ໃນວັນທີ 11 ເມສາ 2018, ທີ່ ນະຄອນຫລວງວຽງຈັນ ທະນາຄານພັດທະນາອາຊີ ປະຈຳ ສປປ ລາວ ໄດ້ຈັດກອງປະຊຸມ ເຜີຍແຜ່ບົດລາຍງານການຄາດຄະເນການພັດທະນາຂອງອາຊີ ໂດຍການເປັນປະທານ ຂອງທ່ານ ຢາຊຸຊິ ເນກິຊິ ຜູ້ຕາງໜ້າທະນາຄານພັດທະນາອາຊີປະຈຳລາວ, ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ຢາຊຸຊິ ເນກິຊິ ກ່າວວ່າ: ເຖິງແມ່ນວ່າລັດຖະບານຈະເກືອດຫ້າມໃນການສົ່ງອອກໄມ້ທ່ອນ, ພ້ອມທັງເພີ່ມເງື່ອນໄຂ ໃນການປ່ອຍສິນເຊື່ອທີ່ເຂັ້ມງວດຂຶ້ນ, ສ່ວນລາຄາ ແຮ່ທາດໃນຕະຫລາດສາກົນມີການຫລຸດລົງ ແລະ ຈຳນວນນັກທ່ອງທ່ຽວ ກໍຫລຸດລົງນຳອີກ, ແຕ່ ສປປ ລາວ ຍັງຮັກສາຈັງຫວະການຂະຫຍາຍຕົວຂອງຕົນໄວ້ ເພາະໄດ້ຮັບແຮງສະໜັບສະໜູນຈາກບັນດາໂຄງການພັດທະນາພື້ນຖານໂຄງລ່າງຂະໜາດໃຫຍ່, ການຜະລິດກະແສໄຟຟ້າທີ່ເພີ່ມຂຶ້ນ ແລະ ການຂະຫຍາຍໂຕໃນຂະແໜງບໍລິການຕ່າງໆ. ບັນດາໂຄງການພະລັງງານໄຟຟ້າຈຳນວນໜຶ່ງ ເຊິ່ງປັດຈຸບັນພວມຢູ່ໃນໄລຍະການກໍ່ສ້າງ ແລະ ຈະໄດ້ເລີ່ມທຳການຜະລິດ ໃນປີ 2019 ໂດຍສະເພາະ ແມ່ນເຂື່ອນໄຟຟ້າໄຊຍະບູລີ ທີ່ມີກໍາລັງການຜະລິດຫລາຍ 1.000 ເມັກກາວັດ ຈະເຮັດໃຫ້ຂະແໜງອຸດສາຫະກໍາ ຫັນທິດທາງຈາກແນວໂນ້ມ ທີ່ຫລຸດລົງເປັນການເພີ່ມຂຶ້ນ. ໃນຂະນະດຽວກັນ ຖ້າສະພາບອາກາດເອື້ອອຳນວຍ ຂະແໜງກະສິກໍາຈະສືບຕໍ່ຂະຫຍາຍຕົວປະມານ 3% ແລະ ຄາດວ່າການການຂະຫຍາຍຕົວຂອງຂະແຫນງບໍລິການຈະມີຄວາມເຂັ້ມແຂງຂຶ້ນຕື່ມ ຍ້ອນວ່າຈຳນວນນັກທ່ອງທ່ຽວເຂົ້າມາ ແລະ ຄາດວ່າຈະດີຂຶ້ນ ກ່ອນປີຜ່ານມາ ດ້ວຍແຮງສະໜັບສະໜູນຈາກການເປີດປີທ່ອງທ່ຽວລາວ 2018.
ເຖິງວ່າ ຈັງຫວະການຂະຫຍາຍຕົວຍັງສືບຕໍ່ຮັກສາໄວ້ ແຕ່ອັດຕາເງິນເຟີ້ຄາດວ່າຈະຄົງຢູ່ທີ່ລະດັບ 2%-2,5%, ການຂາດດູນບັນຊີເດີນສະພັດຄາດວ່າຈະເພີ່ມຂຶ້ນເຖິງ 14,9% ຂອງ ຈີດີພີ ໃນປີ 2018. ຍ້ອນອັດຕາເງິນເຟີ້ ທີ່ເພີ່ມສູງຂຶ້ນ, ລາຄານໍ້າມັນ ໃນຕະຫລາດສາກົນ ເພີ່ມຂຶ້ນ ແລະ ການນໍາເຂົ້າເຄື່ອງກົນຈັກພື່ອຮັບໃຊ້ໃນບັນດາໂຄງການພື້ນຖານໂຄງລ່າງຂະໜາດໃຫຍ່ໄດ້ເຮັດໃຫ້ລາຍຈ່າຍຈາກການນໍາເຂົ້າເພີ່ມຂຶ້ນ,ສ່ວນການຂະຫຍາຍຕົວຂອງການສົ່ງອອກຍັງຢູ່ໃນລະດັບປານກາງ. ເມື່ອໂຄງການພະລັງງານໄຟຟ້າໃຫມ່ເລີ່ມດໍາເນີນງານການສົ່ງອອກ ໄຟຟ້າ ແມ່ນຈະເພີ່ມຂຶ້ນໃນປີ 2019 ແລະ ເຮັດໃຫ້ການຂາດດູນຂອງບັນຊີເດີນສະພັດຫລຸດລົງຢູ່ປະມານ 13,7% ຂອງ ຈີດີພີ.
ຢ່າງໃດກໍຕາມ ຄວາມສ່ຽງຈາກພາຍນອກ ຕໍ່ກັບການຄາດຄະເນເສດຖະກິດ ຂອງ ສປປ ລາວ ທີ່ມີການຫລຸດລົງຢ່າງຫລວງຫລາຍ ໃນການຄ້າ ແລະ ຄວາມບໍ່ມີສະເຖຍລະພາບເພີ່ມຂຶ້ນໃນຕະຫລາດການເງິນຂອງໂລກ ຫລື ພາກພື້ນອາດຈະເກີດຂຶ້ນໄດ້ສູງ ຖ້າຫາກວ່າຄວາມພະຍາຍາມຂອງລັດຖະບານໃນການສັງລວມການເງິນຂອງຕົນບໍ່ປະສົບຜົນສໍາເລັດເຊິ່ງຈະພາໃຫ້ມີຜົນກະທົບຕໍ່ຄວາມຫຍຸ້ງຫຍາກທາງດ້ານໜີ້ສິນພາຍໃຕ້ເງື່ອນໄຂ ທີ່ຄັງສຳຮອງເງິນຕາຕ່າງປະເທດ ເກືອບບໍ່ພໍ ແກ່ການນໍາເຂົ້າ.
ແຫຼ່ງຂໍ້ມູນຂ່າວ: ຂ່າວສານປະເທດລາວ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.