ການໃຫ້ສັດຕະຍາບັນ ສັນຍາອຳນວຍຄວາມສະດວກທາງດ້ານການຄ້າ (ສັນຍາ ອຄ) ຂອງ 4 ປະເທດ ຄື: ລາວັນດາ, ໂອມານ, ແຊດ ແລະ ຈໍແດນ ໃນວັນທີ 22 ກຸມພາ 2017 ທີ່ຜ່ານມາ ໄດ້ເຮັດໃຫ້ຈຳນວນປະເທດທີ່ໃຫ້ສັດຕະຍາບັນ ສັນຍາ ອຄ ມີຈຳນວນ 113 ປະເທດ ຫຼື ຫຼາຍພຽງພໍ ທີ່ຈະເຮັດໃຫ້ ສັນຍາ ອຄ ມີຜົນບັງຄັບໃຊ້. ການມີຜົນບັງຄັບໃຊ້ຂອງສັນຍາສະບັບດັ່ງກ່າວນີ້ ຈະຊ່ວຍໃຫ້ການເຄື່ອນຍ້າຍສິນຄ້າ, ການປ່ອຍສິນຄ້າ ແລະ ແຈ້ງສິນຄ້າອອກຈາກດ່ານ ມີຄວາມວ່ອງໄວຂື້ນ, ເປັນການສ້າງບັນຍາກາດໃໝ່ໃຫ້ແກ່ການອຳນວຍຄວາມສະດວກທາງດ້ານການຄ້າ ແລະ ສ້າງກົນໄກອັນສຳຄັນໃຫ້ແກ່ການຄ້າ ກໍຄືລະບົບການຄ້າຫຼາຍຝ່າຍ.
ທ່ານ Roberto Azevêdo, ຫົວໜ້າອົງການການຄ້າໂລກ ກ່າວວ່າ “ການທີ່ສັນຍາ ອຄ ມີຜົນສັກສິດນຳໃຊ້ນີ້ ຖືເປັນຜົນສຳເລັດ 2 ຢ່າງ ຄື: ອັນທຳອິດ ແມ່ນສະແດງເຖິງການປະຕິບັດພັນທະຂອງສະມາຊິກໃນລະບົບການຄ້າຫຼາຍຝ່າຍ ແລະ ການປະຕິບັດຕາມຂໍ້ຜູກມັດຂອງປະເທດສະມາຊິກຕາມຂໍ້ຕົກລົງ ໃນກອງປະຊຸມທີ່ບາຫຼີ. ອັນທີສອງ, ແມ່ນໝາຍຄວາມວ່າພວກເຮົາສາມາດຈັດຕັ້ງປະຕິບັດສັນຍາດັ່ງກ່າວໄດ້ແລ້ວ ເຊິ່ງຈະຊ່ວຍຫຼຸດຄ່າໃຊ້ຈ່າຍທາງການຄ້າໄດ້ທົ່ວໂລກ. ນອກຈາກນີ້, ພວກເຮົາກໍສາມາດລິເລິ່ມໃຫ້ການຊ່ວຍເຫຼືອທາງດ້ານເຕັກນິກ ໃຫ້ແກ່ປະເທດດ້ອຍພັດທະນາໃນການຈັດຕັ້ງປະຕິບັດສັນຍາດັ່ງກ່າວ.”
ໃນການຈັດຕັ້ງປະຕິບັດສັນຍາ ອຄ ນີ້, ປະເທດພັດທະນາແລ້ວ ມີພັນທະໃນການຈັດຕັ້ງປະຕິບັດສັນຍາ ດັ່ງກ່າວ ໂດຍອີງຕາມລະບຽບການປະຕິຮູບການອຳນວຍຄວາມສະດວກທາງດ້ານການຄ້າທັນທີ ເຊິ່ງນອນໃນ 12 ມາດຕາ. ສັນຍາ ອຄ ໄດ້ກຳນົດຫຼາຍມາດຕະການໃນການປັບປຸງຄວາມໂປ່ງໃສ ແລະ ຄວາມສາມາດຄາດເດົາໄດ້ ຂອງການຄ້າຕ່າງປະເທດ, ພ້ອມທັງຫຼຸດຜ່ອນການເລືອກປະຕິບັດໃນແວດລ້ອມການດຳເນີນທຸລະກິດ. ມາດຕະການ ຂອງ ສັນຍາ ອຄ ປະກອບມີ ການປັບປຸງການເຜີຍແຜ່ ແລະ ການຈັດພິມຂໍ້ມູນ ກ່ຽວກັບ ຂັ້ນຕອນການຄ້າຕ່າງປະເທດ ແລະ ການຈັດຕັ້ງປະຕິບັດ, ການປັບປຸງການຍື່ນອຸທອນຂອງຜູ້ປະກອບການ, ການຫຼຸດຄ່າທຳນຽມ ແລະ ຂັ້ນຕອນ ກ່ຽວກັບ ການນຳເຂົ້າ-ສົ່ງອອກ ສິນຄ້າ, ການຫຼຸດຂັ້ນຕອນການແຈ້ງພາສີ ແລະ ສົ່ງເສີມເງື່ອນໄຂໃຫ້ແກ່ການຂົນສົ່ງສິນຄ້າຜ່ານແດນໃຫ້ມີເສລີພາບ. ນອກຈາກນີ້, ສັນຍາ ອຄ ກໍໍຍັງປະກອບມີມາດຕະການ ເພື່ອເຮັດໃຫ້ການຮ່ວມມືລະຫວ່າງຂະແໜງພາສີ ແລະ ຂະແໜງການອື່ນໆ ມີປະສິດຕິພາບ ໃນການອຳນວຍຄວາມສະດວກທາງດ້ານການຄ້າ ແລະ ສອດຄ່ອງກັບລະບຽບພາສີ.
ສຳລັບປະເທດກຳລັງພັດທະນາ ຈະເລີ່ມປະຕິບັດ ສັນຍາ ອຄ ພຽງແຕ່ບາງສ່ວນ ຕາມທີ່ໄດ້ກຳນົດໄວ້ໃນ “ໝວດ A” ໂດຍທັນທີ, ນອກຈາກນີ້ ກໍຕ້ອງລະບຸວ່າ ຈະເລີ່ມປະຕິບັດມາດຕະການທີ່ນອນໃນໝວດ B ໃນເວລາໃດ ເຊັ່ນດຽວກັນກັບມາດຕະການທີ່ນອນໃນໝວດ C ຕ້ອງໄດ້ກຳນົດໄລຍະເວລາ ແລະ ຄວາມຕ້ອງການການຊ່ວຍເຫຼືອ ເຮັດໃຫ້ການປະຕິບັດພັນທະບັນດາດັ່ງກ່າວສຳເລັດ ເຊິ່ງໝວດດັ່ງກ່າວນີ້ສາມາດຈັດຕັ້ງປະຕິບັດໄດ້ພາຍຫຼັງ. ສຳລັບປະເທດດ້ອຍພັດທະນາ (ເຊິ່ງລວມມີ ສປປ ລາວ) ແມ່ນຈະໄດ້ຮັບເວລາຢືດຢຸ່ນຫຼາຍກວ່າປະເທດກຳລັງພັດທະນາໃນການແຈ້ງການປະຕິບັດພັນທະຕາມໝວດດັ່ງກ່າວ. ມາຮອດປະຈຸບັນນີ້ ປະເທດສະມາຊິກອົງການການຄ້າໂລກໄດ້ແຈ້ງ “ໝວດ A” ແລ້ວ 90 ປະເທດ.
ແຫຼ່ງທີ່ມາ: ອົງການການຄ້າໂລກ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.