ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ
ກະຊວງອຸດສາຫະກຳ ແລະ ການຄ້າ ເລກທີ ເລກທີ 0376/ອຄ.ກຄພນ
ນະຄອນຫຼວງວຽງຈັນ, ວັນທີ ວັນທີ 08 ເມສາ 2020.
ແຈ້ງການ
ເຖິງ: - ທ່ານ ຫົວໜ້າພະແນກອຸດສາຫະກຳ ແລະ ການຄ້າແຂວງ, ນະຄອນຫຼວງວຽງຈັນ.
- ທ່ານ ຫົວໜ້າຫ້ອງການອຸດສາຫະກຳ ແລະ ການຄ້າເມືອງ, ນະຄອນ.
ເລື່ອງ: ການອະນຸຍາດໃຫ້ສືບຕໍ່ດຳເນີນກິດຈະການຮ້ານຄ້າຂາຍຍົກ ແລະ ຮ້ານຄ້າຂາຍຍ່ອຍ ທີ່ຂາຍສິນຄ້າປະເພດສະບຽງອາຫານ ແລະ ອຸປະໂພກ-ບໍລິໂພກ.
- ອີງຕາມ ຄຳສັ່ງຂອງທ່ານນາຍົກລັດຖະມົນຕີ ວ່າດ້ວຍການເພີ່ມທະວີມາດຕະການສະກັດກັ້ນ, ການແຜ່ລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ 19 ສະບັບເລກທີ 06/ນຍ, ລົງວັນທີ 29 ມີນາ 2020;
- ອີງຕາມ ບົດແນະນຳ ວ່າດ້ວຍການຜັນຂະຫຍາຍຄຳສັ່ງຂອງນາຍົກລັດຖະມົນຕີ ວ່າດ້ວຍການເພີ່ມທະວີມາດຕະການສະກັດກັ້ນ, ການແຜ່ລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ 19 ສະບັບເລກທີ 020/ສກພ, ລົງວັນທີ 02 ເມສາ 2020;
- ອີງຕາມ ຂໍ້ຕົກລົງ ວ່າດ້ວຍການແຕ່ງຕັ້ງຄະນະສະເພາະກິດຂອງກະຊວງອຸດສາຫະກຳ ແລະ ການຄ້າ ເພື່ອຮັບມືການແຜ່ລະບາດ ຂອງພະຍາດໂຄວິດ 19 ສະບັບເລກທີ 0358/ອຄ.ກຈພງ, ລົງວັນທີ 02 ເມສາ 2020.
ເພື່ອຜັນຂະຫຍາຍຄຳສັ່ງຂອງທ່ານນາຍົກລັດຖະມົນຕີ ວ່າດ້ວຍການເພີ່ມທະວີມາດຕະການສະກັດກັ້ນ, ການແຜ່ລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ 19 ສະບັບເລກທີ 06/ນຍ ລົງວັນທີ 29 ມີນາ 2020. ເພື່ອຄວາມເປັນເອກະພາບໃນການຈັດຕັ້ງປະຕິບັດ, ການຕິດຕາມ, ການກວດກາ ແລະ ການຄຸ້ມຄອງ ຊຶ່ງໄດ້ກຳນົດໄວ້ໃນຂໍ້ທີ 10 ຂອງຄຳສັ່ງສະບັບນີ້ ໃນການອະນຸຍາດໃຫ້ສືບຕໍ່ດຳເນີນກິດຈະການທີ່ມີຄວາມຈຳເປັນ ໂດຍສະເພາະ ການກໍານົດຄວາມເປັນເອກະພາບໃນຄໍາວ່າຮ້ານຂາຍເຄື່ອງຍ່ອຍ.
ລັດຖະມົນຕີກະຊວງອຸດສາຫະກຳ ແລະ ການຄ້າ ອອກແຈ້ງການ:
- ອະນຸຍາດໃຫ້ສືບຕໍ່ດຳເນີນກິດຈະການທີ່ມີຄວາມຈຳເປັນ ເປັນຕົ້ນ ຮ້ານຄ້າຂາຍຍົກ ແລະ ຮ້ານຄ້າຂາຍຍ່ອຍ ທີ່ຂາຍສິນຄ້າປະເພດສະບຽງອາຫານ, ເຄື່ອງອຸປະໂພກ-ບໍລິໂພກທີ່ຮັບໃຊ້ຊີວິດການເປັນຢູ່ປະຈໍາວັນ, ຮ້ານຂາຍອຸປະກອນການແພດ, ຮ້ານຂາຍຢາ ທີ່ຕັ້ງຢູ່ ຫຼື ບໍ່ຕັ້ງຢູ່ ໃນສູນການຄ້າ, ຮ້ານສັບພະສິນຄ້າ, ຕະຫຼາດສົດ ຫຼື ຕະຫຼາດຂາຍ ເຄື່ອງກະສິກຳ;
- ການຈຳໜ່າຍສິນຄ້າຢູ່ສູນການຄ້າ ແລະ ຮ້ານສັບພະສິນຄ້າທີ່ມີເຄື່ອງຫຼາຍປະເພດຢູ່ນໍາກັນ ອະນຸຍາດໃຫ້ເປີດຈຳໜ່າຍສະເພາະຮ້ານຊຸບເປີ້ມາເກັດ ທີ່ຂາຍສິນຄ້າປະເພດສະບຽງອາຫານ, ເຄື່ອງອຸປະໂພກ-ບໍລິໂພກ, ຮ້ານຂາຍອຸປະກອນການແພດ, ຮ້ານຂາຍຢາ ນອກນັ້ນແມ່ນໃຫ້ປິດບໍລິການຊົ່ວຄາວ.
- ມອບໃຫ້ພະແນກອຸດສາຫະກໍາ ແລະ ການຄ້າແຂວງ, ນະຄອນຫຼວງວຽງຈັນ ເຮັດບົດບັນທຶກກັບບໍລິສັດ ນໍາເຂົ້າ-ສົ່ງອອກ, ຂາຍຍົກ ຮັບປະກັນການສະໜອງສິນຄ້າສະບຽງອາຫານ ແລະ ສິນຄ້າອຸປະໂພກ-ບໍລິໂພກ ເພື່ອຮັບປະກັນການສະໜອງ ມີການເກັບຮັກສາເຄື່ອງຢູ່ໃນສາງໃຫ້ສາມາດກຸ້ມໄດ້ 1-2 ເດືອນ ເປັນຢ່າງຕໍ່າ ແລະ ໃຫ້ພະແນກ ຊ່ວຍອໍານວຍຄວາມສະດວກໃຫ້ບໍລິສັດດັ່ງກ່າວຂ້າງເທິງ ເພື່ອສາມາດເຮັດຫຼ້ອນພາລະບົດບາດດັ່ງກ່າວ.
- ມອບໃຫ້ພະແນກອຸດສາຫະກຳ ແລະ ການຄ້າແຂວງ, ນະຄອນຫຼວງວຽງຈັນ, ຫ້ອງການອຸດສາຫະກຳ ແລະ ການຄ້າເມືອງ, ນະຄອນ ກຳນົດຈຸດຈຳໜ່າຍສິນຄ້າ ປະເພດສະບຽງອາຫານ ທີ່ເຫັນວ່າມີຄວາມຈຳເປັນ ແລະ ເໝາະສົມ ຕາມການແບ່ງຂັ້ນຄຸ້ມຄອງທີ່ໄດ້ກຳນົດໄວ້ໃນຂໍ້ຕົກລົງວ່າດ້ວຍຕະຫຼາດ, ຮັບປະກັນດ້ານລາຄາ ແລະ ການສະໜອງສິນຄ້າໃຫ້ໄດ້ປົກກະຕິ ແລະ ປະຕິບັດຕາມລະບຽບການຂອງຂະແໜງສາທາລະນະສຸກວາງອອກ ເພື່ອປ້ອງກັນ ແລະ ຫຼີກລ້ຽງການແຜ່ລະບາດຂອງພະຍາດໂຄວິດ 19. ສຳລັບຈຸດຈຳໜ່າຍສິນຄ້າທີ່ແຂວງ, ເມືອງບໍ່ໄດ້ກຳນົດ ແມ່ນໃຫ້ປິດຮ້ານຊົ່ວຄາວໃນໄລຍະນີ້;
- ມອບໃຫ້ພະແນກອຸດສາຫະກຳ ແລະ ການຄ້າແຂວງ, ນະຄອນຫຼວງວຽງຈັນ ແລະ ຫ້ອງການອຸດສາຫະກຳ ແລະ ການຄ້າເມືອງ, ນະຄອນ ຊຸກຍູ້ສົ່ງເສີມຜູ້ປະກອບການທີ່ມີເງື່ອນໄຂ ຂາຍສິນຄ້າຜ່ານສື່ອອນລາຍຕ່າງໆ ເພື່ອຫຼຸດຜ່ອນຄວາມແອອັດໃນການໄປຊື້ສິນຄ້າຕົວຈິງໃນທ້ອງຕະຫຼາດ, ສູນການຄ້າ ແລະ ຮ້ານສັບພະສິນຄ້າ. ການຂາຍສິນຄ້າຕ້ອງຮັບປະກັນດ້ານຄຸນນະພາບ, ຄວາມສະອາດ ແລະ ຄວາມປອດໄພຂອງສິນຄ້າ ແລະ ຫ້າມເດັດຂາດບໍ່ໃຫ້ເກງກໍາໄລ ຫຼື ຂຶ້ນລາຄາສິນຄ້າ ໂດຍບໍ່ໄດ້ຮັບອະນຸຍາດຈາກຂະແໜງອຸດສາຫະກໍາ ແລະການຄ້າ;
- ສໍາລັບຮ້ານຂາຍຍົກ-ຂາຍຍ່ອຍທີ່ບໍ່ໄດ້ຈໍາໜ່າຍສິນຄ້າປະເພດສະບຽງອາຫານ, ເຄື່ອງອຸປະໂພກ-ບໍລິໂພກ ຮ້ານຂາຍອຸປະກອນການແພດ, ຮ້ານຂາຍຢາ, ອຸປະກອນທີ່ຮັບໃຊ້ເຂົ້າໃນການຕ້ານ ແລະ ສະກັດກັ້້ນການລະບາດຂອງພະຍາດ ໂຄວິດ 19 ແມ່ນໃຫ້ປິດຮ້ານຊົ່ວຄາວ.
- ມອບໃຫ້ພະແນກອຸດສາຫະກຳ ແລະ ການຄ້າແຂວງ, ນະຄອນຫຼວງວຽງຈັນ ແລະ ຫ້ອງການອຸດສາຫະກຳ ແລະ ການຄ້າເມືອງ, ນະຄອນ ປະສານສົມທົບກັບພາກສ່ວນທີ່ກ່ຽວຂ້ອງ ຈັດຕັ້ງປະຕິບັດຕາມແຈ້ງການສະບັບນີ້ຢ່າງເຂັ້ມງວດ. ຖ້າຫາກການຈັດຕັ້ງປະຕິບັດພົບບັນຫາ ຫຼື ຂໍ້ຫຍຸ້ງຍາກ ໃຫ້ປະສານຫາຄະນະສະເພາະກິດຂອງແຂວງ, ເມືອງ ຂອງຕົນ ຂໍທິດຊີ້ນໍາເພື່ອຄວາມເປັນເອກະພາບ ຫຼື ສາມາດສະເໜີຫາ ຄະນະສະເພາະກິດຂອງກະຊວງອຸດສາຫະກຳ ແລະ ການຄ້າ ເພື່ອຮັບມືການແຜ່ລະບາດຂອງພະຍາດໂຄວິດ 19;
- ແຈ້ງການສະບັບນີ້ມີຜົນສັກສິດນັບແຕ່ມື້ລົງລາຍເຊັນເປັນຕົ້ນໄປ ແລະ ມີຜົນບັງຄັບໃຊ້ຈົນກວ່າພົ້ນວິກິດການ ການແຜ່ລະບາດຂອງພະຍາດໂຄວິດ 19 ຕາມການແຈ້ງການຂອງລັດຖະບານ.
ດັ່ງນັ້ນ, ຈຶ່ງແຈ້ງມາຍັງທ່ານເພື່ອຊາບ ແລະ ຈັດຕັ້ງປະຕິບັດ.
ລັດຖະມົນຕີ
ນ. ເຂັມມະນີ ພົນເສນາ
| # | ຫົວຂໍ້ | ດາວໂຫຼດ |
|---|---|---|
| 1 | ແຈ້ງການ ກ່ຽວກັບການອະນຸຍາດໃຫ້ສືບຕໍ່ດໍາເນີນກິດຈະການຮ້ານຄ້າຂາຍຍົກ ແລະ ຮ້ານຄ້າຂາຍຍ່ອຍ ທີ່ຂາຍສິນຄ້າປະເພດສະບຽງອາຫານ ແລະ ອຸປະໂພກ-ບໍລິໂພກ, ເລກທີ 0376/ອຄ.ກຄພນ, ລົງວັນທີ 08 ເມສາ 2020. |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.