ສາທາລະນະ​ລັດ ປະຊາທິ​ປະ​ໄຕ ປະຊາຊົນ​ລາວ
ສັນຕິພາບ ​ເອກະລາດ ປະຊາທິປະ​ໄຕ​ ​ເອກະພາບ ວັດທະນາ​ຖາວອນ

ປະທານ​ປະ​ເທດ    ​ເລກ​ທີ 207 /ປປທ
ນະຄອນຫຼວງ​ວຽງ​ຈັນ, ວັນ​ທີ​ 06 ສິງຫາ 2018

ລັດຖະດຳລັດ
ຂອງ​ປະທານ​ປະ​ເທ​ດ ສາທາລະນະ​ລັດ ປະຊາ​ທິປະ​ໄຕ ປະຊາຊົນ​ລາວ

ກ່ຽວ​ກັບ​ການ​ປະ​ກາດ​ໃຊ້​ກົດໝາຍ​ວ່າ​ດ້ວຍ ອາກອນ​ມູນ​ຄ່າ​ເພີ່ມ (ສະບັບ​ປັບປຸງ)

• ອີງ​ຕາມ ລັດຖະທຳມະນູນ ​ແຫ່ງ ສາທາ​ລະນະ​ລັດ ປະຊາທິປະ​ໄຕ ປະຊາຊົນ​ລາວ (ສະບັບ​ປັບປຸງ ປີ 2015) ໝວດ​ທີ VI ມາດຕາ 67 ຂໍ້ 1;
• ອີງ​ຕາມ ​ມະຕິຂອງ​ກອງ​ປະຊຸມ​ສະພາ​ແຫ່ງ​ຊາດ, ສະບັບ​ເລກທີ 089/ສພຊ, ລົງ​ວັນ​ທີ 20 ມິ​ຖຸນາ 2018 ກ່ຽວ​ກັບ​ການ​ຮັບຮອງ​ເອົາ​ກົດໝາຍ​ວ່າ​ດ້ວຍ ອາກອນ​ມູນ​ຄ່າ​ເພີ່ມ (ສະບັບ​ປັບປຸງ​);
• ອີງ​ຕາມ ໜັງສື​ສະ​ເໜີ​ຂອງ​ຄະ​ນະ​ປະຈຳ​ສະພາ​ແຫ່ງ​ຊາດ, ສະບັບ​ເລກທີ 09/ຄປຈ, ລົງ​ວັນ​ທີ 18 ກໍ​ລະ​ກົດ 2018.

​ປະທານ​ປະ​ເທດ

ສາທາລະນະ​ລັດ ປະຊາ​ທິປະ​ໄຕ ​ປະຊາຊົນ​ລາວ ອອກ​ລັດຖະດຳລັດ:

ມາດຕາ 1 ປະກາດ​ໃຊ້​ກົດໝາຍ​ວ່າ​ດ້ວຍ ອາກອນ​ມູນ​ຄ່າ​ເພີ່ມ (ສະບັບ​ປັບປຸງ).

ມາດ​ຕາ 2 ລັດຖະດໍາລັດ​ສະບັບ​ນີ້ ມີ​ຜົນ​ສັກ​ສິດ ນັບ​ແຕ່​​ວັນລົງ​ລາຍ​ເຊັນ ​ເປັນ​ຕົ້ນ​ໄປ.

ປະທານ​ປະ​ເທດ ​ແຫ່ງ ສປປ ລາວ

ບຸນຍັງ ວໍລະຈິດ

---

ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ

ສັນຕິພາບ ​ເອກະລາດ ປະຊາທິປະ​ໄຕ ​ເອກະ​ພາບ ວັດທະນາ​ຖາວອນ

ສະພາ​ແຫ່ງ​ຊາດ     ເລກທີ 089/ສພຊ

ນະຄອນຫຼວງ​ວຽງ​ຈັນ, ວັນ​ທີ 20/06/2018

ມະຕິ

ຂອງກອງ​ປະຊຸມ​ສະພາ​ແຫ່ງ​ຊາດ

ກ່ຽວ​ກັບ​ການ​ຮັບຮອງ​ເອົາ​ກົດໝາຍ​ວ່າ​ດ້ວຍ​ອາກອນ​ມູນ​ຄ່າ​ເພີ່ມ (ສະບັບ​ປັບປຸງ)

     ອີງ​ຕາມ​ລັດຖະທຳ​ມະນູນ ​ແຫ່ງ ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ (ສະບັບ​ປັບປຸງ ປີ 2015) ມາດຕາ 53 ຂໍ້ 1 ​ແລະ ກົດໝາຍວ່າ​ດ້ວຍ​ສະພາ​ແຫ່ງ​ຊາດ (ສະບັບ​ປັບປຸງ ປີ 2015) ມາດຕາ 11 ຂໍ້ 1.

ພາຍຫຼັງ​ທີ່​ກອງ​ປະຊຸມສະ​ໄໝ​ສາມັນ ​ເທື່​ອທີ 5 ຂອງ​ສະພາ​ແຫ່ງ​ຊາດ ຊຸດ​ທີ VIII ​ໄດ້​ຄົ້ນ​ຄ້ວາ​ພິຈາລະນາ​ຢ່າງ​ກ້ວາງ​ຂວາງ ​ແລະ ​ເລິກ​ເຊິ່ງ ກ່ຽວ​ກັບ​ເນື້ອ​ໃນຂອງ​ກົດໝາຍ​ວ່າ​ດ້ວຍ​ອາກອນ​ມູນ​ຄ່າ​ເພີ່ມ (ສະບັບ​ປັບປຸງ) ​ໃນ​ວາລະ​ກອງ​ປະຊຸມ ຕອນ​ເຊົ້າ, ວັນ​ທີ 20 ມີິຖຸ​ນາ 2018. 

ກອງ​ປະຊຸມ​ສະພາ​ແຫ່ງ​ຊາດ​ ຕົກລົງ:

ມາດຕາ 1 ຮັບຮອງ​ເອົາ​ກົດໝາຍ​ວ່າ​ດ້ວຍ​ອາກອນ​ມູນ​ຄ່າ​ເພີ່ມ (ສະບັບ​ປັບປຸງ) ດ້ວຍ​ຄະ​ແນນ​ສຽງ​ເຫັນ​ດີ​ເປັນ​ສ່ວນຫຼາຍ.

ມາດຕາ 2 ມະຕິ​ສະບັບ​ນີ້ ມີ​ຜົນ​ສັກ​ສິດ​ນັບ​ແຕ່​ວັນ​ລົງ​ລາຍ​ເຊັນ​ເປັນ​ຕົ້ນ​ໄປ.

ປະທານ​ສະ​ພາ​ແຫ່​ງຊາດ

ປານີ ຢາທໍ່ຕູ້

---

ສາທາ​ລະນະ​ລັດ ປະຊາທິປະ​ໄຕ ປະຊາ​ຊົນ​ລາວ
ສັນຕິພາບ ​ເອກະລາດ ປະຊາທິປະ​ໄຕ ​ເອກະ​ພາບ ວັດທະນາ​ຖາວອນ

ສະພາ​ແຫ່ງ​ຊາດ          ກທີ 48 /ສພຊ

ນະ​ຄອນ​ຫຼວງ​ວຽງ​ຈັນ, ວັນ​ທີ 20 ມິຖຸນາ 2018

ກົດໝາຍ

ວ່າ​ດ້ວຍ​ອາກອນ​ມູນ​ຄ່າ​ເພີ່ມ

(ສະບັບ​ປັບປຸງ)

ພາກ​ທີ I

ບົດ​ບັນຍັດ​ທົ່ວ​ໄປ

ມາດ​ຕາ 1 (ປັບປຸງ) ຈຸດປະສົງ

       ກົດໝາຍ​ສະບັບ​ນີ້ ກຳນົດ ຫຼັກ​ການ, ລະບຽບ​ການ, ວິທີ​ການ ​ແລະ ມາດ​ຕະການ ກ່ຽວ​ກັບ​ການ​ຄຸ້ມຄອງ ​ແລະ ການ​ຕິດຕາມ ກວດກາ ວຽກ​ງານ​ອາ​ກອນ​ມູນ​ຄ່າ​ເພີ່ມ​ ​ເພື່ອ​ໃຫ້​ວຽກ​ງານ​ດັ່ງ​ກ່າວ ມີ​ປະສິດທິພາບ ​ແລະ ປະສິດ​ທິຜົນ, ສົ່ງ​ເສີມ, ການ​ຜະລິດ, ການ​ດຳ​ເນີນ​ທຸລະ​ກິດ, ການ​ລົງທຶນ, ການ​ສົ່ງ​ອອກ, ການ​ສະໜອງ​ ສິນຄ້າ ​ແລະ ການ​ບໍລິການ ​ແນ່​ໃສ່​ເພີ່ມ​ລາຍ​ຮັບ​ເຂົ້າ​ງົບປະມານ​ແຫ່ງ​ລັດ, ສ້າ​ງເງື່ອນ​ໄຂ​ໃຫ້​ແກ່​ການ​ເຊື່ອມ​ໂຍງ​ກັບ​ພາກ​ພື້ນ ​ແລະ ສາກົນ ປະກ​ອບສ່ວນ​ເຂົ້າ​ໃນ​ການ​ພັດທະນາ​ເສດຖະກິດ-ສັງຄົມ​ຂອງ​ຊາດ.

ມາດ​ຕາ 2 (ປັບປຸງ) ອາກອນ​ມູນ​ຄ່າ​ເພີ່ມ

      ອາກອນ​ມູນ​ຄ່າ​ເພີ່ມ ​ແມ່ນ ອາ​ກອນ​ທີ່​ເກັບ ​ຕາມ​ມູນ​ຄ່າ ສິນຄ້າ ​ແລະ ການ​ບໍລິການ ທີ່​ເພີ່ມ​ຂື້ນ​ຈາກ​ການ​ນຳ​ສິນຄ້າ, ການ​ສະໜອງ ​ສິນຄ້າ ​ແລະ ການ​ບໍລິການ ຢູ່​ພາຍ​ໃນ​ປະ​ເທດ ​ເຊິ່ງຜູ້​ຊົມ​ໃຊ້​ສຸດ​ທ້າ​ຍ ​ເປັນ​ຜູ້​ເສຍ.

ມາດຕາ 3 (ປັບ​ປຸງ) ການ​ອະທິບາຍ​ຄຳ​ສັບ

     ຄຳ​ສັບ​ທີ່​ນຳ​ມາ​ໃຊ້ໃນ​ກົດໝາຍ​ສະບັບ​ນີ້ ມີ​ຄວາມ​ໝາຍ ດັ່ງນີ້:

1. ສິນຄ້າ ໝາຍ​ເຖິງ ສິ່ງ​ທີ່​ບໍ່​ມີ​ຕົວ​ຕົນ ຫຼື ມີ​ຕົວຕົນ ຊຶ່ງ​ສາມ​າດ​ເຄື່ອນ​ຍ້າຍ​ໄດ້ ຫຼື ບໍ່​ສາມາດ​ເຄື່ອນ​ຍ້າຍ​ໄດ້ ​ແລະ ຊັບ​ສົມບັດ​ອື່ນ​ທີ່​ໃຊ້​ເຂົ້າ​ໃນ​ການ​ຜະລິດ, ການ​ສະໜອງ, ການ​ແລກປ່ຽນ ​ແລະ ການ​ບໍລິການ;
2. ການ​ສົ່ງ​ອອກ ໝາຍ​ເຖິງ ການ​ສົ່ງ​ສິນຄ້າ​ອອກ​ຈາກ ສປປ ລາວ ​ໄປ​ຕ່າງປະ​ເທດ ລວມທັງ​ການ​ສົ່ງ​ອອກ​ໄປ​ເຂດ​ເສດຖະກິດ​ພິ​ເສດ;
3. ການ​ນຳ​ເຂົ້າ ໝາຍ​ເຖິງ ການ​ນຳ​ເອົາ​ສິນຄ້າຈາກ​ຕ່າງປະ​ເທດ​ເຂົ້າ​ມາ ສປປ ລາວ ລວມທັງ​ການ​ນຳ​ເຂົ້າ​ສິນຄ້າ​ຈາກ​ເຂດ​ເສດຖະກິດ​ພິ​ເສດ;
4. ການ​ສະໜອງ​ສິນຄ້າ ໝາຍ​ເຖິງ ການ​ມອບ, ການ​ໂອນ​ສິດ​ຊົມ​​ໃຊ້​ສິນຄ້າ, ສິນຄ້າ, ​ໃຫ້​​ແກ່​ຜູ້​ອື່ນ​ໂດຍ​ໄດ້​ຮັບຄ່າ​ຕອບ​ແທນ​ເປັນ​ເງິນ ຫຼື ຜົນ​ປະ​ໂຫຍ​ດອື່ນ ລວມທັງ​ການ​ໃຫ້​ລ້າ ​ແລະ ​ການ​ຊົມ​ໃຊ້​ດ້ວຍ​ຕົນ​ເອງ;
5. ການ​ສະໜອງ​ການ​ບໍລິການ ໝາຍ​ເຖິງ ການ​ເຄື່​ອນ​ໄຫວທຸລະ​ກິດ ທີ່​ເປັນ​ການ​ສະໜອງ​ແຮງ​ງານ​ໃຫ້​ແກ່​ຜູ້​ອື່ນ ຫຼື ຕົນ​ເອງ ທີ່​ບໍ່​ແມ່ນ​ການ​ສະໜອງ​ສິນຄ້າ ​ໂດຍ​ໄດ້​ຮັບ​ຄ່າ​ບໍລິການ ​ເປັນ​ເງິນ ຫຼື ຜົນ​ປະ​ໂຫຍ​ດອື່ນ ​ເປັນ​ຄ່າ​ຕອບ​ແທນ ​ຊຶ່ງອາກລວມທັງ​ວັດຖຸ​ປະກອນ ​ແລະ ພາຫະນະ​ຮັບ​ໃຊ້;
6. ຜູ້​ເສຍ​ອາກອນ​ມູນ​ຄ່າ​ເພີ່​ມ ໝາຍ​ເຖິງ ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ນຳ​ເຂົ້າ​ສິນຄ້າ ຫຼື ຊື້​ສິນຄ້າ ​ແລະ ການ​ບໍ​ລິການ ​ເພື່ອ​ຊົມ​ໃຊ້​ເອງ​ຢູ່ ສປປ ລາວ;
7. ຜູ້​ຈ່າຍ​ອາ​ກອນມູນ​ຄ່າ​ເພີ່ມ ໝາຍ​ເຖິງ ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່ຢູ່​ໃນ​ລະບົບອາກອນ​ມູນ​ຄ່າ​ເພີ່ມ ທີ່​ໄດ້​ຈ່າຍ​ອາກອນ​ມູນ​ຄ່າ​ເພີ່ມ ຈາກ​ການ​ນຳ​ເຂົ້າ​ສິນຄ້າ, ຊື້ສິນຄ້າ ​ແລະ ການ​ບໍລິການ ​ເພື່ອ​ສະໜອງ​ໃຫ້​ຜູ້​ອື່ນ ຫຼື ຕົນ​ເອງ;
8. ອາກອນ​ມູນ​ຄ່າ​ເພີ່ມ​ສົ້ນ​ອອກ ໝາຍ​ເຖິງ ຈຳນວນ​ເງິນ​ອາກອນ​ມູນ​ຄ່າ​ເພີ່ມ ທີ່​ຄິດ​ໄລ່​​ເກັບຈາກ​ການ​ສະໜອງ ​ສິນຄ້າ ​ແລະ ການ​ບໍລິການ ຊື່​ງ​ຈ່າຍ​ໂດຍ​ຜູ້​ຊື້​ສິນຄ້າ ຜູ້​ຊົ​ມ​ໃຊ້​ການ​ບໍລິການ;
9. ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ ໝາຍ​ເຖິງ ຈຳນວນ​ເງິນ​ອາກອນ​ມູນ​ຄ່າ​ເ​ພີ່​ມ ທີ່​ຜູ້​ມອບ​ອາກອນ​ມູນ​ຄ່າ​ເພີ່ມ ​ໄດ້​ຈ່າຍ ຈາ​ກການ​ນຳ​ເຂົ້າ​ສິນຄ້າ ຫຼື ການ​ຊື້​ສິນຄ້າ ​ແລະ ການ​ບໍລິການ​ຢູ່​ພາຍ​ໃນ​ປະ​ເທດ ​ເພື່ອ​ນຳ​ໃຊ້​ເຂົ້າ​ໃນ​ການ​ເຄື່ອນ​ໄຫວ​ທຸລະ​ກິດ;
10. ໄລຍະ​ແຈ້ງ​ການ ​ແລະ ການ​ມອບອາກອນ​ມູນ​ຄ່າ​ເພີ່ມ ໝາຍ​ເຖິງ ​ໄລຍະ​ທີ່​ຜູ້​ມອບ​ອາກອນ​ມູນ​ຄ່າ​ເພີ່ມ ຕ້ອງ​ແຈ້ງ ​ແລະ ມອບ​ອາກອນ​ມູນ​ຄ່າ​ເພີ່ມ​ທັງ​ໝົດ ທີ່​ຕິດ​ພັນ​ກັບ​ການ​ເຄື່ອນ​ໄຫວດຳ​ເນີນ​ທຸລະ​ກິດ​ໃນ​ໄລຍະ​ນັ້ນ;
11. ຜູ້​ບໍ່​ມີພູມລຳ​ເນົາ ໝາຍ​ເຖິງ​ ຜູ້​ບໍ່​ມີ​ທີ່ຢູ່​ຖາວອນ​ໃນ​ການ​ດຳລົງ​ຊິວິດ, ທຳ​ມາ​ຫາ​ກິນ ​ແລະ ດຳ​ເນີນ​ທຸລະ​ກິດ​ຢູ່ ສປປ ລາ​ວ;
12. ເລືອດ​ຄົນ ໝາ​ຍ​ເຖິງ ຜະລິດ​ຕະພັນ ຈາກ​ເລືອດ​ຄົນ ​ແລະ ນ້ຳ​ເລືອດ​ ທີ່​ໄດ້​ຮັບ​ຢັ້ງຢືນ​ການ​ແພດ​ວ່າ​ມີ​ຄູນ​ນະພາ​ບ;
13. ການ​ຂົນ​ສົ່ງ​ຜ່ານ​ແດນ​ສາກົນ​ ໝາຍ​ເຖິງ ການ​ບໍລິການ​ຂົນ​ສົ່ງ ຜູ້​ໂດຍສານ, ສິນຄ້າ ​ແລະ ​ເຄື່ອງ​ຂອງ​ຜ່ານ​ແດນ ສປປ ລາວ;
14. ລັດຖະການ​ສ່ວຍ​ສາ​ອາກອນ ໝາຍ​ເຖິງ ກົມ​ສ່ວຍ​ສາ​ອາກອນ, ສ່ວຍສາ​ອາກອນ​ປະ​ຈຳ​ແຂວງ, ນະ​ຄອນ​ຫຼວງ ​ແລະ ສ່ວຍ​ສາ​ອາກອນ​ປະຈຳ​ເມືອງ, ​ເທດສະບານ, ນະຄອນ;
15. ຫ້ອງການ​ສ່ວຍ​ສາ​ອາກອນ ໝາຍ​ເຖິງ ​ບ່ອນ​ເຮັດ​ວຽກ​ຂອງ​ພະນັກງານ-ລັດຖະກອນ​ສ່ວຍ​ສາ​ອາກອນ​ແຕ່ລະ​ຂັ້ນ;
16. ເຈົ້າ​ໜ້າ​ທີ່​ສ່ວຍ​ສາ​ອາກອນ ໝາຍ​ເຖິງ​ພະນັກງານ​ສ່ວຍ​ສາ​ອາກອນ ທີ່​ຖືກ​ແຕ່ງ​ຕັ້ງ​ໃຫ້​ໄປ​ເຄື່ອນ​ໄຫວ ​ແລະ ປະຕິບັດ​ໜ້າ​ທີ່ຢູ່​ສະຖານ​ທີ່​ສະ​ເພາະ ຫຼື ວຽກ​ງານ​ໃດ​ໜຶ່ງ.

ມາດຕາ 4 ນະ​ໂຍບ​າຍຂອງ​ລັດ ກ່ຽວ​ກັບ​ອາກອນ​ມູນ​ຄ່າ​ເພີ່ມ

ລັດວາ​ງນະ​ໂຍບາຍ​ກ່ຽວ​ກັບອາກອນ​ມູນ​ຄ່າ​ເພີ່ມ ​ເພື່ອ​ຊຸກຍູ້ ສົ່ງ​ເສີມ ການ​ຜະລິດ​ສິນຄ້າ ​ແລະ ການ​ບໍ​ລິ​ການ, ການ​ລົງທຶນ​ມີ​ການ​ຂະຫຍາຍຕົວ​ຕໍ່​ເນື່ອງ, ພັດທະນາ​ລະບົບ ການ​ຈັດ​ເກັບ ​ແລະ ການ​ແຈ້ງ​ມອບອາກອນ​ມູນ​ຄ່າ​ເພີ່ມ ​ໃຫ້​ມີ​ຄວາມ​ສະ​ດວກ, ທັນ​ສະ​ໄໝ ​ແລະ ຮັບປະກັນ​ຄວາມ​ຍຸ​ຕິ​ທຳ, ​ໂປ່​ງ​ໃສ ​ແລະ ສາມາດ​ກວດ​ສອບ​ໄດ້.

 ລັດ ສ້າງ​ເງື່ອນ​ໄຂ ​ແລະ ອຳນວຍ​ຄວາມ​ສະດວກ ​ໃນ​ການ​ຄຸ້​ມຄອງ​ວຽກ​ງານ​ອາກອນ​ມູນ​ຄ່າ​ເພີ່ມ ​ໃຫ້​ຂະ​ແໜງ​ການ​ຂອງ​ລັດ ດ້ວຍ​ການ​ປະກອບ ບຸກຄະລາ​ກອນ, ງົບປະມານ, ​ໂຄງ​ລ່າງ​ພື້ນ​ຖານ, ພາຫະນະ ​ແລະ ວັດຖຸ​ປະກອນ​ຮັບ​ໃຊ້​ທີ່​ຈຳ​ເປັນ ຕາມ​ຄວາມ​ສາມ​າດ​ໃນ​ແຕ່ລະ​ໄລຍະ.

 ລັດ ສ້າງ​ສະພາບ​ແວດ​ລ້ອມ​ທີ່​ດີ, ​ເງື່ອນ​ໄຂ ​ແລະ ອຳນວຍ​ຄວາມ​ສະດວກ​ໃຫ້​ແກ່​ຜູ້​ປະກອບ​ການ ​ໃນ​ການ​ແຈ້ງ ​ແລະ ມອບ​ອາກອນ​ມູນ​ຄ່າ​ເພີ່​ມ.

ມາດຕາ 5 (ປັບປຸງ) ຫຼັກການ​ກ່ຽວ​ກັບ​ວຽກ​ງານ​ອາກອນ​ມູນ​ຄ່າ​ເພີ່ມ​

  ໃນ​ການ​ເຄື່ອນ​ໄຫວ​ວຽກ​ງານ​ອາກອນ​ມູນ​ຄ່າ​ເພີ່ມ ​ໃຫ້​ປະຕິບັດ​ຕາມ​ຫຼັກການ​ດັ່ງ​ນີ້:

1.  ຄຸ້ມຄອງ​ລວມສູນ​ລະບົບ​ພື້ນຖານ​ຂອງ​ອາກອນ​ມູນ​ຄ່າ​ເພີ່ມ ຢ່າງ​ເປັນ​ເອກະ​ພາບ​ໃນ​ຂອບ​ເຂດທົ່ວ​ປະ​ເທດ;
2. ສົ່ງ​ເສີມ​ການ​ຜະລິດ​ສິນ​ຄ້າ, ການ​ບໍລິການ, ການ​ລົງທຶນ​ ໃຫ້​ມີ​ການ​ຂະ​ຫຍາ​ຍຕົວຢ່າງຕໍ່​ເນື່ອງ;
3. ຮັບປະກັນ​ຄວາມ​ທັນ​ສະ​ໄໝ, ບໍລິການ​ສະດວກ, ວ່ອງໄວ, ຍຸຕິ​ທຳ, ​​ໂປ່​ງ​ໃສ ​ແລະ ກວດ​ສອບ​ໄດ້;
4. ປະສານ​ສົມທົບ​ກັບ​ທຸກ​ພາກສ່ວນ​ທີ່​ກ່ຽວ​ຂ້ອງ;
5. ປະຕິບັດ​ຕາມ​ສົນທິສັນຍາ ​ແລະ ສັນຍາ​ສາກົນ ທີ່ ສປປ ລາວ ​ເປັນ​ພາຄີ.

ມາດຕາ 6 ພັນທະ​ຂອງ​ບຸກຄົນ, ນິຕິບຸກຄົນ ຫຼື ການຈັດ​ຕັ້ງ

ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ຊົມ​ໃຊ້​ສິນຄ້າ ​ແລະ ການ​ບໍລິການ ຢູ່ ສປປ ລາວ ລ້ວນ​ແຕ່​ມີ​ພັນ​ທະ​ເສຍ​ອາກອນ​ມູນ​ຄ່າ​ເພີ່ມ ຕາມ​ທີ່ໄດ້​ກຳນົດ​ໄວ້​ໃນ​ກົດໝາຍ​ສະບັບ​ນີ້.

ມາດຕາ 7 ຂອບ​ເຂດ​ການ​ນຳ​ໃຊ້​ກົດໝາຍ

  ກົດໝາຍ​ສະບັບ​ນີ້ ນຳ​ໃຊ້​ສຳລັບ ບຸກຄົນ, ນິຕິບຸກຄົນ ຫຼື ການຈັດ​ຕັ້ງ​ ທັງ​ພາຍ​ໃນ ​ແລະ ຕ່າງປະ​ເທດ​ທີ່​ດຳ​ເນີນ​ທຸລະ​ກິດ, ຊົມ​ໃຊ້​ສິນຄ້າ ​ແລະ ການ​ບໍລິການ​ ຢູ່ ສປປ ລາວ.

ມາດຕາ 8 ການ​ຮ່ວມ​ມື​ສາກົນ

   ລັດ ​ເປີດ​ກ້ວາງ ​ແລະ ສົ່ງ​ເສີມ ​ໃຫ້​ມີ​ການ​ພົວພັນ ຮ່ວມ​ມື​ກັບ​ຕ່າງປະ​ເທດ, ພາກ​ພື້ນ ​ແລະ ສາກົນ​ກ່ຽວ​ກັບ​ວຽກ​ງານອາກອນ​ມູນ​ຄ່າ​ເພີ່ມ ​ດ້ວຍ​ການ​ແລກປ່ຽນຂໍ້​ມູນ ຂ່າວສານ, ບົດຮຽນ, ​ເຕັກ​ນິກ, ການ​ນຳ​ໃຊ້​ເຕັກ​ໂນ​ໂລ​ຊີ​ທີ່​ທັນ​ສະ​ໄໝ, ການ​ພັດທະນາ​ຊັບພະຍາກອນ​ມະນຸດ, ການ​ຍົກ​ລະດັບ​ທາງ​ດ້ານ​ວິຊາ​ການ, ປະຕິບັດ​ສົນທິ​ສົນ​ຍາ ​ແລະ ສັນຍາ​ສາກົນ ທີ່ ສປປ ລາວ​ເປັນ​ພາຄີ.

ພາກ​ທີ II

ລະບົບພື້ນຖານ​ຂອງ​ອາກອນ​ມູນ​ຄ່າ​ເພີ່ມ

ມາດຕາ 9 (​ໃໝ່) ລະບົບ​ພື້ນຖານຂອງ​ອາກອນ​ມູນ​ຄ່າ​ເພີ່​ມ

     ລະບົບພື້ນຖານ​ຂອງ​ອາກອນ​ມູນ​ຄ່າ​ເພີ່ມ ມີ​ດັ່ງ​ນີ້:

1.  ການ​ເກັບ​ອາກອນ​ມູນ​ຄ່າ​ເພີ່ມ;
2. ການ​ຄິດ​ໄລ່​ອາກອນ​ມູນ​ຄ່າ​ເພີ່ມ;
3. ການ​ຫັກ ​ແລ​ະ ການ​ສົ່ງ​ຄືນ ອາກອນ​ມູນ​ຄ່າ​ເພີ່ມ;
4. ການ​ແຈ້ງ ​ແລະ ການ​ມ​ອບ ອາກອນ​ມູນຄ່າ​ເພີ່ມ;
5. ການ​ເຂົ້າ​-ອອກ​ລະບົບ​ອາກອນ​ມູນ​ຄ່າ​ເພີ່ມ;
6. ການ​ຖື​ບັນຊີ ​ແລ​ະ ການ​ອອກ​ໃບ​ເກັບ​ເງິນ;
7. ການ​ກວດກາ ​ແລະ ການ​ຄຸ້ມຄອງ​ອາກອນ​ມູນ​ຄ່າ​ເພີ່ມ​ຄ້າງ​ມອບ.

                                 ໝວດ​ທີ 1

                                ການ​ເກັບ​ອາກອນ​ມູນ​ຄ່າ​ເພີ່ມ

ມາດຕາ 10 (ປັບປຸງ) ຜູ້​ເກັບ​ອາກອນ​ມູນ​ຄ່າ​ເພີ່ມ

ຜູ້​ເກັບ​ອາກອນ​ມູນ​ຄ່າ​ເພີ່ມ ປະກອບ​ມີ ​ບຸກຄົນ, ນິຕິ​ບຸກຄົນ ຫຼື ການຈັດ​ຕັ້ງ ​ທີ່​ດຳ​ເນີນ​ທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ, ​ເຈົ້າ​ໜ້າ​ທີ່​ພາສີ ​ແລະ ຜູ້​ຊື້​ການ​ສະໜອງ ​ສິນຄ້າ ​ແລະ ການ​ບໍລິການ ຈາກ​ຜູ້​ບໍ່ມີ​ພູມ​ລຳ​ເນົາ ຫຼື ​ມີ​ພູມລຳ​ເນົາ ​ແຕ່​ບໍ່​ໄດ້​ຈົດ​ທະບຽນ​ສ້າງຕັ້ງວິ​ສາ​ຫະກິດຕາມ​ກົດໝາຍ​ຂອງ ສປປ ລາວ.

ມາ​ດຕາ 11 (ປັບປຸງ) ກິດຈະກໍາ​ທີ່​ຖືກ​ເກັບ​ອາກອນ​ມູນ​ຄ່າ​ເພີ່ມ

               ກິດຈະກຳ​ທີ່​ຖືກ​ເກັບ​ອາກອນ​ມູນ​ຄ່າ​ເພີ່ມ ມີດັ່ງ​ນີ້:

1.  ການ​ນຳ​ເຂົ້າ​ສິນຄ້າ;
2. ການ​ສະໜອງ ​ສິນຄ້າ​ ​ແລະ ການ​ບໍລິການ ຢູ່ ສປປ ລາວ ​ໂດຍ​ ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ​ທີ່​ດຳ​ເນີ​ນທຸລະ​ກິດຢູ່​​ໃນ​ລະບົບ​ອາກອນ​ມູນ​ຄ່າ​ເພີ່ມ;
3. ການ​ສະໜອງ​ການ​ບໍລິການ ຢູ່ ສປປ ລາວ ​ໂດຍ​ຜູ້ ​ບໍ່​ມິ​ພູມ​ລຳ​ເນົາ ​ແລະ ບໍ່​ໄດ້​ຈົດ​ທະບຽນ​ສ້າງ​ຕັ້ງ​ວິສາຫະກິດ ຕາມ​ກົດໝາຍ​ຂອງ ສປປ ລາວ;
4. ການ​ສະໜອງ​ບໍລິການ ຢູ່​ເຂດ​ນອກ​ເສດຖະກິດ​ພິ​ເສດ ​ໃນ ສປປ ລາວ ​ຂອງ​ວິ​ສາ​ຫະກິດ ທີ່​ຈົດ​ທະບຽນ​ສ້າງ​ຕັ້ງ​ຢຸ່​ໃນ​ເຂດ​ເສດຖະກິດ​ພິ​ເສດ;
5. ການ​ສະໜອງ ​ສິນຄ້າ ​ແລະ ການ​ບໍລິການ ຜ່ານ​ລະບົບ​ເອ​ເລັກ​​ໂຕ​ນິກ.

ມາດຕາ 12 (ປັບປຸງ) ກິດຈະກໍາ ທີ່​ຖືກ​ຍົກ​ເວັ້ນ​ອາກອນ​ມູນ​ຄ່າ​ເພີ່ມ

   ກິດຈະ​ກຳ ທີ່​ຖືກ​ຍົກ​ເວັ້ນອາກອນ​ມູນ​ຄ່າ​ເພີ່ມ​ ມີ​ດັ່ງ​ນີ້:

1.  ສຳລັບ​ສິນ​ຄ້າ​ທີ່​ນຳ​ເຂົ້າ
2. 1 ​ແນວ​ພັນ​ພຶດທຸກ​ປະ​ເພດ, ​ແນວ​ພັນ​ສັດ, ນ້ຳ​ເຊື້ອ​ສັດ, ວັກ​ຊິນ​ກັນ​ພະຍາດ, ອຸປະກອນ ​ແລະ ນ້ຳ​ຢາ (​ໄນ​ໂຕຣ​ເຈນ​ແຫຼວ) ​ເພື່ອ​ເກັບ​ຮັກສາ ວັກ​ຊິນ​ກັນ​ພະຍາດ ​ແລະ ນ້ຳ​ເຊື້ອ​ສັດ, ຫົວອາຫານ​ສັດ, ວັດຖຸ​ດີິບຮັບ​ໃຊ້​ການ​ຜະລິດ​ຫົວອາຫ​ານສັດ ​ແລະ ການ​ຜະລິດ​ວັກ​ຊິນ;

       1.2. ວັດຖຸ​ດິບທີ່​ນຳ​ໃຊ້​ເຂົ້າ​ໃນ​ການ​ຜະລິດ​ຝຸ່ນ, ອຸດສາຫະກຳ​ປຸງ​ແຕ່​ງຜະລິດ​ຕະພັນ​ກະ​ສິ​ກຳ, ຝຸ່ນ​ຊິ​ວະ​ພາບ, ຝຸ່ນວິທະຍາສາດ, ຢາ​ປາບ​ສັດ​ຕູພືດ ທີ່​ບໍ່​ເປັນ​ອັນຕະລາຍ​ຕໍ່​ລະບົບ​ນິ​ເວດ, ສຸຂະ​ພາບ ​ແລະ ຊິວິດ ​ຂອງ​ຄົນ ​ແລະ ສັດ;

       1.3. ວັດຖຸ​ປະກອນ ​ແລະ ​ເຄື່ອງ​ກົນ​ຈັກ ຮັບ​ໃຊ້​ວຽກ​ກະ​ສິ​ກ

       1.4. ວັດ​ຖຸດິບ, ​ແຮ່​ທາດ, ວັດຖຸ​ປະກອນ ​ແລະ ຊິ້ນສ່ວນ​ປະກອບ ທີ່​ຮັບ​ໃຊ້​ການ​ຜະລິດ​ ເພື່ອ​ສົ່ງ​ອອກ;

       1.5. ວັດຖຸ​ປະກອນ ທີ່​ບໍ່​ສາມ​າດ ສະໜອງ ຫຼື ຜະລິດ​ໄດ້ ​ໃນ ສປປ ລາວ ​ແລະ ພາ​ຫະນະກົນ​ຈັກ ​ເພື່ອ​ເປັນ​ຊັບ​ສົມບັດ​ຄົງ​ທີ່ ​ແລະ ຮັບ​ໃຊ້​ການ​ຜະລິດ​ໂດຍ​ກົງ

       1.6. ​ເຄມີ​ເພື່ອ​ການ​ຄົ້ນຄ້ວາ, ທົດ​ລອງ, ການ​ວິ​ໄຈ​ວິທະຍາສາດ ຂອງ​ອົງການ​ຈັດ​ຕັ້ງ​ລັດ;

       1.7. ສະ​ແຕັມ​ອາ​ກອນ ຫຼື ສະ​ແຕັມ​ໄປ​ສະ​ນີ;

       1.8. ​ເຮືອບິນ ​ແລະ ວັດຖຸ​ປະກອບ​ຮັບ​ໃຊ້​ການ​ຂົນ​ສົ່ງ​ທາງ​ອາກາດ ທັງ​ພາຍ​ໃນ ​ແລະ ຕ່າງປະ​ເທດ;

       1.9. ນໍ້າມັນ​ເຊື້ອ​ໄຟ ​ແລະ ນ້ຳມັນ​ອື່ນ ​ເພື່ອ​ຮັບ​ໃຊ້​ການ​ບໍລິການ​ຂົນ​ສົ່ງ​ສາກົນ​ທາງ​ອາກາດ;

       1.10. ສິນຄ້າ ​ເພື່ຶອນຳ​ໃຊ້​ໃນ​ວຽກ​ງານທາງ​ລັດຖະການ​ຂອງ​ສະຖານ​ເອກ​ອັກຄະ​ລັດຖະທູດ, ອົງການ​ຈັດ​ຕັ້ງ​ສາກົນ​ທີ່​ປະຈຳ​ຢູ່ ສປປ ລາວ ຕາມ​ຂໍ້​ຕົກລົງ, ສັນຍາສາກົນ ​ແລະ ຕາມ​ການອະນຸຍາດຂອງກະຊວງທີ່ກ່ຽວຂ້ອງ;

       1.11. ປື້​ມ ​ແບບຮຽນ, ​ແບບ​ສອນ​, ອຸປະກອນ​ທີ່​ທັນ​ສະ​ໄໝ ​ເພື່ອ​ຮັບ​ໃຊ້ການ​ຮຽນ ການ​ສອນ, ຮັບ​ໃຊ້​ໃນ​ຫ້ອງ​ຄົ້ນ​ຄ້ວາ ​ແລະ ທົດລອງ ທີ່​ໄດ້​ຮັບ​ອະນຸຍາດ​ຈາກ​ກະຊວງ​ທີ່​ກ່ຽວຂ້ອງ

       1.12. ຄໍາ​ແທ່ງ ​ເພື່ອ​ຄ້ຳປະກັນ​ການ​ພີມ​ທະ​ນະ​ບັດ, ການ​ນຳ​ເຂົ້າ​ທະ​ນະ​ບັດ ​ແລະ ການ​ນຳ​ເຂົ້າ​ເຈ້ຍ ຫຼື ​ໂລຫະ ​ເພື່ອ​ພີ​ມທະ​ນະ​ບັດ ​ໂດຍທະນາ​ຄານ ​ແຫ່ງ ສປປ ລາວ ຫຼື ຜູ້​ໄດ້​ຮັບ​ມອບ​ສິດ​ຈາກ​ທະນາຄານ​ແຫ່ງ ສປປ ລາວ;

       1.13. ຢາ​ປິ່ນປົວ​ສັດ,​ ອະ​ໄວ​ຍະ​ວະ​ທຽມ ​ເພື່ອ​ປ່ຽນ​ຖ່າຍ​ໃສ່​ຮ່າງ​ການ​ຂອງ​ສັດ

       1.14. ຢາ​ພື້ນ​ເມື​ອງ, ອະ​ໄວ​ຍະ​ວະ​ທຽມ ​ເພື່ອ​ປ່ຽນ​ຖ່າຍ​ໃສ່​ຮ່າງກາຍ​ຂອງ​ຄົນ, ​ເລືອດ​ຄົນ,​ເຄື່ອງ​ຄ້ຳ​ຊູ, ລໍ້​ຮັບ​ໃຊ້​ຄົນ​ເຈັບ, ຄົນ​ພິການ ​ແລະ ຜູ້​ສູງ​ອາຍຸ;

       1.15. ​ເຄື່ອງມື, ອຸປະກອນ​ການ​ແພດ, ​ເຄື່ອງ​ວິ​ເຄາະ​ຕ່າງໆ ​ເພື່ອ​ຮັບ​ໃຊ້​ບໍລິການ​ສັງຄົມ​ຂອງ​ບັນດາ​ໂຮງໝໍ, ສຸກສາລາ;

       1.16. ຍານພາຫະນະ​ຮັບ​ໃຊ້​ວຽກ​ງານ​ວິຊາ​ສະ​ເພາະ, ​ເຄື່ອນ​ໄຫວ​ຮັບ​ໃຊ້​ສາທາລະນະ​ປະ​ໂຫຍ​ດ ​ເປັນ​ຕົ້ນ ລົດ​ດັບ​ເພີງ, ລົດ​ຮັບ​ສົ່ງ​ຄັນ​ເຈັບ, ລົດ​ສ້ອມ​ແປງ, ລົດ​ຖ່າຍ​ທອດ​ໂທລະພາບ, ວິທະຍຸ ​ແລ​ະ ລົດ​ວິຊາ​ສະ​ເພາະ​ອື່ນ ຂອງ​ຂະ​ແໜງ​ການ​ລັດ ​ແລະ ອົງການ​ຈັດ​ຕັ້ງ​ສັງຄົມ;

       1.17. ລົດ​ຮັບ​ໃຊ້​ວຽກ​ງານ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ ຍົກ​ເວັ້ນລົດ​ຮັບ​ໃຊ້​ວຽກ​ງານ​ບໍລິຫານ

       1.18. ​ເຄື່ອງຮັບ​ໃຊ້​ບາງ​ປະ​ເພດ ​ແລະ ຂອງ​ຂັວນ ຂອງ​ນັກ​ສຶກສາ, ພະນັກດງາ​ນ-ລັດ​ຖະກອນ, ນັກ​ການ​ທູດ ທີ່​ສຳ​ເລັດ​ວຽກ​ງານ​ຢູ່​ຕ່າງປະ​ເທດ ​ແລະ ຄົນ​ຕ່າງປະ​ເທດທີ່​ມີ​ຈຸດປະສົງ​ຍົກຍ້າຍ​ມາ​ຢູ່ ສປປ ລາວ ​ແບບ​ຖາວອນ ຕາມ​ທີ່​ກຳນົດ​ໄວ້​ໃນ​ກົດໝາຍ​ວ່າ​ດ້ວຍ​ພາສີ ຍົກ​ເວັ້ນວັດຖຸ​ສິ່​ງຂອງທີ່​ໄດ້​ຈາກ​ການ​ສືບ​ທອດ​ມູນ​ມໍລະດົກ;

       1.19. ສິນຄ້າ ​ເພື່ອ​ສະໜອງ​ໃຫ້​ແກ່​ໂຄງການ​ຊ່ວຍ​ເຫຼືອ​ລ້າ ຊຶ່ງ​ໄດ້​ກຳນົດ​ໄວ​ໃນ​ສັນຍາ, ຂໍ້​ຜູກ​ພັນ ທີ່​ລັດຖະບານ​ເຊັນ​ກັບ​ຕ່າງປະ​ເທດ.

2. ສໍາລັບ​ການ​ສະໜອງ ສິນຄ້າ ​ແລະ ການ​ບໍ​ລິ​ການ ຢູ່​ພາຍ​​ໃນ​ປະ​ເທດ:

       2.1. ພືດກະສິກຳທີ່ຍັງບໍ່ທັນໄດ້ຮັບການປຸງແຕ່ງ ຫຼື ຜ່ານການປຸງແຕ່ງຂັ້ນຕົ້ນ ເປັນຕົ້ນການຝານ, ການບົດ, ການສິເອົາເປືອກອອກ, ການເອົາເມັດອອກ;

      2.2. ສັດ​ທຸກ​ປະ​ພດທີ່​ມີ​ຊິວິດ ຫຼື ບໍ່​ມີ​ຊິວິດ ທັງ​ເປັນ​ໂຕ ຫຼື ​ເປັນ​ຊິ້ນ​ສ່ວນ ທີ່ຍັງບໍ່​ທັນ​ໄດ້​ປຸງ​ແຕ່ງ ຫຼື ​ໄດ້​ປຸງ​ແຕ່ງ​ຂັ້ນ​ຕົ້ນ ​ເພື່ອ​ເຮັດ​ໃຫ້​ຢູ່​ໃນ​ສະພາ​ບສົດ ຫຼື ບໍ່​ໃຫ້​ເນົ່າ​ເປື່ອຍ;

      2.3. ການ​ບໍລິການ ປູກ​ຕົ້ນ​ໄມ້​ໃຫ້​ເປັນ​ປ່າ, ຕົ້ນ​ໄມ້​ອຸດ​ສາ​ຫະກຳ, ຕົ້ນ​​ໄມ້​ໃຫ້​ໝາກ ​ແລະ ຕົ້ນ​ໄມ້​ເ​ປັນ​ຢາ;

      2.4. ແນວ​ພັນ​ພຶດທຸກ​ປະ​ເພດ, ​ແນວ​ພັນ​ສັດ, ຫົວອາຫານ​ສັດ, ຢາ​ວັກ​ຊິນ, ວັດຖຸ​ດິບ ຮັບ​ໃຊ້​ການ​ຜະລິດ​ຫົວອາ​ຫານ​ສັດ ​ແລະ ການ​ຜະລິດ​ຢາ​ວັກ​ຊິນ;

      2.5. ວັດຖຸ​ດິບ ທີ່​ນຳ​ໃຊ້​ເຂົ້າ​ໃນ​ການ​​ຜະ​ລິດ​ຝຸ່ນ, ອຸດສາ​ຫະກຳ​ປຸງ​ແຕ່ງ​ຜະລິດ​ຕະພັນ​ກະສິກຳ, ຝຸຸ່ນຊິ​ວະ​ພາບ, ຝຸ່ນວິທະຍາສາດ, ຢາ​ປາບ​ສັດ​ຕູ້​ພືດ ທີ່​ບໍ່​​​ເປັນ​ອັນຕະລາຍ​ຕໍ່​ລະບົບ​ນິ​ເວດ, ສຸຂະ​ພາບ ​ແລະ ຊິວິດ​ຂອງ​ຄົນ ​ແລະ ສັດ;

      2.6. ສິນຄ້າ​ໃນ​ເຮືອບິນ​ທີ່​ບໍ​ລິ​ການ​ຂົນ​ສົ່ງສາກົນ​ທາງ​ອາກາດ;

      2.7. ວັດຖຸ​ປະກອນ ​ແລະ ເຄື່ອງກົນ​ຈັກ ​ຮັບ​ໃຊ້​ວຽກງານກະສິກຳ;

      2.8. ວັດຖຸ​ດິບ ອຸປະກອນ ​ແລະ ຊິ້ນ​ສ່ວນ​ປະກອບ ທີ່​ຮັບ​ໃຊ້​ການ​ຜະລິດ ​ເພື່ອສົ່ງອອກ;

      2.9. ສະ​ແຕັມ​ອາກອນ ຫຼື ສະ​ແຕັມໄປສະ​ນີ;

      2.10. ການ​ຂົນ​ສົ່ງ​ຜ່ານ​ແດນ​ສາກົນ;

      2.11. ປື້​ມ ​ແບບຮຽນ, ​ແບບ​ສອນ, ອຸປະກອນ​ທີ່​ທັນ​ສະ​ໄໝ ​ເພື່ອ​ຮັບ​​ໃຊ້ການ​ຮຽນ ການ​ສອນ, ຮັບ​ໃຊ້​ໃນຫ້ອງ​ຄົ້ນ​ຄ້ວາ ​ແລະ ທົດ​ລ​ອງ ທີ່​ໄດ້​ຮັບ​ອະນຸຍາດ​ຈາກ​ກະຊວງ​ທີ່​ກ່ຽວຂ້ອງ;

      2.12. ໜັງສື​ພີ​ມ, ວາລະສານ​ການ​ເມືອງ ການ​ບໍລິການ ລາຍການ​ໂທລະ​ພາບ, ວິ​ທະ​ຍຸ​ກະຈາ​ຍສຽງ ທີ່​ເຜີຍ​​ແຜ່​ແນວທາງ, ນະ​ໂຍບາຍ ​ແລະ ຮັບ​ໃຊ້​ໜາ​້ທີ່​ການ​ເມືອງ​ຂອງ​ລັດ ບໍ່​ມີ​ລັກສະນະ​ທຸລະ​ກິດ;

      2.13. ການ​ບໍລິການ​ກ່ຽວ​ກັບ​ການ​ສຶກສາ ​ແລະ ກິລາ​​ ເປັນ​ຕົ້ນ ​ໂຮງຮຽນ​ລ້ຽງ​ເດັກ, ​ໂຮງຮຽນ​ອະນຸບານ, ​ໂຮງຮຽນ​ປະຖົມ, ​ໂຮງຮຽນ​ມັດທະຍົມ, ​ໂຮງຮຽນ​ວິຊາ​ຊິີບ, ວິທະຍາ​ໄລ, ວິທະຍາ​ຄານ ​ແລະ ມະຫາ​ວິທະຍາ​ໄລ, ​ໂຮງຮຽນ​ສອນ​ກິລາ ​ແລະ ກາຍຍະກຳ;

      2.14. ດອກ​ເບ້​ຍ​ເງິນ​ຝາກ, ດອກ​ເບ້​ຍ​ເງິນ​ກູ້, ລາຍ​ຮັບ​ຈາກ​ການ​ໂອນ​ເງິນ, ກຳໄລຈາກ​ອັດຕາ​ແລກປ່ຽນ ​ແລະ ທຸລະ​ກຳ​ທາງ​ດ້ານ​ການ​ເງິນ​ອື່ນ ຈາກ​ການ​ເຄື່ອນ​ໄຫວ​ຂອງ​ທະນາຄານ​ທຸລະ​ກິດ ຫຼື ສະ​ຖາ​ບັນ​ການ​ເງິ​ນອື່ນ ທີ່​ໄດ້​ຮັບ​ອະນຸຍາດ​ຈາກ​ທະນາຄານ​​ແຫ່ງ ສປປ ລາວ;

      2.15. ຜົນຕອບແທນທີ່ໄດ້ຈາກການລົງທຶນໃນຫຼັກຊັບ ທີ່ຈົດທະບຽນໃນຕະຫຼາດຫຼັກຊັບ, ການບໍລິການຂອງຕະຫຼາດຫຼັກຊັບ, ການບໍລິການຂອງສູນຮັບຝາກຫຼັກຊັບ, ການບໍລິການຂອງສະຖາບັນສື່ກາງດ້ານຫຼັກຊັບ ທີ່ໃຫ້ບໍລິການໃນຂົງເຂດວຽກງານຫຼັກຊັບ ແລະ ການບໍລິການອື່ນໃນຂົງເຂດວຽກງານຫຼັກຊັບ;

      2.16. ກິດຈະການປະກັນໄພ ສຸຂະພາບ, ຊິວິດ, ສັດລ້ຽງ ແລະ ຕົ້ນໄມ້ປູກ;

      2.17. ການບໍລິການ ກວດ, ປິ່ນປົວ ແລະ ວິໄຈ ພະຍາດ ຄົນ ແລະ ສັດ;

      2.18. ຢາປິ່ນປົວສັດ, ອະໄວຍະວະທຽມ ເພື່ອປ່ຽນຖ່າຍໃສ່ຮ່າງກາຍຂອງສັດ;

      2.19. ຢາພື້ນເມືອງ, ອະໄວຍະວະທຽມ ເພື່ອປ່ຽນຖ່າຍໃສ່ຮ່າງກາຍຂອງຄົນ, ເລືອດຄົນ, ເຄື່ອງຄ້ຳຊູ, ລໍ້ຮັບໃຊ້ ຄົນເຈັບ, ຄົນພິການ ແລະ ຜູ້ອາຍຸສູງ;

      2.20. ​ເຄື່ອງມື, ອຸປະກອນ​ການ​ເພດ, ​ເຄື່ອງ​ວິ​ເຄາະ​ຕ່າງໆ ​ໃຫ້​ແກ່​ບັນດາ​ໂຮງໝໍ, ສຸກສາລາ, ​ເພື່ອ​ຮັບ​ໃຊ້​ບໍລິການ​ສັງຄົມ;

      2.21. ສິນຄ້າ ​ແລະ ການ​ບໍລິການ ​ໃຫ້​ແກ່​ໂຄງການ​ຊ່ວຍ​ເຫຼືອ​ລ້າ ​ຊື່​ງ​ໄດ້​ກຳນົດ​ໄວ້​ໃນ​ສັນຍາ, ຂໍ້​ຜູກ​ພັນ ທີ່​ລັດຖະບານ​ເຊັນ​ກັບ​ຕ່າງປະ​ເທ​ດ.

ກະຊວງ​ການ​ເງິນ ປະສານ​ສົມທົບ​ກັບ​ຂະ​ແໜງ​ການ​ທີ່​ກ່ຽວຂ້ອງ ກຳນົດບັນ​ຊີ​ລະອຽດກ່ຽວ​ກັບ ສິນຄ້າ ​ແລະ ການ​ບໍລິການ ທີ່​ຖືກ​ຍົກ​ເວັ້ນອາກອນ​ມູນ​ຄ່າ​ເພີ່ມ.

ມາດຕາ 13 (​ໃໝ່) ສະຖານ​ທີ່​ສະໜອງ​ ສິນຄ້າ ​ແລະ ການ​ບໍລິການ ທີ່​ຖືກ​ອາກອນ​ມູນ​ຄ່າ​ເ​ພີ່ມ

ສະຖານ​ທີ່​ສະໜອງ ສິນຄ້າ ​ແລະ ການ​ບໍ​ລິ​ການ​ ທີ່​ຖືກ​ເກັບ​ອາກອນ​ມູນ​ຄ່າ​ເພີ່ມ ​ແມ່ນ ບ່ອນ​ສະໜອງ​ສິນ​ຄ້າ ​ແລະ ບໍລິການ ​ທີ່​ເກີດ​ຂື້ນ​ໃນ​ດິນ​ແດນ​ຂອງ ສປປ ລາວ ​ຊຶ່ງ​ມີ​ ດັ່ງນີ້:

1. ສະ​ຖານ​ທີ່​ສະໜອງ​ສິນຄ້າ:

               1.1. ຢູ່​ບ່ອນ​ສິນຄ້າ​ທີ່​ມີ​ຕົວ​ຈິງ​ໃນ​ເວ​ລາສະໜອງ ສຳ​ລັບ​ການ​ສະໜອງ​ສິນຄ້າ ທີ່​ບໍ່​ມີ​ການ​ຂົນ​ສົ່ງ;

               1.2. ຢູ່​ບ່ອນ​ການ​ຂົນ​ສົ່ງ​ສິນຄ້າ​ເລີ່ມຕົ້ນ ສຳລັບ​ການ​ສະໜອງ​ສິນຄ້າ ທີ່​ບໍ່​ມີ​ການ​ຂົນ​ສົ່ງ​ໂດຍ​ຜູ້​ສະໜອງ​ເອງ ຫຼື ​ໃນ​ນາມ​ຜູ້​ສະໜອງ ​ໂດຍ​ຜູ້​ຊື້ ຫຼື ​ໃນ​ນາມ​ຜູ້ຊື້;

               1.3. ຢູ່​ບ່ອນ​ສິນຄ້າ​ຖືກ​ຕິດ​ຕັ້ງ ຫຼື ປະກອບ ສຳລັບ​ການ​ສະໜອງ​ສິນຄ້າ ທີ່​ມີ​ການ​ຕິດ​ຕັ້ງ ຫຼື ປະກອບ​ໂດຍ​ຜູ້​ສະໜອງ​ເອງ​ ຫຼື ​ໃນ​ນາມ​ຜູ້​ສະໜອງ;

               1.4. ຢູ່ ສປປ ລາວ ສໍາລັບ​ສິນຄ້າທີ່​ຖືກ​ຂາຍ​ຢູ່​ຕ່າງປະ​ເທດ ​ໂດຍ​ຜູ້​ມອບ​ອາກອນ​ມູນ​ຄ່າ​ເພີ່ມ ກ່ອນ​ຖືກ​ຂົນ​ສົ່ງ ​ແລະ ຖືກ​ນຳ​ເຂົ້າ​ມາ ສປປ ລາວ ​ໂດຍ​ຜູ້​ມອບ​ເອງ ຫຼື ​ໃນ​ນາມ​ຜູ້​ມອບ ​ໃຫ້​ຜູ້​ຊື້​ທີ່​ມີ​ພູມລຳ​ເນົາ ຫຼື ຈົດ​ທະບຽນ​ສ້າງ​ຕັ້ງ​ວິ​ສາ​ຫະກິດ ຕາມ​ກົດໝາຍ​ຂອງ ສປປ ລາວ;

               1.5. ຢູ່ ສປປ ລາວ​ສຳລັບ​ການ​ສະໜອງ​ສິນຄ້າ​ຕົວ​ຈິງ​ຢູ່ ສປປ ລາວ ​ແຕ່​ຖືກ​ຂົນສົ່ງ​ໄປ​ຕ່າງປະ​ເທດ ຫຼື ​​ໄປ​ເຂດ​ເສດຖະກິດ​ພິ​ເສດ ​ໂດຍ​ຜູ້​ສະໜອງ ຫຼື ຜູ້​ຊື້​ເອງ;

               1.6. ຢູ່ ສປປ ລາວ ສໍາລັບ​ການ​ສະໜອງ​ສິນຄ້າ ກ່ອນ​ການ​ແຈ້ງ​ເສຍ​ພາສີ​ຂາ​ເຂົ້າ ​ໂດຍ​ຜູ້ນຳ​ເຂົ້າ.

    2. ສະຖານ​ທີ່​ສະໜອງ​ການ​ບໍລິການ:

            ສະຖານ​ທີ່​ສະໜອງ​ການ​ບໍລິການ ​ແມ່ນ​ຢູ່ ສປປ ລາວ ​ຊຶ່ງ​ມີ​ກໍລະ​ນິດັ່ງ​ນີ້:

           2.1. ຢູ່​ບ່ອນ​ຜູ້​ຮັບ​ການ​ສະໜອງ​ບໍລິການ ທີ່​ມີ​ພູມລຳ​ເນົາ ​ແລະ ​ໄດ້​ຈົດ​ທະບຽນ​ສ້າງຕັ້ງ​ວິ​ສາ​ຫະກິດ ຕາມ​ກົດໝາຍ​ຂອງ ສປປ ລາວ;

           2.2. ຢູ່​ບ່ອນ​ການ​ບໍລິການ​ທີ່​ປຶກສາ ພົວພັນ​ກັບ​ຂໍ້​ມູນ ຢູ່ ສປປ ລາວ ​ເຖິງ​ວ່າ​ຜູ້​ຮັບ​ການ​ສະໜອງ​ການບໍລິການ ຈະ​ມີ​ພູມລຳ​ເນົາ ​ແລະ ​ໄດ້​ຈົດ​ທະບຽນ​ສ້າງ​ຕັ້ງ​ວິ​ສາ​ຫະກິດ ຕາມ​ກົດໝາຍ​ຂອງ ສປປ ລາວ ຫຼື ບໍ່ ​ກໍ່ຕາມ;

           2.3. ຢູ່​ບ່ອນ​ການ​ບໍ​ລິການ ທີ່​ຕິດ​ພັນ​ໂດຍ​ກົງກັບ​ອະສັງຫາຣິມະ​ຊັບ​ຕັ້ງ​ຢູ່ ສປປ ລາວ ​ເຊັ່ນ ການ​ອອກ​ແບບ, ການ​ກໍ່ສ້າງ, ການ​ບຳລົງ​ຮັກສາ, ການ​ສ້ອບ​ແປ້ງ, ການ​ບໍລິການ ​ແລະ ການ​ເຄື່ອນ​ໄຫວອື່ນ;

           2.4. ຢູ່​ບ່​ອນການ​ບໍລິການ​ໃຫ້​ເຊົ່າ​ສິນຄ້າ ຫຼື ຊັບ​ສິນ​ຂອງ​ວິ​ສາ​ຫະກິດ ທີ່​ສາມາດ​ເຄື່ອນ​ຍ້າຍ​ໄດ້ ​ເຊັ່ນ ລົດ, ​ເຮືອ, ​ເຮືອບິນ ຂອງ​ຜູ້​ມອບອາກອນ​ມູນ​ຄ່າ​ເພີ່ມ ຖ້າວ່າ​ສິນຄ້າ​ນັ້ນ​ຖື​ກນຳ​ໃຊ້​ຕົວ​ຈິງ​ຢູ່ ສປປ ລາວ;

           2.5. ຢູບ່ອນ​ບໍລິການ​ຂົນ​ສົ່ງ​ໂດຍສານ ​ແລະ ສິນຄ້າ ຖ້າວ່າ​ການ​ເຄື່ອນ​ໄຫວ​ຕົວ​ຈິງ​ຫາກ​ເກີດ​ຂື້ນ​ຢູ່ ສປປ ລາວ;

           2.6. ຢູ່​ບ່ອນ​ການ​ບໍລິການ​ກິດຈະກຳ​ທາງ​ດ້ານ ວັດທະນາ​ທຳ, ສິນລະ​ປະກຳ, ກິລາ, ວິທະຍາສາດ, ການ​ສຶກສາ, ບັນ​ເທີ​ງ ຫຼື ຄ້າຍຄື​ກັນ ລວມ​ເຖິງ​ການ​ສະໜອງ​ການ​ບໍລິ​ການ​ໃຫ້​ຜູ້​ຈັດ​ງານ​ທີ່​ກ່ຽວຂ້ອງ​ກັບ​ກິດ​ຈະ​ກຳ​ເຫຼົ່າ​ນັ້ນ;

           2.7. ຢູ່​ບ່​ອນການ​ບໍລິການ ດ້ານ​ໄປ​ສະ​ນີ ​ແລະ ​ໂທລະ​ຄົມມະ​ນາ​ຄົມ ຖ້າວ່າ​ບ່ອນ​ສະ​ໜອງ​ການ​ບໍລິການ​ດັ່ງກ່າວ ຫາກ​ຈົດ​ທະບຽນ​ສ້າງ​ຕັ້ງວິ​ສາ​ຫະກິດ ຕາມ​ກົດໝາຍ​ຂອງ ສປປ ລາວ ​ເຖິງ​ວ່າຜູ້​ຮັບການ​ສະໜອງ​ການ​ບໍລິການ​ຈະ​ຢູ່​ພາຍ​ໃນ ຫຼື ຢູ່​ຕ່າງປະ​ເທດ​ກໍ​ຕາມ;

                      2.8. ຢູ່​ບ່ອນ​ການ​ບໍລິການ​ທ່ອງ​ທ່ຽວ ທີ່​ຂາຍ​ໃນ​ລາຄາ​ລວມ​ເອົາ​ຄ່າ​ບໍລິການຫຼາຍ​ຢ່າງ.

ໝວດ​ທີ​ 2

ການ​ຄິດ​ໄລ່​ອາກອນ​ມູນ​ຄ່າ​ເພີ່ມ

ມາດຕາ 14  (ປັບປຸງ) ວິທີ​ຄິດ​ໄລ່​ອາກອນ​ມູນ​ຄ່າ​ເພີ່ມ

ວິທີ​ຄິດ​ໄລ່​ອາກອນ​ມູນ​ຄ່າ​ເພີ່ມ ​ໃຫ້​ເອົາ​ພື້ນຖານ​ການ​ຄິດ​ໄລ່​ອາກອນ​ມູນ​ຄ່າ​ເພີ່ມ ຄູນ​ອັດຕາ​ອາກອນ​ມູນ​ຄ່າ​ເພີ່ມ.

ມາດຕາ 15 (ປັບປຸງ) ພື້ນຖານ​ຄິດ​ໄລ່​ອາກອນ​ມູນ​ຄ່າ​ເພີ່ມ

     ພື້ນ​ຖານ​ການ​ຄິດ​ໄລ່​ອາກອນ​ມູນ​ຄ່າ​ເພີ່ມ ​ມີ ​ດັ່ງ​ນີ້:

1. ລາຄາ​ຊື້-ຂາຍ​ຕົວ​ຈິງ​ຮອດ​ຊາຍ​ແດນ ບວກ​ພາສີ​ຂາ​ເຂົ້າ ບວກ​ອາກອນ​ຊົມ​ໃຊ້ (ຖ້າ​ມີ) ສຳລັບ​ການ​ນຳ​ເຂົ້າ​ສິນຄ້າ;
2. ມູນ​ຄ່າ​ການ​ສະໜອງ ສິນ​ຄ້າ ​ແລະ ການ​ບໍລິການ ບວກ​ອາກອນ​ຊົມ​ໃຊ້ ( ຖ້າ​ມີ) ​ແຕ່​ບໍ່​ລວມອາກອນ​ມູນ​ຄ່າ​ເພີ່ມ ສຳລັບ​ການ​ສະໜ​ອງ ສິນຄ້າ ​ແລະ ການບໍລິ​ການ ພາຍ​ໃນ​ປະ​ເທດ;
3. ມູນ​ຄ່າ​ການ​ຊື້​ການ​ບໍລິການ​ຕົວ​ຈິງ ທີ່​ບໍ່​ລວມອາກອນ​ມູນ​ຄ່າ​ເພີ່ມ ສຳລັບ​ການ​ສະໜອງ​ການ​ບໍລິການ ຈາກ​ຜູ້​ບໍ່​ມີ​ພູມລຳ​ເນົາ ​ແລະ ບໍ່​ໄດ້​ຈົດ​ທະບຽນ​ສ້າງ​ຕັ້ງ​ວິ​ສາ​ຫະກິດ ຕາມ​ກົດໝາຍ​ຂອງ ສປປ ລາວ;
4. ມູນ​ຄ່າ​ຊື້​ສິນ​ຄ້າ ​ແລະ ການ​ບໍລິການ​ຕົວ​ຈິງ ທີ່​ບໍ່​ລວມອາກອນ​ມູນ​ຄ່າ​ເພີ່ມ ສຳລັບ​ການ​ສະໜອງ​ສິນຄ້າ ​ແລະ ການ​ບໍລິການ ຈາກ​ຜູ້​ມີ​ພູມລຳ​ເນົາ ​ແລະ ບໍ່​ໄດ້​ຈົດ​ທະ​ບຽນ​ສ້າງ​ຕັ້ງ​ວິ​ສາ​ຫະກິດ ຕາມ​ກົດໝາຍ​ຂອງ ສປປ ລາວ
5. ລາຄາ​ຊື້-ຂາຍ​ຕົວ​ຈິງ​ຮອດ​ຊາຍ​ແດນ ບວກ​ພາສີ​ຂາ​ເຂົ້າ ບວກ​ອາກອນ​ຊົມ​ໃຊ້ (ຖ້າ​ມີ) ບວກ​ກຳ​ໄລ​ລວມ ສຳລັບ​ຜູ້​ບໍ່​ຢູ່​ໃນ​ລະບົບ​ອາກອນມູນ​ຄ່າ​ເພີ່ມ;
6. ມູນ​ຄ່າ​ການ​ສະໜອງ ສິນຄ້າ ​ແລະ ການ​ບໍລິການ ຕາມ​ຕົວ​ຈິງ ຫຼື ທ້ອງ​ຕະຫຼາດ ບວກ​ອາກອນ​ຊົມ​ໃຊ້ (ຖ້າ​ມີ) ສຳລັບ ການ​ຜູ້​ຊົມ​ໃຊ້​ເອງ, ​ແລກປ່ຽນ ຫຼື ​ໃຫ້​ລ້າ;
7. ມູນ​ຄ່າ​ການ​ສະຫ​ນອງ ​ສິນຄ້າ ​ແລະ ການ​ບໍລິການ​ຕົວ​ຈິງ ບວກ​ອາກອນ​ຊົມ​ໃຊ້ (ຖ້າ​ມີ) ສຳລັບ​ການ​ສະໜອງ​ສິນ​ຄ້າ ​ແລະ ການ​ບໍລິການ ຜ່ານ​ລະບົບ​ເອ​ເລັກ​ໂຕຣ​ນິກ.

ໃນ​ກໍລະ​ນິຜູ້​ມອບ​ອາກອນ​ມູນ​ຄ່າ​ເພີ່ມ​ມີ​ລາຍ​ຮັບ​ສຳຮອງ ກໍ​ໃຫ້​ລວມ​ເຂົ້າພື້ນຖານ​ການ​ຄິດ​ໄລ່​ອາກອນ​ມູນ​ຄ່າ​ເພີ່ມ​ອັນ​ດຽວ.

ຖ້າວ່າ​ລາຍ​ຮັບ​ຈາກ​ການ​ດຳ​ເນີ​ນທຸລະ​ກິດ ຫາກ​ເປັນ​ເງິນຕາ​ຕ່າງປະ​ເທດ ກໍ​ໃຫ້​ຄິດ​ໄລ່​ເປັນ​ກີບ ຕາມ​ອັດຕາ​ແລກປ່ຽນ​ທາງ​ການ​ຂອງ​ ສປປ ລາວ ​ໃນ​ເວລາ​ນັ້ນ.

ມາດຕາ 16 ການ​ດັດ​ແກ້​ພື້ນ​ຖານ​ການ​ຄິດ​ໄລ່​ອາກອນ​ມູນ​ຄ່າ​ເພີ່ມ

      ພື້ນຖານ​ການ​ຄິດ​ໄລ່​ອາກອນ​ມູນ​ຄ່າ​ເພີ່ມ ຈະ​ຖືກ​ດັດ​ແກ້​ຕາມ​ແຕ່​ລະ​ກໍລະນີ ດັ່ງ​ນີ້:

1. ລູກ​ຄ້າ​ສົ່ງ​ສິນຄ້າ ຫຼື ຄ່າ​ບໍ​ລິ​ການ​ຄືນ ບາງ​ສ່ວນ ຫຼື ທັງໝົດ;
2.  ຜູ້​ມອບ​ອາກອນມູນ​ຄ່າ​ເພີ່ມຍົກ​ເລີກ​ການ​ຊື້​ສິນ​ຄ້າ ຫຼື ການ​ບໍລິການ​ຕາມ​ພາຍຫຼັງ;
3. ຜູ້​ມອບ​ອາກອນ​ມູນ​ຄ່າ​ເພີ່ມ ​ໄດ້​ມີ​ການ​ຫຼຸດ ຫຼື ​ເພີ່ມ​ລາຄາ​ສິນຄ້າ ຫຼື ການ​ບໍລິການ​ຕາມ​ພາຍຫຼັງ;

ການ​ດັດ​ແກ້​ພື້ນຖານ​ການ​ຄິດ​ໄລ່​ອາກອນ​ມູນ​ຄ່​າ​ເ​​ພີ່​ມ ຕາມ​ແຕ່​ລະ​ກໍລະນີ​ທີ່​ໄດ້​ກຳນົດ​ໄວ້​ເທິງ​ນີ້ ຈະ​ຖືກ​ປະ​ຕິ​ບັດ​ໄດ້ ກໍ່​ຕໍ່​ເມື່ອ​ຜູ້​ສະໜອງ​ໄດ້​ອອກ​ໃບ​ເກັບ​ເງິນ​ທີ່​ມີ​ອາກອນ​ມູນ​ຄ່າ​ເພີ່ມ ​ແລະ ​ໄດ້​ແຈ້ງ​ມອບ​ຈຳນວນ​​ເງິນ​ອາກອນ​ມູນ​ຄ່າ​ເພີ່ມ ຕາມ​ກົດໝາຍ.

ມາດຕາ 17 (ປັບປຸງ) ອັດຕາອາກອນ​ມູນ​ຄ່າ​ເພີ່ມ

       ອັດຕາ​ອາກອນ​ມູນ​ຄ່າ​ເພີ່ມ ​ມີ ​ດັ່ງ​ນີ້:

1.  ອັດຕາ ສິບ ສ່ວນ​ຮ້ອຍ (10%) ສໍາລັບ​ການ​ນຳ​​ເຂົ້າ​ສິນຄ້າ, ການ​ສະໜອງ ສິນຄ້າ ​ແລະ ການ​ບໍລິການ ທີ່​ຖືກ​ເກັບ​ອາກອນ​ມູນ​ຄ່າ​ເພີ່ມ​ຢູ່​ພາຍ​ໃນ ສປປ ລາວ;
2. ອັດຕາ ສູນ ສ່ວນ​ຮ້ອຍ (0%) ສໍາລັບ​ການ​ສົ່ງ​ສິນຄ້າ​ໄປ​ປະ​ເທ​ດຕ່າງໆ.

ມາ​ດຕາ 18 ການ​ຄິດ​ໄລ່ ​ແລະ ​ເກັບ​ອາກອນ​ມູນ​ຄ່າ​ເພີ່ມ

     ການ​ຄິດ​ໄລ່ ​ແລະ ​ເກັບ​ອາກອນ​ມູນ​ຄ່າ​ເພີ່ມ ​ໃຫ້​ປະຕິບັດ​ຕາມ​ແຕ່​ລະ​ກໍລະ​ນີ ​ດັ່ງນີ້:

1. ການ​ນຳ​ເຂົ້າ​ສິນຄ້າ​ຈາກ​ຕ່າງປະ​ເທດ ​ໃຫ້​ຄິດ​ໄລ່ ​ແລະ ​ເກັບ​ໃນ​ເວລາ​ແຈ້ງ​ພາສີ​​ເຂົ້າ;
2. ການ​ສະໜອງ ​ສິນຄ້າ ​ແລະ ການ​ບໍລິການ ຢູ່​ພາຍ​ໃນ​ປະ​ເທດ ​ໃຫ້​ຄິດ​ໄລ່ ​ແລະ ​ເກັບ​ໃນ​ເວລາ​ການ​ສະໜອງ​ສິນຄ້າ ​ແລະ ການ​ບໍ​ລິ​ການ;
3. ສິນຄ້າ​ ​ແລະ ການ​ບໍ​ລິການ ທີ່​ຊົມ​ໃຊ້​ດ້ວຍ​ຕົນ​ເອງ ຫຼື ການ​ໃຫ້​ລ້າ ​ໃຫ້​ຄິດ​ໄລ່ ​ແລະ ​ເກັບ​ໃນ​ເວລາ​ມີ​ການ​ນຳ​ໃຊ້​ຕົວ​ຈິງ ຫຼື ​ໃນ​ເວລາ​ທີ່​ມີ​ການ​ໂອນ ຫຼື ມອບ​ກຳມະສິດ;
4. ການ​ຊື້​ການ​ບໍລິການ​ຈາກ ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ບໍ່​ມີ​ພູມລຳ​ເນົາ ຫຼື ມີ​ພູມລຳ​ເນົາ​ແຕ່​ບໍ່​ໄດ້​ຈົດ​ທະບຽນ​ສ້າງ​ຕັ້ງ​ວິສາ​ຫະກິດ ຕາມ​ກົດໝາຍ​ຂອງ ສປປ ລາວ ​ໃຫ້​ຫັກ ​ແລະ ​ເກັບ​ເງິນ​ອາກອນ​ມູນ​ຄ່​າ​ເພີ່​ມ​ໄວ້​ໃນເວລາມີການເບີກຈ່າຍ​ເງິນ​ໃຫ້​ແກ່​ບຸກຄົນ, ນິຕິບຸກຄົນ ຫຼື ການຈັດ​ຕັ້ງ​ດັ່ງກ່າວ.

ມາດຕາ 19​ ກໍານົດ​ເວລາ​ຄິດ​ໄລ່​ເກັບ​ອາກອນ​ມູນ​ຄ່າ​ເພີ່ມ​ຄືນ

ເຈົ້າ​ໜ້າທີ່ສ່ວຍສາອາກອນ ສາມາດຄິດໄລ່ເກັບອາກອນມູນຄ່າເພີ່ມຄືນຢ້ອນຫຼັງໄດ້ ພາຍໃນເວລາ ສາມປີ ນັບແຕ່ວັນໄດ້ສະໜອງ ສິນຄ້າ ແລະ ການບໍລິການ ທີ່ມີອາກອນມູນຄ່າເພີ່ມເກີດຂື້ນ ຫາກເຫັນວ່າມີຫຼັກຖານຢັ້ງຢືນຊັດເຈນ ແລະ ຂໍ້ມູນພຽງພໍ.

ອາກອນມູນຄ່າເພີ່ມທີ່ຄິດໄລ່ເກັບຄືນນັ້ນ ຕ້ອງມອບພາຍໃນເວລາ ສິບຫ້າ ວັນ ນັບແຕ່ວັນທີ່ລັດຖະການສ່ວຍສາອາກອນ ໄດ້ອອກເອກະສານຄິດໄລ່ທາງການ ເປັນຕົ້ນໄປ.

ໝວດທີ 3

ການຫັກ ແລະ ການສົ່ງຄືນ ອາກອນມູນຄ່າເພີ່ມ

ມາດຕາ 20 (​ໃໝ່​) ການຫັກ​ອາກອນ​ມູນ​ຄ່າ​ເພີ່ມ

ການ​ຫັກ​ອາກອນ​ມູນ​ຄ່າ​ເພີ່​ມ ​ແມ່ນ ການ​ຫັກ​ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ ຄືນ​ໃຫ້​ຜູ້​ມອບ​ອາກອນ​ມູນ​ຄ່າ​ເພີ່ມ.

ມາດ​ຕາ 21 ຜູ້​ມີ​ສິດ​ຫັກ​ອາກອນ​ມູນ​ຄ່າເພີ່ມ​ສົ້ນ​ເຂົ້າ

ຜູ້​ມີ​ສິດ​ຫັກ​ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ ​ແມ່ນ ຜູ້​ມອບ​ອາກອນ​ມູນ​ຄ່າ​ເພີ່ມ​ທີ່​ປະຕິບັດ​ຖືກຕ້ອງ ​ແລະ ຄົບ​ຖ້ວນ ຕາມ​ທີ່​ກຳນົດ​ໄວ້​ໃນ​ມາດຕາ 22 ​ແລະ 23 ຂອງ​ກົດໝາຍ​ສະບັບ​ນີ້.

ມາດຕາ 22 (ປັບປຸງ) ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ​ທີ່​ອະນຸຍາດ​ໃຫ້​ຫັກ

ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ​ທີ່​ອະນຸຍາດ​ໃຫ້​ຫັກ ​ແມ່ນ ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ ທີ່​ຕິດ​ພັນ​ໂດຍ​ກົງ​ກັບ ​ສິນຄ້າ ​ແລະ ການ​ບໍລິການ ທີ່​ນຳ​ໃຊ້​ເຂົ້າ​ໃນ​ການ​ຜະລິດ, ການ​ດຳ​ເນີ​ນທຸລະ​ກິດ ຫຼື ການ​ບໍລິການ​ທີ່​ຖືກ​ເສຍ​ອາກອນ​ມູນ​ຄ່າ​ເພີ່ມ.

ມາດ​ຕາ 23 (ປັບປຸງ) ​ເງື່ອນໄຂ​ການ​ຫັກ​ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ

       ເງື່ອນ​ໄຂ​ການ​ຫັກ​ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ ມີ ດັ່ງ​ນີ້:

1. ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ດຳ​ເນີ​ນທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ ມີ​ການ​ແຈ້ງມອບ​ອາກອນ​ມູນ​ຄ່າ​ເພີ່ມ​ເປັນ​ປົກກະຕິ​ແຕ່ລະ​ເດືອນ;
2. ເອກະສານ​ຢັ້ງຢືນການ​ຂໍຫັກ ຖືກຕ້ອງ ​ແລະ ຄົບ​ຖ້ວນ ​ເປັນ​ຕົ້ນ ​ໃບ​ເກັບ​ເງິນ, ​ໃບຮັບ​ເງິນ, ​ໃບ​ແຈ້ງ​ມີ​ເອກະສານ​ຢັ້ງຢືນ​ອື່ນ;
3. ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ ຕ້ອງ​ເລີ່​ມຫັກ​ໃນ​ເດືອນ​ທີ່​ມີ​ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ​ເກີດ​ຂື້ນ​ຖ້າ​ຫັກບໍ່​ໝົດ​ພາຍ​ໃນ​ສາມ​ເດືອ​ນ ​ແມ່ນ​ສາມາດ​ຂໍ​ຄືນ​ເປັນ​ເງິນ​ໄດ້;

ບຸກຄົນ, ນິຕິບຸກຄົນ ຫຼື ການ​ຈັດ​ຕັ້ງ ທີ່​ດຳ​ເນີ​ນທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ​ ທີ່​ມີ​ລາຍ​ຮັບ​ທຸລະ​ກິດ​ປະຈຳ​ປີ ບໍ່​ເກີນ ສີ່​ຮ້ອຍລ້ານ ກີບ ​ໃຫ້​ຫັກ​ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ​ແບບກຳນົດ ​​ໂດ​ຍກະຊວງ​ການ​ເງິນ ​ເປັນ​ຜູ້​ວາງ​ອອກ.

ສຳລັບ ການ​ຫັກ​ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ ຂອງ​ກິດຈະກຳ​ກ່ຽວ​ກັບ​ຊັບ​ພະຍາກອນ​ທຳ​ມະ​ຊາດ ​ແລະ ພະນັກງານ​ໄຟຟ້ານັ້ນ ​ໄດ້​ກຳນົດ​ໄວ້​ໃນ​ລະບຽບ​ການ​ຕ່າງຫາກ.

ມາດຕາ 24 (ປັບປຸງ) ອາກອນ​ມູນ​ຄ່າ​ເພີ່ມສົ້ນ​ເຂົ້າ​ທີ່ບໍ່​ອະນຸຍາດ​ໃຫ້​ຫັກ

  ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ​ທີ່​ບໍ່ອະນຸຍາດ​ໃຫ້​ຫັກ ​ແມ່ນ ອາກອນມູນ​ຄ່າ​ເພີ່ມ​ທີ່​ໄດ້​ຈ່າຍ​ໃນ​ເວລາ​ນຳ​ເຂົ້າ ​ສິນຄ້າ, ຊື້​ສິນຄ້າ ​ແລະ ​ບໍລິການ ຕາມ​ແຕ​່ລະ​ກໍ​ລະ​ນີ ດັ່ງນີ້:

1. ອາກອນ​ມູນ​ຄ່າ​ເພີ່ມ​ສົ​້ນ​ເຂົ້າ ທີ່​ຕິດ​ພັນ​ກັບ​ການ​ສະໜ​ອງ ທີ່​ຖືກ​ຍົກ​ເວັ້ນອາກອນ​ມູນ​ຄ່າ​ເພີ່ມ;
2. ອາກອນມູນ​ຄ່າ​ເພີ່ມ​ສົ້ນ​ເຂົ້າທີ່​ໄດ້​ຮັບ​ການ​ຫັກ ຫຼື ສົ່ງ​ຄືນ​ແລ້ວ;
3. ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ ຈາກ​ການ​ປະຕິບັດ​ບໍ່​ຖືກຕ້ອງ ​ແລະ ບໍ່​ຄົບ​ຖ້ວນ ຕາມ​ທີ່​ໄດ້​ກຳນົດ​ໄວ້​ໃນມາດຕາ 22 ​ແລະ 23 ຂອງ​ກົດໝາຍ​ສະບັບ​ນີ້;
4. ອາກອນ​ມູນ​ຄ່າ​ເພີ່ມ​ສົ້ນ​ເຂົ້າຂອງ​ສິນຄ້າ ​ແລະ ການ​ບໍລິການ ທີ່​ບໍ່​ໄດ້ນຳ​ໃຊ້​ໂດຍ​ກົງ​ເຂົ້າ​ໃນ​ການ​ດຳ​ເນີ​ນທຸລະ​ກິດ ຊຶ່ງ​ຕິດ​ພັນ​ກັບ​ລາຍ​ຈ່າຍ​ຂອງ​ຜູ້​ມອບ​ອາກອນ​ມູນ​ຄ່າ​ເພີ່ມ ມີ ດັ່ງ​ນີ້:

• ລາຍ​ຈ່າຍ​ທີ່​ຕິດ​ພັນ​ກັບ​ການ​ຊື້ ສິນ​ຄ້າ ​ແລະ ການ​ບໍລິການ ທີ່​ບໍ່​ເປັນ​ການ​ດຳ​ເນີນ​ທຸລະ​ກິດ​ໂດຍ​ກົງ ​ເປັນ​ຕົ້ນ ການຈັດ​ງານ​ລ້ຽງ, ງານ​ສ້າງສັນ, ງານ​ປະ​ເພນີ, ສາສະໜາ, ສິ່ງ​ຫຼຸ​ຫຼາ, ຟູ​ມ​ເຟືອຍ, ການ​ພັກຜ່ອນ, ການ​ເຕັ້ນ​ລຳ ຫຼື ບັນ​ເທິງ, ການ​ຕີ​ກ໊ອບ ​ແລະ ກິລາ ອື່ນໆ, ຂອງ​ຂັວນ, ລາງວັນ;
• ລາຍ​ຈ່າຍ​ນອກ​ທຸູລະ​ກິດ ​ແລະ ລາຍ​ຈ່າຍ​ສ່ວນ​ຕົວ​ຂອງ​ເຈົ້າ​ຂອງ​ທຸລະ​ກິດ, ຜູ້ຖື​ຮຸ້ນ, ຂາ​ຮຸ້ນ ​ແລະ ພະນັກງານ​ຂອງ​ຕົນ;
• ລາຍ​ຈ່າຍ​ຂອງ​ທຸລະ​ກິດ ທີ່​ບໍ່​ມີ​ເອກະສານ​ຢັ້ງຢືນ ຫຼື ມີ​ເອກະສານ​ຢັ້ງຢືນ ​ແຕ່ບໍ່​ຖືກຕ້ອງ ​ແລະ ບໍ່ຄົບ​ຖ້ວນ;
• ລາຍ​ຈ່າຍ​ທີ່​ຕິດ​ພັນ​ກັບ​ອັດຕາ​ສ່ວນ​ທີ່​ບໍ່​ເປັນ​ລາຍ​ຈ່າຍ ກ່ອນ​ການ​ຄິດ​ໄລ່ອາກອນກຳ​ໄລ​ເປັນ​ຕົ້ນ ຄ່າ​ເດີນທາງ, ຄ່າ​ຮັບ​ແຂກ, ຄ່າ​ໂທລະສັບ ​ແລະ ຄ່າ​ໂຄ​ສະນາ;
• ລາຍ​ຈ່າຍ​ທີ່​ຕິດ​ພັນ​ກັບ​ຊັບ​ສົມບັດ​ຄົງ​ທີ່ ທີ່​ບໍ່​ໄດ້​ຈົດ ຫຼື ​ໄດ້​ຈົດ​ເປັນຊັບ​ສິນ​ຂອງ​ວິ​ສາ​ຫະກິດ ​ແຕ່​ບໍ່​ໄດ້​ນຳ​ໃຊ້​ເຂົ້າ​ໃນ​ການ​ດຳ​ເນີ​ນທຸລະ​ກິດ​ທັງ​ໝົດ ຫຼື ບາງ​ສ່ວນ ​ເຊັ່ນ ​ເອົາ​ໃຫ້​ຜູ້​ຖື​ຮຸ້ນ, ຜູ້ອຳນວຍການ, ຜູ້​ຈັດການ ຫຼື ພະນັກງານ ນຳ​ໃຊ້​ສ່ວນ​ຕົວ ຫຼື ມີ​ເກີນ​ຄວາມ​ຕ້ອງການ​​ໃນ​ການ​ດຳ​ເນີ​ນທຸລະ​ກິດ;
• ລາຍ​ຈ່າຍ​ທີ່​ຕິດ​ພັນ​ກັບ ​ໄຟຟ້າ, ນ້ຳ​ປະປາ, ນ້ຳມັນ​ເຊື້ອ​ໄຟ, ອາຍ​ແກັດ ສະ​ເພາະ​ອັດຕາ​ສ່ວນ​ທີ່​ບໍ່​ໄດ້ນຳ​​ໃຊ້​ໂດຍ​ກົງ​ເຂົ້າ​ໃນ​ການ​ດຳ​ເນີນ​ທຸລະ​ກິດ;
• ລາຍ​ຈ່າຍ​ທີ່​ຕິດ​ພັນ​ກັບ ​ຄອມ​ພີ​ວ​ເຕີ, ​ໂນ​ດບຸກ, ​ແທັບ​ເລັດ, ​ໂທລະສັບ​ມື​ຖື ທີ່​ຈົດ ຫຼື ບໍ່​ຈົດ​ເປັນ​ຊັບ​ສິນ​ຂອງ​ຜູ້​ມອບ​ອາກອນ​ມູນ​ຄ່າ​ເພີ່ມ;
• ສິນຄ້າ ທີ່​ນຳ​ໃຊ້​ສ່ວນ​ຕົວ ​ເຊັ່ນ ຢາ​ສູບ, ​ເຄື່ອງ​ດື່ມ​ທີ່​ມີ​ທາດ​ເຫຼົ້າ, ອາຫານ ​ແລະ ​ເຄື່ອງ​ດື່ມ​ທຸກ​ຊະນິດ ​ແລະ ຜະ​ລິດ​ຕະພັນ​ອື່ນ.

​ມາ​ດຕາ 25 (ປັບປຸງ) ຜູ້​ມີ​ສິດ​ຂໍ​ອາກອນ​ມູນ​ຄ່າ​ເພີ່ມ​ຄືນ       

    ຜູ້​ມີ​ສິດ​ຂໍ​ອາກອນ​ມູນ​ຄ່າ​ເພີ່ມ​ຄືນ ​ມີ ດັ່ງ​ນີ້:

1. ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ດຳ​ເນີ​ນທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ ທີ່​ສົ່ງ​ອອກ​ສິນຄ້າ ຕາມ​ກິດ​ຈະ​ກຳທີ່​ໄດ້​ກຳນົດ​ໄວ້ໃນ​ມາ​ດຕາ 11 ຂອງ​ກົດໝາຍ​ສະບັບ​ນີ້ ​ໄປ​ຕ່າງປະ​ເທ​ດ ຫຼື ​ເຂດ​ເສດຖະກິດ​ພິ​ເສດ;
2. ບຸກຄົນ, ນິຕິ​ບຸກຄົນ ຫຼື ການຈັດ​ຕັ້ງ​ ທີ່​ດຳ​ເນີ​ນທຸລະ​ກິດ​ຢູ່​ໃນ​ລະ​ບົບອາກອນ​ມູນ​ຄ່າ​ເພີ່ມ ທີ່​ຄວບ​ກິດຈະ​ການ, ​ແຍກ​ກິດຈະການ, ຢຸດ​ເຊົາ​ ຫຼື ລົ້ມ​ລະລາຍ ​ຕາມ​ກົດໝາຍ;
3. ບຸກຄົນ, ນິຕິບຸ​ກຄົນ ຫຼື ການຈັດ​ຕັ້ງ ທີ່​ດຳ​ເນີ​ນທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ ຊຶ່ງ​ໄດ້​ໄລ່​ລຽງ​ເປັນ​ແຕ່ລະ​ເດືອນ ​ແຕ່​ຫັກ​ອາກອນ​ມູນ​ຄ່າ​ເພີ່ມ​ເຂົ້າ​ບໍ່​ໝົດ ​ພາຍ​ໃນ​ເວລາ ສາມ​ເດືອນ ນັບ​ແຕ່​ເດືອນ​ທີ່​ມີ​ອາ​ກອນ​ມູນ​ຄ່າ​ເພີ່ມ​ເກີດ​ຂື້ນ;
4. ອົງການ​ຈັດ​ຕັ້ງ​ສາກົນ, ສະຖານ​ເອັກ​ອັກຄະ​ລັດ​ຖະ​ທູດ, ສະຖານກົງສູນ ​ແລະ ນັກ​ການ​ທູດ​ຕາມ​ການ​ຢັ້ງຢືນ​ຂອງ​ກະຊວງ​ການ​ຕ່າງປະ​ເທດ;
5. ຜູ້​​ໂດຍສານ ​ແລະ ນັກ​ທ້ອງ​ທ່ຽວ​ຕ່າງປະ​ເທດ ຊື້​ສິນຄ້າ​ຢູ່ ສປປ ລາວ ​ແລະ ນຳ​ສິນຄ້າ​ດັ່ງກ່າວ​ໄປ​ຊົມ​ໃຊ້​ຢູ່​ຕ່າງປະ​ເທດ ​​ໂດຍ​ຜ່ານ​ດ່ານສະໜາມ​ບິນ​ສາກົນ ຂອງ ສປປ ລາວ;
6. ບຸກຄົນ, ນິຕິບຸກຄົນ ທີ່​ໄດ້​ມອບ​ອາກອນ​ມູນ​ຄ່າ​ເພີ່ມ ​ເກີນ​ກວ່າ​ທີ່​ກຳນົດ​ໄວ້​ໃນ​ກົດໝາຍ.

ມາ​ຕາດ 26 (ປັບ​ປຸງ) ອາກອນ​ມູນ​ຄ່າ​ເພີ່ມ​ທີ່​ອະ​ນຸຍາດ​ໃຫ້​ສົ່ງ​ຄືນ

          ອາກອນ​ມູນ​ຄ່າ​ເພີ່ມ​ທີ່​ອະນຸຍາດ​ໃຫ້ສົ່ງ​ຄືນ ມີ ດັ່ງ​ນີ້:

1. ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ ຂອງ​ກິດ​ຈະ​ກຳ​ທີ່​ກ​ຳນົດ​ໄວ້​ໃນ​ມາດຕາ​ທີ່ 11 ຂອງ​ກົດໝາຍ​ສະບັບ​ນີ້ ສຳລັບ​ສິນຄ້າ​ທີ່​ສົ່ອອກ​ໄປ​ຕ່າງ​ປະ​ເທດ;
2. ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ ທີ່​ຍັງ​ເຫຼືອ​ໃນ​ເວລາ​ຄວບ​ກິດຈະການ, ​ແຍ​ກກິດຈະການ, ຢຸດ​ເຊົາ​ກິດຈະ​ການ, ຫຼື ລົ້ມ​ລະລາຍ ຕາມ​ກົດໝາຍ;
3. ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ ຊຶ່ງ​ໄດ້​​ໄລ່​ລຽງ​ເ​ປັນ​ແຕ່ລະ​ເດືອນ ​ແຕ່​ບໍ່​ຫັກ​ໝົດ ພາຍ​ໃນ​ເວລາ ສາມ​ເດືອນ ນັບ​ແຕ່​ເດືອນ​ທີ່​ມີ​ອາກອນ​ມູນ​ຄ່າ​ເພີ່ມ​ຂື້ນ;
4. ອາກອນ​ມູນ​ຄ່າ​​ເພີ່ມ​ທີ່​ມອບ​ເກີນ;
5. ອາກອນ​ມູນ​ຄ່າ​ເພີ່ມ​ທີ່​ຕິດ​ພັນ​ກັບ​ການ​ຊື້ສິນຄ້າ ຢູ່​ພາຍ​ໃນ​ປະ​ເທດ ຂອງ​ອົງການ​ຈັດ​ຕັ້ງ​ສາກົນ, ສະຖານ​ເອກ​ອັກຄະ​ລັດຖະທູດ, ສະຖານກົງສູນ ແລະ ນັກການທູດ;
6. ອາກອນ​ມູນ​ຄ່າ​ເພີ່​ມທີ່​ຕິດ​ພັນ​ກັບ​ການ​ຊື້​ສິນຄ້າ​ຢູ່ ສປປ ລາວ ຂອງ​ນັກ​ທ່ອງທ່ຽວ ​ແລະ ຜູ້​ໂດຍສານ​ຂາ​ອອກ ຊາວ​ຕ່າງປະ​ເທດ​ ເພື່ອ​ໄປ​ຊົມ​ໃຊ້​ຢູ່​ຕ່າງປະ​ເທດ​.

ວິທີ​ການ, ຂັ້ນ​ຕອນ ​ແລະ ​ເງື່ອນ​ໄຂ ການ​ສົ່ງ​ຄືນ​ອາກອນ​ມູນ​ຄ່າ​ເພີ່ມ ສຳ​ລັບ ຂໍ້​ທີ 5 ​ແລະ ຂໍ້​ທີ 6 ຂອງ​ມາດຕາ​ນີ້ ​ໄດ້​ກຳນົດ​ໄວ້​ໃນ​ລະບຽບ​ການ​ຕ່າງໆ.

 ມາດຕາ 27 (ປັບປຸງ) ​ເງື່ອນ​ໄຂ​ຂອງ​ການ​ສົ່ງ​ຄືນ​ອາກອນ​ມູນ​ຄ່າ​ເພີ່ມ                           

ການສົ່ງ​ຄືນ​ອາກອນ​ມູນຄ່າ​ເພີ່ມ ​ໃຫ້​ປະຕິບັດ​ຕາມ​ເງື່ອນ​ໄຂ ດັ່ງ​ນີ້:

1. ບຸກຄົນ, ນິຕິບຸກຄົນ ຫຼື ການຈັດຕັ້ງ ​ທີ່​ດຳ​ເນີ​ນທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ ທີ່​ມີ​ການ​ສົ່ງ​ອອກ​ສິນຄ້າ​ໄປ​ຕ່າງປະ​ເທດ ​ຕ້ອງ:

• ຖືບັນຊີ​ຖືກຕ້ອງ​ຕາມ​ກົດໝາຍວ່າ​ດ້ວຍ​ການ​ບັນຊີ;
• ນຳ​ໃຊ້​ໃບ​ເກັບ​ເງິນ​ຖືກຕ້ອງ​ຕາມ​ລະບຽບ​ການ​ກ່ຽວ​ກັບ​ໃບ​ເກັບ​ເງິນ;
•  ມີ​ສັນ​ຍາ​ຊື້-ຂາຍ​ທີ່​ກ່ຽວ​ຂ້ອງ, ​ເອກະສານ​ຢັ້ງຢືນ​ການ​ສົ່ງ​ອອກ​ຢ່າງ​ຖືກຕ້ອງ ​ແລະ ຄົບ​ຖ້ວນ;
• ຊຳລະ​ຜ່ານ​ລະ​ບົບທະນາຄານ ຢູ່ ສປປ ລາວ;
• ​ແຈ້ງ ​ແລະ ມອບ​ອາກອນ​ມູນ​ຄ່າ​ເພີ່ມ ຖືກຕ້ອງ ​ແລະ ຄົບ​ຖ້ວນ​ ຕາມ​ກົດໝາຍ;

2. ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ດໍາເນີນທຸລະກິດຢູ່ໃນລະບົບອາກອນມູນຄ່າເພີ່ມ ທີ່ມີການຄວບກິດຈະການ, ແຍກກິດຈະກຳ, ຢຸດເຊົາກິດຈະກຳ ຕ້ອງ:

• ມິ​ສັນຍາ​ຮ່ວມ​ທຸລະ​ກິດ ​ພ້ອມ​ດ້ວຍ​ເອກະສານ​ຢັ້ງຢືນ​ການ​ຄວບ, ການ​ແຍກ​ກິດຈະການ ຈາກ​ຂະ​ແໜງ​ການທີ່​ກ່ຽວຂ້ອງ;
• ມີ​ເອກະສານ​ຢັ້ງຢືນ​ການ​ມອບ​ພັນທະ​ອາກອນ ທີ່ຖືກຕ້ອງ ແລະ ຄົບຖ້ວນ ພ້ອມດ້ວຍເອກະສານຢັ້ງຢືນການຢຸດເຊົາກິດຈະການຂອງຂະແໜງການທີ່ກ່ຽວຂ້ອງ;

3. ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ດຳ​ເນີນ​ທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​​ເພີ່ມ ທີ່​ມີ​ການ​ລົ້ມ​ລະລາຍ ຕ້ອງ​ມີ​ເອກ​ະສານ ​ແລະ ຄຳ​ຕັດສິນ​ຂອງ​ສານ​ກ່ຽວ​ກັບ​ການ​ລົ້ມ​ລະລາຍ​ຂອງ​ວິ​ສາ​ຫະກິດ​ຕົນ.

ສໍາລັບ​ການ​ສົ່ງ​ຄືນ​ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ ຂອງ​ກິດຈະກຳ​ກ່ຽວ​ກັບ​ຊັບພະຍາກອນ​ທຳ​ມະ​ຊາດ ​ແລະ ພະລັງງານ​​ໄຟຟ້າ ​ໄດ້​ກຳນົດ​ໄວ້​ໃນ​ລະ​ບຽບການ​ຕ່າງຫາກ.

ການ​ຄົ້ນ​ຄ້ວາ ​ແລະ ພິຈາລະນາ​ການ​ສົ່ງ​ຄືນ​ອາກອນ​ມູນ​ຄ່າ​ເພີ່ມ ​ໃຫ້​ປະ​ຕິ​ບັດ​ຕາມ​ການ​ແບ່ງຂັ້ນ​ຄຸ້ມຄອງຂອງຂະແໜງສ່ວຍສາອາກອນ.

ມາດຕາ 28​ (ປັບປຸງ) ການຂໍຄືນອາກອນມູນຄ່າເພີ່ມ

ການຂໍຄືນອາກອນມູນ​ຄ່າ​ເພີ່ມ ​ໃຫ້​ດຳ​ເນີ​ນ​ໄປ​ແຕ່ລະ​ເດືອນ ​ແລະ ບໍ່​ໃຫ້​ເກີນ ສາມ​ເດືອນ ນັບ​ແຕ່​ວັນ​ທີ່​ມີ​ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ​ ເກີດ​ຂື້ນ:

1. ຂໍ​ຄືນ​ເປັນ​ແຕ່ລະ​ເດືອນ ນັບ​ແຕ່​ເດືອນທີ່​ມີ​ອາກອນ​ມູນ​ຄ່າ​ເພີ່ມສົ້ນ​ເຂົ້າ​ເກີດ​ຂື້ນ ​ສຳລັບ​ຜູ້​ມອບ​ອາກອນ​ມູນ​ຄ່າ​ເພີ່ມ ທີ່​ມີ​ການ​ສົ່ງ​ອອກ​ສິນຄ້າ, ການ​ສະໜອງ​ສິນຄ້າ ແລະ ການບໍລິການ ຢູ່ພາຍໃນປະເທດ ປົກກະຕິ ແລະ ຕໍ່ເນື່ອງ;

2. ຂໍ​ຄືນອ​າກ​ອນມູນ​ຄ່າ​ເພີ່ມ ກໍລະນີ​ທີ່​ມີ​ການ​ຄວບ​ກິດ​ຈະ​ການ, ​ແຍກ​ກິດຈະການ, ຢຸດ​ເຊົາ​ກິດຈະການ ຫຼື ລົ້ມ​ລະລາຍ ​ແຕ່​ບໍ່​​ໃຫ້​ເກີນ ສາມ​ເດືອນ ພາຍ​ຫຼັງມີ​ການ​ຕົກລົງ​ຈາກ​ຂະ​ແໜງ​ການ​ທີ່​ກ່ຽວຂ້ອງ​ເປັນ​ລາຍ​ລັກ​ອັກສອນ ​ເປັນ​ຕົ້ນ​ໄປ.

ມາດຕາ 29 (ປັບປຸງ)  ອາກອນ​ມູນ​ຄ່າ​ເພີ່ມ​ທີ່​ບໍ່​ອະ​ນຸຍາດ​ໃຫ້​ສົ່ງ​ຄືນ

       ອາກອນມູນ​ຄ່າ​ເພີ່ມ​ທີ່​ບໍ່​ອະນຸຍາດ​ໃຫ້​ສົ່ງ​ຄື​ນ ມີ​ ດັ່ງ​ນີ້

1. ອາກອນ​ມູນ​ຄ່າ​ເພີ່ມ​ສົ້ນ​ເຂົ້າ​ທີ່​ບໍ່​ອະນຸ​ຍາດ​ໃຫ້​ຫັກ ຕາມ​ທີ່​ກຳນົດ​ໄວ້​ໃນ​ມາດຕາ 24 ຂອງ​ກົດໝາຍ​ສະບັບ​ນີ້;
2. ອາ​ກອນ​ມູນ​ຄ່າ​ເພີ່ມທີ່​ໃຫ້​ຫັກ ຫຼື ສົ່ງ​ຄືນ ​ແຕ່​ປະຕິບັດ​ເງື່ອນ​ໄຂ​ບໍ່​ຖືກຕ້ອງ ​ແລະ ບໍ່​ຄົບ​ຖ້ວນຕາມ​ທີ່​ກຳນົດ​ໄວ້​ໃນ​ມາດຕາ​ 27 ຂອງ​ກົດໝາຍ​ສະບັບ​ນີ້.

ໝວດ​ທີ 4

ການ​ແຈ້ງ ​ແລະ ການ​ມ​ອບ ອາກອນມູນ​ຄ່າ​ເພີ່​ມ

ມາດຕາ 30 (ປັບປຸງ) ການ​ແຈ້ງ​ອາກອນ​ມູນ​ຄ່າ​ເພີ່ມ

      ການ​ແຈ້ງ​ອາກອນ​ມູນ​ຄ່າ​ເພີ່ມ ​ໃຫ້​ປະຕິບັດ ດັ່ງ​ນີ້:

1. ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ດຳ​ເນີ​ນທຸລະ​ກິດ ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ​ຕ້ອງ​ແຈ້ງ​ອາ​ກອນ​ມູນ​ຄ່າ​ເພີ່ມ​ບໍ່​ໃຫ້​ກາຍ​ວັນ​ທີ 15 ຂອງ​ເດືອນ​​ຖັດ​ໄປ ຕໍ່​ລັດຖະການ​ສ່ວຍ​ສາ​ອາກອນ​ບ່ອນ​ຕົນຂື້ນກັບ
2. ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ນຳເຂົ້າສິນຄ້າຕ້ອງແຈ້ງອາກອນມູນຄ່າເພີ່ມໃນເວລາມີການນຳເຂົ້າສິນຄ້າ ພ້ອມກັບການແຈ້ງເສຍພາສີຂາເຂົ້າຢູ່ບ່ອນນຳເຂົ້າ.

ລະບຽບ​ການ, ຂັ້ນ​ຕອນ, ​ແບບ​ພີ​ມ​ໃບ​ແຈ້ງ ​ແລະ ​ແບບ​ພີ​ມຕາຕະລາງ​ລາຍ​ງານ​ການ​ນຳ​ໃຊ້​​ໃບ​ເກັບ​ເງິນ ລວມທັງ​ການ​ແຈ້ງ​ຜ່ານ​ລະບົບ​ເອັກ​ເລັກ​ໂຕຣນິກ ​ໄດ້​ກຳນົດ​ໄວ້​ໃນ​ລະບຽບ​ການ​ຕ່າງຫາກ.

ມາດຕາ 31 (ປັບປຸງ) ການ​ມອບ​ອາກອນ​ມູນ​ຄ່າ​ເພີ່​ມ

      ການ​ມອບ​ອາກອນ​ມູນ​ຄ່າ​ເພີ່ມ ​ໃຫ້​ປະຕິບັດ ດັ່ງ​ນີ້:

1. ຜູ້​ນຳ​ເຂົ້າສິນຄ້າ ​ໃຫ້​ມອບ​ຢູ່​ດ່ານ​ບ່ອນ​ນຳ​ເຂົ້າ​ສິນ​ຄ້າ ຫຼື ຄັງ​ເງິນ​ແຫ່ງ​ຊາດ ຫຼື ຢູ່​ທະນາຄານ​ທີ່​ມີ​ບັນຊີຂອງ​ຄັງ​ເງິນ​ແຫ່ງ​ຊາດ;
2. ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ດຳ​ເນີ​ນທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ​ໃຫ້​ມອບ​ເປັນ​ແຕ່ລະ​ເດືອນ ບໍ່​ໃຫ້ກາຍວັນ​ທີ 15 ຂອງ​ເດືອນ​ຖັດ​ໄປ ຢູ່​ຄັງ​ເງິນ​ແຫ່ງ​ຊາດ ຫຼື ຢູ່​ທະ​ນາຄາ​ນ ທີ່​ມິີບັນຊີ​ຂອງຄັງ​ເງິນ​ແຫ່ງ​ຊາດ;
3. ຜູ້ຊື້ການ​ບໍລິການ​ຜູ້​ບໍ່​ມີ​ພູມລຳ​ເນົາ ​ແລະ ບໍ່​ໄດ້​ຈົດ​ທະບຽນ​ສ້າງ​ຕັ້ງ​ວິ​ສາ​ຫະກິດ ຕາມ​ກົດໝາຍ​ຂອງ ສປປ ລາວ ຫຼື ຜູ້​ຊື້​ການບໍລິການ ຈາກ​ຜູ້​ມີ​ພູມລຳ​ເນົາ ບໍ່​ໄດ້​ຈົດ​ທະບຽນ​ສ້າງ​ຕັ້ງ​ວິ​ສາ​ຫະກິດ ຕາມ​ກົດໝາຍ​ຂ​ອງ ສປປ ລາວ ​ໃຫ້​ປະຕິບັດ ດັ່ງ​ນີ້:

   3.1  ບຸກຄົນ, ນິຕິ​ບຸກຄົນ ຫຼື ການ​ຈັດ​ຕັ້ງ ທີ່​ດຳ​ເນີນ​ທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ ​ໃຫ້​ມອບ​ບໍ່​ໃຫ້ກາຍວັນ​ທີ 15 ຂອງ​ເດືອນຖັດໄປ ພ້ອມກັບການແຈ້ງມອບໃນແຕ່ລະເດືອນ:

   3.2  ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ບໍ່ແມ່ນບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ດຳເນີນທຸລະກິດຢູ່ໃນລະບົບອາກອນມູນ່າເພີ່ມ ໃຫ້ມອບພາຍໃນເວລາ ສິບຫ້າວັນ ນັບແຕ່ວັນຊຳລະເງິນໃຫ້ແກ່ຜູ້ສະໜອງດັ່ງກ່າວ ເປັນຕົ້ນໄປ.

ມາດຕາ 32 (ປັບປຸງ) ອາກອນມູນຄ່າເພີ່ມສຳລັບຜູ້ບໍ່ມີພູມລຳເນົາ ແລະ ບໍ່ໄດ້ຈົດທະບຽນສ້າງຕັ້ງວິສາຫະກິດຢູ່ ສປປ ລາວ ແລະ ຜູ້ມີພູມລຳເນົາ ແຕ່ໄດ້ຈົດທະບຽນສ້າງຕັ້ງວິສາຫະກິດຢູ່ເຂດເສດຖະກິດພິເສດ

ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ດຳເນີນທຸລະກິດຢູ່ໃນລະບົບອາກອນມູນຄ່າເພີ່ມ ຫາກໄດ້ຊື້ການບໍລິການຈາກຜູ້ບໍ່ມີພູມລຳເນົາ ແລະ ບໍ່ໄດ້ຈົດທະບຽນສ້າງຕັ້ງວິສາຫະກິດ ຕາມກົດໝາຍຂອງ ສປປ ລາວ ແລະ ຜູ້ມີພູມລຳເນົາ ແຕ່ຈົດທະບຽນສ້າງຕັ້ງວິສາຫະກິດຢູ່ເຂດເສດຖະກິດພິເສດ ຕ້ອງຄິດໄລ່ອາກອນມູນຄ່າເພີ່ມ ໃນເວລາທີ່ມີການຊຳລະເງິນ ໃຫ້ແກ່ຜູ້ສະໜອງການບໍລິການດັ່ງກ່າວ ໂດຍໃຫ້ມອບອາກອນມູນຄ່າເພີ່ມໃນເວລາແຈ້ງມອບອາກອນປົກກະຕິ ຕາມທີ່ໄດ້ກຳນົດໄວ້ໃນມາດຕາ 31 ຂໍ້ 2 ຂອງກົດໝາຍສະບັບນີ້.

ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ບໍ່ແມ່ນບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ດຳເນີນທຸລະກິດຢູ່ໃນລະບົບອາກອນມູນຄ່າເພີ່ມ ຫາກໄດ້ຊື້ການບໍລິການຈາກຜູ້ບໍ່ມີພູມລຳເນົາ ແລະ ບໍ່ໄດ້ຈົດທະບຽນສ້າງຕັ້ງວິສາຫະກິດ ຕາມກົດໝາຍຂອງ ສປປ ລາວ ແລະ ຜູ້ມີພູມລຳເນົາ ແຕ່ຈົດທະບຽນສ້າງຕັ້ງວິສາຫະກິດຢູ່ເຂດເສດຖະກິດພິເສດນັ້ນ ຕ້ອງຄິດໄລ່ ແລະ ມອບອາກອນມູນຄ່າເພີ່ມ ພາຍໃນເວລາ ສິບຫ້າວັນ ນັບແຕ່ວັນໄດ້ຊຳລະເງິນໃຫ້ແກ່ຜູ້ສະໜອງດັ່ງກ່າວ.

ໃນກໍລະນີ ການສະໜອງບໍລິການ ຫາກມີການນຳໃຊ້ສິນຄ້ານຳເຂົ້າ ແຕ່ບໍ່ທັນຖືກຄິດໄລ່ເກັບອາກອນມູນຄ່າເພີ່ມເທື່ອ ຕ້ອງໄດ້ຄິດໄລ່ເກັບຄືນ.

ມາດຕາ 33 (ປັບປຸງ) ອາກອນມູນຄ່າເພີ່ມທີ່ຕ້ອງມອບ ຫຼື ຍົກໄປຫັກໃນເດືອນຖັດໄປ

ອາກອນມູນຄ່າເພີ່ມທີ່ຕ້ອງມອບ ຫຼື ຍົກໄປຫັກໃນເດືອນຖັດໄປ ແມ່ນ ຜົນລົບລະຫວ່າງອາກອນມູນຄ່າເພີ່ມສົ້ນອອກ ແລະ ອາກອນມູນຄ່າເພີ່ມສົ້ນເຂົ້າທີ່ສາມາດຫັກໄດ້ ໃນກໍລະນີອາກອນມູນຄ່າເພີ່ມສົ້ນອອກ ຫາກຫຼາຍກວ່າອາກອນມູນຄ່າເພີ່ມສົ້ນເຂົ້າ ໃຫ້ຖືວ່າມີອາກອນມູນຄ່າເພີ່ມທີ່ຕ້ອງມອບຕື່ມ, ໃນກໍລະນີອາກອນມູນຄ່າເພີ່ມສົ້ນອອກ ຫາກໜ້ອຍກວ່າອາກອນມູນຄ່າເພີ່ມສົ້ນເຂົ້າ ໃຫ້ຖືວ່າມີອາກອນມູນຄ່າເພີ່ມ ທີ່ຕ້ອງໄດ້ຍົກໄປຫັກໃນເດືອນຖັດໄປ.

ໝວດທີ 5

ການເຂົ້າ, ການອອກ ລະບົບອາກອນມູນຄ່າເພີ່ມ

ມາດຕາ 34 (ປັບປຸງ) ການ​​ເຂົ້າ​ໃນ​ລະບົບ​ອາກອນ​ມູນ​ຄ່າ​ເພີ່ມ

ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ໄດ້​ຂື້ນ​ທະບຽນ​ວິ​ສາ​ຫະກິດ, ຮັບ​ອະນຸຍາດ​ລົງທຶນ ຈາກ​ຂະ​ແໜງ​ການ​ກ່ຽວຂ້ອງ ​ແລະ ​ໄດ້​ຮັບ​ເລກ​ປະຈຳ​ຕົວ​ຜູ້​ເສຍ​ອາກອນ ຕ້ອງ​ໄດ້​ເຂົ້າ​ໃນ​ລະບົບ​ອາກອນ​ມູນ​ຄ່າ​ເພີ່ມ​ຍົກ​ເວັ້ນຈຸນລະ​ວິ​ສາ​ຫະກິດ.

ມາດຕາ 35 (​ໃໝ່) ການ​ອອກ​ຈາກ​ລະບົບ​ອາກອນ​ມູນ​ຄ່າ​ເພີ່ມ

ບຸ​ກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ດຳ​ເນີ​ນທຸລະ​ກິດຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ ຈະ​ຖືກ​ອອກ​ຈາກ​ລະບົບ ​ໃນ​ກໍລະນີ ຍຸບ​ເລີກ, ລົ້ມ​ລະລາຍ ຫຼື ຢຸດ​ເຊົາ​ກິດຈະການ​ຖາວອນ.

ໝວດ​ທີ 6

ການຖືບັນຊີ ​ແລະ ການ​ອອກ​ໃບ​ເກັບ​ເງິນ

ມາດຕາ 36 (ປັບປຸງ) ການ​ຖື​ບັນຊີ

ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ດຳ​ເນີນ​ທຸລະ​ກິດ​ ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ​ຕ້ອງ​ຖື​ບັນ​ຊີ ຕາມ​ກົດ​ໝາຍ​ວ່າ​ດ້ວຍການ​ບັນຊີ.

ຂໍ້​ມູນ​ຢັ້ງຢືນ​ການ​ລົງ​ບັນຊີ, ​ເອກະສານ​ບັນ​ຊີ ຕ້ອງ​ເກັບ​ຮັກສາ​ໄວ້​ພາຍ​​ໃນ​ເວລາ ສິບ​ປີ ​ແລະໃຫ້ນຳສະເໜີໄດ້ທຸກເວລາ ຖ້າຫາກມີການກວດກາຂອງເຈົ້າໜ້າທີ່ສ່ວຍສາອາກອນ ຫຼື ເຈົ້າໜ້າທີ່ອື່ນທີ່ກ່ຽວຂ້ອງ.

ມາດຕາ 37 ການອອກໃບເກັບເງິນ

ການອອກໃບເກັບເງິນ ແມ່ນ ການອອກເອກະສານຢັ້ງຢືນ ການບັກທຶກບັນຊີ, ການສະໜອງ ສິນຄ້າ ແລະ ການບໍລິການ, ການຈ່າຍອາກອນມູນຄ່າເພີ່ມໃນເວລາຊື້, ການເກັບອາກອນມູນຄ່າເພີ່ມໃນເວລາສະໜອງ, ການຫັກ ແລະ ການຂໍຄືນອາກອນມູນຄ່າເພີ່ມ.

ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ດຳເນີນທຸລະກິດ ຢູ່ໃນລະບົບອາກອນມູນຄ່າເພີ່ມ ທຸກຄັ້ງທີ່ມີການສະໜອງ ສິນຄ້າ ແລະ ການບໍລິການ ຕ້ອງອອກໃບເກັບເງິນໃຫ້ແກ່ຜູ້ຊື້ ໃຫ້ຖືກຕ້ອງຕາມລະບຽບການກ່ຽວກັບໃບເກັບເງິນ.

     ການອອກໃບເກັບເງິນ ໄດ້ກຳນົດໄວ້ໃນລະບຽບການຕ່າງຫາກ.

ມາດຕາ 38 (ປັບປຸງ) ມາດຕະຖານການລາຍງານການເງິນ ແລະ ການນຳໃຊ້ໃບເກັບເງິນ

ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ດຳເນີນທຸລະກິດຢູ່ໃນລະບົບອາກອນມູນຄ່າເພີ່ມ ຕ້ອງຖືບັນຊີຕາມມາດຕະຖານການບັນຊີ ທີ່ໄດ້ກຳນົດໄວ້ໃນກົດໝາຍວ່າດ້ວຍການບັນຊີ ແລະ ການນຳໃຊ້ໃບເກັບເງິນທີ່ຖືກຕ້ອງ ຕາມລະບຽບການກ່ຽວກັບໃບເກັບເງິນ ທີ່ປະກາດໃຊ້ໃນແຕ່ລະໄລຍະ.

ໝວດທີ 7

ການກວດກາ ແລະ ການຄູ້ມຄອງອາກອນມູນຄ່າເພີ່ມຄ້າງມອບ

ມາດຕາ 39 (ປັບປຸງ​) ການ​ກວດກາ

ການ​ກວດກາ ​ແມ່ນ​ ​ແນ່​ໃສ່​ຮັບ​ປະກັນ​ການປະຕິບັດພັນທະ​ຂອງ ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ດຳ​ເນີນ​ທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ ​ໃຫ້​ຖືກຕ້ອງ ​ແລະ ຄົບ​ຖ້ວນ.

      ການກວດກາ ສາມາດ​ດຳ​ເນີນ ດັ່ງ​ນີ້:

1. ການ​ກວດກາ​ເອກະສານ​ບັນຊີ​ຂອງ ບຸກຄົນ, ນິຕິບຸກຄົນ ຫຼື ການ​ຈັດ​ຕັ້ງ ທີ່​ດຳ​ເນີນ​ທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ ຢູ່​ຫ້ອງການ​ສ່ວຍ​ສາ​ອາກອນ;
2. ກວດກາ​ບັນຊີ​ກັບທີ່ ຂອງ​ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ດຳ​ເນີນ​ທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ ຢູ່ ສຳນັກງານ, ສາຂາ ຫຼື ຕົວ​ແທນ​ຈຳໜ່າຍ ລວມທັງ​​ສາງສິນຄ້າ, ສະຖານ​ທີ່​ການ​ຜະ​ລິດ, ການ​ສະໜອງ ສິນຄ້າ ​ແລະ ການ​ບໍ​ລິ​ການ;
3. ກວດກາ​ສິນຄ້າ​ຕົວ​ຈິງ ຂອງ​ບຸກຄົນ, ນິຕິບຸກຄົນ ຫຼື ການຈັດ​ຕັ້ງ​ ທີ່​ດຳ​ເນີນ​ທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ ຢູ່​ສະ​ຖານ​ທີທີ່​ກ່ຽວຂ້ອງ ​ເຊັ່ນ ຢູ່​ສາງ, ບ່ອນ​ເຄື່ອນ​ຍ້າຍ​ສິນຄ້າ ຢູ່​ພາຍ​ໃນ​ປະ​ເທດ.

      ການ​ກວດກາ ສາມາດ​ດຳ​ເນີນ​ຕາມ​ຮູບ​ການ​ປົກກະຕິ, ​ແຈ້​ງ​ໃຫ້​ຮູ້ລ່ວງ​ໜ້າ ຫຼື ກະທັນຫັນ.

ຜູ້​ຖືກ​ກວດກາ ຕ້ອງ​ໃຫ້​ຄວາມ​ຮ່ວມ​ມື​ໃນ​ການ​ກວດກາ​ຂອງ​ເຈົ້າ​ໜ້າ​ທີ່, ພາຍຫຼັງ​ສຳ​ເລັດ​ການ​ກວດກາ​ທຸກ​ຄັ້ງ​ແລ້ວ ​ເຈົ້າ​ໜ້າ​ທີ່​ກວດກາ ຕ້ອງ​ເຮັດ​ບົດ​ບັນທຶກ​ກວດກາ​ເປັນ​ລາຍ​ລັກອກ​ສອນ ​ໂດຍ​ຊ້ອງ​ໜ້າ​ຜູ້​ດຳ​ເນີ​ນທຸລະ​ກິດ​ທີ່​ຖືກ​ກວດກາ, ຫຼັງ​ຈາກ​ນັ້ນ​ຕ້ອງ​ອ່ານ ຫຼື ​ໃຫ້​ຜູ້ກ່ຽວ​ອ່ານເອງ​ບົດ​ບັນທຶກ​ດັ່ງ​ກ່າວ ​ແລ້ວ​ໃຫ້​ລົງ​ລາຍ​ເຊັນ​ໄວ​້​ເປັນ​ຫຼັກ​ຖານ.

ໃນ​ການ​ກວດກາ​ນັ້ນ ​ເຈົ້າ​ໜ້າ​ທີ່​ກວດກາ​ຕ້ອງ​ປະຕິບັດ​ຕາມ​ກົດໝາຍ ຢ່າງ​ເ​ຂັ້ມງວດ.

ມາດຕາ 40 ການ​ຄຸ້ມ​ຄອງ​ອາກອນ​ມູນ​ຄ່າ​ເພີ່ມ​ຄ້າງ​ມອບ

        ການ​ຄຸ້ມ​ຄອງ​ອາກອນ​ມູນ​ຄ່າ​ເພີ່ມຄ້າງມອບ ມີ ດັ່ງ​ນີ້:

1. ອາກອນ​ມູນ​ຄ່າ​ເພີ່ມ​ຈາກ​ການ​ແຈ້ງ​ມອບ​ທີ່​ບໍ່​ທັນ​ໄດ້​ມອບ;
2. ອາກອນ​ມູນ​ຄ່າ​ເພີ່ມ​ຈາກ​ການ​ກວດກາ ຫຼື ກໍລະນີ​ອື່ນທີ່​ຜູ້​ມອບ​ອາກອນ​ມູນ​ຄ່າ​ເພີ່ມ​ບໍ່​ທັນ​ໄດ້​ມອບ.

ກາ​ນຄຸ້ມ​ຄອງ​ອາກອນ​ມູນ​ຄ່າ​ເພີ່ມຄ້າງ​ມອບ ດຳ​ເນີນ​ດ້ວຍ​ການ​ບັນທຶກຕາມ​ເປົ້າ​ໝາຍ, ຈຳນວນ​ອາກອນ​ມູນ​ຄ່າ​ເພີ່ມ​ທີ່​ຄ້າງ​ມອບ, ​ເລັ່ງທວງ ​ແລະ ​ເກັບ​ເຂົ້າ​ງົບປະມານ​ໃຫ້​ຄົບ​ຖ້ວນ.

ພາກ​ທີ III

ສິດ ​ແລະ ໜ້າ​ທີ່​ຂອງ​ບຸກຄົນ, ນິຕິບຸກຄົນ ຫຼື ການຈັດ​ຕັ້ງ​ ທີ່​ດຳ​ເນີ​ນທຸລະ​ກິດ ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ ​ແລະ ພາກສ່ວນ​ອື່ນ​ທີ່​ກ່ຽວຂ້ອງ

 

ມາດຕາ 41 (ປັບປຸງ) ສິດ ​ແລະ ໜ້າ​ທີ່​ຂອງ​ບຸກຄົນ, ນິຕິບຸກຄົນ ຫຼື ການຈັດ​ຕັ້ງ​ ທີ່​ດຳ​ເນີ​ນທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ

 ສິດ ​ແລະ ໜ້າ​ທີ່​ ຂອງ​ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ດຳ​ເນີນ​ທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່​ມ ມີ ດັ່ງ​ນີ້:

1.  ສິດ​ຂອງ ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ດຳ​ເນີນ​ທຸລະ​ກິດ​ຢູ່​​ໃນ​ລະບົບ​ອາກອນ​ມູນ​ຄ່າ​ເພີ່ມ:
   1. 1 ​​ໄດ້​ຮັບ​ການ​ສະໜອງ​ຂໍ້​ມູນ ຂ່າວສານ, ການ​ຊີ້​ແຈງ, ການ​ອະທິບາຍ ​ແລະ ​ໃຫ້​ຄຳ​ແນະນຳ​ກ່ຽວ​ກັບ​ອາກອນ​ມູນ​ຄ່າ​ເພີ່ມ; 
   2. ​2 ໄດ້​ຮັບ​ການ​ຮັກສາ​ຄວາມ​ລັບ ກ່ຽວ​ກັບ​ຂໍ້​ມູນ​ຂອງ​ຜູ້​ມອບ​ອາກອນ​ມູນ​ຄ່າ​ເພີ່ມ;
   3. ​3 ໄດ້​ຮັບ​ເງິນ​ອາກອນ​ມູນ​ຄ່າ​ເພີ່ມ​ທີ່​ມອບ​ເກີນ​ນັ້ນ​ຄືນ ຕາມ​ກົດໝາຍ;
   4. 4 ຮ້ອງທຸກ ກ່ຽວ​ກັບ​ການ​ກະທຳ​ຂອງ​ເຈົ້າ​ໜ້າ​ທີ່​ພະນັກງານ​ສ່ວຍ​ສາ​ອາກອນ ຫຼື ການຈັດ​ຕັ້ງ​ທີ່​ບໍ່​ຖືກຕ້ອງ ​ແລະ ບໍ່​ສອດຄ່ອງ​ກັບ​ກົດໝາຍ;
   5. 5 ນຳ​ໃຊ້​ສິດ​ອື່ນ ຕາມ​ທີ່​ໄດ້​ກຳນົດ​ໄວ້​ໃນ​ກົດໝາຍ.
2. ໜ້າ​ທີ່ຂອງ ​ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ດຳ​ເນີນ​ທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ:
   1. 1 ຄິດ​ໄລ່, ​ແຈ້ງ ​ແລະ ມອບ​ອາກອນ​ມູນ​ຄ່າ​ເພີ່ມ​ໃຫ້​ຖືກຕ້ອງ, ຄົບ​ຖ້ວນ ​ແລະ ທັນ​ເວລາ;
   2. 2 ຮັບຜິ​ດຊອບ​ຕໍ່​ການ​​ແຈ້ງ, ກາ​ນຄິດ​ໄລ່, ການ​ເກັບ, ກາ​ນຂໍ​ຫັກ, ການ​ຂໍ​ຄືນ​ອາກອນ​ມູນ​ຄ່າ​ເພີ່ມ ​ໃຫ້​ຊັດ​ເຈນ ​ແລະ ຖືກຕ້ອງ​ຕາມ​ຄວາມ​ຈິງ;
   3. 3 ລາຍ​ງານ​ບັນ​ຊີ​ເງິນ​ຝາກ​ຂອງ​ຕົນ​ຢູ່ ຄັງ​ເງິນ, ທະນາຄານ ​ແລະ ສະ​ຖາ​ບັນ​ການ​ເງິນ​ອື່ນ ​ໃຫ້​​ແກ່​ຂະ​ແໜງ​ການ​ສ່ວຍ​ສາ​ອາກອນ;
   4. 4 ລາຍ​ງານ​ມູນ​ຄ່າ​ອາກອນ​ມູນ​ຄ່າ​ເພີ່ມ ທີ່​ໄດ້​ຮັບ​ການ​ຍົກ​ເວັ້ນ ​ແລະ ອັດຕາ ສູນ ສ່ວນຮ້ອຍ ຕາມ​ກົດໝາຍ ​ແລະ ຕາມ​ການ​ຕົກລົງ​ຂອງ​ລັດຖະບານ;
   5. 5 ຖື​ບັນຊີ ​ແລະ ນຳ​ໃຊ້​ໃບ​ເກັບ​ເງິນ ຕາມ​ກົດໝາຍ ​ແລະ ລະ​ບຽບການ;
   6. 6 ສະໜອງ​ເອກະສານ​ບັນຊີ, ​ໃບ​ເກັບ​ເງິນ, ​ໃບ​ຢັ້ງຢືນ​ຖານະ​ການ​ເງິນ ​ແລະ ​ເອກະສານ​ອື່ນ ທີ່​ພົວພັນ​ກັບ​ການ​ຄິດ​ໄລ່ ​ແລະ ການ​ກວດກາ​ບັນຊີ ​ໃຫ້​ແກ່​ຂະ​ແໜ​ງສ່ວຍ​ສາ​ອາກອນ ຕາມ​ລະບຽບ​ການ;
   7. 7 ປະຕິບັດ​ຂໍ້​ຕົກລົງ, ຄຳ​ສັ່ງ, ຄຳ​ແນະນຳ ​ແລະ ​ແຈ້ງ​ການ​ຂອງ​ຂະ​ແໜງ​ການ​ສ່ວຍ​ສາ​ອາກອນ ​ໃນ​ການ​ມອບ​ອາກອນ​ມູນ​ຄ່າ​ເພີ່ມ​ຄ້າງ​ມອບ ​ແລະ ຄ່າ​ປັບ​ໃໝ, ຖ້າ​ຫາກ​ຍັງ​ບໍ່​ເອົາ​​ໃຈ​ໃສ່ ​ແລະ ບໍ່​ໃຫ້​ຄວາມ​ຮ່ວມ​ມື ກໍ່​ຕ້ອງ​ຍິນ​ຍອມ​ໃຫ້​ຍຶດ ຫຼື້ ອາ​ຍັດ​ຊັບ​ສິນ​ທີ່​ຕົນ​ມີ ຊຶ່ງ​ມີ​ມູນ​ຄ່າ​ເທົ້າ​ກັບ​ຈຳນວນ​ເງິນ​ອາກອນ​ມູນ​ຄ່າ​ເພີ່ມ​ທີ່​ຕົນ​ຄ້າງ​ມອບ;
   8. 8 ຮັກສາ ​ແລະ ​ເກັບ​ມ້ຽນ​ເອກະສານ​ການ​ບັນ​ຊີ ຕາມ​ກົດໝາຍ;
   9. 9 ປະຕິບັດ​ໜ້າ​ທີ່​ອື່ນ ຕາມ​ທີ່​ໄດ້​ກຳນົດ​ໄວ້​ໃນ​ກົດໝາຍ.

​ມາ​ດຕາ 42 ສິດ ​ແລະ ໜ້າ​ທີ່​ຂອງ ບຸກຄົນ, ນິຕິບຸກຄົນ ຫຼື ການຈັດ​ຕັ້ງ​ທີ່​ກ່ຽວຂ້ອງ

     ບຸກຄົນ, ນິຕິບຸກຄົນ ຫຼື ການຈັດ​ຕັ້ງ​ທີ່​ກ່ຽວຂ້ອງ ມີ ສິດ ​ແລະ ໜ້າ​ທີ່ ດັ່ງ​ນີ້:

1. ຕິດຕາມ, ກວດກາ, ການ​ຄິດ​ໄລ່, ການ​ເກັບ, ການ​ຫັກ, ການ​ມອບ ​ແລ​ະ ການ​ສົ່ງ​ຄືນ​ອາກອນ​ມູນ​ຄ່າ​ເພີ່ມ​ຂອງ​ລັດຖະການ​ສ່ວຍ​ສາ​ອາກອນ;
2. ​ໄດ້​ຮັບການປົກປ້ອງ ແລະ ຮັກສາຄວາມລັບກ່ຽວກັບອາກອນມູນຄ່າເພີ່ມ ຕາມກົດໝາຍ;
3. ສະໜອງຂໍ້ມູນ ກ່ຽວກັບບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ດຳເນີນທຸລະກິດຢູ່ລະບົບອາກອນມູນຄ່າເພີ່ມ;
4. ແຈ້ງ ແລະ ລາຍງານ ການລະເມີດກົດໝາຍກ່ຽວກັບອາກອນມູນຄ່າເພີ່ມ ຕໍ່​ຂະແໜງ​ສ່ວຍ​ສາ​ອາກອນ;
5. ຮັກສາ ​ແລະ ​ເກັບ​ມ້ຽນ​ເອກ​ະສານ​ກ່ຽວ​ກັບ​ອາກອນ​ມູນ​ຄ່າ​ເພີ່ມ ຕາມ​ມກົດໝາຍ;
6. ​ໃຫ້​ຄວາມ​ຮ່ວມ​ມື ​ແລະ ຊ່ວຍ​ເຫຼືອ​ຂະ​ແໜງ​ການ​ສ່ວຍ​ສາ​ອາກອນ ຕາມ​ພາລະ​ບົດບາດ​ຂອງ​ຕົນ;
7. ນຳ​ໃຊ້​ສິດ ​ແລະ ປະຕິບັດ​ໜ້າ​ທີ່​ອື່ນ ຕາມ​ທີ່​ໄດ້​ກຳນົດ​ໄວ້​ໃນ​ກົດໝາຍ.

ພາກ​ທີ IV

ຂໍ້​ຫ້າມ

ມາດຕາ 43 ຂໍ້​ຫ້າມ​ ສຳລັບ​ພະນັກງານ ​ແລະ ​ເຈົ້າ​ໜ້າ​ທີ່​ສ່ວຍ​ສາ​ອາກອນ

    ຫ້າມ​ພະນັກງານ ​ແລະ ​ເຈົ້າ​ໜ້າ​ທີ່​ສ່ວຍ​ສາ​ອາກອນ​ ມີ ພຶດຕິ​ກຳ ດັ່ງ​ນີ້:

1. ​ເປີດ​ເຜີຍ​ຄວາ​ມລັບ​ຂອງ​ລັດ, ທາງ​ລັດຖະການ ​ແລະ ຂໍ້​ມູນ​ທີ່​ເປັນຄວາມ​ລັບ​ຂອງ​ຜູ້​ເສຍ​ອາກອນ;
2. ສ້າງ​ຄວາມ​ຫຍຸ້ງ​ຍາກ, ຖ່ວງ​ດຶງ, ​ແກ່ຍາວ​ເວລາ​ໃນ​ການ​ຄົ້ນ​ຄ້ວາ, ​ແກ້​ໄຂ ​ແລະ ປອມ​ແປງ​ເອກະສານ ກ່ຽວ​ກັບ​ອາກອນ​ມູນ​ຄ່າ​ເພີ່ມ;
3. ປະລະ​ໜ້າ​ທີ່ ​ແລະ ຂາດ​ຄວາມ​ຮັບຜິດຊອບ​ຕໍ່​ວຽກ​ງານ​ທີ່​ໄດ້​ຮັບ​ມອບ​ໝາຍ;
4. ສວຍ​ໃຊ້​ໜ້າ​ທີ່​ຕຳ​ແໜ່​ງ, ​ໃຊ້​ຄວາມ​ຮຸນ​ແຮງ, ບັງຄັບ​ນາບ​ຂູ່ ທວງ​ດຶງ, ຂໍ​ເອົາ ຫຼື ຮັບ​ສິນ​ບົນ​ເພື່ອ​ຜົນ​ປະ​ໂຫຍ​ດຂອງຕົນ, ຄອບຄົວ, ຍາດ​ພີ່ນ້ອງ, ຈຸ້ມ​ເຈື້ອ, ພັກ​ພວກ ຫຼື ໝູ່​ຄະນະ ຊຶ່ງ​ກໍ​ໃຫ້​ເກີດ​ຄວາມ​ເສຍ​ຫາຍ​ແກ່​ຜົນ​ປະ​ໂຫຍ​ດ ຂອງ​ບຸກຄົນ, ນິຕິບຸກຄົນ ຫຼື ການຈັດ​ຕັ້ງ;
5. ​ເກັບ​ອາກອນ​ມູນ​ຄ່າ​ເພີ່ມ​ໂດຍ​ບໍ່​ແມ່ນ​ໜ້າ​ທີ່​ຮັບຜິດຊອບ​ຂອງ​ຕົນ ຫຼື ບໍ່​ໄດ້​ຮັບ​ອະນຸຍາດ​ຈາກ​ການຈັດ​ຕັ້ງ​ທີ່​ກ່ຽວຂ້ອງ;
6. ນຳ​ເອົາ​ເງິນ​ອາກອນ​ມູນ​ຄ່າ​ເພີ່ມ​ທີ່​ເກັບ​ໄດ້​ໄປ​ນຳ​ໃຊ້ ​ໂດຍ​ບໍ່​ມອບ​ເຂົ້າງົບປະມານແຫ່ງ​ລັດ;
7. ມີ​ພຶດຕິ​ກຳ​ອື່ນ ທີ່​ເປັນ​ການລະ​ເມີດ​ກົດໝາຍ.

ມາດຕາ 44 ຂໍ້​ຫ້າມ​ສຳລັບ​ຜູ້​ເສຍ ​ແລະ ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ດຳ​ເນີນ​ທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ

     ຫ້າມ​ຜູ້​ເສຍ ​ແລະ ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ດຳ​ເນີນ​ທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ ມີ ພຶດຕິ​ກຳ ດັ່ງ​ນີ້:

1. ທຳລາຍ, ປອມ​​ແປງ ຂໍ້​ມູນ​ຫຼັກ​ຖານ, ປົກ​ປິດ, ​ເຊື່ອງ​ອຳ​ລາຍ​ຮັບ ​ແລະ ຊຸກ​ເຊື້ອງ​ການ​ກະທຳ​ຜິດ​ທີ່​ຕິດ​ພັນ​ກັບ​ການ​ເສຍ​ອາກອນ;
2. ນຳ​ໃຊ້​ໃບ​ເກັບ​ເງິນ​ທີ່​ບໍ່​ຖືກຕ້ອງ​ຕາມ​ແບບ​ພີ​ມຂອງ​ກະຊວງ​ການ​ເງິນ ຫຼື ພີ​ມ, ນຳ​ໃຊ້​ແບບ​ພີ​ມທີ່​ບໍ່​ໄດ້​ຮັບ​ອະນຸຍາດ;
3. ​ໃຫ້​ສິນ​ບົນ ຫຼື ຄ່າ​ລ້າງ, ລາງວັນ, ສົມຮູ້​ຮ່ວມ​ຄິດ​ເອົາ​ເງິນ​ຂອງ​ລັດ;
4. ປອມ​ແປງ​ເອກະສານ ກ່ຽວ​ກັບ​ວຽກ​ງານ​ອາກອນ​ມູນ​ຄ່າ​ເພີ່ມ;
5. ໜິ່ນ​ປະໝາດ, ບັງຄັບ, ນາບ​ຂູ່, ທຳຮ້າຍຮ່າງກາຍ ພະນັກງານ​ລັດ ​ແລະ ​ເຈົ້າ​ໜ້າ​ທີ່​ສ່ວຍ​ສາ​ອາກອນ;
6. ມີ​ພຶດຕິ​ກຳ​ອື່ນ ທີ່​ເປັນ​ການລະ​ເມີດ​ກົດ​ໝາຍ.

ມາດ​ຕາ 45 ຂໍ້​ຫ້າມ​ສຳລັບ​ບຸກຄົນ​ ນິຕິບຸກຄົນ ຫຼື ການຈັດ​ຕັ້ງ​ອື່ນ

     ຫ້າມ​ບຸກຄົນ, ນີຕິ​ບຸ​ກຄົນ ຫຼື ການ​ຈັດ​ຕັ້ງ​ອື່ນ ມີ​ພຶດຕິ​ກຳ ດັ່ງ​ນີ້:

1. ​ປະຕິ​ເສດ​ການ​ສະໜອງ​ຂໍ້​ມູນ ​ຂ່າວສານ ກ່ຽວ​ກັບ​ການ​ກະທຳ​ຜິດ ຫຼື ການລະ​ເມີດ​ກົດໝາຍ ​ແລະ ລະບຽບ​ການ ກ່ຽວ​ກັບ​ວຽກ​ງານ​ອາກອນ​ມູນ​ຄ່າ​ເພີ່ມ;
2. ຮ່ວມ​ກັນ​ກະທຳ​ຜິດ, ປົກ​ປິດ ​ແລະ ຊຸກ​​ເຊື່ອງຜູ້​ກະທຳ​ຜິດ ກ່ຽວ​ກັບ​ວຽກ​ງານ​ອາກອນ​ມູນ​ຄ່າ​ເພີ່ມ;
3. ​ໃຫ້ ຫຼື ຮັບ​ສິນ​ບົນ, ຄ່າ​ຈ້າງ ລາງວັນ, ສົມຮູ້​ຮ່ວມ​ຄິດ​ເອົາ​ເງິນ​ຂອງ​ລັດ;
4. ໝິ່ນປະໝາດ, ບັງຄັບ ນາບ​ຂູ່, ທຳຮ້າຍ​ຮ່າງ​ກາຍ ພະ​ນັກ​ງານ ​ແລະ ​ເຈົ້າ​ໜ້າ​ທີ່​ສ່ວຍ​ສາ​ອາກອນ ຫຼື ຜູ້​ເສຍ​ອາກອນ;
5. ມີ​ພຶດຕິ​ກຳອື່ນ ທີ່​ເປັນ​ລະ​ເມີດ​ກົດໝາຍ.

າກ​ທີ V

ການ​ແກ້​ໄຂ​ຄຳ​ສະ​ເໜີ ກ່ຽວ​ກັບ​ອາກອນ​ມູນ​ຄ່າ​ເ​ພີ່​ມ

ມາດຕາ 46 ການ​ຍື່ນ​ຄຳ​ສະ​ເໜີຂອງ​ ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ​ທີ່​ດຳ​ເນີນ​ທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ

ບຸກຄົນ, ນິຕິບຸ​ກຄົນ ຫຼື ການຈັດ​ຕັ້ງ ທີ່​ດຳ​ເນີນ​ທຸລະ​ກິດ​ຢູ່​​ໃນ​ລະບົບ​ອາກອນ​ມູນ​ຄ່າ​ເພີ່ມ ທີ່ມີ​ສິດ​ຢື່ນຄຳ​ສະ​ເໜີ​ກ່ຽວ​ກັບ​ການ​ປະຕິບັດ​ອາກອນ​ມູນ​ຄ່າ​ເພີ່ມ ທີ່​ຕົນ​ເຫັນ​ວ່າ​ບໍ່​ຖືກຕ້ອງ​ຕາມ​ກົດໝາຍ. ຄຳ​ສະ​ເໜີ​ຕ້ອງ​ຍື່ນ​ໂດຍ​ກົງ​ຕໍ່​ລັດຖະການ​ສ່ວຍ​ສາ​ອາກອນ​ບ່ອນ​ຕົນ​ຂຶ້ນ​ກັບ ພາຍ​ໃນ​ເວລາ ສາມ​ສິບ​ວັນ ນັບ​ແຕ່​ວັນ​ໄດ້​ຮັບ​ໃບ​ສັ່ງ​ມອບ ຫຼື ​ແຈ້ງ​ການ​ຂອງ​ລັດຖະການ​ສ່ວຍສາ​ອາກອນ ຫຼື ວັນ​ພົບ​ເຫັນ​ເຫດການ​ທີ່​ຕົນເ​ຫັນ​ວ່າ ບໍ່​ຖືກຕ້ອງ​ນັ້ນ ​ເປັນ​ຕົ້ນ​ໄປ.

ລັດຖະການ​ສ່ວຍ​ສາ​ອາກອນ​ທີ່​ໄດ້​ຮັບ​ຄຳ​ສະ​ເໜີ ມີ​ສິດ​ທວງ​ໃຫ້​ຜູ້​ສະ​ເໜີ ສະໜອງ​ບັນດາ​ເອກະສານ, ຂໍ້​ມູນ​ຕ່າງໆ​ທີ່​ກ່ຽວຂ້ອງ​ກັບ​ການສະ​ເໜີ​ນັ້ນ​​ໃຫ້​ຕົນ.

ມາດຕາ 47 ການ​ພິຈາລະນາ​ແກ້​ໄຂ​ຄຳ​ສະ​ເໜີ

 ລັດຖະການ​ສ່ວຍ​ສາ​ອາກອນ ຕ້ອງ​ພິຈາລະ​ນາ​ແກ້​ໄຂ​ພາຍ​ໃນເວລາ ສາມ​ສິບ​ວັນ ນັບ​ແຕ່​ວັນ​ໄດ້​ຮັບ​ຄຳ​ສະ​ເໜີ​ນັ້ນ ​ເປັນ​ຕົ້ນ​ໄປ, ຍົກ​ເວັ້ນກໍລະ​ນີ​ທີ່​ມີ​ຄວາມ​ຫຍຸ້ງຍາກ​ສັບສົນ ສາມາດ​ຕໍ່​ເວລາ​ນນັ້ນ​ໄດ້ ​ແຕ່​ບໍ່​ໃຫ້​​ເກີນ ຫົກ​ສິບ​ວັນ.

 ການ​ຕົກລົງ​ແກ້​ໄຂ​ຂອງ​ລັດຖະການ​ສ່ວຍ​ສາ​ອາກອນ ມີ​ຜົນ​ຫວັງ​ຄັບປະຕິບັດ​ສຳລັບ​ຜູ້​ດຳ​ເນີນ​ທຸລະ​ກິດ​ເວັ້ນ​ເສຍ​ແຕ່​ຫາກຍັງ​ບໍ່​​ເຫັນ​ດີ​ນຳ​ການ​ຕົກລົງ​ແກ້​ໄຂ​ນັ້ນ ກໍມີສິດນຳ​ສະ​ເໜີ​ຕໍ່ລັດຖະການ​ສ່ວຍ​ສາ​ອາກອນ​ຂັ້ນ​ເທິງ ຖັດນັ້ນ ພາຍ​ໃນ​ເວລາ ຊາວ​ວັນ ​ເພື່ອ​ພິຈາລະນາ​ແກ້​ໄຂ​​ເປັນຂັ້ນສຸດ​ທ້າຍ.

 ​ໃນ​ກໍລະນີ ຜູ້​ມອບ​ອາກອນ​ມູນ​ຄ່າ​ເພີ່ມ ຍັງ​ບໍ່​ເຫັນ​ດີ​ນໍາ​ການ​ແກ້​ໄຂ​ຄຳ​ສະ​ເໜີຂອງ​ລັດຖະການ​ສ່ວຍ​ສາ​ອາກອນ ຂັ້ນ​ສຸດ​ທ້າຍ​ແລ້ວ ກໍ່​ມີ​ສິດສະ​ເໜີ​ຕາມ​ກົດໝາຍ​ວ່າ​ດ້ວຍ​ການ​ແກ້​ໄຂ​ຄຳ​ຮ້ອງທຸກ.

ລັດຖະການ​ສ່ວຍ​ສາ​ອາກອນ ຕ້ອງ​ສົ່ງ​ຈຳນວນ​ອາກອນ​ມູນ​ຄ່າ​ເພີ່ມ ​ແລະ ຄ່າ​ປັບ​ໃໝ ທີ່​ມອບ​ເກີນ​ຄືນ​ພາຍ​ໃນ​ເວ​ລາ ສິບ​ຫ້າ​ວັນ ນັບ​ແຕ່​ວັນ​ມີ​ການ​ຕົກລົງ​ຂອງ​ລັດຖະການ​ສ່ວຍ​ສາ​ອາກອນ​ຂັ້ນ​​ເທິງ​ຖັດນັ້ນ ​ເປັນ​ຕົ້ນ​ໄປ.

ພາກ​ທີ VI

ການ​ຄຸ້ມ​ຄອງ ​ແລ​ະ ກວດກາ​ວຽກ​ງານ​ອາກອນ​ມູນ​ຄ່າ​ເພີ່ມ

ໝວດ​ 1

ການ​ຄຸ້ມ​ຄອງ​ວຽກ​ງານ​ອາກອນ​ມູນ​ຄ່າ​ເພີ່ມ

ມາດຕາ 48 ອົງການ​ຄຸ້ມ​ຄອງວຽກ​ງານ​ອາກອນ​ມູນ​ຄ່າ​ເພີ່ມ

ລັດຖະບານ ​ເປັນ​ຜູ້​ຄຸ້ມ​ຄອງ​ວຽກ​ງານ​ອາກອນ​ມູນ​ຄ່າ​ເພີ່ມ​ຢ່າງ​ລວມສູນ ​ແລະ ​ເປັນ​ເອກະ​ພາບ​ໃນ​ຂອບ​ເຂດ​ທົ່ວ​ປະ​ເທດ ​ໂດຍ​ມອບ​ໃຫ້​ກະຊວງ​ການ​ເງິນ ​ເປັນ​ຜູ້​ຮັບຜິດຊອບ​ໂດ​ຍກົງ ຕາມ​ຂະ​ແໜງ​ການ​ສາຍ​ຕັ້ງ ​ແລະ ເ​ປັນ​ເຈົ້າ​ການ​ປະສານ​ສົມ​ທົບ​ກັບ​ກະຊວງ, ອົງການ ​ແລະ ອົງການ​ປົກຄອງ​ທ້ອງ​ຖິ່ນທີ່​ກ່ຽວຂ້ອງ.

       ອົງການ​ຄຸ້ມ​ຄອງ​ວຽກ​ງານ​ອາກອນມູນ​ຄ່າ​ເພີ່ມ ປະກອບ​ດ້ວຍ:

1. ກະຊວງ​ການ​ເງິນ;
2. ກົມ​ສ່ວຍ​ສາ​ອາກອນ;
3. ສ່ວຍ​ສາ​ອາກອນ​ປະຈຳ ​ແຂວງ, ນະຄອນຫຼວງ;
4. ສ່ວຍ​ສາ​ອາກອນ​ປະຈຳ ​ເມືອງ, ​ເທດສະບານ, ນະຄອນ.

ມາດຕາ 49 ​ສິດ ​ແລະ ໜ້າ​ທີ່​ ຂອງກະຊວງ​ການ​ເງິນ

       ໃນ​ການ​ຄຸ້ມ​ຄອງ​ວຽກ​ງານ​ອາກອນ​ມູນ​ຄ່າ​ເພີ່ມ ກະຊວງ​ການ​ເງິ​ນ ມີ ​ສິດ ​ແລະ ໜ້າ​ທີ່ ດັ່ງ​ນີ້:

1. ຄົ້ນ​ຄ້ວາ, ສ້າງ​ ນະ​​ໂຍບາຍ, ຍຸດ​ທະ​ສາດ, ກົດໝາຍ ​ແລະ ລະ​ບຽບການ​ກ່ຽວ​ກັບ​ວຽກງານ​ອາກອນ​ມູນ​ຄ່າ​ເ​ພີ່​ມ ​ເພື່ອ​ສະ​ເໜີ​ລັດຖະບານ​ພິຈາລະນາ;
2. ຜັນ​ຂະຫຍາ​ຍນະ​ໂຍບາຍ, ຍຸດ​ທະ​ສາດ, ກົດໝາຍ ​ແລະ ລະບຽບ​ການ​ກ່ຽວ​ກັບ​ວຽກ​ງານ​ອາກອນ​ມູນ​ຄ່າ​ເພີ່ມ ​ເປັນ ​ແຜນການ, ​ແຜນ​ງານ, ​ໂຄງການ ​ແລະ ຈັດ​ຕັ້ງ​ປະຕິບັດ;
3. ​ໂຄສະນາ, ​ເຜີຍ​ແຜ່ ​ແລະ ການ​ສຶກສາ​ອົບຮົມ ນະ​ໂບບາຍ, ກົດໝາຍ ​ແລະ ລະບຽບ​ການ ກ່ຽວ​ກັບ​ວຽກ​ງານ​ອາກອນ​ມູນ​ຄ່າ​ເພີ່ມ;
4. ຝຶກ​ອົບ​ຮົມ, ​ໃຫ້​ຄຳ​ແນະນຳ ​ແກ່​ຫົວ​ໜ່ວຍ​ທຸລະ​ກິດ​ທີ່​ກ່ຽວຂ້ອງ​ກັບ​ວຽກ​ງານ​ອາກອນ​ມູນ​ຄ່າ​ເພີ່ມ;
5. ຊີ້​ນຳ, ຕິດຕາມ ກວດກາ ການ​ຈັດ​ຕັ້ງ​ປະຕິບັດ​ກົດໝາຍ, ນິຕິ​ກຳ​ອື່ນ​ກ່ຽວ​ກັບ​ວຽກງານອາກອນ​ມູນ​ຄ່າ​ເພີ່ມ ​ແລະ ການ​ປະຕິບັດ​ໜ້າ​ທີ່​ຂອງ​ພະນັກງານ ຫຼື ​ເຈົ້າ​ໜ້າ​ທີ່​ສ່ວຍ​ສາ​ອາກອນ;
6. ຊີ້​ນຳ ວຽກ​ງານ​ວິຊາ​ສະ​ເພາະ, ຄຸ້ມ​ຄອງ, ສ້າງ, ຍົກ​ລະດັບ​ວິຊາ​ກາ​ນ​ໃຫ້​ແກ່​ບຸກຄະ​ລາກ​ອນ, ສະໜອງ​ງົບປະມານ ​ແລະ ປະ​ກອບ​ພາ​ຫະ​ນະ, ອຸປະ​ກອນ​ເຕັກ​ນິກຮັບ​ໃຊ້​ກົງຈັກ​ອາກອນ​ມູນ​ຄ່າ​ເພີ່ມ;
7. ປະສານ​ສົມ​ທົບ ​ເຈົ້າ​ແຂວງ, ​ເຈົ້າ​ຄອງ​ນະຄອນຫຼວງ ​ໃນ​ການ​ແຕ່ງ​ຕັ້ງ, ຍົກຍ້າຍ, ປົດ​ຕຳ​ແໜ່​ງ, ປະຕິບັດ​ນະ​ໂຍບາຍ ຫຼື ລົງ​ວິ​​ໄນ​ຕໍ່​ພະນັກງານ​ ຫຼື ​ເຈົ້າ​ໜ້າ​ທີ່​ສ່ວຍ​ສາ​ອາກອນ;
8. ປະສານ​ສົມທົບກັບ​ອົງການ​ຈັດ​ຕັ້ງ​ຂອງ​ລັດ ​ແລະ ອົງການຈັດຕັ້ງ​ອື່ນ ທີ່​ກ່ຽວຂ້ອງ​ກັບ​ວຽກ​ງານ​ອາກອນ​ມູນ​ຄ່າ​ເພີ່ມ;
9. ​ແກ້​ໄຂ​ຄຳ​ສະ​ເໜີ​ຂອງ​ຜູ້​ມອບ​ອາກອນ​ມູນ​ຄ່າ​ເພີ່ມ ​ໃນ​ຂອບ​ເຂດ​ທົ່ວ​ປະ​ເທດ;
10. ຮັບຜິດຊອບ​ຕໍ່​ລັດຖະບານ ​ໃນ​ການ​ຄຸ້ມ​ຄອງ​ການ​ຈັດ​ຕັ້ງ​ປະຕິບັດ​ວຽກ​ງານ​ອາກອນ​ມູນ​ຄ່​າ​ເພີ່ມ ​ໃນ​ຂອບ​ເຂດ​ທົ່ວ​ປະ​ເທດ;
11. ພົວພັນ ຮ່ວມ​ມື ກັບ​ຕ່າງປະ​ເທ​ດ, ພາກ​ພື້ນ ​ແລະ ສາກົນ ກ່ຽວ​ກັບ​ວຽກ​ງານ​ອາກອນ​ມູນ​ຄ່າ​ເພີ່ມ;
12. ສະຫຼຸບ, ລາຍ​ງານ ການຈັດ​ຕັ້ງ​ປະຕິບັດ​ວຽກ​ງານ​ກ່ຽວ​ກັບ​ອາກອນ​ມູນ​ຄ່າ​ເພີ່​ມຕໍ່​ລັດຖະບານ ຢ່າງ​ເປັນ​ປົກ​ກະຕິ;
13. ນຳ​ໃຊ້​ສິດ ​ແລະ ປະຕິບັດ​ໜ້າ​ທີ່​ອື່ນ ຕາມ​ທີ່​ໄດ້​ກຳນົດ​ໄວ້​ໃນ​ກົດໝາຍ.

ມາດ​ຕາ 50 (ປັບປຸງ​) ສິດ ​ແລະ ໜ້າທີ່ ຂອງ​ກົມ​ສ່ວຍ​ສາ​ອາກອນ

ໃນ​ການ​ຄຸ້ມ​ຄອງ​ວຽກ​ງານ​ອາກອນ​ມູນ​ຄ່າ​ເພີ່ມ ກົມສ່ວຍ​ສາ​ອາກອນ​ເປັນ​ເສນາ​ທິການ​ໃຫ້​ກະຊວງ​ການ​ເງິນ ​ໃນ​ການ​ນຳ​ໃຊ້​ສິດ ​ແລະ ປະຕິບັດ​ໜ້າ​ທີ່ ຂອງ​ກະຊວງ​ການ​ເງິນ ຕາມ​ທີ່​ກຳນົດ​ໄວ້​ໃນ​ມາດຕາ 49 ຂອງ​ກົດໝາຍ​ສະບັບ​ນີ້.

ມາດຕາ 51  ສິດ ​ແລະ ໜ້າ​ທີ່ ຂອງ​ສ່ວຍ​ສາ​ອາກອນ​ປະຈຳ ​ແຂວງ, ນະຄອນຫຼວງ

​ໃນ​ການ​ຄຸ້ມ​ຄອງ​ວຽກ​ງານ​ອາກອນ​ມູນ​ຄ່າ​ເພີ່ມ ສ່ວຍ​ສາ​ອາກອນ​ປະຈຳ ​ແຂວງ, ນະຄອນຫຼວງ ມີ ​ສິດ ​ແລະ ໜ້າ​ທີ່ ຕາມ​ຂອບ​ເຂດ​ຄວາມ​ຮັບຜິດຊອບ​ຂອງ​ຕົນ ດັ່ງ​ນີ້:

1. ຄົ້ນ​ຄວ້າ ​ແລະ ປະກອບ​ຄຳ​ເຫັນ​ໃສ່​ຮ່າງ​ນະ​ໂຍບາຍ, ຍຸດ​ທະ​ສາດ, ​ແຜນການ, ກົດໝາຍ ​ແລະ ລະບຽບ​ການ ​ກ່ຽວ​ກັບວຽກງານ​ອາກອນ​ມູນ​ຄ່າ​ເພີ່ມ;
2. ​ໂຄສະນາ ​ເຜີຍ​ແຜ່ ​ແລະ ສຶກສາ​ອົບຮົມ ຈັດ​ຕັ້ງ​ປະຕິບັດ ນະ​ໂຍບາຍ, ກົດໝາຍ ​ແລະ ລະບຽບ​ການ​ອື່ນ ທີ່​ພົວພັນ​ກັບ​ວຽກ​ງານ​ອາກອນ​ມູນ​ຄ່າ​ເພີ່ມ;
3. ຝຶກ​ອົບຮົມ, ​ໃຫ້​ຄຳ​ແນະນຳ ​ແກ່​ຫົວໜ໋ວຍທຸລະ​ກິດ​ທີ່​ກ່ຽວຂ້ອງ ກັບ​ວຽກ​ງານ​ອາກອນ​ມູນ​ຄ່າ​ເພີ່ມ;
4. ສ້າງ​ແຜນການ​ເກັບ​ລາຍ​ຮັບ​ຈາກ​ອາກອນ​ມູນ​ຄ່າ​ເພີ່ມ​ປະຈຳ​ປີຂ​ອງ ​ແຂວງ, ນະຄອນຫຼວງ;
5. ຮັບຜິດຊອບ​ຕໍ່​ກະຊວງ​ການ​ເງິນ ໃນ​ການ​ຄຸ້ມ​ຄອງ​ການຈັດ​ຕັ້ງ​ປະຕິບັດ​ການ​ເກັບ​ອາກອນ​ມູນ​ຄ່າ​ເພີ່ມ​ໃຫ້​ຄົບ​ຖ້ວນ ຖືກຕ້ອງ​ຕາມ​ກົດໝາຍ;
6. ຊີ້​ນຳ, ຄຸ້ມ​ຄອງ, ຕິດຕາມ ກວດກາ ການ​ປະຕິບັດ​ໜ້າ​ທີ່​ຂອງ​ສ່ວຍ​ສາ​ອາກອນ​ປະຈຳ ​ເມືອງ, ​ເທດສະບານ, ນະຄອນ ​ແລະ ພະນັ​ກງານ ຫຼື ​ເຈົ້າ​ໜ້າທີ່ສ່ວຍ​ສາ​ອາກອນ;
7. ສະ​ເໜີ​ລັດຖະມົນ​ຕີ​ກະຊວງ​ການ​ເງິນ ພິຈາລະນາ​ແຕ່ງ​ຕັ້ງ, ຍົກຍ້າຍ, ປົດຕຳ​ແໜ່​ງ ພະນັກງານ ຫຼື ​ເຈົ້າ​ໜ້າ​ທີ່​ສ່ວຍ​ສາ​ອາກອນ ​ໂດຍ​ປະສານ​ສົມທົບ​ກັບ ​ເຈົ້າ​ແຂວງ, ​ເຈົ້າ​ຄອງ​ນະຄອນຫຼວງ;
8. ສະ​ເໜີ​ລັດຖະມົນຕີ​ກະຊວງ​ການ​ເງິນ ພິຈາລະນາ ຍ້ອງຍໍ​ຜູ້​ມີ​ຜົນງານ ​ແລະ ລົງ​ວິ​ໄນ ຕໍ່​ຜູ້​ລະ​ເມີດ​ກົດໝາຍ ​ໂດຍ​ປະສານ​ສົມ​ທົບ ​ເຈົ້າ​ແຂວງ, ​ເຈົ້າ​ຄອງ​ນະຄອນຫຼວງ;
9. ແກ້​ໄຂຄຳ​ສະ​ເໜີ​ຂອງ​ຜູ້​ມອບ​ອາກອນ​ມູນ​ຄ່າ​ເພີ່ມ ຕາມ​ກົດໝາຍ;
10. ພົວພັນ​ຮ່ວມ​ມືກັບ​ຕ່າງປະ​ເທດ ກ່ຽວກັບ​ວຽກງານ​ອາ​ກອນ​ມູນ​ຄ່າ​ເພີ່ມ ຕາມ​ການ​ມອບໝາຍ​ຂອງ​ຂັ້ນ​ເທິງ;
11. ສະຫຼຸບ, ລາຍ​ງານ ການຈັດ​ຕັ້ງ​ປະຕິບັດ​ວຽກ​ງານ​ກ່ຽວ​ກັບ​ອາກອນ​ມູນ​ຄ່າ​ເພີ່ມ ຕໍ່​ກະຊວງ​ການ​ເງິນ ​ແລະ ອົງການ​ປົກຄອງ ​ແຂວງ, ນະຄອນຫຼວງ ຢ່າງ​ເປັນ​ປົກກະຕິ;
12. ນຳ​ໃຊ້​ສິດ ​ແລະ ປະຕິບັດໜ້າ​ທີ່​ອື່ນ ຕາມ​ທີ່​ກຳນົດ​ໄວ້​ໃນ​ກົດໝາຍ.

ມາດຕາ 52 ສິດ ​ແລະ ໜ້າທີ່ ຂອງ​ສ່ວຍ​ສາ​ອາກອນ​ປະຈຳ ​ເມືອງ, ​ເທດສະບານ, ນະຄອນ

​ໃນ​ການ​ຄຸ້ມ​ຄອງ​ວຽກ​ງານ​ອາກອນ​ມູນ​ຄ່າ​ເພີ່ມ ສ່ວຍ​ສາ​ອາກອນ​ປະຈຳ ​ເມືອງ, ​ເທດສະບານ, ນະຄອນ ມີ ​ສິດ ​ແລະ ໜ້າ​ທີ່ ຕາມ​ຂອບ​ເຂດ​ຄວາມ​ຮັບຜິດຊອບ​ຂອງ​ຕົນ ດັ່ງ​ນີ້:

1. ຄົ້ນ​ຄ້ວາ ​ແລະ ປະກອບ​ຄຳ​ເຫັນ​ໃສ່​ຮ່າງ​ນະ​ໂຍບາຍ, ຍຸດ​ທະ​ສາດ, ​ແຜນ​ການ,ກົດໝາຍ ​ແລະ ລະບຽບ​ການ ກ່ຽວກັບ​ວຽກ​ງານ​ອາກອນ​ມູນ​ຄ່າ​ເພີ່ມ;
2. ເຜີຍ​​ແຜ່​ຈັດ​ຕັ້ງ​ປະຕິບັດ​ນະ​ໂຍບາຍ, ກົດໝາຍ ​ແລະ ລະບຽບ​ການ​ອື່ນ​ທີ່​ພົວພັນ​ກັບວຽກ​ງານ​ອາກອນ​ມູນ​ຄ່າ​ເພີ່ມ;
3. ຝຶກ​ອົບຮົ​ມ, ​ແນະນຳ ຫົວໜ່ວຍ​ທຸລະ​ກິດ​ທີ່​ກ່ຽວຂ້ອງ ກັບ​ວຽກງານ​ອາກອນ​ມູນ​ຄ່າ​ເພີ່ມ;
4. ເປັນ​ເຈົ້າ​ການຈັດ​ຕັ້ງ​ປະຕິບັດ, ຄຸ້ມ​ຄອງ ​ແລະ ​ເກັບ​ອາກອນ​ມູນ​ຄ່າ​ເພີ່ມ;
5. ຊີ້​ນຳ, ຄຸ້ມ​ຄອງ, ຕິດຕາມ ກວດກາ ການຈັດ​ຕັ້ງ​ປະຕິບັດ​ໜ້າ​ທີ່ ຂອງ​ພະນັກ​ງານ ຫຼື ​ເຈົ້າ​ໜ້າ​ທີ່​ສ່ວຍ​ສາ​ອາກອນ;
6. ແກ້​ໄຂ​ຄຳ​ສະ​ເໜີ ຂອງ​ຜູ້​ມອບ​ອາກອນ​ມູນ​ຄ່າ​ເພີ່ມ ຕາມ​ກົດໝາຍ;
7. ສະຫຼຸບ, ລາຍ​ງານ ການຈັດ​ຕັ້ງ​ປະຕິບັດ​ວຽກ​ງານ​ກ່ຽວ​ກັບ​ອາກອນ​ມູນ​ຄ່າ​ເພີ່ມ ຕໍ່​ສ່ວຍ​ສາ​ອາກອນ​ປະຈຳ ​ແຂວງ, ນະຄອນຫຼວງ ​ແລະ ອົງການ​ປົກ​ຄອງ ​ເມືອງ, ​ເທດສະບານ, ນະຄອນ ຢ່າງ​ເປັນ​ປົກກະ​ຕິ;
8. ນຳ​ໃຊ້​ສິດ ​ແລະ ປະຕິບັດໜ້າ​ທີ່ອື່ນ ຕາມ​ທີ່​ໄດ້​ກຳນົດ​ໄວ້​ໃນ​ກົດໝາຍ.

ໝວດທີ 2

ກວດກາ​ວຽກ​ງານ​ອາກອນ​ມູນ​ຄ່າ​ເພີ່ມ

ມາດຕາ 53 (ປັບປຸງ​) ອົງການ​ກວດກາ​ວຽກ​ງານ​ອາກອນ​ມູນ​ຄ່າ​ເພີ່ມ

      ອົງການ​ກວດກາ​ວຽກ​ງານ​ອາກອນ​ມູນ​ຄ່າ​ເພີ່ມ ປະກອບ​ດ້ວຍ:

1. ອົງການກວດກາ​ພາຍ​ໃນ ຊຶ່ງ​ແມ່ນ​ອົງການ​ດຽວ​ກັນ​ກັບ​ອົງການ​ຄຸ້ມ​ຄອງ​ວຽກ​ງານ​ອາກອນ​ມູນ​ຄ່າ​ເພີ່ມ ຕາມທີ່​ໄດ້​ກຳນົດ​ໄວ້​ໃນ​ມາດຕາ 48 ຂອງ​ກົດໝາຍ​ສະບັບ​ນີ້.
2. ອົງການ​ກວດກາ​ພາຍ​ນອກ ຊື່​ງ​ແມ່ນ​ສະພາ​ແຫ່ງ​ຊາດ, ສະພາ​ປະຊາຊົນ​ຂັ້ນ​ແຂວງ, ອົງການ​ກວດກາ​ລັດ​ແຕ່​ລະ​ຂັ້ນ, ອົງການ​ກວດ​ສອບ​ແຫ່ງລັດ, ​ແນວ​ລາວວສ້າງ​ຊາດ, ສະຫາ​ພັນ​ນັກ​ຮົບ​ເກົ່າ​ລາວ, ອົງການ​ຈັດ​ຕັ້ງ​ມະຫາຊົນ, ອົງການ​ຈັດ​ຕັ້ງ​ສັງ​ຄົມ, ສື່​ມວນ​ຊົນ ​ແລະ ພາກສ່ວນ​ອື່ນ​ທີ່​ກ່ຽວຂ້ອງ.

ມາດ​ຕາ 54 ສິດ ​ແລະ ໜ້າ​ທີ່ ຂອງ​ອົງການ​ກວດກາ​ພາຍ​ໃນ

ອົງການ​ກວດກາ​ພາຍ​ໃນ ມີ ສິດ ​ແລະ ໜ້າ​ທີ່ ກວດກາ​ຢ່າງ​ເປັນ​ປົກກະຕິ ການຈັດ​ຕັ້ງປະຕິບັດ​ກົດໝາຍ ​ແລະ ລະບຽບ​ການ, ການ​ນຳ​ໃຊ້ສິດ ​ແລະ ການ​ປະຕິບັດ​ໜ້າ​ທີ່​ຂອງ​ພະນັກງານ ຫຼື ​ເຈົ້າ​ໜ້າ​ທີ່​ສ່ວຍ​ສາ​ອາກອນ​ແຕ່ລະ​ຂັ້ນ ລວມທັງ​ການ​ນຳ​ໃຊ້​ສິດ ​ແລະ ການ​ປະຕິບັດ​ພັນທະ​ຂອງ​ຜູ້​ເກັບ​ອາກອນ​ມູນ​ຄ່າ​ເພີ່ມ.

ມາດ​ຕາ 55 ສິດ ​ແລະ ໜ້າ​ທີ່ ຂອງ​ອົງການ​ກວດກາ​ພາຍ​ນອກ

ອົງການ​ກວດກາ​ພາຍ​ນອກ ມີ ສິດ ​ແລະ ໜ້າ​ທີ່ ກວດກາ​ປະຕິບັດ​ໜ້ທີ່​ຂອງ​ພະນັກງານ ຫຼື ​ເຈົ້າ​ໜ້າ​ທີ່​ສ່ວຍ​ສາ​ອາກອນ ລວມທັງ​ກວດກາ​ປະຕິບັດ​ອາກອນ​ມູນ​ຄ່າ​ເພີ່ມ ​ເພື່ອ​ເຮັດ​ໃຫ້​ວຽກ​ງານ​ອາກອນ​ມູນ​ຄ່າ​​ເພີ່​ມ ມີ​ປະສິດທິ​ຜົນ, ມີ​ປະສິດທິພາບ, ມີ​ຄວາມ​ໂປ່​ງ​ໃສ, ຍຸຕິ​ທຳ ​ແລະ ກວດ​ສອບ​ໄດ້.

ມາດຕາ 56 ຮູບ​ການ ການ​ກວດກາ

    ການ​ກວດກາວຽກ​ງານ​ອາກອນ​ມູນ​ຄ່າ​ເພີ່ມ ມີ ສາມ​ຮູບ​ການ ດັ່ງ​ນີ້:

1. ການ​ກວດກາ​ຕາມ​ລະບົບ​ປົກ​ກະຕິ ຊຶ່ງ​ແມ່ນ ການ​ກວດກາ​ທີ່​ດຳ​ເນີ​ນ​ໄປ​ຕາມ​ແຜນການ​ຢ່າງ​ເປັນ​ປະຈຳ ​ແລະ ມີ​ການ​ກຳນົດ​ເວລາ​ອັນ​ແນ່ນ​ອນ;
2. ການ​ກວດກາ​ໂດຍ​ແຈ້ງ​ໃຫ້​ຮູ້ລ່ວງ​ໜ້າ​ ຊຶ່ງ​ແມ່ນ​ ການ​ກວດກາ​ນອກ​ແຜນການ ​ເມື່ອ​ເຫັນ​ວ່າ​ມີ​ຄວາມ​ຈຳ​ເປັນ ຊຶ່ງ​ຕ້ອງ​ແຈ້ງ​ໃຫ້​ຜູ້​ຖືກ​ກວດກາ​ຊາບ​ລ່ວງ​ໜ້າ;
3. ການ​ກວດກາ​ແບບ​ກະທັນຫັນ ຊຶ່ງແມ່ນ ການກວດກາໂດຍຮີບດ່ວນ ຊຶ່ງບໍ່ໄດ້ແຈ້ງໃຫ້ຜູ້ຖືກກວດກາຊາບລ່ວງໜ້າ.

ໃນ​ການ​ກວດກາ​ວຽກ​ງານ​ອາກອນ​ມູນ​ຄ່າ​ເພີ່ມ ຕ້ອງ​ປະຕິບັດ​ໃຫ້​ຖືກຕ້ອງ​ຕາມ​ກົດໝາຍ ​ແລະ ລະບຽບ​ການ​ຢ່າງ​ເຂັ້ມ​ງວດ.

ພາກ​ທີ VII

ນະ​ໂຍບາຍ​ຕໍ່​ຜູ້​ມີ​ຜົນງານ ​ແລະ ມາດ​ຕະການ​ຕໍ່​ຜູ້​ລະ​ເມີດ

ໝວດ​ທີ 1

ນະ​ໂຍບາຍ​ຕໍ່​ຜູ້​ມີ​ຜົນງານ

ມາດຕາ 57 ນະ​ໂຍບາຍ​ຕໍ່​ຜູ້​ມີ​ຜົນງານ

ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ​ທີ່​ໄດ້​ປະກອບສ່ວນ​ເຂົ້າ​ໃນ​ການຈັດ​ຕັ້ງ​ປະຕິບັດ​ກົດໝາຍ​ສະບັບ​ນີ້​ຢ່າງ​ມີ​ປະສິດທິພາບ, ປະສິດທິ​ຜົນ ຈະ​ໄດ້​ຮັບ​ການ​ຍ້ອງຍໍ ຫຼື ນະ​ໂຍບາຍ​ອື່ນ​ຕາມ​ລະບຽບ​ການ.

ມາດຕາ 58 ນະ​ໂຍບາຍ​ຕໍ່​ຜູ້​ມອບ​ອາກອນ​ມູນ​ຄ່າ​ເພີ່ມ

ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ດຳ​ເນີນ​ທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່​ມ ທີ່​ປະຕິບັດ​ພັນທະ​ຂອງ​ຕົນ​ຢ່າງ​ຖືກຕ້ອງ, ຄົບ​ຖ້ວນ ​ແລະ ທັນ​ເວລາ ຈະ​ໄດ້​ຮັບ​ການ​ຍ້ອງຍໍ ​ແລະ ​ໄດ້​ຮັບ​ຄວາມ​ສະດວກຢ່າງ​ເໝາະ​ສົມ​ໃນ​ການ​​ເຄື່ອນ​ໄຫວ​ທຸລະ​ກິດ​ຂອງຕົນ ຕາມ​ກົດໝາຍ.

ໝວດ​ທີ 2

ມາດ​ຕະການ​ຕໍ່​ຜູ້​ລະ​ເມີດ

ມາດ​ຕາ 59 ມາດ​ຕະການ​ຕໍ່​ຜູ້​ລະ​ເມີດ

ບຸ​ກຄົນ, ນິຕິບຸກຄົນ ຫຼື​ ການຈັດ​ຕັ້ງ ທີ່​ລະ​ເມີດ​ກົດໝາຍ ​ແລະ ລະບຽບ​ການ ກ່ຽວ​ກັບ​ອາກອນ​ມູນ​ຄ່​າເພີ່ມ  ຈະ​ຖືກ​ປະຕິບັດ​​ມາດ​ຕະການ ສຶກສາ​ອົບຮົມ, ກ່າວ​ເຕືອນ, ລົງ​ວິ​ໄນ, ປັປ​ໃໝ, ​ໃຊ້​ແທນ​ຄ່າ​ເສຍ​ຫາຍ​ທາງ​ແພ່ງ ຫຼື ລົງ​ໂທດ​ທາງ​ອາຍາ ຕາມ​ແຕ່​ລະ​ກໍລະ​ນີ ​ເບົາ ຫຼື້ ໜັກ.

ຜູ້​ດຳ​ເນີນ​ທຸລະກິດທີ່ບໍ່​ເຂົ້າ​ໃຈ​ໃນ​ລະ​ບົບອາກອນ​ມູນ​ຄ່າ​ເພີ່ມ​ນັ້ນ ລັດຖະການ​ສ່ວຍ​ສາ​ອາກອນ ​ແຈ້ງ​ເຕືອນ ​ແລະ ຈົດ​ເ​ຂົ້າ​ໃນລະບົບ​ອາກອນ​ມູນ​ຄ່າ​ເພີ່ມ.

ມາດ​ຕາ 60 (ປັບປຸງ) ມາດ​ຕະການ​ຕໍ່​ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່​ດຳ​ເນີນ​ທຸລະ​ກິດ​ຢູ່​ໃນ​ລະບົບ​  ອາກອນ​ມູນ​ຄ່າ​ເພີ່ມ

ບຸກຄົນ, ນິຕິບຸກຄົນ ຫຼື ການຈັດ​ຕັ້ງ ທີ່ດຳ​ເນີນ​ທຸລະ​ກິດ​ຢູ່​ໃນ​ລະບົບ​ອາກອນ​ມູນ​ຄ່າ​ເພີ່ມ ທີ່​ລະ​ເມີດ​ກົດໝາຍ ​ແລະ ລະບຽບ​ການ ກ່ຽວກັບວຽກງານອາກອນມູນຄ່າເພີ່ມ ຈະຖືກປະຕິບັດຕາມມາດຕະການ ຕາມແຕ່ລະກໍລະນີ ດັ່ງນີ້:

1.  ປັບ​ໃໝ 500.000 ກີບ​ຕໍ່​ເດືອນ ​ສຳລັບ​ການ​​ແຈ້ງມອບ​ອາກອນ​ມູນ​ຄ່າ​ເພີ່ມ​ຊັກ​ຊ້າ;
2. ປັບ​ໃໝ 100.000 ກີບ ຕໍ່​ຄັ້ງ ສຳລັບ​ການ​ບໍ່​ປະກອບ​ເລກ​ປະຈຳ​ຕົວ​ຜູ້​ເສຍ​ອາກອນ​ໃສ່​ໃນ​ການ​ແຈ້ງ​ມອບ​ອາກອນ​ມູນ​ຄ່າ​ເພີ່ມ;
3. ປັບ​ໃໝ 3.000.000 ກີບ ຕໍ່​ຄັ້ງ​ ສໍາລັບ​ການ​ບໍ່​ແຈ້ງ​ການ​ປ່ຽນ​ແປງ​ຂໍ້​ມູນ​ຕ່າງ​ໆ ​ເຊັ່ນ ​ເລກ​ໂທລະສັບ, ທີ່​ຕັ້ງ​ວິ​ສາ​ຫະກິດ ​ແລະ ອື່ນໆ ​​ໃສ່​ໃນ​ການ​ແຈ້ງ​ມອບ​ອາກອນ​ມູນ​ຄ່າ​ເພີ່ມ;
4. ປັບ​ໃໝ ສູນ​ຈຸດ​ໜຶ່ງ ສ່ວນ​ຮ້ອຍ (0.1%) ຕໍ່​ວັນ ຂອງ​ຈຳນວນ​ອາກອນ​ມູນ​ຄ່າ​ເ​ພີ່​ມທີ່​ຍັງ​ຄ້າງ​ມອບ ສຳລັບ​ການ​ບໍ່​ມອບ​ອາກອນ​ມູນ​ຄ່າ​ເພີ່ມ​ທີ່​ຕ້ອງ​ມອບ​ຢູ່​ໃນ​ການ​ແຈ້ງ​ມອບ​ອາກອນ​ມູນ​ຄ່າ​ເພີ່ມ;
5. ປັບ​ໃໝ​ຕາມ​ລະບຽບ​ການ​ດ້ານ​ບັນຊີ ສຳລັບ​ການ​ບໍ່​ປະຕິບັດ​ຕາມ​ມາດຕະຖານ​ຂອງບັນຊີ;
6. ປະຕິບັດ​ມາດ​ຕະການ ຕາມ​ລະບຽບການ​ກ່ຽວ​ກັບ​ໃບ​ເກັບ​ເງິນ ສຳລັບ​ການ​ບໍ່​ນຳ​ໃຊ້​ໃບ​ເກັບ​ເງິນ ຫຼື ນຳ​ໃຊ້​ໃບ​ເກັບ​ເງິນ​ບໍ່​ຖືກຕ້ອງ ຫຼື ຂຽນ​ເນື້ອ​ໃນ​ໃສ່​ໃບເກັບ​ເງິນ​ບໍ່​ຖືກຕ້ອງ​ຄົບ​ຖ້ວນ;
7. ປັບ​ໃໝ 1.500.000 ກີບ​ຕໍ່​ເດືອນ ສຳ​ລັບການ​ບໍ່​ແຈ້ງ​ມອບ​ອາກອນ​ມູນ​ຄ່າ​ເພີ່ມ;
8. ປັບ​ໃໝ ຫ້າ​ສິບ ສ່ວນ​ຮ້ອຍ ( 50%) ຂອງ​ຈຳນວນ​ອາກອນ​ມູນ​ຄ່າເພີ່ມ ທີ່​ເຮັດ​ໃຫ້​ລັດ​ເກີດ​ຄວາມ​ເສຍ​ຫາຍ ທີ່​ເກີດ​ຈາກ​ການ​ບໍ່​ແຈ້ງ ​ຫຼື ​ແຈ້ງ​ມອບ​ບໍ່​ຖືກຕ້ອງ​ຕາມ​ຄວາມເປັນ​ຈິງ ​ເຊັ່ນ ບໍ່​ແຈ້ງ​ກ່ຽວ​ກັບ​ການ ສະໜອງ ສິນຄ້າ ​ແລະ ການ​ບໍລິການ ທີ່​ຖືກ​ເສຍ​ອາກອນ​ມູນ​ຄ່າ​ເພີ່ມ ຫຼື ​ແຈ້ງ​ຕ່ຳ​ກວ່າ​ຄວາມ​ເປັນຈິງ, ຫັກ​ອາກອນ​ມູນ​ຄ່າ​ເພີ່ມ​ສົ້ນເຂົ້າ ທີ່​ບໍ່​ອະນຸຍາດ​ໃຫ້​ຫັກ ຫຼື ຫັກ​ຫຼາຍ​ເກີນ​ຄວາມ​ເປັນ​ຈິງ, ຍົກ​ຍອດ​ອາກອນ​ມູນ​ຄ່າ​ເພີ່​ມມາຫັກ​ຕໍ່ສູງ​ກວ່າ​ຄວາມ​ຈິງ, ​ແຈ້ງ​ກ່ຽວ​ກັບ​ການ​ມອບ​ລ່ວງ​ໜ້າ ຫຼື ການ​ມອບ​ເກີນ​ກົດ​ມາຍ​ກຳນົດ ທີ່​ບໍ່​ມີ​ຄວາມ​ຈິງ, ບໍ່​ແຈ້ງ​ກ່ຽວ​ກັບ​ອາກອນມູນ​ຄ່າ​ເພີ່ມ​ທີ່​ຄິດ​ໄລ່​ໄວ້ ຫຼື ​ແຈ້ງ​ຕ່ຳກ່ວາ​ກົດໝາຍ​ກຳນົດ;
9. ປັບ​ໃໝ 1.000.000 ກີບ ຕໍ່​ການເລັ່ງທວງ​​ໜຶ່ງຄັ້ງ ສຳລັບ​ການ​ບໍ່​ສະໜອງ​ເອກະສານ​ການບັນຊີ ຫຼື ​ສະໜອງ​ເອກະສານການບັນ​ຊີ​ທີ່​ບໍ່​ຖືກຕ້ອງ ​ແລະ/ ຫຼື ບໍ່​ຄົບ​ຖ້ວນ, ​ໃຫ້​ຂໍ້​ມູນ​ບໍ່​ຊັດ​ເຈນ ​ແລະ/ຫຼື ບໍ່​ຖືກຕ້ອງ;
10. ປັບ​ໃໝ 1.000.000 ກີບ ຕໍ່​ການລະ​ເມີດ​ໜຶ່ງ​ຄັ້ງ ສຳລັບ​ການ​ບໍ່​ໃຫ້​ຄວາມ​ຮ່ວມ​ມື ຫຼື ຂັດຂວາງ ການ​ປະຕິບັດ​ໜ້າ​ທີ່​ຂອງ​ພະນັກງານ ຫຼື ​ເຈົ້າ​ໜ້າ​ທີ່​ສ່ວຍ​ສາ​ອາກອນ.

ມາດຕາ 61 (ປັບປຸງ) ມາດຕາ​ຕໍ່​ຜູ້​ມີ​ອາກອນ​ມູນຄ່າ​ເພີ່ມ​ຄ້າງ​ມອບ

    ຜູ້​ມີ​ອາກອນ​ມູນ​ຄ່າ​ເພີ່ມ​ຄ້າງ​ມອບ ຈະ​ຖືກ​ປະຕິບັດ​ມາດ​ຕະການ ດັ່ງ​ນີ້:

1. ປັບ​ໃໝ ສາມ​ສິບ ສ່ວນ​ຮ້ອຍ (30%) ຂອງ​ຈຳນວນ​ອາກອນ​ມູນ​ຄ່າ​ເພີ່ມ​ທີ່​ຕ້ອງ​ມອບ ສຳລັບ​ການ​ເລັ່ງທວງ​ຄັ້ງ​ທີໜຶ່ງ;
2. ປັບ​ໃໝ ຫົກ​ສິບ ສ່ວນ​ຮ້ອຍ (60%) ຂອງ​ຈຳນວນ​ອາກອນມູນ​ຄ່າ​ເພີ່ມ​ທີ່​ຕ້ອງ​ມອບ ສຳລັບ​ການ​ເລັ່ງທວງ​ຄັ້ງ​ທີສອງ;
3. ປັບ​ໃໝ ຮ້ອຍ​ສ່ວນ​ຮ້ອຍ (100%) ຂອງ​ຈຳ​ນວນ​ອາກອນ​ມູນ​ຄ່າ​ເພີ່ມທີ່​ຕ້ອງ​ມອບ ສຳລັບການ​ເລັ່ງທວງ​ຄັ້ງ​ທີ່​ສາມ.

ໃນ​ກໍລະນີ​ຜູ້​ມີ​ອາກອນ​ມູນ​ຄ່າ​ເພີ່ມ​ຄ້າງ​ມອບ ຫາກ​ບໍ່​ປະຕິບັດ​ຕາມ​ມາດ​ຕະການ​ດັ່ງກ່າວ​ເທິງ​ນີ້​ກໍຈະ​ຖືກ​​ໂຈະ​ການ​ດຳ​ເນີນ​ທຸລະ​ກິດ, ຖອນ​ທະບຽນ​ວິ​ສາ​ຫະກິດ, ຖອນ​ໃບ​ອະນຸຍາດ​ລົງທຶນ, ​ໃບ​ອະນຸຍາດ​ອື່ນ ຫຼື ຈະ​ລົງ​ໂທດ​ຕາມ​ກົດໝາຍ ​ແລ້ວ​ແຕ່​ກໍລະນີ ​ເບົາ ຫຼື ໜັກ.

ກຳນົດ​ເວລາ​ຂອງ​ການ​ເລັ່ງທວງ​ແຕ່​ລະ​ຄັ້ງ ​ແມ່ນ ​ສິບ​ຫ້າວັນ ນັບ​ແຕ່​ວັນ​ອອກ​ໃບ​ເລັ່ງທວງ ​ແລ​ະ ສົ່ງ​ໃຫ້​ຜູ້​ມອບ​ອາກອນ​ມູນ​ຄ່າ​ເພີ່ມ​ທີ່​ຍັງ​ຄ້າງ​ມອບ​ອາກອນ​ມູນ​ຄ່າ​ເພີ່ມ ​ເປັນ​ຕົ້ນ​ໄປ.

ມາດຕາ 62 (ປັບປຸງ) ມາດ​ຕະການຕໍ່​ພະນັກງານ ​ແລະ​ ເຈົ້າ​ໜ້າ​ທີ່​ສ່ວຍ​ສາ​ອາກອນ

ພະນັກງານ ​ແລະ ​ເຈົ້າ​ໜ້າ​ທີ່​ສ່ວຍ​ສາ​ອາກອນ ທີ່​ລະ​ເມີດ​ຂໍ້​ຫ້າມ​ຕາມ​ທີ່​ກຳ​ນົດ​ໄວ້ໃນ​ມາດຕາ 43 ຂອງ​ກົດໝາຍ​ສະບັບ​ນີ້ ຈະ​ຖືກລົງ​ວິ​ໄນ ຕາມ​ທີ່​ກຳນົດ​ໄວ້​ໃນ​ກົດ​ໝາຍວາ​ດ້ວຍ​ພະນັກງານ-ລັດຖະກອນ ຫຼື ຖືກ​ລົງ​ໂທດ​ຕາມ​ກົດໝາຍ.

ພາກ​ທີ VIII

ບົດ​ບັນຍັດ​ສຸດ​ທ້າຍ

ມາດຕາ​ 63 ການຈັດ​ຕັ້ງ​ປະຕິບັດ

 ລັດ​ຖະບານ ​ແຫ່ງ ສາທາລະນະ​ລັດ ປະຊາທິປະ​ໄຕ ປະ​ຊາ​ຊົນ​ລາວ ​ເປັນ​ຜູ້​ຈັດ​ຕັ້ງ​ປະຕິບັດ​ກົດໝາຍ​ສະບັບ​ນີ້.

ມາດຕາ 64 (ປັບປຸງ) ຜົນ​ສັກສິດ

ກົດໝາຍ​ສະບັບ​ນີ້ ມີ​ຜົນສັກສິດ​ນັບ​ແຕ່​ວັນ​ປະທານ​ປະ​ເທດ ​ແຫ່ງ​ ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ອອກ​ລັດຖະດຳລັດ​ປະກາດ​ໃຊ້ ​ແລະ ພາຍຫຼັງ​​ໄດ້​ລົງ​ຈົດໝາຍ​ເຫດ​ທາງ​ລັດຖະການ ສິບ​ຫ້າ​ວັນ.

ກົດໝາຍ​ສະບັບ​ນີ້ ປ່ຽນ​ແທນ​ກົດໝາຍ​ວ່າ​ດ້ວຍ​ອາກອນ​ມູນ​ຄ່າ​ເພີ່ມ ສະບັບ​ເລກທີ 52/ສພຊ, ລົງ​ວັນ​ທີ່ 23 ກໍລະກົດ 2014.

ຂໍ້​ກຳນົດ, ບົດ​ບັນ​ຍັດ​ໃດ ທີ່​ຂັດ​ກັບ​ກົດໝາຍ​ສະບັບ​ນີ້ ລ້ວນ​ແຕ່​ຖືກ​ຍົກ​ເລີກ.

ປະທານ​ສະພາ​ແຫ່ງ​ຊາດ

ປານີ ຢາທໍ່ຕູ້