ກອງປະຊຸມຝຶກອົບຮົມໄດ້ຈັດຂຶ້ນໃນວັນທີ 23-26 ເມສາ 2018 ທີ່ໂຮງແຮມລາວພລາຊາ, ນະຄອນຫຼວງວຽງຈັນ ໂດຍມີເຈົ້າໜ້າທີ່ທີ່ປະຈຳຢູ່ດ່ານສາກົນຂົວມິດຕະພາບ 1 ແລະ ດ່ານສາກົນທີ່ວັດໜາມບິນວັດໄຕ ຊຶ່ງປະກອບມີ: ເຈົ້າໜ້າທີ່ພາສີ, ເຈົ້າໜ້າທີ່ກັກກັນພືດ ແລະ ສັດ, ເຈົ້າໜ້າທີ່ກວດກາອາຫານ ແລະ ຢາ. ນອນນັ້ນ, ກໍຍັງມີຜູ້ເຂົ້າຮ່ວມຈາກ ກົມແຜນການ ແລະ ການຮ່ວມມື ແລະ ກອງເລຂາເຄມີ, ຊີວະ, ນິວເຄຣຍ, ກະຊວງວິທະຍາສາດ ແລະ ເຕັກໂນໂລຊີ ພ້ອມດ້ວຍວິຊາການທີ່ຕາງໜ້າກົມການນຳເຂົ້າ ແລະ ສົ່ງອອກເຂົ້າຮ່ວມ. ກອງປະຊຸມໄດ້ດຳເນີນໄປເປັນເວລາ 04 ວັນ ພາຍໃຕ້ການເປັນການເປັນປະທານ ຂອງ ທ່ານ ສຸລິຍົນ ພິລາວົງ, ຫົວໜ້າກົມການນໍາເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ.
ຈຸດປະສົງຂອງກອງປະຊຸມຝຶກອົບຮົມໃນຄັ້ງນີ້ ແມ່ນເພື່ອເປັນການສ້າງຄວາມເຂົ້າໃຈ ກ່ຽວກັບສິນຄ້າຍຸດທະສາດທີ່ສາມາດນຳໃຊ້ໄດ້ສອງດ້ານ ແລະ ນຳສະເໜີກ່ຽວກັບບົດຮຽນການຄຸ້ມຄອງຂອງສາກົນ ໂດຍສະເພາະແມ່ນບົດຮຽນຂອງສະຫະພາບເອີຣົບໃນການຄຸ້ມຄອງສິນຄ້າປະເພດດັ່ງກ່າວ, ການຄຸ້ມຄອງໃນກອບການຂົນສົ່ງຜ່ານແດນ ແລະ ການຂົນສົ່ງສິນຄ້າທີ່ມີການຄ່ຽນຖ່າຍພາຫະນະຂົນສົ່ງ. ກອງປະຊຸມຝຶກອົບຮົມໄດ້ອະທິບາຍ ຢ່າງລະອຽດ ກ່ຽວກັບ ຄູ່ມືການຈັດຕັ້ງປະຕິບັດ STCE, ການສັ່ງຫ້າມລັກລອບສິນຄ້າເຂົ້າປະເທດຢ່າງຜິດກົດໝາຍ, ຫລັກສູດສິນຄ້າພິເສດ: ເຄມີພັນ, ອຸປະກອນດ້ານຊີວະວິທະຍາ ແລະ ວັດສະດຸກຳມັນຕະພາບລັງສີ, ໂມດູນສິນຄ້າພິເສດ: ວັດສະດຸທີ່ໃຊ້ແບບສອງແງ່, ອຸປະກອນດ້ານອາວຸດ ແລະ ການທະຫານ, ການປະເມີນຄວາມສ່ຽງ, ການປະກອບຂໍ້ມູນ, ການກຳນົດເປົ້າໝາຍຂອງ STCE.
ນອກຈາກນີ້, ກົມການນຳເຂົ້າ ແລະ ສົ່ງອອກ ຍັງໄດ້ໃຫ້ຊາບວ່າໃນແຜນການຕໍ່ໜ້າ ທາງກົມຈະໄດ້ມີການສ້າງໜ່ວຍງານຄຸ້ມຄອງການຄ້າ ແລະ ການສົ່ງອອກສິນຄ້າຍຸດທະສາດ ແລະ ຈະຈັດກອງປະຊຸມປຶກສາຫາລືກ່ຽວກັບການຮ່າງລະບຽບການຄຸ້ມຄອງສິນຄ້າຍຸດທະສາດທີ່ສາມາດນຳໃຊ້ໄດ້ສອງດ້ານ ຄັ້ງທີ 03.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.