ການຂຶ້ນທະບຽນວິສາຫະກິດແມ່ນການຮັບຮອງກ່ຽວກັບການແຈ້ງຂຶ້ນທະບຽນວິສາຫະກິດ ຢ່າງຖືກຕ້ອງຕາມກົດຫມາຍຂອງລັດຕໍ່ບຸກຄົນ ຫຼື ນິຕິບຸກຄົນທັງພາຍໃນ ແລະ ຕ່າງປະເທດ ທີ່ເຄື່ອນໄຫວດຳເນີນທຸລະກິດຢູ່ ສປປ ລາວ. ທຸກການເຄື່ອນໄຫວທຸລະກິດ ຕ້ອງໄດ້ຮັບການຂຶ້ນທະບຽນສ້າງຕັ້ງວິສາຫະກິດ (ສ່ວນບຸກຄົນ ຫລື ນິຕິບຸກຄົນ) ໃຫ້ຖືກຕ້ອງ ຕາມບົດບັນຍັດຂອງກົດໝາຍວ່າດ້ວຍ ວິສາຫະກິດ (ສະບັບປັບປຸງ), ເລກທີ 46/ສພຊ, ວັນທີ 26 ທັນວາ 2013, ເວັ້ນເສຍແຕ່ການເຄື່ອນໄຫວໃນບາງທຸລະກິດ ທີ່ບໍ່ຈໍາເປັນຕ້ອງຂຶ້ນທະບຽນວິສາຫະກິດ ຕາມທີ່ກໍານົດໄວ້ໃນກົດໝາຍ ແລະ ລະບຽບການທີ່ກ່ຽວຂ້ອງ. ການຂຶ້ນທະບຽນສ້າງຕັ້ງວິສາຫະກິດ (ສ່ວນບຸກຄົນ ຫລື ນິຕິບຸກຄົນ) ດັ່ງກ່າວນີ້ ແມ່ນບໍ່ໄດ້ບົ່ງກິດຈະການໃດໆໃສ່ຫລັງໃບທະບຽນວິສາຫະກິດຄືທີ່ຜ່ານມາ. ນອກຈາກນັ້ນ, ກ່ອນຈະເຄື່ອນໄຫວທຸລະກິດໃນກິດຈະການໃດໜຶ່ງນັ້ນ ວິສາຫະກິດທີ່ກ່ຽວຂ້ອງ ຕ້ອງໄດ້ຂໍອະນຸຍາດລົງທຶນ ຫລື ຂໍອະນຸຍາດດໍາເນີນທຸລະກິດນໍາຂະແໜງການກ່ຽວຂ້ອງ ໃຫ້ຖືກຕ້ອງຕາມຂັ້ນຕອນທີ່ໄດ້ກໍານົດໄວ້ໃນຄໍາແນະນໍາສະບັບນີ້ ແລະ ຕ້ອງສອດຄ່ອງກັບກົດໝາຍ ແລະ ລະບຽບການທີ່ກ່ຽວຂ້ອງຢ່າງເຂັ້ມງວດ. ການຂຶ້ນທະບຽນສ້າງຕັ້ງວິສາຫະກິດ (ສ່ວນບຸກຄົນ ຫລື ນິຕິບຸກຄົນ) ມີດັ່ງນີ້:
- ການແບ່ງຂັ້ນຄຸ້ມຄອງການຂຶ້ນ ທະບຽນສ້າງຕັ້ງວິສາຫະກິດ (ສ່ວນບຸກຄົນ ຫລື ນິຕິບຸກຄົນ)
- ສໍານວນຄໍາຮ້ອງແຈ້ງຂຶ້ນທະບຽນສ້າງຕັ້ງວິສາຫະກິດ
- ການກວດສອບສໍານວນຄໍາຮ້ອງແຈ້ງຂຶ້ນທະບຽນສ້າງຕັ້ງວິສາຫະກິດ
- ກໍານົດເວລາໃນການອອກໃບທະບຽນວິສາຫະກິດ
- ການສ້າງຕັ້ງສາຂາ, ລັດວິສາຫະກິດ ແລະ ສະຫະກອນ
- ຜູ້ມີສິດເຊັນໃບທະບຽນວິສາຫະກິດ
ດັ່ງນັ້ນ, ການຈັດຕັ້ງປະຕິບັດຄໍາແນະນໍາສະບັບນີ້ ແມ່ນໃຫ້ເລີ່ມນັບແຕ່ວັນທີ 01 ກໍລະກົດ 2018 ເປັນຕົ້ນໄປ ໂດຍຕ້ອງລົງໃນຈົດໝາຍເຫດທາງລັດຖະການ ກ່ອນກໍານົດເວລາຈັດຕັ້ງປະຕິບັດດັ່ງກ່າວ.
ສຳລັບຂໍ້ມູນເພີ່ມເຕີມ, ກະລຸນາພົວພັນຫາ ກົມທະບຽນ ແລະ ຄຸ້ມຄອງວິຫາຫະກິດ, ກະຊວງອຸດສາຫະກຳ ແລະ ການຄ້າ
ທີ່ຢູ່: ບ້ານໂພນໄຊ, ເມືອງ ໄຊເສດຖາ, ນະຄອນຫຼວງວຽງຈັນ
ໂທ: 856 21 412 011 ແຟັກ: 856 21 453 865
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.