ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດຖະນາຖາວອນ
ກະຊວງການເງິນ ເລກທີ 0420/ກງ
ນະຄອນຫຼວງວຽງຈັນ,ວັນທີ 14 ກຸມພາ 2018
ແຈ້ງການ
ເຖິງ: ບັນດາກະຊວງ, ອົງການລັດ, ແຂວງ, ນະຄອນຫຼວງວຽງຈັນ ແລະ ພາກສ່ວນທີ່ກ່ຽວຂ້ອງ.
ເລື່ອງ: ຂັ້ນຕອນການດໍາເນີນເອກະສານຂໍອະນຸມັດນໍາເຂົ້າສິນຄ້າເຄື່ອງຂອງ ແລະ ຍົກເວັ້ນພາສີ-ອາກອນ ນໍາເຂົ້າສໍາລັບໂຄງການທີ່ໃຊ້ທຶນກູຢືມ ແລະ ຊ່ວຍເຫຼືອລ້າຈາກຕ່າງປະເທດ.
- ອີງຕາມດໍາລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງການເງິນ ສະບັບເລກທີ 144/ນຍ, ລົງວັນທີ 8 ພຶດສະພາ 2017.
- ອີງຕາມກົດໝາຍພາສີ ສະບັບປັບປຸງ ເລກທີ 04/ສພຊ, ລົງວັນທີ 20 ທັນວາ 2011.
- ອີງຕາມກົດໝາຍຊ່ວຍສາອາກອນ ສະບັບປັບປຸງ ເລກທີ 70/ສພຊ, ລົງວັນທີ 15 ທັນວາ 2015.
- ອີງຕາມບົດບັນທຶກການມອບໂອນວຽກຢັ້ງຢືນການຍົກເວັ້ນພາສີ-ອາກອນ ສໍາລັບໂຄງການ/ແຜນງານ ທີ່ນໍາໃຊ້ທຶນຊ່ວຍເຫຼືອທາງການເພື່ອການພັດທະນາ ລະຫວ່າງການເງິນຕ່າງປະເທດ ແລະ ຄຸ້ມຄອງໜີ້ສິນ ແລະ ກົມພາສີ ສະບັບລົງວັນທີ 2 ກຸມພາ 2018
ເພື່ອຫຼຸດຜ່ອນຂັ້ນຕອນທີ່ຊັບຊ້ອນໃນການດໍາເນີນເອກະສານພາຍໃນກະຊວງການເງິນ ແລະ ເປັນການອໍານວຍຄວາມສະດວກໃນການເດີນເອກະສານຂໍອະນຸມັດນໍາເຂົ້າສິນຄ້າເຄື່ອງຂອງ ແລະ ຍັກເວັ້ນພາສີ-ອາກອນນໍາເຂົ້າ ວັດຖຸ-ອຸປະກອນ, ເຄື່ອງມື, ພາຫະນະ, ແລະ ອື່ນໆ ແບບຊົ່ວຄາວ ແລະ ຖາວອນ ສໍາລັບບັນດາໂຄງການ/ແຜນການ ທີ່ນໍາໃຊ້ທຶນກູຢືມ ແລະ ຊ່ວຍເຫຼືອລ້າຈາກຕ່າງປະເທດ, ກະຊວງການເງິນ ຈຶ່ງຂໍແຈ້ງມາຍັງບັນດາກະຊວງ, ອົງການລັດ, ແຂວງ, ນະຄອນຫຼວງວຽງຈັນ ແລະ ພາກສ່ວນກ່ຽວຂ້ອງຊາບດັ່ງນີ້:
1. ໂຄງການ ແລະ ແຜນງານ ທີ່ນຳໃຊ້ທຶນຊ່ວຍເຫຼືອທາງການພັດທະນາ (ຊກພ): ທຶນ ຊກພ ປະກອບມີ ທຶນກູ້ຢືມເງື່ອນໄຂຜ່ອນຜັນ ແລະ ທຶນຊ່ວຍເຫຼືອລ້າໃຫ້ແກ່ ສປປ ລາວ ສໍາລັບການຈັດຕັ້ງປະຕິບັດໂຄງການ/ແຜນການ ຫຼື ດຸນງົບປະມານ ແລະ ທຶນຊ່ວຍເຫຼືອລ້າດ້ານວິຊາການ, ການຊ່ວຍເຫຼືອເປັນຄັ້ງຄາວດ້ານວັດຖຸ, ການຊ່ວຍເຫຼືອດ້ານມະນຸດສະທໍາ ແລະ ການຊ່ວຍເຫຼືອສຸກເສີນຕ່າງໆ ຈາກບັນດາສະຖາບັນການເງິນສາກົນ, ອົງການຈັດຕັ້ງສາກົນ ຫຼື ບັນດາປະເທດ ໃນຂອບເຂດການຮ່ວມມືຫຼາຍຝ່າຍ ຫຼື ສອງຝ່າຍ, ທີ່ມີເປົ້າໝາຍສໍາລັບການພັດທະນາເສດຖະກິດ-ສັງຄົມຂອງລັດຖະບານ ແລະ ລົບລ້າງຄວາມທຸກຍາກ, ແມ່ນປະຕິບັດດັ່ງນີ້:
ກ). ກົມການເງິນຕ່າງປະເທດ ແລະ ຄຸ້ມຄອງໜີ້ສິນ ສືບຕໍ່ເປັນຜູ້ຄົ້ນຄວ້າສະເໜີການຂໍອະນຸມັດນໍາເຂົ້າ ແລະ ສະເໜີຍົກເວັ້ນພາສີ-ອາກອນ ຕໍ່ລັດຖະມົນຕີກະຊວງການເງິນ, ຕາມການມອບໂອນຈາກກະຊວງແຜນການ ແລະ ການລົງທຶນ ໃນການແຈ້ງການສະບັບເລກທີ 1881/ຜທ.ຮມສ.02, ລົງວັນທີ 11 ສິງຫາ 2016 ແລະ ຕາມທີ່ກໍານົດໃນເອກະສານ ດັ່ງລຸ່ມນີ້:
- ຂໍ້ຕົກລົງຂອງລັດຖະມົນຕີ ວ່າດ້ວຍລະບຽບການຄຸ້ມຄອງການເງິນສໍາລັບທຶນ ຊກພ ສະບັບເລກທີ 2695/ກງ, ລົງວັນທີ 1 ພະຈິກ 2010.
- ຄໍາແນະນໍາຂອງລັດຖະມົນຕີ ວ່າດ້ວຍການປະຕິບັດນະໂຍບາຍພາສີ-ອາກອນ ສໍາລັບການນໍາເຂົ້າວັດຖຸ, ອຸປະກອນ ແລະ ພາຫະນະຕ່າງຂອງແຜນງານ/ໂຄງການ ທີ່ນໍາໃຊ້ທຶນກູ້ຢືມ ແລະ ຊ່ວຍເຫຼືອລ້າຈາກຕ່າງປະເທດ ສະບັບເລກທີ 2560/ກງ, ລົງວັນທີ 9 ສິງຫາ 2016.
ຂ). ພາຍຫຼັງລັດຖະມົນຕີກະຊວງການເງິນອອກຂໍ້ຕົກລົງອະນຸມັດການນໍາເຂົ້າ, ຈະບໍ່ມີການຢັ້ງຢືນການນໍາເຂົ້າ ແລະ ແຫຼ່ງທຶນຄືນອີກ. ມອບໃຫ້ກົມພາສີ ເປັນຜູ້ດໍາເນີນການຄຸ້ມຄອງການນໍາເຂົ້າສິນຄ້າເຄື່ອງຂອງດັ່ງກ່າວ ແລະ ຕັດແຜນການນໍາເຂົ້າຕົວຈິງ ຕາມການອະນຸມັດໃນຂໍ້ຕົກລົງຂອງລັດຖະມົນຕີ. ຈາກນັ້ນ, ໃຫ້ສະຫຼຸບລາຍງານການນໍາເຂົ້າສິນຄ້າເຄື່ອງຂອງດັ່ງກ່າວໃຫ້ ການນໍາກະຊວງການເງິນ ແລະ ພາກສ່ວນກ່ຽວຂ້ອງຕາມລະພາລະບົດບາດທີ່ໄດ້ກໍານົດ ເພື່ຶຮັບຊາບໃນແຕ່ລະໄລຍະ.
2. ສໍາລັບການຊ່ວຍເຫຼືອສະເພາະ ລະຫວ່າງບຸກຄົນ ຫຼື ນິຕິບຸກຄົນ ແລະ ການຊ່ວຍເຫຼືອທີ່ບໍ່ແນ່ນອນຢູ່ໃນຂໍ້ 1 ຂ້າງເທິງ ແມ່ນໃຫ້ສະເໜີກົມພາສີ ພິຈາລະນາດໍາເນີນໂດຍກົງ ຕາມລະບຽບການ ແລະ ຂັ້ນຕອນທີ່ໄດ້ກໍານົດ.
ດັ່ງນັ້ນ, ຈຶ່ງແຈ້ງມາຍັງ ເພື່ອຊາບ ແລະ ຈັດຕັ້ງປະຕິບັດຕາມແຈ້ງການສະບັບນິ້ ນັບແຕ່ມື້ລົງລາຍເຊັນເປັນຕົ້ນໄປ.
ເຊັນແທນລັດຖະມົນຕີກະຊວງການເງິນ
ຮອງລັດຖະມົນຕີກະຊວງການເງິນ
ບຸນໂຈມ ອຸບົນປະເສີດ
PDF
PDFກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.