ການພົວພັນທາງດ້ານເສດຖະກິດ-ການຄ້າລະຫວ່າງ ສປປ ລາວ ແລະ ສປ ຈີນ ນັບມື້ນັບມີການຂະຫຍາຍ ຕົວຢ່າງບໍ່ຢຸດຢັ້ງ ແລະ ໜັກແໜ້ນ ເຊິ່ງພົ່ນເດັ່ນທີ່ສຸດ ແມ່ນການຮ່ວມມືພັດທະນາດ້ານພື້ນຖານໂຄງລ່າງຂອງ ສປປ ລາວ ເຊື່ອມຕໍ່ກັບ ສປ ຈີນ ເປັນຕົ້ນແມ່ນ ການສ້າງເສັ້ນທາງລົດໄຟຄວາມໄວສູງ. ນອກນັ້ນ ການຄ້າ-ການລົງທຶນກໍ່ໄດ້ຮັບການຂະຫຍາຍຕົວຢ່າງສະໝໍ່າສະເໝີເຊັ່ນດຽວກັນ, ໃນ 09 ເດືອນ ປີ 2018, ມູນຄ່າການຄ້າສອງຝ່າຍ ລາວ-ຈີນ ບັນລຸ 2,42 ຕື້ໂດລາ ເພີ່ມຂຶ້ນ 14,9% ທຽບໃສ່ປີ 2017.
ສປປ ລາວ ນໍາເຂົ້າຈາກ ສປ ຈີນ ມີມູນຄ່າ 970 ລ້ານໂດລາສະຫະລັດ ຫຼຸດລົງ 1,2% ທຽບໃສ່ໄລຍະດຽວກັນຂອງປີ 2017, ສິນຄ້າທີ່ ສປປ ລາວ ນໍາເຂົ້າປະກອບມີ ກົນຈັກໄຟຟ້າ (350 ລ້ານ ໂດລາສະຫະລັດ), ສິນຄ້າອີເລັກໂທຣນິກ (70 ລ້ານໂດລາສະຫະລັດ), ປະເພດເຫຼັກຮູບປະພັນ (60 ລ້ານ ໂດລາສະຫະລັດ), ຍານພາຫະນະ (30 ລ້ານໂດລາສະ ຫະລັດ) ແລະ ອື່ນໆ.
ມູນຄ່າການສົ່ງອອກສິນຄ້າ ຂອງສປປ ລາວ ໄປ ສປ ຈີນ ບັນລຸ 1,45 ຕື້ໂດລາສະຫະລັດ ເພີ່ມຂຶ້ນ 28,8% ທຽບໃສ່ໄລຍະດຽວກັນຂອງປີ 2017. ສິນຄ້າທີ່ ສປປ ລາວ ສົ່ງອອກຕົ້ນຕໍ່ ປະກອບມີ ແຮ່ທອງ (230 ລ້ານໂດລາສະຫະລັດ), ເຟີນີເຈີ້ທີ່ເຮັດດ້ວຍໄມ້ (80 ລ້ານໂດລາສະຫະລັດ), ຜະລິດຕະພັນກະສິກໍາ (50 ລ້ານໂດລາສະຫະລັດ), ຢາງພາລາທໍາມະຊາດ (20 ລ້ານໂດລາສະຫະລັດ).
ມູນຄ່າການລົງທຶນຂອງນັກທຸລະກິດຈີນ ໃນ ສປປ ລາວ ມີອັດຕາເພີ່ມຂຶ້ນເຊັ່ນດຽວກັນ ໄລຍະ 09 ເດືອນ ຂອງປີ 2018 ມີມູນຄ່າການລົງທຶນທັງໝົດ 1,2 ຕື້ໂດລາສະຫະລັດ ເພີ່ມຂຶ້ນ 25,1% ທຽບໃສ່ໄລຍະດຽວກັນຂອງປີ 2017. ການລົງທຶນສ່ວນໃຫຍ່ ແມ່ນສຸ່ມໃສ່ຂະແໜງການພະລັງງານໄຟຟ້າ, ບໍ່ແຮ່, ກະສິກໍາ-ປ່າໄມ້, ໂຮງແຮມ-ອະສັງຫາລິມະຊັບ ແລະ ອື່ນໆ.
ແຫຼ່ງຂໍ້ມູນຂ່າວ: ບົດສະຫຼຸບລາຍງານສະພາບການເຄື່ອນໄຫວປະຈໍາປີ 2018 ແລະ ວາງແຜນເຄືອນໄຫວປີ 2019 ຂອງຫ້ອງການທີ່ປຶກສາຝ່າຍເສດຖະກິດ-ການຄ້າ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.