ໂດຍອີງຕາມ ແຈ້ງການ ກ່ຽວກັບການນຳໃຊ້ແບບຟອມໃບອະນຸຍາດນຳເຂົ້າ, ໃບອະນຸຍາດສົ່ງອອກສິນຄ້າ ສະບັບປັບປຸງໃໝ່ ເລກທິ 0472/ອຄ. ກຂອ , ລົງວັນທີ 10 ມີນາ 2016, ກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ ອອກ ບົດແນະນຳ ກ່ຽວກັບ ແນະນຳວິທີການນຳໃຊ້ໃບອະນຸຍາດນຳເຂົ້າ, ສົ່ງອອກສິນຄ້າ ສະບັບປັບປຸງໃໝ່ ສະບັບເລກທີ 1535/ກຂອ.ບຂອ, ລົງວັນທີ 10 ພຶດສະພາ 2016 ເພື່ອຄວາມເປັນເອກະພາບໃນການຈັດຕັ້ງປະຕິບັດ ແລະ ການນຳໃຊ້ ໃບອະນຸຍາດນຳເຂົ້າ, ໃບອະນຸຍາດສົ່ງອອກສິນຄ້າ ສະບັບປັບປຸງໃໝ່ ທັງນີ້, ກໍ່ເພື່ອໃຫ້ມີຄວາມສະດວກງ່າຍດາຍ, ຫຼຸດຜ່ອນຂັ້ນຕອນການປະກອບເອກະສານໃຫ້ແທດເໝາະກັບສະພາບຕົວຈິງໃນປະຈຸບັນ ແລະ ຄ່ອຍຫັນໄປສູ່ການນຳໃຊ້ລະບົບການ ອອກອະນຸຍາດແບບທັນສະໄໝ (E-License) ໃນອະນາຄົດເທື່ຶອລະກ້າວ.
ຜູ້ຂໍອະນຸຍາດນຳເຂົ້າ-ສົ່ງອອກສິນຄ້າ ສາມາດດາວໂຫຼດ ແບບຟອມໃບອະນຸຍາດນຳເຂົ້າ, ໃບອະນຸຍາດສົ່ງອອກສິນຄ້າ ສະບັບປັບປຸງໃໝ່ ພ້ອມທັງ ຄຳແນະນຳໃນການນຳໃຊ້ ໂດຍການດາວໂຫຼດຈາກເວັບໄຊ້ຂອງສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ ຫຼື ສາມາດຂໍສຳເນົາ (Soft File) ໃບອະນຸຍາດນຳເຂົ້າ, ສົ່ງອອກສິນຄ້າ ຈາກໜ່ວຍງານອອກອະນຸຍາດທີ່ຕົນຮ້ອງຂໍ.
ໃນກໍລະນີທີ່ ຜູ້ປະກອບການຍັງບໍ່ທັນສາມາດນຳໃຊ້ລະບົບການຍື່ນຂໍແບບໃໝ່ໄດ້, ຜູ້ປະກອບການສາມາດສືບຕໍ່ນຳໃຊ້ໃບອະນຸຍາດແບບເກົ່າ ຈົນກວ່າຈະມີຄວາມພ້ອມ ແຕ່ບໍ່ໃຫ້ກາຍວັນທີ 30 ກັນຍາ 2016. ຫຼັງຈາກນັ້ນ, ແມ່ນໃຫ້ຫັນເຂົ້າສູ່ວິທີການຍື່ນໃບອະນຸຍາດນຳເຂົ້າ, ສົ່ງອອກແບບໃໝ່ແທນ.
ສະນັ້ນ, ກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ ຈຶ່ງສະເໜີໃຫ້ ພະແນກອຸດສາຫະກໍາ ແລະ ການຄ້າແຂວງ, ນະຄອນຫຼວງວຽງຈັນ ເປັນເຈົ້າການເຜີຍແຜ່ ແລະ ຊຸກຍູ້ໃຫ້ຄຳແນະນຳແກ່ຜູ້ປະກອບການ ຈັດຕັ້ງປະຕິບັດການນໍາໃຊ້ໃບອະນຸຍາດນໍາເຂົ້າ, ສົ່ງອອກສິນຄ້າ ສະບັບປັບປຸງໃໝ່ ເຊິ່ງໄດ້ເລິ່ມນຳໃຊ້ນັບແຕ່ວັນທີ 1 ເມສາ 2016 ເປັນຕົ້ນມາ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.