມເປັນຫ້ອງການປະຈໍາຂອງກອງເລຂາອໍານວຍຄວາມສະດວກທາງດ້ານການຄ້າ (ກຂອຄ) ໄດ້ຈັດກອງປະຊຸມ ທົບທວນວຽກງານການອໍານວຍຄວາມສະດວກທາງດ້ານການຄ້າຂັ້ນທ້ອງຖິ່ນໃຫ້ແກ່ 06 ແຂວງ ພາກເໜືອ ໃນວັນທີ 19-20 ພຶດສະພາ 2016 ທີ່ໂຮງແຮມ ມິດຕະພາບ ແຂວງອຸດົມໄຊ, ພາຍໃຕ້ການເປັນປະທານຮ່ວມໂດຍ ທ່ານ ນາງ ບານສະຕິ ເທບພະວົງ, ຫົວໜ້າກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ, ແລະ ທ່ານ ຄຳເພົ້າ ສິລິສຸກ, ຫົວໜ້າພະແນກອຸດສາຫະກຳ ແລະ ການຄ້າ ແຂວງອຸດົມໄຊ ໂດຍໄດ້ເຊື້້ອເຊີນຜູ້ເຂົ້າຮ່ວມຈາກຫ້ອງວ່າການແຂວງ, ພະແນກອຸດສາຫະກໍາ ແລະ ການຄ້າ (ອຄ), ພະແນກພາສີ, ພະແນກກະສິກຳ ແລະ ປ່າໄມ້, ພະແນກສາທາລະນະສຸກ, ພະແນກໂຍທາທິການ ແລະ ຂົນສົ່ງ, ສະພາການຄ້າ ແລະ ອຸດສາຫະກຳແຂວງ ແລະ ພາກທຸລະກິດທີ່ກ່ຽວຂ້ອງຈາກ 06 ແຂວງພາກເໜືອ ເຂົ້າຮ່ວມທັງໝົດ 70 ທ່ານ. ກອງປະຊຸມຄັ້ງນີ້ ແມ່ນກອງປະຊຸມສືບເນື່ອງມາຈາກ ກອງປະຊຸມ ທົບທວນວຽກງານການອໍານວຍຄວາມສະດວກທາງດ້ານການຄ້າ ຂັ້ນທ້ອງຖິ່ນ ຢູ່ແຂວງພາກກາງ ແລະ ພາກໃຕ້ ທີ່ໄດ້ຈັດຢູ່ແຂວງສະຫວັນນະເຂດໃນວັນທີ 25-26 ກຸມພາ 2016 ທີ່ຜ່ານມາ.
ໃນກອງປະຊຸມ ບັນດາຜູ້ເຂົ້າຮ່ວມໄດ້ຮັບຟັງການລາຍງານ ກ່ຽວກັບ ຄວາມຈໍາເປັນໃນການສ້າງຕັ້ງຈຸດປະສານງານຢູ່ຂັ້ນທ້ອງຖິ່ນ ໂດຍຊີ້ໃຫ້ເຫັນເຖິງ ຂໍ້ຫຍຸ້ງຍາກໃນການເກັບກຳຂໍ້ມູນ ເພື່ອດໍາເນີນການຄົ້ນຄວ້າ ແລະ ຊອກຫາວິທີການແກ້ໄຂບັນຫາໃຫ້ແກ່ ພາກທຸລະກິດຢູ່ຂັ້ນທ້ອງຖິ່ນ. ນອກນັ້ນ, ກຂອຄ ໄດ້ນໍາສະເໜີຄວາມຄືບໜ້າຂອງການປັບປຸງສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ ແລະ ວິທີການນໍາໃຊ້ສູນຂໍ້ມູນຂ່າວສານດັ່ງກ່າວ ໂດຍຊີ້ໃຫ້ເຫັນສະຖິຕິການເຂົ້າຊົມໃຊ້ເວັບໄຊ້, ການລົງເຜີຍແຜ່ຂໍ້ມູນຂ່າວສານບັນດານິຕິກໍາທີ່ພົວພັນເຖິງການຄ້າ ແລະ ວິທີການຊອກຫາຂໍ້ມູນຂ່າວສານຈາກສູນຂໍ້ມູນຂ່າວສານທາງດ້ານການຄ້າແຫ່ງ ສປປ ລາວ.
ກອງປະຊຸມ ໄດ້ເຫັນດີເປັນເອກະພາບກັນຕໍ່ການລາຍງານຂອງຫ້ອງການປະຈຳ ກຂອຄ ພ້ອມກັບໄດ້ຮັບຟັງການລາຍງານ ຂໍ້ສະດວກ ແລະ ຫຍຸ້ງຍາກໃນການດຳເນີນການນຳເຂົ້າ ແລະ ສົ່ງອອກ, ແລະ ຜ່ານແດນ ໂດຍພະແນກ ອຄ ແຂວງ ຢູ່ 06 ແຂວງ ແລະ ພາກທຸລະກິດ ຊຶ່ງໄດ້ຊີ້ໃຫ້ເຫັນວ່າ ການດຳເນີນເອກະສານຍັງໃຊ້ເວລາດົນ ແລະ ມີຕົ້ນທຶນສູງ. ບັນຫາຕົ້ນຕໍຂອງການອໍານວຍຄວາມສະດວກທາງດ້ານການຄ້າຂອງບັນດາແຂວງພາກເໜືອ ມີຄື: (1) ການເຮັດມອບເໝົາສົ່ງອອກສິນຄ້າ ເຮັດໃຫ້ບໍລິສັດທີ່ຂຶ້ນທະບຽນວິສາຫະກິດບໍ່ສາມາດສົ່ງອອກໄດ້ໂດຍກົງ ແລະ ເພີ່ມຕົ້ນທຶນການສົ່ງອອກ; (2) ການສົ່ງອອກເຄື່ອງປ່າຂອງດົງ ມີຄວາມຫຍຸ້ງຍາກ ຍ້ອນຕ້ອງຜ່ານຫຼາຍຂະແໜງການ ເຊັ່ນ: ກະສິກໍາ, ການຄ້າ, ຊັບສິນ; (3) ຂອດການປະສານງານລະຫວ່າງ ຂະແໜງການຄ້າ ກັບຂະແໜງການອື່ນໆ (ເຊັ່ນ: ກະສິກໍາ, ພາສີ) ຍັງບໍ່ທັນເປັນເອກະພາບ ເຮັດໃຫ້ເກີດຄວາມຊໍ້າຊ້ອນໃນການກວດກາເອກະສານ ແລະ ເກີດຄວາມບໍ່ຊັດເຈນ ໃນການເກັບກໍາສະຖິຕິການຄ້າ; ແລະ (4) ການສົ່ງອອກສິນຄ້າທີ່ເປັນທ່າແຮງ (ເຊັ່ນ: ຢາງພາລາ, ສາລີ ແລະ ໝາກເດືອຍ) ຍັງບໍ່ໄດ້ຮັບສິດທິພິເສດສົ່ງອອກໄປຕະຫລາດ ສປ ຈີນ.
ເພື່ອແກ້ໄຂບັນຫາດັ່ງກ່າວ ທີ່ປະຊຸມໄດ້ເປັນເອກະພາບກັນດັ່ງນີ້: (1) ເຫັນຄວນມີຈຸດປະສານງານວຽກງານອຳນວຍຄວາມສະດວກທາງດ້ານການຄ້າໃນຂັ້ນທ້ອງຖິ່ນ ໂດຍມີຫ້ອງວ່າການແຂວງ ເປັນຫົວໜ້າ; (2) ແກ້ໄຂບັນຫາການເຮັດມອບເໝົາອາກອນ ສໍາລັບການສົ່ງອອກສິນຄ້າກະສິກໍາ; (3) ພິຈາລະນາເພີ່ມເວລາຂອງສັນຍາຄໍ້າປະກັນກັບກົມພາສີ; (4) ສະເໜີໃຫ້ກວດກາຄືນຄ່າບໍລິການຜ່ານສາງ ຢູ່ດ່ານບໍ່ເຕັນ ແລະ ຂົວມິດຕະພາບ 4; (5) ຄວນມີການຍົກເວັ້ນພາສີ ແລະ ອາກອນຕາມກົດໝາຍສົ່ງເສີມການລົງທຶນ; (6) ເຜີຍແຜ່ນິຕິກໍາທາງດ້ານການຄ້າໃຫ້ແກ່ ພະແນກ ອຄ ແຂວງ; ແລະ (7) ຂໍສິດທິພິເສດການສົ່ງອອກຜົນຜະລິດກະສິກໍາ (ເຊັ່ນ: ຢາງພາລາ, ສາລີ ແລະ ໝາກເດືອຍ) ຈາກ ສປ ຈີນ.
ກອງປະຊຸມດັ່ງກ່າວນີ້ ໄດ້ຮັບປະສິດທິຜົນດີເທົ່າທີ່ຄວນ ແລະ ສາມາດບັນລຸຄາດໝາຍທີ່ວາງໄວ້. ໃນຕໍ່ໜ້າ ຫ້ອງການປະຈຳ ກຂອຄ ມີແຜນຈະຈັດກອງປະຊຸມໃນລັກສະນະດຽວກັນສຳລັບແຂວງພາກກາງ.
ດາວໂຫຼດລາວ: ຜົນຂອງກອງປະຊຸມ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.