ສາທາລະນະລັດ ປະຊາທີປະໄຕ ປະຊາຊົນລາວ

ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ

 ກະຊວງ ກະສິກຳ ແລະ ປ່າໄມ້

                                                                                                                ເລກທີ   1046  /ກປຝ

                                                                    ນະຄອນຫຼວງວຽງຈັນ, ວັນທີ  26 ພຶດສະພາ 2016

ແຈ້ງການແນະນຳ

ຮຽນ:  ທ່ານ ຫົວໜ້າພະແນກກະສິກຳ ແລະ ປ່າໄມ້ປະຈຳແຂວງ, ນະຄອນຫຼວງວຽງຈັນ ໃນຂອບເຂດທົ່ວປະເທດ.

ເລື່ອງ: ເພີ່ມທະວີຄວາມເອົາໃຈໃສ່ ໃນການຢັ້ງຢືນສຸຂານາໄມພືດ ແລະ ຜະລິດຕະພັນພືດ ຂອງ ສປປ ລາວ ທີ່ສົ່ງອອກໄປຍັງສະຫະພາບເອີຣົບ.

-         ອີງຕາມ ກົດໝາຍວ່າດ້ວຍການປ້ອງກັນພືດ ສະບັບເລກທີ 06/ສພຊ, ລົງວັນທີ 9 ທັນວາ 2008;
-         ອີງຕາມ ດຳລັດ ແນະນຳປະຕິບັດກົດໝາຍ ວ່າດ້ວຍການປ້ອງກັນພືດ ສະບັບເລກທີ 229/ລບ, ລົງວັນທີ 31 ພຶດສະພາ 2012;
-         ອີງຕາມ ຄຳສັ່ງ ກ່ຽວກັບການເພີ່ມທະວີຄວາມເຂັ້ມງວດ ໃນການນໍາໃຊ້ມາດຕະການສຸຂານາໄມພືດ ເພື່ອແກ້ໄຂບັນຫາຕໍ່ການແຈ້ງເຕືອນຂອງສະຫະພາບເອີຣົບ (EU) ສະບັບເລກທີ 2109/ກປ, ລົງວັນທີ 27/04/2016.

          ເພື່ອຈັດຕັ້ງປະຕິບັດ ແລະ ຜັນຂະຫຍາຍຄຳສັ່ງຂອງລັດຖະມົນຕີກະຊວງກະສິກຳ ແລະ ປ່າໄມ້ ເລກທີ 2109/ກປ, ລົງວັນທີ 27/04/2016 ກ່ຽວກັບການເພີ່ມທະວີຄວາມເຂັ້ມງວດ ໃນການນໍາໃຊ້ມາດຕະການສຸຂານາໄມພືດ ເພື່ອແກ້ໄຂບັນຫາຕໍ່ການແຈ້ງເຕືອນຂອງສະຫະພາບເອີຣົບແນໃສ່ຮັບປະກັນການສົ່ງອອກພືດ ແລະ ຜະລິດຕະພັນພືດ ຈາກ ສປປ ລາວ ໄປຍັງສະຫະພາບເອີຣົບໃຫ້ຖືກຕ້ອງ, ມີຄວາມໂປ່ງໃສ ແລະ ສອດຄ່ອງກັບເງື່ອນໄຂດ້ານສຸຂານາໄມພືດ ສໍາລັບການນຳເຂົ້າຂອງສະຫະພາບເອີຮົບ, ດັ່ງນັ້ນ ກົມປູກຝັງຈຶ່ງອອກແຈ້ງການແນະນຳດັ່ງນີ້:

1.    ໃຫ້ຂະແໜງປູກຝັງປະຈຳແຂວງ ແລະ ນະຄອນຫຼວງວຽງຈັນ ເປັນເຈົ້າການປະສານສົມທົບກັບພາກສ່ວນທີ່ກ່ຽວຂ້ອງປະຕິບັດຢ່າງເດັດຂາດ ແລະ ເຂັ້ມງວດບາງວຽກງານດັ່ງລຸ່ມນີ້:

1.1     ທຸກໆ ພືດ ແລະ ຜະລິດຕະພັນພືດ ທີ່ສົ່ງອອກໄປຍັງສະຫະພາບເອີຣົບ ຕ້ອງຈົດທະບຽນສວນປູກ/ຟາມ, ໂຮງເຮືອນຫຸ້ມຫໍ່ ແລະ ບໍລິສັດສົ່ງອອກ ນໍາຂະແໜງປູກຝັງປະຈຳແຂວງ ແລະ ນະຄອນຫຼວງວຽງຈັນໂດຍມີການຢັ້ງຢືນຈາກ ຫ້ອງການກະສິກຳ ແລະ ປ່າໄມ້ເມືອງ (ເອກະສານຄັດຊ້ອນທ້າຍ ເຊັ່ນ: ແບບຟອມ ແລະ ຮ່າງໃບທະບຽນ...);

1.2.    ການສົ່ງອອກພືດ ແລະ ຜະລິດຕະພັນພືດ ໄປຍັງສະຫະພາບເອີຣົບ ຕ້ອງໄດ້ກວດກາວິໃຈບໍ່ໃຫ້ມີສານເຄມີຕົກຄ້າງ (Maximum Residue Limit MRLs) ເກີນມາດຕະຖານທີ່ກຳນົດ ແລະ ບໍ່ໃຫ້ມີເຊື້ອຈຸລິນຊີຕິດແປດ ໂດຍສະເພາະເຊື້ອ Salmonella ແລະ ເຊື້ອ Escherichia coli ພ້ອມທັງມີໃບຢັ້ງຢືນຜົນການວິໃຈຈາກຫ້ອງວິໃຈອ້າງອີງ ທີໄດ້ຮັບການຮັບຮອງ ແລະ ຢັ້ງຢືນຕາມມາດຕະຖານສາກົນ ISO 17025;

1.3     ກ່ອນອອກໃບຢັ້ງຢືນສຸຂານາໄມພືດ (Phytosanitary Certificate), ໃຫ້ເພີ່ມທະວີການກວດກາ, ການສຸ່ມເກັບຕົວຢ່າງສິນຄ້າຕົວຈິງ ເພື່ອຮັບປະກັນບໍ່ໃຫ້ມີການຕິດແປດສັດຕູພືດກັກກັນ ຂອງສະຫະພາບເອີຣົບ ທີ່ກໍານົດໄວ້ ( ເອກະສານຄັດຊ້ອນທ້າຍເຊັ່ນ: ສັງລວມບັນຊີສັດຕູພືດກັກກັນຕາມການແຈ້ງເຕືອນຂອງເອີຣົບ);

1.4     ສ່ວນເລກລະຫັດຂອງໃບທະບຽນສວນປູກ/ຟາມ, ໂຮງເຮືອນຫຸ່ມຫໍ່ ແລະ ບໍລິສັດສົ່ງອອກ ແມ່ນ ພະແນກກັກກັນພືດ, ກົມປູກຝັງ ເປັນຜູ້ກໍານົດໃຫ້.

          2.  ເປັນເຈົ້າການໃນການໂຄສະນາເຜີຍແຜ່ບັນດານິຕິກໍາ ແລະ ເງື່ອນໄຂການນໍາເຂົ້າພືດ ແລະ ຜະລິດຕະພັນພືດຂອງສະຫະພາບເອີຣົບ ໃຫ້ຜູ້ສົ່ງອອກຮັບຮູ້, ເຂົ້າໃຈ ແລະ ສາມາດຈັດຕັ້ງປະຕິບັດໄດ້ຢ່າງຖືກຕ້ອງ.

          3.  ແຈ້ງການແນະນໍາສະບັບນີ້ ມີຜົນສັກສິດນັບແຕ່ມື້ລົງລາຍເຊັນເປັນຕົ້ນໄປ.

       ດັ່ງນັ້ນ, ຈຶ່ງແຈ້ງມາຍັງທ່ານເພື່ອຊາບ ແລະ ພ້ອມກັນຈັດຕັ້ງປະຕິບັດໃຫ້ມີປະສິດທິພາບສູງ.

                                                            ຫົວໜ້າກົມປູກຝັງ

(ເຊັນ ແລະ ປະທັບຕາ)

ຄຳຕັນ ທາດາວົງ

ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.