ຈຸດປະສົງ ຂອງຄະນະວິຊາການຈາກກົມການສົ່ງອອກ ແລະ ນຳເຂົ້າ, ກະຊວງການຄ້າ ແຫ່ງຣາຊະອານາຈັກ ກໍາປູເຈຍ ທີ່ເລືອກມາແລກປ່ຽນບົດຮຽນກັບ ສປປ ລາວ ເນື່ອງຈາກວ່າ ສປປ ລາວ ເປັນປະເທດທຳອິດໃນອາຊຽນທີ່ໄດ້ລິເລີ່ມຈັດຕັ້ງປະຕິບັດລະບົບ REX ເຊິ່ງໄດ້ເລີ່ມຈັດຕັ້ງປະຕິບັດ ແຕ່ວັນທີ 01 ມັງກອນ 2017 ເປັນຕົ້ນມາ. ລະບົບ REX ແມ່ນໄດ້ນໍາໃຊ້ Statement on Origin ປ່ຽນແທນ ຟອມ A ທີ່ເຈົ້າໜ້າທີ່ພາກລັດເປັນຜູ້ອອກໃຫ້ ເພື່ອຂໍຫຼຸດຜ່ອນອັດຕາພາສີນຳເຂົ້າສະຫະພາບເອີຣົບ ຊຶ່ງລະບົບດັ່ງກ່າວຮຽກຮອງໃຫ້ຜູ້ສົ່ງອອກມາລົງທະບຽນນໍາ ກຂອ ແລະ ກຂອ ຈະລົງທະບຽນໃຫ້ຜູ້ສົ່ງອອກໃນນາມ ສປປ ລາວ ມອບສິດໃຫ້ຜູ້ສົ່ງອອກສາມາດອອກ Statement on Origin ໄປສະຫະພາບເອີຣົບໄດ້ເລີຍ.
ຄະນະວິຊາການຂອງ ກຂອ ກໍ່ໄດ້ແລກປ່ຽນບົດຮຽນ ແລະ ປະສົບການ ກ່ຽວກັບ ການຈັດຕັ້ງປະຕິບັດຕົວຈິງໃນການຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງຂອງ ສປປ ລາວ ກັບຄະນະວິຊາການຈາກ ຣາຊະອານາຈັກ ກຳປູເຈຍ ຢ່າງລະອຽດ ບໍ່ວ່າຈະເປັນການສ້າງນິຕິກໍາຄຸ້ມຄອງ, ການກະກຽມບຸກຄະລາກອນເພື່ອຄຸ້ມຄອງ, ການຈັດຝຶກອົບຮົມໃຫ້ແກ່ພາກສ່ວນກ່ຽວຂ້ອງທັງພາກລັດ ແລະ ພາກທຸລະກິດ ແລະ ລວມເຖິງຂັ້ນຕອນການຈັດຕັ້ງປະຕິ ບັດການຢັ້ງຢືນແຫຼ່ງກໍາເນີດສິນຄ້າ ຮອດປະຈຸບັນ ສປປ ລາວ ມີທັງໝົດ 68 ບໍລິສັດ ທີ່ໄດ້ລົງທະບຽນໃນລະບົບ REX ແລ້ວ.
ຄະນະວິຊາການຝ່າຍລາວ ໄດ້ຮັບຟັງການນຳສະເໜີ ວຽກງານການຈັດຕັ້ງປະຕິບັດລະບົບ REX ຂອງກໍາປູເຈຍ. ຣຊ ກໍາປູເຈຍ ເລີ່ມປະຕິບັດແຕວັນທີ 01 ມັງກອນ 2019, ກົມການສົ່ງອອກ ແລະ ນໍາເຂົ້າ ໄດ້ພະຍາຍາມແກ້ໄຂບັນຫາທີ່ເກີດຂື້ນແຕ່ລະໄລຍະ ໂດຍສະເພາະ ແມ່ນບັນຫາກ່ຽວກັບການປຸກລະດົມ ຫຼື ຊຸກຍູ້ສົ່ງເລີມໃຫ້ຜູ້ປະກອບການຝ່າຍກໍາປູເຈຍຫັນມານໍາໃຊ້ລະບົບດັ່ງກ່າວໃຫ້ຫຼາຍຂື້ນ ເພາະປະຈຸບັນມີພຽງແຕ່ 50 ບໍລິສັດ ທີ່ໄດ້ລົງທະບຽນ ແຕ່ຍັງຫຼາຍກວ່າ 650 ບໍລິສັດທີ່ຍັງບໍ່ທັນໄດ້ລົງທະບຽນ.
ຕອນທ້າຍ ຝ່າຍລາວ ໄດ້ແນະນຳ ລະບົບ ແລະ ກົນໄກການເກັບກຳຂໍ້ມູນສະຖິຕິຂອງຝ່າຍລາວ ໃຫ້ຝ່າຍ ກຳປູເຈຍ ຮັບຊາບ ເຊິ່ງຝ່າຍກໍາປູເຈຍໃຫ້ຄວາມສົນໃຈ ແລະ ຂໍລະບົບດັ່ງກ່າວ ໄປເປັນຕົວຢ່າງ ໝູນໃຊ້ເຂົ້າໃນການເກັບກໍາສະຖິທິຂອງຕົນ. ຜ່ານການແລກປ່ຽນ ແລະ ຖອດຖອນບົດຮຽນເຊິ່ງກັນ ແລະ ກັນ ທັງສອງຝ່າຍເຫັນວ່າ ປະສົບຜົນສຳເລັດຢ່າງຈົບງາມ ແລະ ໄດ້ຮັບໝາກຜົນເປັນທີ່ໜ້າພໍໃຈຫຼາຍ ຕ່າງຝ່າຍຕ່າງໄດ້ສະແດງຄວາມຈິງໃຈໃນການສົນສະທະນາຖາມຕອບບັນຫາຕ່າງໆຢ່າງກົງໄປກົງມາ ເພື່ອເປັນການກະກຽມຄວາມພ້ອມຂອງ ຣາຊະອານາຈັກ ກຳປູເຈຍ ທີ່ຈະໄດ້ນຳໃຊ້ລະບົບ REX ຢ່າງເຕັມຮູບແບບ ໃນປີ 2020.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.