ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ
ກະຊວງການເງິນ
ກົມພາສີ ເລກທີ 04145 /ກພສ
ນະຄອນຫຼວງວຽງຈັນ, ວັນທີ 23 ພຶດສະພາ 2019
ຄໍາແນະນໍາເພີ່ມເຕີມ
ກ່ຽວກັບການນໍາໃຊ້ລະບົບແຈ້ງພາສີປະຕູດຽວ
- ອີງຕາມກົດໝາຍວ່າດ້ວຍພາສີ ສະບັບເລກທີ 04/ສພຊ, ລົງວັນທີ 20 ທັນວາ 2011;
- ອີງຕາມ ຂໍ້ຕົກລົງຂອງກະຊວງການເງິນ ວ່າດ້ວຍການອະນຸມັດນໍາໃຊ້ລະບົບແຈ້ງພາສີປະຕູດຽວ ສະບັບເລກທີ 0204/ກງ, ລົງວັນທີ 15 ມັງກອນ 2019;
- ອີງຕາມ ບົດແນະນໍາຂອງກະຊວງການເງິນ ວ່າດ້ວຍການນໍາໃຊ້ລະບົບແຈ້ງພາສີປະຕູດຽວ ສະບັບເລກທີ 4217/ກງ, ລົງວັນທີ 28 ທັນວາ 2018;
1. ຈຸດປະສົງ
ຄໍາແນະນໍາສະບັບນີ້ ຜັນຂະຫຍາຍບົດແນະນໍາຂອງກະຊວງການເງິນ ສະບັບເລກທີ 4217/ກງ, ລົງວັນທີ 28 ທັນວາ 2018 ວ່າດ້ວຍການນໍາໃຊ້ລະບົບແຈ້ງພາສີປະຕູດຽວ (LNSW) ເຂົ້າໃນການຄຸ້ມຄອງການແຈ້ງພາສີສໍາລັບການນໍາເຂົ້າ ແລະ ສົ່ງອອກສິນຄ້າ, ເຄື່ອງຂອງໃຫ້ຖືກຕ້ອງ, ຄ່ອງຕົວ ແລະ ມີປະສິດທິຜົນສູງ.
2. ການອະທິບາຍຄໍາສັບ
- ໃບຂົນສົ່ງສິນຄ້າ: ໝາຍເຖິງເອກະສານຂົນສົ່ງສິນຄ້າທີ່ອອກໂດຍຜູ້ບໍລິການຂົນສົ່ງ, ຜູ້ບໍລິການຈັດສົ່ງສິນຄ້າ ຫຼື ພາກສ່ວນທີ່ກ່ຽວຂ້ອງຢູ່ປະເທດຕົ້ນທາງ ຊຶ່ງເອກະສານຂົນສົ່ງສິນຄ້າ ຕ້ອງເຮັດເປັນພາສາອັງກິດ ເຊັ່ນ: Truck Bill, Bill of Lading, Airway Bill, Manifest ( Master Bill or House Bill) ແລະ ອື່ນໆ. ເອກະສານຂົນສົ່ງສິນຄ້າຕ້ອງປະກອບດ້ວຍຂໍ້ມູນທີ່ກໍານົດໃນມາດຕະຖານຂໍ້ມູນການຄ້າສາກົນເປັນຕົ້ນແມ່ນມາດຕະຖານດ້ານຂໍ້ມູນຂອງອົງການພາສີໂລກ ( WCO Data Model ) ຊຶ່ງເອກະສານຂົນສົ່ງສິນຄ້າຕ້ອງປະກອບດ້ວຍຂໍ້ມູນພື້ນຖານດັ່ງນີ້: ຜູ້ຮັບ, ຜູ້ສົ່ງ, ຮູບແບບການຂົນສົ່ງ, ວັນທີການຂົນສົ່ງ-ເຄື່ອນຍ້າຍ, ປະເພດສິນຄ້າ, ນໍ້າໜັກ, ຈໍານວນ ເຫຼົ່ານີ້ເປັນຕົ້ນ.
- ຂໍ້ມູນຂົນສົ່ງລວມ ( Summary Declaration-SD ): ໝາຍເຖິງຂໍ້ມູນລວມຂອງການຂົນສົ່ງໜຶ່ງຄັ້ງ (shipment ) ທີ່ລະບຸໃນໃບຂົນສົ່ງສິນຄ້າ. ຖ້າເປັນການຂົນສົ່ງທາງບົກ ໝາຍເຖິງການຂົນສົ່ງຂອງລົດຂົນສົ່ງໜຶ່ງຂະບວນ, ຊຶ່ງອາດຈະບັນທຸກຕູ້ສິນຄ້າ ໜຶ່ງຕູ້ ຫຼື ຫຼາຍຕູ້ສິນຄ້າ.
- ຂໍ້ມູນການຂົນສົ່ງສະເພາະ ( Transport Document-TD ): ໝາຍເຖິງຂໍ້ມູນການຂົນສົ່ງ ຂອງແຕ່ລະທຸລະກໍາການຄ້າທີ່ລະບຸໃນໃບຂົນສົ່ງສິນຄ້າ. ໜຶ່ງທຸລະກໍາການຄ້າ ແມ່ນການຊື້-ຂາຍໜຶ່ງຄັ້ງ ປະກອບດ້ວຍໜຶ່ງຜູ້ສົ່ງອອກ ແລະ ໜຶ່ງຜູ້ນໍາເຂົ້າ, ໂດຍອີງໃສ່ໃບແຈ້ງລາຄາສິນຄ້າ ( Invoice ) ເປັນເອກະສານຢັ້ງຢືນ. ການຂົນສົ່ງສິນຄ້າໜຶ່ງຄັ້ງ ( Shipment ) ອາດຈະປະກອບດ້ວຍໜຶ່ງ ຫຼື ຫຼາຍທຸລະກໍາການຄ້າ ( Consignment ) ສໍາລັບ ພາຫະນະປະເພດລົດໃຫຍ່ ຕ້ອງປະກອບເອກະສານແຈ້ງພາສີໜຶ່ງຊຸດຕໍ່ລົດໜຶ່ງຄັນ, ສະນັ້ນ ຂໍ້ມູນການຂົນສົ່ງສະເພາະ ໝາຍເຖິງຂໍ້ມູນກ່ຽວກັບລົດນໍາເຂົ້າໜຶ່ງຄັນ.
3. ການອອກລະຫັດນໍາໃຊ້ລະບົບ
3.1 ການອອກລະຫັດຜູ້ນໍາໃຊ້ໃຫ້ແກ່ພະນັກງານລັດ
ພາຍຫຼັງໄດ້ຮັບໜັງສືສະເໜີຂອງຂະແໜງການລັດທີ່ກ່ຽວຂ້ອງ, ມອບໃຫ້ບໍລິສັດຮ່ວມພັດທະນາລະບົບແຈ້ງພາສີປະຕູດຽວ ເປັນຜູ້ກວດກາ ແລະ ອອກລະຫັດຜູ້ນໍາໃຊ້ໃຫ້ແກ່ ພະນັກງານຂອງຂະແໜງການລັດ ໂດຍໃຫ້ອີງໃສ່ເນື້ອໃນໜັງສືສະເໜີ ແລະ ໃບຢັ້ງຢືນການເຂົ້າຮ່ວມຝຶກອົບຮົມ.
3.2 ການອອກລະຫັດຜູ້ນໍາໃຊ້ໃຫ້ແກ່ຜູ້ປະກອບການ
ພາຍຫຼັງໄດ້ຮັບໜັງສືສະເໜີຂອງຜູ້ປະກອບການ ແລະ ໄດ້ຜ່ານການກວດກາເບື້ອງຕົ້ນຂອງ ບໍລິສັດຮ່ວມພັດທະນາລະບົບແຈ້ງພາສີປະຕູດຽວແລ້ວ, ມອບໃຫ້ ພະແນກນິຕິກໍາເປັນເສນາທິການໃຫ້ແກ່ກົມພາສີໃນການກວດກາຄວາມຖືກຕ້ອງຂອງການສະເໜີຂໍອອກລະຫັດຜູ້ນໍາໃຊ້ລະບົບໃຫ້ແກ່ຜູ້ປະກອບການ ໂດຍໃຫ້ອີງໃສ່ກວດກາເອກະສານຢັ້ງຢືນຕ່າງໆເຊັ່ນ: ໃນທະບຽນວິສາຫະກິດ, ໃບຢັ້ງຢືນການມອບພັນທະອາກອນປະຈໍາປີ, ໃບຢັ້ງຢືນເລກປະຈໍາຕົວຜູ້ເສຍອາກອນ ແລະ ໃບຢັ້ງຢືນການຝຶກອົບຮົມ ເປັນຕົ້ນ. ພະແນນນິຕິກໍາຕ້ອງຕິດຕາມ ແລະ ປະເມີນຜົນຜູ້ນໍາໃຊ້ລະບົບ LNSW ແລະ ລາຍງານໃຫ້ກົມພາສີຮັບຊາບເປັນປົກກະຕິ.
4. ການນໍາໃຊ້ລະບົບ LNSW ເຂົ້າໃນການແຈ້ງຂໍ້ມູນ ແລະ ເອກະສານຂົນສົ່ງສິນຄ້າ
4.1 ການແຈ້ງຂໍ້ມູນການຂົນສົ່ງສິນຄ້າ
ຜູ້ບໍລິການຂົນສົ່ງ, ຜູ້ບໍລິການຈັດສົ່ງ, ຜູ້ບໍລິການແຈ້ງພາສີ ຫຼື ຕົວແທນ ຕ້ອງແຈ້ງຂໍ້ມູນການຂົນສົ່ງສິນຄ້າຢ່າງໜ້ອຍໜຶ່ງຊົ່ວໂມງກ່ອນສິນຄ້າມາຮອດດ່ານ ໂດຍນໍາໃຊ້ລະບົບແຈ້ງພາສີປະຕູດຽວ (LNSW). ຂໍ້ມູນການຂົນສົ່ງສິນຄ້າທີ່ແຈ້ງໃນລະບົບ LNSW ຕ້ອງສອດຄ່ອງກັບຂໍ້ມູນໃນໃບຂົນສົ່ງສິນຄ້າ. ພາຍຫຼັງ ສໍາເລັດການປະກອບຂໍ້ມູນການຂົນສົ່ງສິນຄ້າແລ້ວ, ຕ້ອງກວດກາຄືນຖືກຕ້ອງ ແລະ ລົງທະບຽນຂໍ້ມູນການຂົນສົ່ງສິນຄ້າໃນລະບົບ LNSW. ພາຍຫຼັງລົງທະບຽນຂໍ້ມູນການຂົນສົ່ງລະບົບ LNSW ຈະແຈ້ງເລກທະບຽນການແຈ້ງຂໍ້ມູນຂົນສົ່ງສິນຄ້າເພື່ອຂໍ້ມູນປະກອບການແຈ້ງພາສີເປັນລະອຽດ ຊຶ່ງລະບຸໃນຂໍ້ 6 ຂອງຄໍາແນະນໍາສະບັບນີ້.
4.2 ການແຈ້ງໃບຂົນສົ່ງສິນຄ້າ
ການນໍາເຂົ້າ ແລະ ສົ່ງອອກກສິນຄ້າ, ເຄື່ອງຂອງຕ້ອງດໍາເນີນການແຈ້ງຂໍ້ມູນ, ເອກະສານຂົນສົ່ງສິນຄ້າ ແລະ ພາຫະນະຂົນສົ່ງສິນຄ້າຕໍ່ເຈົ້າໜ້າທີ່ພາສີໃຫ້ສອດຄ່ອງຕາມາດຕາ 19 ຂອງກົດໝາຍວ່າດ້ວຍພາສີສະບັບເລກທີ 04/ສພຊ ລົງວັນທີ 20 ທັນວາ 2011 ແລະ ບົດແນະນໍາຂອງກົມພາສີສະບັບເລກທີ 00097/ກພສ, ລົງວັນທີ 06 ມັງກອນ 2017 ຢ່າງເຂັ້ມງວດ.
ເວລາສິນຄ້າມາຮອດດ່ານຜູ້ບໍລິການຂົນສົ່ງ ຫຼື ຕົວແທນຕ້ອງແຈ້ງໃບຂົນສົ່ງສິນຄ້າຕໍ່ໜ້າທີ່ພາສີເພື່ອດໍາເນີນການຄວບຄຸມກວດກາຕາມລະບຽບການ. ເຈົ້າໜ້າທີ່ພາສີຕ້ອງກວດກາສະພາບລວມຂອງບັນທຸກສິນຄ້າ, ສະພາບຕູ້ສິນຄ້າ ແລະ ສະພາບການຫຸ້ມຫໍ່ສິນຄ້າ, ກວດກາຂໍ້ມູນໃນລະບົບ LNSW ເພື່ອສົມທຽບກັບຂໍ້ມູນໃນໃບຂົນສົ່ງສິນຄ້າ. ຈາກນັ້ນ ໃຫ້ເຈົ້າໜ້າທີ່ພາສີລະບຸສະຖານທີ່ເກັບມ້ຽນສິນຄ້າຊົ່ວຄາວເພື່ອລໍຖ້າການດໍາເນີນຂັ້ນຕອນການແຈ້ງພາສີເປັນລາຍລະອຽດ ແລະ ການກວດກາສິນຄ້າຕົວຈິງຖ້າເປັນສິນຄ້າທີ່ມີຄວາມສ່ຽງສູງ.
5. ການຄຸ້ມຄອງສິນຄ້າເຂົ້າສາງ
ມອບໃຫ້ດ່ານພາສີຊາຍແດນນໍາໃຊ້ລະບົບ LNSW ເຂົ້າໃນການຄຸ້ມຄອງສິນຄ້າສາງສິນຄ້າໂດຍໃຫ້ຢຸດຕິການນໍາໃຊ້ໃບແຈ້ງສາງ ຫຼື ໃບແຈ້ງສິນຄ້າຊົ່ວຄາວ ຫຼື ເອກະສານອື່ນໆທີ່ນໍາໃຊ້ສໍາລັບການຄວບຄຸມການເຄື່ອນຍ້າຍສິນຄ້າ ເຂົ້າ-ອອກສາງພັກສິນຄ້າ.
ກໍລະນີຕ້ອງນໍາສິນຄ້າເຂົ້າເກັບມ້ຽນຢູ່ສາງພັກສິນຄ້າຊົ່ວຄາວ, ເຈົ້າໜ້າທີ່ພາສີຕ້ອງກໍາກັບຕິດຕາມການເຄື່ອນຍ້າຍສິນຄ້າເຂົ້າສາງຢ່າງເຂັ້ມງວດ. ເວລາລົດບັນທຸກສິນຄ້າມາຮອດປະຕູເຂົ້າທາງສາງ, ເຈົ້າໜ້າທີ່ພາສີທີ່ປະຈໍາຢູ່ປະຕູເຂົ້າສາງຕ້ອງກວດກາສະພາບລວມຂອງລົດບັນທຸກສິນຄ້າພ້ອມທັງຢືນຢັນການນໍາສິນຄ້າເຂົ້າສາງຜ່ານລະບົບ LNSW.
ໃນເວລາຂົນສິນຄ້າລົງສາງເຈົ້າໜ້າທີ່ພາສີທີ່ຮັບຜິດຊອບຄຸ້ມຄອງສາງສິນຄ້າຕ້ອງກວດກາດ້ານຈໍານວນ, ສະພາບການຫຸ້ມຫໍ່ ແລະ ສະພາບລວມຂອງສິນຄ້າເພື່ອຮັບປະກັນຄວາມຖືກຕ້ອງກັບຂໍ້ມູນການຂົນສົ່ງທີ່ແຈ້ງລົງໃນລະບົບ LNSW. ການຂົນສິນຄ້າລົງສາງ ຕ້ອງດໍາເນີນການໂດຍມີພະນັກງານຂອງຜູ້ບໍລິການສາງພັກສິນຄ້າ ເຂົ້າຮ່ວມທຸກຄັ້ງ. ພາຍຫຼັງສໍາເລັດການຂົນສິນຄ້າລົງສາງ ຖ້າເຫັນວ່າຖືກຕ້ອງ ພະນັກງານສາງພັກສິນຄ້າ ຕ້ອງຢືນຢັນຄວາມຖືກຕ້ອງໃນລະບົບ LNSW. ໃນກໍລະນີພົບເຫັນຄວາມແຕກຕ່າງດ້ານຈໍານວນ ແລະ ປະເພດສິນຄ້າຕົວຈິງກັບຂໍ້ມູນທີ່ລະບຸໄວ້ໃນໃບຂົນສົ່ງສິນຄ້າ, ໃຫ້ເຈົ້າໜ້າທີ່ພາສີເຮັດບົດບັນທຶກຄວາມແຕກຕ່າງ ແລ້ວດັດແກ້ຂໍ້ມູນໃນລະບົບ LNSW ໃຫ້ຖືກຕ້ອງກັບສິນຄ້າຕົວຈິງ.
6. ການແຈ້ງພາສີເປັນລາຍລະອຽດ.
ສໍາລັບການແຈ້ງພາສີເປັນລາຍລະອຽດ, ຜູ້ແຈ້ງພາສີຕ້ອງນໍາໃຊ້ລະບົບແຈ້ງພາສີເອເລັກໂຕຣນິກ (ASYCUDA) ເຂົ້າໃນການແຈ້ງພາສີ ໂດຍໃຫ້ເອົາໃຈໃສ່ດັ່ງນີ້:
- ໃນການປະກອບຂໍ້ມູນການແຈ້ງພາສີ, ຜູ້ແຈ້ງພາສີຕ້ອງຕື່ມເລກທະບຽນຂໍ້ມູນການຂົນສົ່ງສະເພາະ(TDID) ທີ່ໄດ້ຈາກລະບົບ LNSW ລົງໃນຫ້ອງ (9 ກ) ໃນລະບົບ ASYCUDA ເພື່ອໃຫ້ສອງລະບົບດັ່ງກ່າວສາມາດແລກປ່ຽນຂໍ້ມູນຮ່ວມກັນໄດ້ຢ່າງອັດຕະໂນມັດ.
- ໃນກໍລະນີການແຈ້ງຂໍ້ມູນການຂົນສົ່ງເບື້ອງຕົ້ນເປັນຂໍ້ມູນຂົນສົ່ງລວມ ( SD ) ຜູ້ແຈ້ງພາສີຕ້ອງ ແຍກເປັນຂໍ້ມູນຂົນສົ່ງສະເພາະ TD ຈຶ່ງສາມາດແຈ້ງພາສີເປັນລາຍລະອຽດໄດ້. ຂໍ້ມູນຂົນສົ່ງສະເພາະ TD ໜຶ່ງຊຸດແມ່ນໃຫ້ປະກອບເອກະສານແຈ້ງພາສີເປັນລາຍລະອຽດໜຶ່ງຊຸດ.
- ເຈົ້າໜ້າທີ່ພາສີ ຜູ້ທີ່ຮັບຜິດຊອບກວດເອກະສານປະກອບການແຈ້ງພາສີ ຕ້ອງນໍາໃຊ້ລະບົບ LNSW ເຂົ້າໃນການກວດກາຂໍ້ມູນການຂົນສົ່ງສິນຄ້າ ແລະ ຂໍ້ມູນກ່ຽວກັບການອະນຸຍາດຂອງຂະແໜງການທີ່ກ່ຽວຂ້ອງເພື່ອຮັບປະກັນຄວາມຖືກຕ້ອງ.
- ສໍາລັບ ຂັ້ນຕອນການຄຸ້ມຄອງກວດກາຂໍ້ມູນການແຈ້ງພາສີ ແລະ ກວດກາສິນຄ້າ ແມ່ນໃຫ້ປະຕິບັດຕາມ ບົດແນະນໍາ ຂອງກົມພາສີ ສະບັບເລກທີ 00097/ກພສ, ລົງວັນທີ 06 ມັງກອນ 2017 ກ່ຽວກັບການແຈ້ງພາສີເປັນລາຍລະອຽດດ້ວຍລະບົບເອເລັກໂຕຣນິກ ຢ່າງເຂັ້ມງວດ.
7. ການຊໍາລະຄ່າພາສີ ແລະ ພັນທະອື່ນ
- ພາຍຫຼັງ ເຈົ້າໜ້າທີ່ພາສີໄດ້ສໍາເລັດການກວດກາຂໍ້ມູນ, ເອກະສານ ແລະ ກວດກາສິນຄ້າຕົວຈິງ ແລະ ຮັບຮອງຜົນການກວດກາໃນລະບົບ ASYCUDA ແລ້ວ, ຂໍ້ມູນການຄິດໄລ່ຄ່າພາສີ ແລະ ພັນທະຕ່າງໆ ຈະຖືກສົ່ງໄປຫາລະບົບ LNSW ເພື່ອອອກເອກະສານການສັ່ງມອບ (Summary of Invoice) ທີ່ສັງລວມເອົາພັນທະທັງໝົດທີ່ຜູ້ແຈ້ງພາສີຕ້ອງຊໍາລະຄື: ຄ່າພາສີ, ຄ່າອາກອນ, ຄ່າທໍານຽມ, ຄ່າບໍລິການ ແລະ ພັນທະອື່ນໆ ທີ່ຕ້ອງມອບສໍາລັບການນໍາເຂົ້າ ຫຼື ສົ່ງອອກດັ່ງກ່າວ.
- ສໍາລັບ ການສໍາລະຄ່າພາສີ-ອາກອນ ແລະ ພັນທະອື່ືນໆ, ພ້ອມທັງຄ່າທໍານຽມ ແລະ ຄ່າບໍລິການຕ່າງໆ ຜູ້ແຈ້ງພາສີ ສາມາດຊໍາລະຜ່ານລະບົບ ຜ່ານໜ່ວຍບໍລິການ, ລະບົບເອເລັກໂຕຣນິກ ຂອງທະນາຄານ ທີ່ເຊື່ອມໂຍງເຂົ້າກັບລະບົບ LNSW.
8. ການຄຸ້ມຄອງສິນຄ້າອອກຈາກສາງ/ດ່ານ
- ພາຍຫຼັງສໍາເລັດຂັ້ນຕອນການແຈ້ງພາສີເປັນລາຍລະອຽດແລ້ວ, ຜູ້ປະກອບການຕ້ອງຂົນສິນຄ້າຂຶ້ນລົດບັນທຸກໂດຍຊ່ອງໜ້າພະນັກງານຄຸ້ມຄອງສາງສິນຄ້າ ແລະ ເຈົ້າໜ້າທີ່ພາສີ.
- ພະນັກງານຄຸ້ມຄອງສາງສິນຄ້າ ຕ້ອງຢືນຢັນຄວາມຖືກຕ້ອງຈໍານວນສິນຄ້າທີ່ຂົນຂຶ້ນລົດບັນທຸກ ລົງໃນລະບົບ LNSW ໂດຍການສົມທຽບໃສ່ເອກະສານແຈ້ງພາສີ.
- ພາຍຫຼັງ ລົດບັນທຸກສິນຄ້າເຄື່ອນຍ້າຍມາຮອດປະຕູທາງອອກສາງ ຫຼື ປະຕູໂຂງອອກສາງເຈົ້າໜ້າທີ່ພາສີຕ້ອງກວດກາສະພາບລວມຂອງລົດບັນທຸກສິນຄ້າ, ສະພາບຕູ້ສິນຄ້າ ແລະ ສະພາບການຫຸ້ມຫໍ່ສິນຄ້າ. ຫຼັງຈາກຜ່ານການກວດກາແລ້ວເຫັນວ່າຖືກຕ້ອງ ຈຶ່ງອະນຸມັດໃຫ້ສິນຄ້າອອກຈາກສາງ ແລະ ຢືນຢັນການປ່ອຍສິນຄ້າອອກຈາກສາງ ຫຼື ດ່ານ ໃນລະບົບ LNSW .
- ຫົວໜ້າ ແລະ ຮອງຫົວໜ້າດ່ານພາສີສາກົນ ຕ້ອງນໍາໃຊ້ລະບົບດັ່ງກ່າວ ເຂົ້າໃນການຕິດຕາມ, ຄວບຄຸມ, ກວດກາສິນຄ້າທີ່ເຂົ້າ-ອອກ ແລະ ຄ້າງຢູ່ສາງ ໃຫ້ສອດຄ່ອງກັບກົດໝາຍວ່າດ້ວຍພາສີ ແລະ ລະບຽບການທີ່ກ່ຽວຂ້ອງ
9. ການຈັດຕັ້ງປະຕິບັດ
- ໃຫ້ນໍາໃຊ້ລະບົບ LNSW ເຂົ້າໃນການຄຸ້ມຄອງການແຈ້ງພາສີນໍາເຂົ້າສິນຄ້າປະເພດພາຫະນະ ທີ່ດ່ານພາສີສາກົນຂົວມິດຕະພາບ 1 ເປັນບາດກ້າວເລີ່ມຕົ້ນ. ພາຍຫຼັງ ຈັດຕັ້ງປະຕິບັດໄປໄດ້ໜຶ່ງເດືອນໃຫ້ມີການປະເມີນຜົນຄືນ, ຖ້າຫາກເຫັນ ວ່າລະບົບ LNSW ສາມາດນໍາໃຊ້ໄດ້ຢ່າງຄ່ອງຕົວ ແລະ ມີປະສິດທິຜົນ, ກົມພາສີ ຈະອອກແຈ້ງການເພີ່ມເຕີມ ເພື່ອຜັນຂະຫຍາຍການນໍາໃຊ້ໄປສູ່ສິນຄ້າປະເພດຕ່າງໆ ແລະ ຂະຫຍາຍໄປສູ່ດ່ານພາສີສາກົນອື່ນໆ ທີ່ມີເງື່ອນໄຂ.
- ຄໍາແນະນໍາເພີ່ມເຕີມສະບັບນີ້ມີຜົນສັກສິດນໍາໃຊ້ນັບແຕ່ວັນລົງລາຍເຊັນເປັນຕົ້ນໄປ.
ຮອງຫົວໜ້າກົມພາສີ
ບຸນປະເສີດ ສີກຸນລະບຸດ
PDF
PDFກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.