ໃນວັນທີ 25 ທັນວາ 2018, ຫ້ອງການກະຊວງອຸດສາຫະກຳ ແລະ ການຄ້າ ໄດ້ຈັດພິທີເປີດໂຕເວັບໄຊຖານຂໍ້ມູນນິຕິກຳຂອງຂະແໜງອຸດສາຫະກຳ ແລະ ການຄ້າ ຂຶ້ນຢ່າງເປັນທາງການ ທີ່ກະຊວງອຸດສາຫະກໍາ ແລະ ການຄ້າ, ນະຄອນຫຼວງວຽງຈັນ. ຊຶ່ງພິທີດັ່ງກ່າວໄດ້ຮັບກຽດກ່າວເປີດໂດຍ ທ່ານ ນາງ ບານສະຕິ ເທບພະວົງ, ຫົວໜ້າຫ້ອງການກະຊວງອຸດສາຫະກຳ ແລະ ການຄ້າ. ຈຸດປະສົງໃນການສ້າງຖານຂໍ້ມູນນິຕິກຳນີ້ແມ່ນເພື່ອ ເກັບກຳ-ສັງລວມ ບັນດານິຕິກຳທັງໝົດຂະແໜງອຸດສາຫະກຳ ແລະ ການຄ້າທີ່ມີຜົນສັກສິດ ແລະ ປະກາດໃຊ້ໃນຜ່ານມາ ໃຫ້ເປັນລະບົບຄົບຊຸດ ແລະ ມີປະສິດທິພາບ ແລະ ເພື່ອສ້າງເປັນຖານຂໍ້ມູນທາງເອເລັກໂຕຣນິກ ໃຫ້ທຸກຄົນສາມາດເຂົ້າເຖິງ ໃນຮູບແບບຊັອບກັອບປີ້, ພີດີເອັບ ແລະ ຮູບແບບໄມໂຄຣຊັອບເວີດ ໄດ້ຢ່າງສະດວກງ່າຍດາຍ.
ທ່ານ ນາງ ບານສະຕິ ເທບພະວົງ ໄດ້ກ່າວວ່າ “ຖານຂໍ້ມູນນີ້ຈະສ້າງປະໂຫຍດຢ່າງຫຼວງຫຼາຍໃຫ້ແກ່ທຸລະກິດທັງພາຍໃນ ແລະ ຕ່າງປະເທດ ໃນການເຂົ້າເຖິງນິຕິກຳສະເພາະຂອງຂະແໜງອຸດສາຫະກຳ ແລະ ການຄ້າ ເພື່ອເປັນບ່ອນອີງໃນການດຳເນີນທຸລະກິດ ແລະ ສາມາດນຳໃຊ້ນິຕິກຳສະເພະຂອງຂະແໜງອຸດສາຫະກຳ ແລະ ການຄ້າ ທີ່ມີຜົນສັກສິດ, ຫຼີກລ່ຽງການນຳໃຊ້ນິຕິກຳຫຼ້າຫຼັງ ຫຼື ນິຕິກຳທີ່ຖືກລົບລ້າງ, ມີບ່ອນອີງຢ່າງຈະແຈ້ງ ແລະ ສອດຄ່ອງກັບກົດໝາຍ ແລະ ລະບຽບການ”.
ການເປີດທົດລອງນຳໃຊ້ເວັບໄຊຖານຂໍ້ມູນນິຕິກຳຂອງຂະແໜງອຸດສາຫະກຳ ແລະ ການຄ້າ ແມ່ນຄວາມສຳເລັດໃນເບື້ອງຕົ້ນ, ຊຶ່ງເວັບໄຊດັ່ງກ່າວ ແມ່ນຍັງຈະສືບຕໍ່ພັດທະນາໃຫ້ສົມບູນ ໃນອີກໄລຍະໜຶ່ງ ເພື່ອສືບຕໍ່ພັດທະນາເວັບໄຊດັ່ງກ່າວໃຫ້ມີຄວາມສົມບູນແບບຍິ່ງຂຶ້ນ ແລະ ກາຍເປັນເວັບໄຊທີ່ສັງລວມຂໍ້ມູນບັນດານິຕິກຳຂອງຂະແໜງ ອຄ ສາມາດໃຫ້ຜົນປະໂຫຍດຢ່າງແທ້ຈິງແກ່ຜູ້ຊົມໃຊ້. ສະນັ້ນ, ຖ້າມີຈຸດໃດທີ່ຜູ້ຊົມໃຊ້ເຫັນວ່າຄວນໃຫ້ປັບປຸງເພີ່ມເຕີມ ສາມາດສະເໜີຄຳຄິດເຫັນສົ່ງໃຫ້ ພະແນກນິຕິກຳ, ຫ້ອງການກະຊວງ, ໂທ: 856 (21) 412014. ເວັບໄຊຖານຂໍ້ມູນນິຕິກຳຂອງຂະແໜງອຸດສາຫະກຳ ແລະ ການຄ້າ http://law.moic.gov.la
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.