ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ
ກະຊວງອຸດສາຫະກໍາ ແລະ ການຄ້າ ເລກທີ0336/ອຄ.ກຂອ
ນະຄອນຫຼວງວຽງຈັນ, ວັນທີ 13 ມີນາ 2017
ຄໍາສັ່ງແນະນໍາ
ເຖິງ: ຄະນະຮັບຜິດຊອບການປະມູນຂາຍໄມ້ທີ່ຍຶດເປັນຂອງລັດ ນະຄອນຫຼວງວຽງຈັນ ແລະ ບັນດາແຂວງທົ່ວປະເທດ.
ເລື່ອງ: ແນະນໍາການຈັດຕັ້ງປະມູນຂາຍໄມ້ທີ່ຍຶດເປັນຂອງລັດ.
- ອີງຕາມ ແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ເລກທີ 1345/ຫສນຍ.ກລຂ, ລົງວັນທີ 09 ກັນຍາ 2016 ແລະ ແຈ້ງການ ເລກທີ 324/ຫສນຍ.ກລຂ (ຂໍ້3), ລົງວັນທີ 21 ກຸມພາ 2017;
- ອີງຕາມ ຂໍ້ຕົກລົງ ວ່າດ້ວຍການແຕ່ງຕັ້ງຄະນະຮັບຜິດຊອບການປະມູນຂາຍໄມ້ທີ່ຍຶດເປັນຂອງລັດໃນຂອບເຂດທົ່ວປະເທດ ເລກທີ 19/ນຍ ລົງວັນທີ 02 ມີນາ 2017.
- ອີງຕາມລະບຽບການຊື້-ຂາຍໄມ້ ເລກທີ 1726/ອຄ.ກຂອ, ລົງວັນທີ 23 ສິງຫາ 2012.
ເພື່ອໃຫ້ການຈັດຕັ້ງປະຊຸມຂາຍໄມ້ທີ່ຍຶດເປັນຂອງລັດໃນຂອບເຂດທົ່ວປະເທດສໍາເລັດໄດ້ຕາມເປົ້າໝາຍ, ແນໃສ່ສະ ໜອງວັດຖຸດິບໄມ້ໃຫ້ແກ່ບັນດາໂຮງງານປຸງແຕ່ງໄມ້ ແລະ ໂຮງງານເຟີນິເຈີພາຍໃນປະເທດ ເພື່ອປຸງແຕ່ງຜະລິດຕະພັນໄມ້ທີ່ມີການສ້າງມູນຄ່າເພີ້ມສູງ. ພ້ອມຮັບປະກັນຄວາມໂປ່ງໃສ, ເປັນທໍາ, ຖືກຕ້ອງຕາມລະບຽບການ ແລະ ເປັນເອກະພາບກັນໃນການຈັດຕັ້ງປະຕິບັດ, ຮັບປະກັນຜົນປະໂຫຍດຮ່ວມກັນລະຫວ່າງພາກລັດ ແລະ ພາກທຸລະກິດ.
ລັດຖະມົນຕີກະຊວງອຸດສາຫະກໍາ ແລະ ການຄ້າ ແນະນໍາຄະນະຮັບຜິດຊອບການປະມູນຂາຍໄມ້ທີ່ຍຶດເປັນ
ຂອງລັດນະຄອນຫຼວງວຽງຈັນ ແລະ ບັນດາແຂວງທົ່ວປະເທດ ເພື່ອປະຕິບັດດັ່ງນີ້:
- ໃຫ້ຄະນະຮັບຜິດຊອບການປະມູນຂາຍໄມ້ຍຶດເປັນຂອງລັດ ນະຄອນຫຼວງວຽງຈັນ ແລະ ບັນດາແຂວງສືບຕໍ່ສົມທົບກັບ ຄະນະຮັບຜິດຊອບການປະມູນໄມ້ທີ່ຍຶດເປັນຂອງລັດໃນຂອບເຂດທົ່ວປະເທດຂັ້ນສູນກາງເລັ່ງລັດການປະມູນໄມ້ທີ່ຍຶດເປັນຂອງລັດໃຫ້ສໍາເລັດ ດ້ວຍຮູບການປະມູນແບບເປີດກວ້າງທົ່ວປະເທດ.
- ໃຫ້ໂຄສະນາເຜີຍແຜ່ເປີດກວ້າງການປະມູນໄມ້ທີ່ຍຶດເປັນຂອງລັດໂດຍຜ່ານສື່ຕ່າງໆເຊັ່ນ: ໂທລະພາບ, ວິທະຍຸ, ສື່ອອນລາຍ ຫຼື ໜັງສືພິມຕ່າງໆຢ່າງໜ້ອຍ 15 ວັນລັດຖະການກ່ອນວັນທີ່ເປີດການປະມູນ. ເພື່ອໃຫ້ບັນດາໂຮງງານປຸງແຕ່ງໄມ້ ແລະ ໂຮງງານເຟີນິເຈີໃນຂອບເຂດທົ່ວປະເທດທີ່ມີຄວາມສົນໃຈ, ມີເວລາພຽງພໍໃນການກະກຽມຄວາມພ້ອມແລະ ເຂົ້າຮ່ວມປະມູນ, ໂດຍສະເພາະບັນດາໂຮງງານທີ່ເປັນສະມາຊິກຂອງສະມາຄົມອຸດສາຫະກໍາປຸງແຕ່ງໄມ້ສໍາເລັດຮູບແຫ່ງຊາດລາວ ແລະ ສະມາຄົມເຟີນີເຈີລາວ.
- ຜູ້ທີ່ສາມາດເຂົ້າຮ່ວມປະມູນໄມ້ທີ່ຍຶດເປັນຂອງລັດໄດ້ ຕ້ອງມີເງື່ອນໄຂດັ່ງນີ້:
3.1. ຕ້ອງເປັນໂຮງງານປຸງແຕ່ງໄມ້ ຫຼື ໂຮງງານເຟີນິເຈີຢູ່ ສປປ ລາວ ທີ່ມີທະບຽນວິສາຫະກິດດໍາເນີນທຸລະກິດດ້ານການຜະລິດ ແລະ ປຸງແຕ່ງໄມ້ຖືກຕ້ອງຕາມລະບຽບກົດໝາຍ, ໂດຍໃຫ້ຖືເອົາສະມາຊິກຂອງສະມາຄົມອຸດສາຫະກໍາປຸງແຕ່ງໄມ້ສໍາເລັດຮູບແຫ່ງຊາດ ແລະ ສະມາຄົມເຟີນິເຈີລາວເປັນບູລິມະສິດ.
3.2. ມີໃບຢັງຢືນຖານະທາງດ້ານການນເງິນຈາກທະນາຄານຢູ່ ສປປ ລາວ.
3.3. ມີປະຫວັດການດໍາເນີນທຸລະກິດຈະແຈ້ງ, ບໍ່ມີໜີ້ສິນ, ຄ້າງປະຫວັດພັນທະຕ່າງໆກັບລັດມາກ່ອນ, ບໍ່ເຄີຍຖືກດໍາເນີນຄະດີ, ກ່າວໂທດ ຫຼື ຖືກປັບໄໜຍ້ອນການລະເມີດກົດໝາຍ ແລະ ລະບຽບການທີ່ກ່ຽວຂ້ອງ, ໂດຍສະເພາະແມ່ນການກະທໍາຜິດທີ່ກ່ຽວພັນກັບໄມ້.
- ລາຄາທີ່ໃຊ້ເປັນພື້ນຖານສໍາລັບການປະມູນລວມມີ: (1) ລາຄາພັນທະໄມ້, (2) ອາກອນມູນຄ່າເພີ່ມ ແລະ (3) ອາກອນກໍາໄລ.
- ຂັ້ນຕອນການປະມູນຂາຍໄມ້ຍຶດ ໃຫ້ດໍາເນີນໄປ 03 ຂັ້ນຕອນດັ່ງນີ້:
5.1 ຂັ້ນຕອນທີ່ 01:
5.1.1 ກໍລະນິໄມ້ຍຶດເປັນປະເພດໄມ້ທ່ອນ: ແມ່ນໃຫ້ຖືເອົາລາຄາຕາມແຈ້ງການລາຄາພັນທະໄມ້ ທີ່ກະຊວງອຸດສາຫະກໍາ ແລະ ການຄ້າວາງອອກ (ແຈ້ງການເລກທີ 1813/ອຄ,ກຂອ, ລົງວັນທີ 04 ກັນຍາ 2015) ບວກອາກອນມູນຄ່າເພີ້ມ (ອມພ) 10% ຈາກການຂາຍໄມ້ ແລະ ອາກອນກໍາໄລ (ອັດຕາກໍາໄລລວມ 20% ຂອງອັດຕາອາກອນກໍາໄລ 24%) ເຂົ້າໃສ່ນໍາ.
ຕົວຢ່າງ: ລາຄາພັນທະໄມ້ຍາງທ່ອນ (ເກຣດ ກ)
• ອາກອນມູນຄ່າເພີ່ມຈາກການຂາຍໄມ້: 927.000 ກີບ X 10% = 92.700 ກີບ
• ອາກອນກໍາໄລ: 927.000 ກີບ X 20% X 24% = 44.496 ກີບ
• ລາຄາພື້ນຖານສໍາລັບການປະມູນ: 927.00 + 92.700 + 44.469 = 1.064.196 ກີບ
5.1.2 ກໍລະນີໄມ້ຍຶດເປັນປະເພດໄມ້ຕີຕັບ: ໃຫ້ຄິດໄລ່ລາຄາໄມ້ຕີຕັບໂດຍ ເອົາລາຄາໄມ້ທ່ອນເກຣດ ກ ບວກເພີ້ມຂື້ນ 10% (ຍ້ອນໄມ້ໄດ້ຜ່ານການສ້າງມູນຄ່າເພີ້ມດ້ວຍການປຸງແຕ່ງເປັນໄມ້ຕີຕັບແລ້ວ). ຫຼັງຈາກນັ້ນ, ໃຫ້ບວກອາກອນມູນຄ່າເພີ້ມ (ອມພ) 10% ຈາກການຂາຍໄມ້ ແລະ ອາກອນກໍາໄລ (ອັດຕາກໍາໄລລວມ 20% ຂອງອັດຕາອາກອນກໍາໄລ24%) ເຂົ້າໃສ່ນໍາ.
ຕົວຢ່າງ: ລາຄາພັນທະໄມ້ຍາງຕິຕັບ
• ລາຄາໄມ້ຕີຕັບ: 927.000 ກີບ + 10% = 1.019.700 ກີບ
• ອາກອນມູນຄ່າເພີ້ມຈາກການຂາຍໄມ້: 1.019.700 ກີບ X 10% = 101.970 ກີບ
• ອາກອນກໍາໄລ: 1.019.700 ກີບ X 20% X 24% = 48.946 ກີບ
• ລາຄາພື້ນຖານສໍາລັບການປະມູນ: 1.019.700+101.970+48.946 = 1.170.616 ກີບ
5.1.3 ກໍລະນີໄມ້ຍຶດທີເປັນປະເພດໄມ້ແປຮູບ: ໃຫ້ຄິດໄລ່ລາຄາໄມ້ແປຮູບເອົາລາຄາໄມ້ທ່ອນ ເກຮດ ກ ບວກເພີ່ມຂຶ້ນ 15% (ຍ້ອນໄມ້ໄດ້ຜ່ານການສ້າງມູນຄ່າເພີ່ມດ້ວຍການປຸງແຕ່ງເປັນໄມ້ແປຮູບແລ້ວ). ຫຼັງຈາກນັ້ນໃຫ້ບວກອາກອນມູນຄ່າເພີ້ມ (ອມພ) 10% ຈາກການຂາຍໄມ້ ແລະ ອາກອນກຳໄລ (ອັດຕາກຳໄລ ລວມ 20% ຂອງອັດຕາອາກອນກຳໄລ 24%)ເຂົ້າໃສ່ນຳ.
ຕົວຢ່າງ: ລາຄາພັນທະໄມ້ຍາງແປຮູບ
- ລາຄາໄມ້ແປຮູບ: 927.000 ກີບ+15%=1.066.050 ກີບ
- ອາກອນມູນຄ່າເພີມຈາກການຂາຍໄມ້:1.066.050 ກີບ x 10%=106.605 ກີບ
- ອາກອນກຳໄລ: 1.019.700 ກີບ x 20% x 24%=51.170ກີບ
- ລາຄາພື້ນຖານສຳລັບການປະມູນ: 1.066.050 + 106.605+51.170 =1.223.825 ກີບ.
(ຫາກພາຍຫຼັງປະຕິບັດຕາມຂັ້ນຕອນທີ 01 ແລ້ວ ບໍ່ສາມາດຂາຍໄດ້ ແມ່ນໃຫ້ຄະນະຮັບຜິດຊອບການປະມູນຂາຍທີຍຶດເປັນຂອງລັດ ນະຄອນຫຼວງວຽງຈັນ, ບັນແຂວງເຮັດບົດບັນທຶຶກໄວ້ເປັນຫຼັກຖານ ແລະ ສືບຕໍ່ດຳເນີນການຂາຍໂດຍນຳໃຊ້ຂັ້ນຕອນທີ 02)
5.2 ຂັ້ນຕອນທີ 02: ໃຫ້ຄິດໄລ່ໂດຍເອົາຄຸນນະພາບໄມ້ຕົວຈິ່ງທີ່ຍັງເຫຼືອ (ຕາມການປະເມີນຂອງຄະນະຮັບຜິດຊອບການປະມູນຂາຍໄມ້ຍຶດຂັ້ນທ້ອງຖິ່ນ) ຄູນດ້ວຍລາຄາຂັ້້ນໄມ້ຕາມແຕ່ລະກໍລະນີຂອງປະເພດໄມ້ຍຶດທີ່ໄດ້ກ່າວມາໃນຂໍ້ 5.1 ຂ້າງເທິງ ເພື່ອເປັນລາຄາພື້ນຖານສຳລັບການປະມູນ.
ຕົວຢ່າງ:
5.2.1 ກໍລະນີໄມ້ທ່ອນ; ໄມ້ຍາງທ່ອນ ເກຮດ ກ ຜ່ານການກວດກາຄຸນນະພາບຄືນວ່າໄມ້ມີຄຸນນະພາບພຽງແຕ່ 70%.
ລາຄາພື້ນຖານສຳລັບການປະມູນ: 1.170.616 ກີບ x 70%=744.937 ກີບ.
5.2.2 ກໍລະນີໄມ້ຕີຕັບ: ຜ່ານການກວດກາຄຸນນະພາບຄືນເຫັນວ່າໄມ້ມີຄຸນນະພາບພຽງແຕ່70%.
ລາຄາພື້ນຖານສຳລັບການປະມູນ: 1.223.825 ກີບ x 70%=819.431 ກີບ.
5.2.3 ກໍລະນີໄມ້ແປຮູບຜ່ານການກວດກາຄຸນນະພາບຄືນເຫັນວ່າໄມ້ມີຄຸນນະພາບພຽງແຕ່70%.
ລາຄາພື້ນຖານສຳລັບການປະມູນ: 1.223.825 ກີບ x 70%=856.677
(ຫາກພາຍຫຼັງປະຕິບັດຕາມຂັ້ນຕອນທີ 02 ແລ້ວ ຍັງບໍ່ສາມາດຂາຍໄດ້ ແມ່ນໃຫ້ຄະນະຮັບຜິດຊອບການປະມູນຂາຍໄມ້ທີຍຶດເປັນຂອງລັດ ນະຄອນຫຼວງວຽງຈັນ, ບັນດາແຂວງ ເຮັດບົດບັນທຶກໄວ້ເປັນຫຼັກຖານ ແລະ ສືບຕໍ່ດຳເນີນການຂາຍໂດຍນຳໃຊ້ຂັ້ນຕອນທີ 03)
5.3 ຂັ້ນຕອນທີ 03: ພິຈາລະນາຂາຍໃນລາຄາສູງສຸດໃຫ້ແກ່ຜູ້ທີເຂົ້າຮ່ວມປະມູນສະເໜີໃນລາຄານັ້ນຢ່າງສົມເຫດສົມຜົນ
- ສຳລັບໄມ້ຍຶດທີເປັນປະເພດໄມ້ທ່ອນສັ້ນ (ໄມ້ກະດຸດ) ທີ່ບໍ່ສາມາດວັດແທກເປັນແມັດກ້ອນ ແລະ ຈັດຊັ້ນຄຸນນະພາບໄດ້, ຊຶ່ງຄະນະຮັບຜິດຊອບການປະມູນຂາຍໄມ້ຍຶດທີເປັນຂອງລັດຂັ້ນທ້ອງຖິ່ນໄດ້ສັງລວມຂໍ້ມູນນ້ຳໜັກເປັນໂຕນ. ໄມ້ຍຶດຈຳນວນນີ້ໃຫ້ຄະນະຮັບຜິດຊອບການປະມູນຂາຍໄມ້ທີຍຶດເປັນຂອງລັດປ່ຽນນ້ຳໜັກຂອງໄມ້ດັ່ງກ່າວຈາກໂຕນມາເປັນແມັດກ້ອນ ຕາມຫຼັກການປ່ຽນນ້ຳໜັກທີໄດ້ລະບຸໄວ້ໃນຂໍ້ຕົກລົງວ່າດ້ວຍລະບຽບການວັດແທກໄມ້ທ່ອນ, ຕໍໄມ້, ປູດໄມ້ ແລະ ການຈັດຊັ້ນຄຸນນະພາບໄມ້ທ່ອນ ເລກທີ 0116/ກປ.07 ລົງວັນທີ 17 ພຶດສະພາ 2007 ດັ່ງນີ້:
6.1 ໄມ້ຂະຍຸງ, ຄຳພີ 01ແມັດກ້ອນທຽບເທົ່າ 1,5 ໂຕນ;
6.2 ໄມ້ດູ່ ໄມ້ແຕ້ຄ່າ 01ແມັດກ້ອນທຽບເທົ່າ 1,2 ໂຕນ; ແລະ
6.3 ໄມ້ສະນິດອື່ນໆ 01ແມັດກ້ອນທຽບເທົ່າ 1 ໂຕນ
ຫຼັງຈາກນັ້ນ, ຈຶ່ງດຳເນີນປະມູນຂາຍໄມ້ຕາມຂັ້ນຕອນທີ່ໄດ້ລະບຸໄວ້ໃນຂໍ້ 5 ຂອງຄຳສັ່ງແນະນຳສະບັບນີ້.
- ການເກັບອາກອນ:
7.1 ອາກອນມູນຄ່າເພີ້ມ (10%) ແລະ ອາກອນກຳໄລ (ອັດຕາກຳໄລລວມ20%ຂອງອັດຕາອາກອນກຳໄລ24%) ແມ່ນໄດ້ຄິດໄລ່ເຂົ້າໃສ່ໃນໂຄງສ້າງຂອງລາຄາເພື່ອເປັນພື້ນຖານໃນການປະມູນແລ້ວ.
7.2 ອາກອນຂົນສົ່ງ (10%): ແມ່ນໃຫ້ເກັບນຳບໍລິສັດຂົນສົ່ງໄມ້, ລວມທັງຜູ້ຊະນະການປະມູນໄມ້ທີນຳໃຊ້ພາຫະນະທີຂຶ້ນທະບຽນໃນນາມບໍລິສັດຂົນສົ່ງຂອງຜູ້ກ່ຽວເພື່ອເຄື່ອນຍ້າຍໄມ້ທີໄດ້ຈາກການປະມູນ ຍົກເວັ້ນກໍລະນີຜູ້ຊະນະການປະມູນນຳໃຊ້ພາຫະນະທີ່ຂຶ້ນທະບຽນໃນນາມໂຮງງານທີ່ດຳເນີນກິດຈະການປຸງແຕ່ງໄມ້ເພື່ອຂົນສົ່ງ ແລະ ເຄື່ອນຍ້າຍໄມ້ເຂົ້າໂຮງງານ ແມ່ນບໍ່ໃຫ້ເກັບອາກອນນີ້.
- ໄມ້ທີ່ຍຶດເປັນຂອງລັດ ຕ້ອງໄດ້ຂຶ້ນບັນຊີເປັນຂອງຊັບສິນຂອງລັດກັບຂະແໜງການເງິນນະຄອນຫຼວງວຽງຈັນ ແລະ ບັນດາແຂວງ (ຫ້ອງການຄຸ້ມຄອງຊັບສິນຂອງລັດ) ໂດຍໃຫ້ມີການເຊັນຢັ້ງຢືນຮັບຮູ້ບັນຊີຮ່ວມກັນລະຫວ່າງຂະ ແໜງກະສິກຳ ແລະ ປ່າໄມ້, ຂະແໜງການເງິນ ແລະ ຂະແໜງອຸດສາຫະກຳ ແລະ ການຄ້າ ເພື່ອຮັບປະກັນຄວາມເປັນເອກະພາບຕໍ່ບັນຊີ ແລະ ບໍລິມາດໄມ້ທີຍຶດເປັນຂອງລັດ ທີ່ຈະປະມູນຂາຍ.
- ຄ່າສິ້ນເປື່ອງຕ່າງໆທີ່ເກີດຂຶ້ນຈາກການຍຶດ, ການທ້ອນໂຮມ, ກນເກັບຮັກສາໄມ້, ການຈັດປະມູນຂາຍໄມ້ ແລະ ຄ່າສິ້ນເປື່ອງອື່ນໆ ແມ່ນອະນຸຍາດຈາກເງິນທີໄດ້ຮັບຈາກການຂາຍໄມ້, ໂດຍໃຫ້ປະຕິບັດຕາມຄຳສັ່ງນາຍຍົກລັດຖະມົນຕີ ວ່າດ້ວຍການຄຸ້ມຄອງເກັບລາຍຮັບຈາການຂາຍໄມ້ ແລະ ເຄື່ອງປ່າຂອງດົງ ເຂົ້າງົບປະມານເເຫຼ່ງລັດ ເລກທີ 57/ນຍ (ຂໍ້ 1.3 ງ: ເງິນລາຍຮັບຈາການຂາຍໄມ້ຍຶດ,ໃຫ້ຫັກຄ່າສິ້ນເປືອງ 10%, ຈຳນວນທີເຫຼືອແມ່ນມອບເຂົ້າເປັນລາຍຮັບງົບປະມານສູນກາງ 50% ແລະງົບປະມານແຂວງ, ນະຄອນຫຼວງວຽງຈັນ 50% ສໍາລັບເງິນປັບໄໝໃຫ້ມອບເຂົ້າເປັນລາຍຮັບງົບປະມານແຂວງ, ນະຄອນຫຼວງວຽງຈັນທັງໝົດ).
- ກໍລະນີພົບຄວາມຫຍຸ້ງຍາກໃນການຈັດຕັ້ງປະຕິບັດແມ່ນໃຫ້ລາຍງານຂໍ້ທິດ ທ່ານເຈົ້າແຂວງ, ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ເພື່ອແກ້ໄຂ້ໃຫ້ທ່ວງທັນກັບສະພາບການ.
- ໃຫ້ຄະນະຮັບຜິດຊອບປະມູນຂາຍໄມ້ທີ່ຍຶດເປັນນຂອງລັດ ນະຄອນຫຼວງວຽງຈັນ ແລະ ບັນດາແຂວງ ເກັບກຳຂໍ້ມູນການຂື້ືນບັນຊີໄມ້ຍຶດທີ່ມີຕົວຈິ່ງ ຜົນການປະມູນ ການຊຳລະເງີນຊື້ໄມ້ຍຶດ ແລະ ອື່ນໆ ແລ້ວສັງລວມລາຍງານຄວາມຄືບໜ້າໃຫ້ຄະນະຮັບຜິດຊອບການປະມູນຂາຍໄມ້ຂັ້ນສູນກາງ ຊາບທຸກວັນທີ 15 ຂອງແຕ່ລະເດືອນ.
- ຄຳສັ່ງແນະນຳສະບັບນີ້ມີຜົນສັກສິດນັບແຕ່ລົງລາຍເຊັນເປັນຕົ້ນໄປ ແລະ ນຳໃຊ້ປ່ຽນແທນສະບັບເລກທີ 2071/ອຄ.ກຂອ, ລົງວັນທີ 14 ພະຈິກ 2016
ດັ່ງນັ້ນ, ຈຶ່ງແຈ້ງມາຍັງ ທ່ານເພື່ອຊາບ ແລະ ປະຕິບັດຕາມນີ້ດ້ວຍ.
ລັດຖະມົນຕີ,
ນ. ເຂັມມະນີ ພົນເສນາ
| # | ຫົວຂໍ້ | ດາວໂຫຼດ |
|---|---|---|
| 1 | ຄຳສັ່ງແນະນຳກ່ຽວກັບແນະນຳການຈັດຕັ້ງປະມູນຂາຍໄມ້ທີ່ຢຶດເປັນຂອງລັດ ສະບັບເລກທີ 0336/ອຄ.ກຂອ, ລົງວັນທີ 13 ມີນາ 2017. |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.