ຂໍ້ຕົກລົງ ວ່າດ້ວຍ ມາດຕະການສຸຂານາໄມພືດ ສຳລັບການນຳເຂົ້າ ແລະ ສົ່ງຜ່ານພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ເລກທີ 2985/ກປ, ລົງວັນທີ 28 ມິຖຸນາ 2019

ສາທາລະນະລັດ ປະຊາທິປະໄຕ ປະຊາຊົນລາວ

ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ

ກະຊວງກະສິກຳ ແລະ ປ່າໄມ້ ເລກທີ 2985/ກປ
ນະຄອນຫຼວງວຽງຈັນ, ວັນທີ 28 ມິຖຸນາ 2019

ຂໍ້ຕົກລົງ

ວ່າດ້ວຍ ມາດຕະການສຸຂານາໄມພືດ ສຳລັບການນຳເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ

ອີງຕາມ ກົດໝາຍວ່າດ້ວຍການປ້ອງກັນ ແລະ ການກັກກັນພືດ (ສະບັບປັບປຸງ) ສະບັບເລກທີ 13/ສພຊ, ລົງວັນທີ 15 ພະຈິກ 2016;
ອິງຕາມ ດຳລັດວ່າດ້ວຍການຈັດຕັ້ງ ແລະ ເຄື່ອນໄຫວຂອງກະຊວງກະສິກຳ ແລະ ປ່າໄມ້ ສະບັບເລກທີ 99/ນຍ, ລົງວັນທີ 09 ມີນາ 2017;
ອີງຕາມ ການສະເໜີຂອງກົມປູກຝັງ ສະບັບເລກທີ 1045/ກປຝ, ລົງວັນທີ 22 ພຶດສະພາ 2019

ໝວດທີ 1

ບົດບັນຍັດທົ່ວໄປ

ມາດຕາ 1 ຈຸດປະສົງ

ຂໍ້ຕົກລົງສະບັບນີ້ ກຳນົດຫຼັກການ, ຂັ້ນຕອນ, ວິທີການ ແລະ ມາດຕະການ ກ່ຽວກັບເງື່ອນໄຂດ້ານສຸຂານາໄມພືດສຳລັບການນຳເຂົ້າ, ການກວດກາກ່ອນມາຖິງດ່ານ ແລະ ປະຈຳດ່ານກັກກັນພືດ, ການກວດກາພາຍຫຼັງການນຳເຂົ້າ, ການສົ່ງຜ່ານ ເພື່ອຄຸ້ມຄອງສຸຂານາໄມພືດສຳລັບການນຳເຂົ້າ ແລະ ການສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ແນໃສ່ສະກັດກັ້ນການນໍາເຂົ້າ ແລະ ແຜ່ລະບາດ ສັດຕູພືດຈາກພາຍນອກເຂົ້າມາຍັງ ສປປ ລາວ ແລະ ອຳນວຍຄວາມສະດວກທາງດ້ານການຄ້າ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ.

ມາດຕາ 2 ມາດຕະການສຸຂານາໄມພືດສໍາລັບການນໍາເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ

ມາດຕະການສຸຂານາໄມພືດສໍາລັບການນຳເຂົ້າ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ແມ່ນການຈັດຕັ້ງປະຕິບັດລະບຽບການ ຫຼື ວິທີການປະຕິບັດດ້ານສຸຂານາໄມພືດ ຕາມເງື່ອນໄຂດ້ານສຸຂານາໄມພືດສຳລັບການນຳເຂົ້າທີ່ເປັນທາງການ ເພື່ອສະກັດກັ້ນການເຂົ້າມາ ຫຼື ການແຜ່ລະບາດຂອງສັດຕູພືດຄວບຄຸມ ຊຶ່ງອາດສ້າງຜົນກະທົບທາງດ້ານເສດຖະກິດໃນ ສປປ ລາວ.

ມາດຕະການສຸຂານາໄມພືດ ສໍາລັບການສົ່ງຜ່ານພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ແມ່ນການຈັດຕັ້ງປະຕິບັດລະບຽບການ ຫຼື ວິທີການປະຕິບັດດ້ານສຸຂານາໄມພືດ ສຳລັບການນຳສົ່ງຊຸດສິນຄ້າຜ່ານ ສປປ ລາວ ໄປຍັງປະເທດທີ່ສາມ.

ມາດຕາ 3 ການອະທິບາຍຄໍາສັບ

ຄຳສັບທີ່ນຳໃຊ້ໃນຂໍ້ຕົກລົງສະບັບນີ້ ມີຄວາມໝາຍ ດັ່ງນີ້:

ຊີວະພາບປາບສັດຕູພືດ ໝາຍເຖິງ ສັດຕູພືດທຳມະຊາດ, ສິ່ງມີຊີວິດທີ່ເປັນປໍລະປັກ ຫຼື ຕໍ່ສູ້ ຫຼື ສິ່ງມີຊີວິດອື່ນ ທີ່ຖືກນຳໃຊ້ໃນການຄວບຄຸມສັດຕູພືດ;
ເງື່ອນໄຂການນຳເຂົ້າ ໝາຍເຖິງ ລະບຽບການທີ່ສ້າງຂື້ນ ໂດຍອົງການຄຸ້ມຄອງວຽກງານປ້ອງກັນ ແລະ ກັກກັນພືດ ເພື່ອຄວບຄຸມວັດຖຸຕ້ອງຄວບຄຸມທີ່ນຳເຂົ້າມາໃນ ສປປ ລາວ;
ໃບອະນຸຍາດນຳເຂົ້າດ້ານສຸຂານາໄມພືດ ໝາຍເຖິງ ເອກະສານທາງການທີ່ອອກໃຫ້ໂດຍອົງການຄຸ້ມຄອງວຽກງານປ້ອງກັນ ແລະ ກັກກັນພືດ ເພື່ອອະນຸຍາດນຳເຂົ້າຊຸດສິນຄ້າ ຕາມຂໍ້ກຳນົດເງື່ອນໄຂທີ່ກຳນົດໄວ້;
NPPO (National Plant Protection Organization) ໝາຍເຖິງ ກົມປູກຝັງ ຊຶ່ງເປັນຕົວແທນໃຫ້ອົງການປ້ອງກັນພືດແຫ່ງຊາດ ຂອງ ສປປ ລາວ ທີ່ກຳນົດໄວ້ໃນ ມາດຕາ IV ຂອງ IPPC.
IPPC (International Plant Protection Convention) ໝາຍເຖິງ ສົນທິສັນຍາປ້ອງກັນພືດສາກົນ (ສະບັບປັບປຸງປີ 1997);
ISPM 15 (The International Standard for Phytosanitary Measure Number 15) ໝາຍເຖິງ ມາດຕະຖານສາກົນດ້ານມາດຕະການສຸຂານາໄມພືດສະບັບເລກທີ 15 ຂອງສົນທິສັນຍາປ້ອງກັນພືດສາກົນ ວ່າດ້ວຍການຄວບຄຸມວັດສະດຸຫຸ້ມຫໍ່ທີ່ເຮັດດ້ວຍໄມ້ໃນການຄ້າສາກົນ;
ສິ່ງມີຊີວິດທີ່ຖືກດັດແປງພັນທຸກຳ ຫຼື LMO (Living modified organism) ໝາຍເຖິງສິ່ງມີຊີວິດ ທີ່ຜ່ານຂະບວນການທາງພັນທຸກຳ ໂດຍນຳໃຊ້ເຕັກໂນໂລຊີຊີວະພາບສະໄໝໃໝ່;

ມາດຕາ 4 ຂອບເຂດການນຳໃຊ້

ຂໍ້ຕົກລົງສະບັບນີ້ ນຳໃຊ້ສຳລັບ ບຸກຄົນ, ນິຕິບຸກຄົນ ຫຼື ການຈັດຕັ້ງທັງພາຍໃນ ແລະ ຕ່າງປະເທດທີ່ກ່ຽວຂ້ອງກັບການນຳເຂົ້າ ແລະ ສົ່ງຜ່ານພືດ, ຜະລິດຕະພັນພືດ ຫຼື ວັດຖຸຕ້ອງຄວບຄຸມ ໃນ ສປປ ລາວ.

ໝວດທີ 2

ເງື່ອນໄຂດ້ານສຸຂານາໄມພືດສຳລັບການນຳເຂົ້າ

ມາດຕາ 5 ເງື່ອນໄຂດ້ານສຸຂານາໄມພືດ ສຳລັບການນຳເຂົ້າ

ເງື່ອນໄຂດ້ານສຸຂານາໄມພືດ ສຳລັບການນຳເຂົ້າ ແມ່ນບັນດາຂໍ້ກຳນົດ ກ່ຽວກັບ ລະບຽບການນຳເຂົ້າ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ທີ່ອອກໂດຍກະຊວງກະສິກຳ ແລະ ປ່າໄມ້ ຊຶ່ງປະກອບດ້ວຍ ເງື່ອນໄຂລວມ, ເງື່ອນໄຂສະເພາະ ແລະ ມາດຕະການອື່ນ ທີ່ກ່ຽວຂ້ອງກັບການນຳເຂົ້າ ພືດ, ຜະລິດຕະພັນພືດ ແລະວັດຖຸຕ້ອງຄວບຄຸມ.

ມາດຕາ 6 ເງື່ອນໄຂລວມການນຳເຂົ້າ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ

ນອກຈາກການປະຕິບັດມາດຕະການສຸຂານາໄມພືດ ສໍາລັບການນໍາເຂົ້າພືດ ຕາມທີ່ກຳນົດໄວ້ໃນ ມາດຕາ 30 ຂອງກົດໝາຍວ່າດ້ວຍການປ້ອງກັນ ແລະ ກັກກັນພືດ ສະບັບປັບປຸງເລກທີ 13/ສພຊ, ລົງວັນທີ 15 ພະຈິກ 2016 ແລ້ວ, ຍັງຕ້ອງຮັບປະກັນຫຼັກການລວມໃນການນຳເຂົ້າ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ດັ່ງນີ້:

ມີໃບອະນຸຍາດນຳເຂົ້າ ອອກໃຫ້ໂດຍກົມປູກຝັງ;
ໃບອະນຸຍາດນຳເຂົ້າໜຶ່ງສະບັບ ແມ່ນນຳໃຊ້ໄດ້ສຳລັບຊຸດສິນຄ້າທີ່ມີ ພືດ ແລະ ຜະລິດຕະພັນພືດ ຊະນິດດຽວກັນ ຫຼື ມີຫຼາຍຊະນິດ ແຕ່ຕ້ອງມາຈາກແຫຼ່ງກຳເນີດດຽວກັນ ແລະ ສົ່ງອອກໄປພ້ອມກັນ;
ພືດ, ຜະລິດຕະພັນພືດ ຫຼື ວັດຖຸຕ້ອງຄວບຄຸມ ບໍ່ມີການຕິດແປດສັດຕູພືດຄວບຄຸມ;
ພືດ, ຜະລິດຕະພັນພືດ ຫຼື ວັດຖຸຕ້ອງຄວບຄຸມ ສອດຄ່ອງກັບກົດໝາຍ ແລະ ລະບຽບການດ້ານສຸຂານາໄມພືດ ຂອງ ສປປ ລາວ;
ພືດ, ຜະລິດຕະພັນພືດ ຫຼື ວັດຖຸຕ້ອງຄວບຄຸມ ຖືກຕາມເງື່ອນໄຂດ້ານສຸຂານາໄມພືດສະເພາະ ທີ່ໄດ້ກຳນົດໄວ້ ແລະ ຕາມການຕົກລົງຂອງອົງການປ້ອງກັນພືດແຫ່ງຊາດ (NPPOs) ຂອງສອງຝ່າຍ ຕາມມາດຕະຖານສາກົນ ຂອງອົງການປ້ອງກັນພືດສາກົນ (IPPC);
ມີໃບຢັ້ງຢືນສຸຂານາໄມພືດ ອອກໃຫ້ໂດຍອົງການປ້ອງກັນພືດແຫ່ງຊາດ ຂອງປະເທດຕົ້ນທາງ;
ສຳລັບ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ທີ່ນຳເຂົ້າທາງໄປສະນີ ຫຼື ຂົນສົ່ງທາງອາກາດ ຕ້ອງມີສະຫຼາກ, ຂໍ້ຄວາມ ຫຼື ເຄື່ອງໝາຍຕິດໄປພ້ອມ ຕາມບົດແນະນຳຂອງກົມປູກຝັງ;
ຜ່ານການກວດກາ, ທົດສອບ ແລະ ບຳບັດກ່ອນການສົ່ງອອກ ຈາກປະເທດຕົ້ນທາງໃນກໍລະນີທີ່ກຳນົດໃຫ້;
ສະພາບຄວາມຖືກຕ້ອງຄົບຖ້ວນ ຂອງວັດຖຸຕ້ອງຄວບຄຸມໄດ້ຮັບການຮັກສາ ແລະ ເກັບໄວ້ໃນສະພາບເດີມ ພາຍຫຼັງການຢັ້ງຢືນຈາກປະເທດຕົ້ນກໍາເນີດ.

ສຳລັບ ການນຳເຂົ້າວັດຖຸຕ້ອງຄວບຄຸມ ທີ່ຢູ່ໃນບັນຊີພືດ, ຜະລິດຕະພັນພືດ ຫຼື ວັດຖຸຕ້ອງຄວບຄຸມ ທີ່ຕ້ອງຂໍອະນຸຍາດນຳເຂົ້າ ຕ້ອງຜ່ານການວິໄຈຄວາມສ່ຽງສັດຕູພືດ ແລະ ປະຕິບັດຕາມເງື່ອນໄຂສະເພາະ ທີ່ກົມປູກຝັງກຳນົດ.

ການນໍາເຂົ້າ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ເພື່ອຮັບໃຊ້ວຽກງານດ້ານສຸຂານາໄມພືດ, ການຄົ້ນຄວ້າທົດລອງທາງດ້ານວິທະຍາສາດ ຫຼື ກໍລະນີສຸກເສີນອື່ນ ຕ້ອງໄດ້ຮັບອະນຸຍາດຈາກກົມປູກຝັງ ໃນປະລິມານທີ່ຈຳກັດຕາມເງື່ອນໄຂ ແລະ ມາດຕະຖານດ້ານຄວາມປອດໄພ.

ກໍລະນີ ມີການສະເໜີນໍາໃຊ້ມາດຕະການສຸຂານາໄມພືດອື່ນ ໂດຍອົງການປ້ອງກັນພືດແຫ່ງຊາດ (NPPO) ຂອງປະເທດສົ່ງອອກ ຕ້ອງຮັບປະກັນວ່າມາດຕະການດັ່ງກ່າວ ມີຄວາມເທົ່າທຽມກັນໃນການປ້ອງກັນສັດຕູພືດ ຄືກັບຂໍ້ກຳນົດເງື່ອນໄຂດ້ານສຸຂານາໄມພືດຂອງ ສປປ ລາວ.

ມາດຕາ 7 ເງື່ອນໄຂສະເພາະ ສຳລັບ ການຂົນສົ່ງ ແລະ ວັດສະດຸຫຸ້ມຫໍ່

ເຈົ້າຂອງ ຫຼື ຜູ້ດຳເນີນການຂົນສົ່ງ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ຕ້ອງປະຕິບັດການບຳບັດ ໃຫ້ສອດຄ່ອງກັບມາດຕະຖານ ທີ່ກົມປູກຝັງ ກຳນົດ.

ວັດສະດຸຫຸ້ມຫໍ່ດ້ວຍໄມ້ ທີ່ບໍ່ທັນໄດ້ຜ່ານການປຸງແຕ່ງ ຫຼື ຍັງເປັນວັດຖຸດິບ ຕ້ອງໄດ້ຜ່ານການບຳບັດຕາມມາດຕະຖານທີ່ກຳນົດໄວ້ ແລະ ຕ້ອງໄດ້ຈໍ້າກາ ໃຫ້ສອດຄ່ອງກັບຂໍ້ກຳນົດເງື່ອນໄຂດ້ານສຸຂານາໄມພືດຕາມມາດຕະຖານສາກົນ ດ້ານມາດຕະການສຸຂານາໄມພືດ ສະບັບເລກທີ 15 (ISPM 15) ແລະ ມີໃບຢັ້ງຢືນຜ່ານການບໍາບັດ ຕາມທີ່ກໍານົດໄວ້.

ເສດພືດ ຫຼື ເຟືອງ ທີ່ນຳໃຊ້ໃນການຫຸ້ມຫໍ່ວັດຖຸຕ້ອງຄວບຄຸມ ຕ້ອງໄດ້ຜ່ານການບຳບັດຕາມມາດຕະຖານທີ່ກຳນົດໄວ້ ແລະ ຕ້ອງລະບຸໄວ້ໃນໃບຢັ້ງຢືນສຸຂານາໄມພືດ.

ມາດຕາ 8 ເງື່ອນໄຂສະເພາະ ສໍາລັບ ການນໍາເຂົ້າຊີວະພາບປາບສັດຕູພືດ ແລະ ສິ່ງມີຊີວິດທີ່ຖືກດັດແປງພັນທຸກຳ

ການນໍາເຂົ້າ ຊີວະພາບປາບສັດຕູພືດ ແລະ ສິ່ງມີຊີວິດທີ່ຖືກດັດແປງພັນທຸກຳ ຕ້ອງຜ່ານການວິໄຈຄວາມສ່ຽງສັດຕູພືດກ່ອນການນຳເຂົ້າ ຫຼື ກ່ອນການນຳໃຊ້ ພ້ອມທັງຮັບປະກັນໃຫ້ສອດຄ່ອງກັບຂໍ້ກຳນົດເງື່ອນໄຂດ້ານຄວາມປອດໄພ ທີ່ຂະແໜງການກ່ຽວຂ້ອງກຳນົດ.

ມາດຕາ 9 ເງື່ອນໄຂສະເພາະ ສຳລັບ ການນໍາເຂົ້າ ພືດຜັກ ແລະ ໝາກໄມ້ສົດ

ກົມປູກຝັງ, ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ ແລະ ດ່ານກັກກັນພືດ ຕ້ອງຄຸ້ມຄອງ ແລະ ກວດກາການນຳເຂົ້າພືດຜັກ ແລະ ໝາກໄມ້ສົດ ໃຫ້ສອດຄ່ອງຕາມມາດຕະຖານຄວາມປອດໄພຂອງອາຫານ ໂດຍປະສານສົມທົບກັບຂະແໜງການທີ່ກ່ຽວຂ້ອງ. ສ່ວນຂັ້ນຕອນລະອຽດ ໄດ້ກຳນົດໄວ້ໃນບົດແນະນຳ ຂອງກົມປູກຝັງ.

ມາດຕາ 10 ການກວດກາລະບົບສຸຂານາໄມພືດຮ່ວມກັບປະເທດຄູ່ຄ້າ

ກົມປູກຝັງ ໃນນາມເປັນອົງການປ້ອງກັນພືດແຫ່ງຊາດ (NPPO) ຂອງ ສປປ ລາວ ສາມາດຮ່ວມມື ກັບ ພາກພື້ນ ແລະ ສາກົນ ໃນການກວດກາດ້ານສຸຂານາໄມພືດ ບົນພື້ນຖານການຕົກລົງຂອງລັດຖະມົນຕີກະຊວງກະສິກຳ ແລະ ປ່າໄມ້.

ມາດຕາ 11 ການຈໍາກັດການນໍາເຂົ້າ ວັດຖຸຸຕ້ອງຄວບຄຸມ

ການຈຳກັດການນຳເຂົ້າ ວັດຖຸຕ້ອງຄວບຄຸມ ແມ່ນການອະນຸຍາດໃຫ້ການນຳເຂົ້າ ວັດຖຸຕ້ອງຄວບຄຸມ ສະເພາະໃດໜຶ່ງ ຕາມຫຼັກການ, ວິທີການ ແລະ ເງື່ອນໄຂທີ່ ກະຊວງກະສິກຳ ແລະ ປ່າໄມ້ ກຳນົດໃນແຕ່ລະໄລຍະ ບົນພື້ນຖານການວິໄຈຄວາມສ່ຽງສັດຕູພືດ ແລະ ຢັ້ງຢືນທາງດ້ານວິທະຍາສາດ ລວມທັງການພິຈາລະນາຂໍ້ມູນ ດ້ານເສດຖະກິດ ແລະ ສິ່ງແວດລ້ອມ.

ບັນຊີ ວັດຖຸຕ້ອງຄວບຄຸມທີ່ ຈໍາກັດການນຳເຂົ້າ ຕ້ອງໂຄສະນາເຜີຍແຜ່ສື່ຕ່າງໆ ພ້ອມທັງຕິດປະກາດໄວ້ຢູ່ດ່ານນຳເຂົ້າ ເພື່ອໃຫ້ສາທາລະນະຊົນ ໄດ້ຮັບຊາບຢ່າງກວ້າງຂວາງ.

ມາດຕາ 12 ການປະຕິບັດຕໍ່ວັດຖຸຕ້ອງຄວບຄຸມ ກ່ອນການນຳເຂົ້າ ແລະ ລະຫວ່າງການນຳເຂົ້າ

ກ່ອນ ແລະ ລະຫວ່າງ ການນຳເຂົ້າ ວັດຖຸຕ້ອງຄວບຄຸມທີ່ຢູ່ໃນບັນຊີພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມທີ່ຕ້ອງຂໍອະນຸຍາດນຳເຂົ້າ ຕ້ອງໄດ້ຜ່ານການປະຕິບັດດ້ານສຸຂານາໄມພືດຈາກປະເທດສົ່ງອອກ ໂດຍໄດ້ຮັບການຢັ້ງຢືນຈາກອົງການປ້ອງກັນພືດແຫ່ງຊາດ (NPPO) ຂອງປະເທດສົ່ງອອກ ດັ່ງນີ້:

ໄດ້ຜ່ານການກວດກາ, ທົດສອບ ແລະ ບໍາບັດ;
ການຜະລິດພືດ ພາຍໃຕ້ສະພາບດ້ານສຸຂານາໄມພືດທີ່ກຳນົດໃຫ້ ເຊັ່ນ: ການປູກພືດທີ່ຜ່ານການທົດສອບຫາເຊື້ອໄວຣັດ ຫຼື ພາຍໃຕ້ເງື່ອນໄຂກໍານົດສະເພາະ;
ມີການກວດກາ ແລະ ທົດສອບໃນລະດູການປູກກ່ອນການສົ່ງອອກ ຕົ້ນກຳເນີດຂອງຊຸດສິນຄ້າທີ່ມາຈາກພື້ນທີ່ຜະລິດປອດສັດຕູພືດ, ເຂດຜະລິດປອດສັດຕູພືດ ຫຼື ເຂດສັດຕູພືດເກີດຂື້ນຕໍ່າ;
ມີວິທີການປະຕິບັດທີ່ຖືກຕ້ອງ ແລະ ໄດ້ຜ່ານການຮັບຮອງຢ່າງເປັນທາງການ ຂອງປະເທດ ສົ່ງອອກ;
ຮັກສາສະພາບຄວາມຄົບຖ້ວນຂອງຊຸດສິນຄ້າ;
ໃນລະຫວ່າງການຂົນສົ່ງ ຕ້ອງຮັກສາຄວາມຄົບຖ້ວນຂອງສິນຄ້າ ແລະ ປະຕິບັດມາດຕະການອື່ນທີ່ຈໍາເປັນ ໂດຍສະເພາະການກວດກາຢູ່ປະເທດຕົ້ນກຳເນີດ ຫຼື ດ່ານນຳເຂົ້າ.

ເພື່ອເຮັດໃຫ້ຂະບວນການ ແລະ ຂັ້ນຕອນ ການວິໄຈຄວາມສ່ຽງສັດຕູພືດ ດໍາເນີນໄປຖືກຕ້ອງຕາມຫຼັກວິຊາການ, ກົມປູກຝັງ ອາດຈະແຕ່ງຕັ້ງເຈົ້າໜ້າທີ່ກັກກັນພືດ ໄປກວດກາພິສູດຄືນຢູ່ປະເທດຕົ້ນກຳເນີດ, ຕິດຕາມປະເມີນການບຳບັດກ່ອນ ຫຼື ຫຼັງການເກັບກ່ຽວ, ກວດກາທາງດ້ານກັກກັນພືດ ແລະ ຢັ້ງຢືນໂຮງເຮືອນ, ຫຸ້ມຫໍ່ບັນຈຸ ແລະ ຂັ້ນຕອນປະຕິບັດອື່ນທີ່ເຫັນວ່າມີຄວາມຈຳເປັນ. ຄ່າໃຊ້ຈ່າຍຕ່າງໆໃນການຈັດຕັ້ງປະຕິບັດທັງໝົດ ແມ່ນເປັນຄວາມຮັບຜິດຊອບຂອງຜູ້ປະກອບການ ຫຼື ຜູ້ສົ່ງອອກ.

ມາດຕາ 13 ສະຫຼາກ ແລະ ການຕິດສະຫຼາກ

ພືດ, ຜະລິດຕະພັນພືດຫຼືວັດຖຸຕ້ອງຄວບຄຸມ ໂດຍສະເພາະ ການນຳເຂົ້າພືດ ທີ່ເປັນແນວພັນ, ເຊື້ອພັນພືດ ຫຼື ສິ່ງເນົ່າເປື່ອຍງ່າຍ ແລະ ມີຄວາມສ່ຽງສູງ ຕ້ອງຕິດສະຫຼາກ ຫຼື ຂໍ້ຄວາມ ໃຫ້ສອດຄ່ອງຕາມຂໍ້ກຳນົດເງື່ອນໄຂດ້ານສຸຂານາໄມພືດ.

ສຳລັບລາຍລະອຽດ ກ່ຽວກັບ ຮູບແບບ, ເນື້ອໃນ ແລະ ວິທີການຕິສະຫຼາກ ໄດ້ກຳນົດໄວ້ໃນບົດແນະນຳ ຂອງກົມປູກຝັງ.

ມາດຕາ 14 ການອອກໃບອະນຸຍາດນຳເຂົ້າສຳລັບພືດ, ຜະລິດຕະພັນພືດ ຫຼື ວັດຖຸຕ້ອງຄວບຄຸມ ທີ່ຢູ່ໃນບັນຊີຕ້ອງຂໍອະນຸຍາດນຳເຂົ້າ

ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ມີຈຸດປະສົງນຳເຂົ້າພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ທີ່ຢູ່ໃນບັນຊີຕ້ອງຂໍອະນຸຍາດນຳເຂົ້າ ຕາມທີ່ໄດ້ກໍານົດໄວ້ໃນວັກສອງຂອງ ມາດຕາ 31 ຂອງກົດໝາຍວ່າດ້ວຍການປ້ອງກັນ ແລະ ກັກກັນພືດ ສະບັບປັບປຸງ ເລກທີ 13/ສພຊ, ລົງວັນທີ 15 ພະຈິກ 2016 ຕ້ອງຍື່ນໃບຄຳຮ້ອງ ຕໍ່ກົມປູກຝັງ ຢ່າງໜ້ອຍ ສິບຫ້າວັນ ກ່ອນວັນນໍາເຂົ້າຕົວຈິງ ເພື່ອພິຈາລະນາອອກໃບອະນຸຍາດ ພ້ອມທັງກໍານົດດ່ານກັກກັນພືດສາກົນ ທີ່ອະນຸຍາດໃຫ້ນຳເຂົ້າ.

ໃນກໍລະນີ ການວິໄຈຄວາມສ່ຽງສັດຕູພືດບໍ່ສາມາດສຳເລັດ ຕາມເວລາທີ່ກໍານົດໄວ້, ກົມປູກຝັງຕ້ອງແຈ້ງເປັນລາຍລັກອັກສອນ ໃຫ້ຜູ້ນຳເຂົ້າຊາບ ກ່ຽວກັບ ຄວາມຄືບໜ້າ ແລະ ຄາດຄະເນເວລາທີ່ຈະສຳເລັດ.

ໃນກໍລະນີ ໃບຄຳຮ້ອງຂໍອະນຸຍາດນຳເຂົ້າ ບໍ່ຖືກຕ້ອງຕາມຂໍ້ກຳນົດເງື່ອນໄຂດ້ານສຸຂານາໄມພືດ ຂອງ ສປປ ລາວ, ກົມປູກຝັງ ຕ້ອງປະຕິເສດການອອກໃບອະນຸຍາດນຳເຂົ້າ ພ້ອມທັງແຈ້ງເຫດຜົນເປັນລາຍລັກອັກສອນໃຫ້ຜູ້ນຳເຂົ້າພາຍໃນເວລາທີ່ກຳນົດໄວ້.

ມາດຕາ 15 ການອອກໃບອະນຸຍາດນຳເຂົ້າສຳລັບ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ທີ່ບໍ່ຢູ່ໃນບັນຊີທີ່ຕ້ອງຂໍອະນຸຍາດນຳເຂົ້າ

ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ມີຈຸດປະສົງນຳເຂົ້າ ພືດ, ຜະລິດຕະພັນພືດ ຫຼື ວັດຖຸຕ້ອງຄວບຄຸມ ທີ່ບໍ່ຢູ່ໃນບັນຊີທີ່ຕ້ອງຂໍອະນຸຍາດນຳເຂົ້າ ຕ້ອງຍື່ນຄຳຮ້ອງ ຕໍ່ ກົມປູກຝັງ ຫຼື ພະແນກກະສິກໍາ ແລະ ປ່າໄມ້ ແຂວງ, ນະຄອນຫຼວງ ທີ່ໄດ້ຮັບສິດມອບໝາຍຈາກກົມປູກຝັງ ຢ່າງໜ້ອຍ ສິບຫ້າວັນ ກ່ອນວັນນໍາເຂົ້າຕົວຈິງ ຕາມແບບພິມ ທີ່ກົມປູກຝັງກຳນົດ ເພື່ອພິຈາລະນາອອກໃບອະນຸຍາດ ພ້ອມທັງກຳນົດດ່ານກັກກັນພືດສາກົນ ທີ່ອະນຸຍາດໃຫ້ນຳເຂົ້າ ຊຶ່ງໄດ້ລະບຸໄວ້ໃນໃບອະນຸຍາດນຳເຂົ້າ. ໃນກໍລະນີ ຄຳຮ້ອງບໍ່ຖືກຕາມເງື່ອນໄຂດ້ານສຸຂານາໄມພືດຂອງ ສປປ ລາວ ຕ້ອງປະຕິເສດການອອກໃບອະນຸຍາດ ພ້ອມທັງແຈ້ງເຫດຜົນເປັນລາຍລັກອັກສອນຕໍ່ຜູ້ສະເໜີຂໍນຳເຂົ້າືພາຍໃນເວລາທີ່ກຳນົດໄວ້.

ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ ທີ່ໄດ້ຮັບມອບສິດອອກໃບອະນຸຍາດນຳເຂົ້າ ພືດ, ຜະລິດຕະພັນພືດ ຫຼື ວັດຖຸຕ້ອງຄວບຄຸມ ທີ່ບໍ່ນອນຢູ່ໃນບັນຊີທີ່ຕ້ອງຂໍອະນຸຍາດນຳເຂົ້າ ຕ້ອງມີເງື່ອນໄຂຄົບຖ້ວນ ດັ່ງນີ້:

ມີຄວາມເຂົ້າໃຈດີ ກ່ຽວກັບ ວຽກງານກັກກັນພືດ;
ມີຄວາມຮູ້ທາງດ້ານກົດໝາຍ, ລະບຽບການສຸຂານາໄມພືດ ຂອງ ສປປ ລາວ, ຫຼັກການ ແລະມາດຕະຖານສາກົນ ດ້ານມາດຕະການສຸຂານາໄມພືດ;
ສາມາດເຂົ້າເຖິງຂໍ້ມູນດ້ານສຸຂານາໄມພືດຂອງປະເທດຄູ່ຄ້າ;
ມີການຕິດຕາມພາຍຫຼັງການນຳເຂົ້າ.

ມາດຕາ 16 ການນຳໃຊ້ໃບອະນຸຍາດນຳເຂົ້າ

ໃບອະນຸຍາດນຳເຂົ້າ ພືດ, ຜະລິດຕະພັນພືດ ຫຼື ວັດຖຸຕ້ອງຄວບຄຸມ ທີ່ນອນຢູ່ໃນບັນຊີທີ່ຕ້ອງຂໍອະນຸຍາດນຳເຂົ້າ ມີອາຍຸການນຳໃຊ້ ຕາມແຕ່ລະກໍລະນີຂື້້ນກັບຄວາມສ່ຽງ ແລະ ປັດໄຈອື່ນ ຊຶ່ງພົວພັນກັບຂໍ້ກຳນົດເງື່ອນໄຂດ້ານສຸຂານາໄມພືດ ສຳລັບການນຳເຂົ້າ ເປັນຕົ້ນ ຈຸດປະສົງນຳເຂົ້າເພື່ອຄົ້ນຄວ້າທົດລອງ, ການຄ້າ ແລະ ການຜະລິດຕາມລະດູການ.

ມາດຕາ 17 ການໂຈະ ຫຼື ການຍົກເລີກໃບອະນຸຍາດນຳເຂົ້າ

ກົມປູກຝັງ ແລະ ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ ເປັນຜູ້ທົບທວນຄືນ, ດັດແກ້ ຫຼື ໂຈະໃບອະນຸຍາດນຳເຂົ້າ ໂດຍແຈ້ງເປັນລາຍລັກອັກສອນ ຕໍ່ຜູ້ນຳເຂົ້າຕາມກໍລະນີ ດັ່ງນີ້:

ມີການປ່ຽນແປງສະພາບສັດຕູພືດຂອງປະເທດສົ່ງອອກ ຫຼື ໄດ້ຮັບຂໍ້ມູນສະພາບສັດຕູພືດຊະນິດໃໝ່;
ກວດພົບສັດຕູພືດຊະນິດໃໝ່ໃນຊຸດສິນຄ້າໃດໜຶ່ງ ຢູ່ດ່ານນໍາເຂົ້າ;
ຊະນິດ ຫຼື ຈຳນວນຂອງ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ທີ່ນຳເຂົ້າມີການປ່ຽນແປງ;
ມີການປ່ຽນແປງພື້ນທີ່ປູກ ທີ່ສົ່ງອອກມາຈາກປະເທດດຽວກັນ ຫຼື ເຂດພື້ນທີ່ດຽວກັນ;
ມີການປ່ຽນດ່ານນຳເຂົ້າ;
ເກີນກໍານົດເວລາ ຕາມທີ່ໄດ້ກໍານົດໄວ້ໃນໃບອະນຸຍາດນໍາເຂົ້າ;
ມີຂໍ້ມູນສະແດງໃຫ້ເຫັນວ່າ ການນໍາເຂົ້າຊຸດສິນຄ້າດັ່ງກ່າວເກີດມີຄວາມສ່ຽງດ້ານສຸຂານາໄມພືດເກີນລະດັບການປ້ອງກັນທີ່ເໝາະສົມ.

ກົມປູກຝັງ ແລະ ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ ມີສິດ ໂຈະ ຫຼື ຍົກເລີກ ໃບອະນຸຍາດນຳເຂົ້າ ໃນກໍລະນີພົບມີການລະເມີດຂໍ້ກຳນົດເງື່ອນໄຂດ້ານສຸຂານາໄມພືດ ທີ່ບໍ່ສອດຄ່ອງຕາມກົດໝາຍ ແລະ ລະບຽບການດ້ານສຸຂານາໄມພືດ ຂອງ ສປປ ລາວ ພ້ອມທັງແຈ້ງການນຳໃຊ້ມາດຕະການສຸຂານາໄມພືດໃຫ້ອົງການປ້ອງກັນພືດແຫ່ງຊາດ ຂອງປະເທດສົ່ງອອກພາຍໃນ ສີ່ສິບແປດ ຊົ່ວໂມງ ແລະ ນໍາໃຊ້ມາດຕະການສຸຂານາໄມພືດສຸກເສີນ ຫຼື ມາດຕະການອື່ນຊົ່ວຄາວ ຈົນກວ່າອົງການປ້ອງກັນພືດແຫ່ງຊາດ ຂອງປະເທດສົ່ງອອກ ສາມາດແກ້ໄຂໄດ້ ພ້ອມທັງຢັ້ງຢືນຫຼັກຖານ ເຖິງສາເຫດຂອງຄວາມບໍ່ສອດຄ່ອງດັ່ງກ່າວ.

ໝວດທີ 3

ການກວດກາກ່ອນມາເຖິງດ່ານ ແລະ ຢູ່ດ່ານກັກກັນພືດ

ມາດຕາ 18 ການກວດກາກ່ອນມາເຖິງດ່ານ

ກົມປູກຝັງ ເປັນຜູ້ຄົ້ນຄວ້າ ແລະ ກຳນົດດ່ານກັກກັນພືດສາກົນ ທີ່ໄດ້ມາດຕະຖານ ໃນການກວດກາການນຳເຂົ້າພືດ, ຜະລິດຕະພັນພືດ ຫຼື ວັດຖຸຕ້ອງຄວບຄຸມ ເພື່ອສະເໜີ ກະຊວງກະສິກຳ ແລະ ປ່າໄມ້ ພິຈາລະນາ ແລະ ປະກາດ ໃຊ້ໃນແຕ່ລະໄລຍະ ພ້ອມທັງສົມທົບກັບອົງການປ້ອງກັນພືດແຫ່ງຊາດ ຂອງປະເທດຄູ່ຄ້າ ໃນການສ້າງຂໍ້ຕົກລົງຮັບຮູ້ສອງຝ່າຍ ກ່ຽວກັບ ການນຳໃຊ້ມາດຕະການດ້ານສຸຂານາໄມພືດ ທີ່ເທົ່າທຽມກັນ ເພື່ອຫຼີກເວັ້ນ ການກວດກາຊໍ້າຊ້ອນກັນຢູ່ດ່ານນຳເຂົ້າ ຂອງ ສປປ ລາວ.

ເຈົ້າໜ້າທີ່ກັກກັນພືດ ຂອງ ກົມປູກຝັງ, ພະແນກກະສິກຳ ແລະ ປ່າໄມ້ ແຂວງ, ນະຄອນຫຼວງ ແລະ ດ່ານກັກກັນພືດ ຕ້ອງຮັບປະກັນການປະຕິບັດຕາມຂັ້ນຕອນການກວດກາ ການນຳເຂົ້າ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ກ່ອນມາເຖິງດ່ານ ຕາມບົດແນະນຳ ຂອງກົມປູກຝັງ.

ມາດຕາ 19 ການແຈ້ງເອກະສານນຳເຂົ້າພືດ, ຜະລິດຕະພັນພືດ ຫຼື ວັດຖຸຕ້ອງຄວບຄຸມ

ຜູ້ນຳເຂົ້າ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ຕ້ອງແຈ້ງເອກະສານກ່ຽວຂ້ອງ ຕໍ່ດ່ານ ກັກກັນພືດ ຕາມແບບພິມທີ່ໄດ້ກຳນົດໄວ້ໃນບົດແນະນຳ ຂອງກົມປູກຝັງ.

ພາຍຫຼັງໄດ້ຮັບຊຸດເອກະສານນຳເຂົ້າ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ແລ້ວ ເຈົ້າໜ້າທີ່ກັກກັນພືດ ຕ້ອງຈໍ້າກາຂາເຂົ້າໃສ່ໃບແຈ້ງຊຸດສິນຄ້າ ພ້ອມທັງກຳນົດເລກທີ ແລະ ວັນ ຮັບເອກະສານ, ເວລາ ແລະ ສະຖານທີ່ ກວດກາຊຸດສິນຄ້າ.

ດ່ານກັກກັນພືດ ຕ້ອງເກັບກໍາຂໍ້ມູນ ແລະ ບັນທຶກຊຸດສິນຄ້ານຳເຂົ້າ ໄວ້ໃນຖານຂໍ້ມູນ ຕາມທີ່ກຳນົດໄວ້ໃນຂໍ້ຕົກລົງສະບັບນີ້ ໂດຍມີເລກທີອ້າງອີງ ແລະ ຂໍ້ມູນທີ່ກ່ຽວຂ້ອງ ພ້ອມທັງສໍາເນົາເກັບຮັກສາໄວ້ ໃນກົມປູກຝັງ ແລະ ພະແນກກະສິກຳແລະປ່າໄມ້ແຂວງ, ນະຄອນຫຼວງ ຫຼື ຂະແໜງການພາສີ ໃນກໍລະນີຈໍາເປັນ.

ມາດຕາ 20 ສະພາບ ແລະ ຄວາມຖີ່ຂອງການກວດກາ

ກົມປູກຝັງ ແລະ ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ ຕ້ອງກວດກາການນຳເຂົ້າບົນພື້ນການການວິໄຈຄວາມສ່ຽງສັດຕູພືດ ຈາກປັດໄຈຕ່າງໆ ດັ່ງນີ້:

ມາດຕະການສຸຂານາໄມພືດ ທີ່ນຳໃຊ້ໂດຍອົງການປ້ອງກັນພືດແຫ່ງຊາດ (NPPO) ຂອງປະເທດສົ່ງອອກ;
ປະເພດສິນຄ້າ ແລະ ເປົ້າໝາຍຂອງການນຳໃຊ້;
ຂະໜາດຂອງຊຸດສິນຄ້າ ແລະ ຮູບຮ່າງພາຍນອກ;
ບໍລິມາດ, ຄວາມຖີ່ ແລະ ເວລາຂອງການຂົນສົ່ງ;
ການຈັດການ ແລະ ປຸງແຕ່ງມາກ່ອນ;
ປະສົບການ ແລະ ປະຫວັດຄວາມເປັນມາຂອງຜູ້ນຳເຂົ້າ;
ຜົນຂອງການກວດກາຄັ້ງກ່ອນ;
ວິທີການຂົນສົ່ງ ແລະ ຫຸ້ມຫໍ່;
ງົບປະມານ, ຊັບພະຍາກອນ ແລະ ຄວາມສາມາດ ໃນການວິໄຈສັດຕູພືດ;
ລັກສະນະໃນການກຳນົດວິທີການສຸ່ມເກັບຕົວຢ່າງ ຂອງການກວດກາ;
ຄວາມຫຍຸ້ງຍາກໃນການກວດກາຫາສັດຕູພືດ ໃນຊຸດສິນຄ້າສະເພາະໃດໜຶ່ງ;
ສະພາບຄວາມເນົ່າເປື່ອຍຂອງສິນຄ້າ;
ປະສິດທິພາບໃນການກວດກາ ເພື່ອປະເມີນຄວາມສ່ຽງຂອງຊຸດສິນຄ້າ.

ກົມປູກຝັງ ແລະ ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ ຕ້ອງສ້າງລະບົບການບັນທຶກຂໍ້ມູນ ກ່ຽວກັບ ຜູ້ນໍາເຂົ້າ, ສິນຄ້າ ແລະ ປະເທດຕົ້ນກຳເນີດສີນຄ້າ.

ໃນການຂົນສົ່ງສິນຄ້າແຕ່ລະຄັ້ງ ຕ້ອງຜ່ານການກວດກາ ແລະ ສຸ່ມເກັບຕົວຢ່າງຕາມ ບົດແນະນຳຂອງກົມປູກຝັງ ທີ່ໄດ້ກຳນົດ.

ມາດຕາ 21 ການກວດກາຊຸດສິນຄ້າຢູ່ດ່ານກັກກັນພືດ

ເມື່ອຊຸດສິນຄ້າ ມາເຖິງດ່ານນຳເຂົ້າທີ່ກຳນົດໄວ້, ເຈົ້າໜ້າທີ່ກັກກັນພືດ ຕ້ອງດຳເນີນການກວດກາຊຸດສິນຄ້າທັນທີ ໂດຍສະເພາະສິນຄ້າທີ່ເນົ່າເປື່ອຍງ່າຍ ຕ້ອງດຳເນີນການກວດກາກ່ອນຊຸດສີນຄ້າປະເພດອື່ນ ແລະ ດຳເນີນການກວດກາເອກະສານ ຕາມທີ່ໄດ້ກໍານົດໄວ້ໃນມາດຕາ 22 ຂອງຂໍ້ຕົກລົງສະບັບນີ້.

ພາຍຫຼັງເຈົ້າໜ້າທີ່ກັກກັນພືດ ກວດກາ ແລະ ຢັ້ງຢືນວ່າ ຊຸດສິນຄ້າມີເອກະສານນຳສົ່ງມາຄົບຖ້ວນ ແລະ ປະຕິບັດຖືກຕ້ອງຕາມເງື່ອນໄຂດ້ານສຸຂານາໄມພືດ ຂອງ ສປປ ລາວ ແລ້ວ ເຈົ້າໜ້າທີ່ກັກກັນພືດ ຕ້ອງຢັ້ງຢືນ ແລະ ປ່ອຍສີນຄ້າທັນທີ ຕາມລະບຽບການ. ໃນກໍລະນີ ພົບວ່າ ຊຸດສິນຄ້າ ບໍ່ມີຄວາມສ່ຽງດ້ານສຸຂານາໄມພືດ, ແຕ່ມີຂໍ້ມູນບໍ່ສອດຄ່ອງກັບໃບອະນຸຍາດນຳເຂົ້າ ແລະ ຊຸດສິນຄ້າ ນັ້ນ ເຈົ້າໜ້າທີ່ກັກກັນພືດ ຕ້ອງກັກຊຸດສິນຄ້າດັ່ງກ່າວໄວ້ ຈົນກວ່າຈະໄດ້ຮັບໃບອະນຸຍາດນຳເຂົ້າສະບັບໃໝ່ທີ່ມີຄວາມສອດຄ່ອງກັບຊຸດສິນຄ້າ.

ເຈົ້າໜ້າທີ່ກັກກັນພືດ ຕ້ອງລາຍງານຜົນຂອງການກວດກາ ແລະ ຢັ້ງຢືນ ໃຫ້ກົມປູກຝັງ ແລະ ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ ຮັບຊາບ ພ້ອມທັງ ສໍາເນົາເກັບຮັກສາໄວ້ຢູ່ດ່ານ ໜຶ່ງສະບັບ.

ມາດຕາ 22 ການກວດກາເອກະສານ

ເຈົ້າໜ້າທີ່ກັກກັນພືດ ຕ້ອງກວດກາຄວາມຖືກຕ້ອງ ແລະ ຄົບຖ້ວນຂອງເອກະສານ ດັ່ງນີ້:

ໃບອະນຸຍາດນໍາເຂົ້າ ອອກໃຫ້ໂດຍກົມປູກຝັງ ຫຼື ພະແນກກະສິກໍາ ແລະ ປ່າໄມ້ແຂວງ, ນະຄອນຫຼວງ;
ໃບຢັ້ງຢືນສຸຂານາໄມພືດ ຫຼື ໃບຢັ້ງຢືນສຸຂານາໄມພືດ ສໍາລັບ ສົ່ງອອກຕໍ່ຂອງປະເທດສົ່ງອອກ;
ໃບແຈ້ງລາຍການສິນຄ້າ ແລະ ໃບແຈ້ງລາຄາ;
ໃບຢັ້ງຢືນການບໍາບັດສິນຄ້າ;
ໃບຢັ້ງຢືນ ຫຼື ບົດລາຍງານ ກ່ຽວກັບ ຜົນການກວດກາພາກສະໜາມ;
ບົດບັນທຶກຂໍ້ມູນສະຖານທີ່ປະກອບການຜະລິດ;
ເອກະສານຢັ້ງຢືນແຫຼ່ງກໍາເນີດ;
ໃບຢັ້ງຢືນ CITES ໃນກໍລະນີນຳເຂົ້າວັດຖຸຕ້ອງຄວບຄຸມທີ່ຢູ່ໃນບັນຊີ ສົນທິສັນຍາສາກົນ ວ່າດ້ວຍ ການຄ້າຂາຍຊະນິດພັນສັດປ່າ ແລະ ພືດປ່າທີ່ໃກ້ຈະສູນພັນ ລະຫວ່າງຊາດ;
ເອກະສານອື່ນທີ່ກ່ຽວຂ້ອງ ຕາມການກຳນົດຂອງກົມປູກຝັງ ໃນແຕ່ລະໄລຍະ.

ໃນການກວດກາໃບຢັ້ງຢືນສຸຂານາໄມພືດນັ້ນ, ເຈົ້າໜ້າທີ່ກັກກັນພືດ ຕ້ອງກວດກາຄວາມຖືກຕ້ອງຂອງໃບຢັ້ງຢືນສຸຂານາໄມພືດ ຊຶ່ງປະກອບມີ ດັ່ງນີ້:

ໃບຢັ້ງຢືນສຸຂານາໄມພືດ ຖືກຕ້ອງຕາມແບບພິມທີ່ຖືກຮັບຮອງຈາກ ມາດຕະຖານສາກົນດ້ານມາດຕະການສຸຂານາໄມພືດ;
ອາຍຸໃບຢັ້ງຢືນສຸຂານາໄມພືດ ຕ້ອງບໍ່ເກີນ ສິບສີ່ ວັນ ນັບແຕ່ວັນອອກໃບຢັ້ງຢືນສຸຂານາໄມພືດ ແລະ ຂົນສົ່ງຊຸດສິນຄ້າ ອອກຈາກປະເທດສົ່ງອອກ;
ເປັນພາສາອັງກິດ;
ປະກອບຂໍ້ມູນຄົບຖ້ວນ, ຊື່ວິທະຍາສາດ ແລະ ຊື່ສາມັນຂອງຊຸດສິນຄ້າ;
ວັນທີ, ເດືອນ, ປີ ອອກໃບຢັ້ງຢືນສຸຂານາໄມພືດ;
ອອກໃຫ້ໂດຍ ແລະ ໃຊ້ຕາປະທັບຂອງອົງການປ້ອງກັນພືດແຫ່ງຊາດ (NPPO) ຂອງປະເທດສົ່ງອອກ;
ມີການແຈ້ງຂໍ້ມູນເພີ່ມຕື່ມ (additional declarations) ຕາມທີ່ໄດ້ກຳນົດໄວ້ໃນໃບອະນຸຍາດນຳເຂົ້າ.

ໃນກໍລະນີ ກວດກາພົບວ່າ ໃບຢັ້ງຢືນສຸຂານາໄມພືດ ບໍ່ຖືກຕ້ອງຕາມລະບຽບກົດໝາຍ ເປັນຕົ້ນ ຂໍ້ມູນບໍ່ຄົບຖ້ວນ, ໃບຢັ້ງຢືນສຸຂານາໄມພືດໝົດອາຍຸການນຳໃຊ້, ມີການດັດແປງ ຫຼື ລຶບຂໍ້ມູນໂດຍບໍ່ໄດ້ຮັບອະນຸຍາດ ຫຼື ຂໍ້ມູນບໍ່ຖືກຕ້ອງກັບຊຸດສິນຄ້າຕົວຈິງ, ໃບຢັ້ງຢືນສຸຂານາໄມພືດອອກໃຫ້ແກ່ຜະລິດຕະພັນຕ້ອງຫ້າມ, ໃບຢັ້ງຢືນສຸຂານາໄມພືດທີ່ຖືກປອມແປງ, ໃບຢັ້ງຢືນສຸຂານາໄມພືດບໍ່ກົງກັບໃບສຳເນົາຂອງໃບຢັ້ງຢືນສຸຂານາໄມພືດທີ່ໄດ້ອອກໃຫ້, ເຈົ້າໜ້າທີ່ກັກກັນພືດ ຕ້ອງປະຕິເສດການອະນຸຍາດ ຫຼື ໃຫ້ມີການແຈ້ງຂໍ້ມູນເພີ່ມຕື່ມ ພ້ອມທັງແຈ້ງເປັນລາຍລັກອັກສອນໃຫ້ຜູ້ນຳເຂົ້າຮັບຊາບ.

ໃບຢັ້ງຢືນສຸຂານາໄມພືດທີ່ຖືກປອມແປງມີລັກສະນະ ດັ່ງນີ້:

ອອກໃຫ້ໂດຍນຳໃຊ້ແບບຟອມ ຫຼື ສິ່ງພີມ ທີ່ບໍ່ໄດ້ຮັບອະນຸຍາດຈາກອົງການປ້ອງກັນພືດແຫ່ງຊາດ (NPPO) ຂອງປະເທດສົ່ງອອກ;
ອອກໃຫ້ໂດຍບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ບໍ່ໄດ້ຮັບອະນຸຍາດຈາກອົງການປ້ອງກັນພືດແຫ່ງຊາດ (NPPO) ຂອງປະເທດສົ່ງອອກ;
ມີຂໍ້ມູນບໍ່ຖືກຕ້ອງ ຫຼື ບໍ່ຖືກກັບຄວາມເປັນຈິງ;
ມີການປອມແປງຕາມທີ່ໄດ້ກຳນົດໄວ້ໃນກົດໝາຍ ແລະ ລະບຽບການທີ່ກ່ຽວຂ້ອງ.

ຖ້າພົບມີຂໍ້ໃດໜຶ່ງ ຫຼື ທຸກຂໍ້ທີ່ກ່າວມາຂ້າງເທິງນັ້ນ ແມ່ນສາມາດປະຕິເສດໃບຢັ້ງຢືນສຸຂານາໄມພືດ ພ້ອມທັງແຈ້ງໃຫ້ກົມປູກຝັງ ເພື່ອແຈ້ງຕໍ່ໄປຍັງອົງການປ້ອງກັນພືດແຫ່ງຊາດ (NPPO) ຂອງປະເທດສົ່ງອອກ ແລະ ຜູ້ນໍາເຂົ້າຮັບຊາບ ກ່ອນນຳໃຊ້ມາດຕະການສຸຂານາໄມພືດໃນຂັ້ນຕໍ່ໄປ.

ມາດຕາ 23 ການສຸ່ມເກັບຕົວຢ່າງ ແລະ ການວິໄຈ

ໃນເວລາດຳເນີນການກວດກາ ຫາກມີເຫດຜົນຢັ້ງຢືນວ່າ ຊຸດສິນຄ້າບໍ່ຖືກຕ້ອງຕາມເງື່ອນໄຂດ້ານສຸຂານາໄມພືດ ຂອງ ສປປ ລາວ ຫຼື ສົງໃສວ່າ ຊຸດສິນຄ້າມີການຕິດແປດສັດຕູພືດຄວບຄຸມ ນັ້ນ, ເຈົ້າໜ້າທີ່ກັກກັນພືດ ຕ້ອງສຸ່ມເກັບຕົວຢ່າງ, ປະກອບຂໍ້ມູນ ແລະ ສົ່ງຕົວຢ່າງໄປຫ້ອງທົດລອງ ເພື່ອວິໄຈ ຫຼື ໃນກໍລະນີຈໍາເປັນ ຕ້ອງກັກສິນຄ້າໄວ້ ຈົນກວ່າສາມາດສະຫຼຸບໄດ້ວ່າ ມີ ຫຼື ບໍ່ມີສັດຕູພືດຄວບຄຸມ.

ເຈົ້າໜ້າທີ່ກັກກັນພືດ ຕ້ອງເກັບຕົວຢ່າງໃຫ້ໄວ, ຖືກຕ້ອງ, ຄົບຖ້ວນ ແລະ ສາມາດກວດສອບຫາສາເຫດຢ້ອນຫຼັງໄດ້ ພ້ອມທັງລາຍງານຜົນຂອງການວິໄຈຕົວຢ່າງ ໃຫ້ກົມປູກຝັງ, ພະແນກກະສິກຳ ແລະປ່າໄມ້ແຂວງ, ນະຄອນຫຼວງ ແລະ ຜູ້ນຳເຂົ້າ.

ສຳລັບ ຫຼັກການ, ວິທີການ ແລະ ຂັ້ນຕອນ ການສຸ່ມເກັບຕົວຢ່າງ ຕ້ອງປະຕິບັດຕາມວິທີການສຸ່ມ ແລະ ການທົດສອບ ທີ່ກຳນົດໄວ້ໃນຄູ່ມືການກວດກາ ຂອງກົມປູກຝັງ.

ມາດຕາ 24 ມາດຕະການສຸຂານາໄມພືດທີ່ນຳໃຊ້ ໃນການກວດກາຊຸດສິນຄ້າຢູ່ດ່ານກັກກັນພືດ

ໃນເວລາກວດກາສິນຄ້າຢູ່ດ່ານກັກກັນພືດ, ຫາກພົບມີຄວາມສ່ຽງສັດຕູພືດ, ພົບເຫັນສັດຕູພືດຄວບຄຸມ ໃນຊຸດສິນຄ້າ ຫຼື ກວດພົບສັດຕູພືດທີ່ບໍ່ກັກກັນແຕ່ຕ້ອງຄວບຄຸມ ໃຫ້ນຳໃຊ້ມາດຕະການສຸຂານາໄມພືດ ຕາມແຕ່ລະກໍລະນີ ດັ່ງນີ້:

ມີຄວາມສ່ຽງສັດຕູພືດ: ເຈົ້າໜ້່ທີ່ກັກັກນພືດ ຕ້ອງເກັບຕົວຢ່າງ ສົ່ງໄປທົດສອບ ຫຼື ໃນກໍລະນີທີ່ຈຳເປັນ ແມ່ນໃຫ້ກັກຊຸດສິນຄ້າໄວ້ ຈົນກວ່າສາມາດສະຫຼຸບໄດ້ວ່າ ມີການຕິດແປດ ຫຼື ບໍ່ຕິດແປດສັດຕູພືດຄວບຄຸມ ແລະ ແຈ້ງໃຫ້ຜູ້ນຳເຂົ້າຊາບ ແລ້ວລາຍງານຜົນການກວດກາ ໃຫ້ກົມປູກຝັງ, ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ ແລະ ຜູ້ນຳເຂົ້າ ຊາບພາຍໃນ ຊາວສີ່ ຊົ່ວໂມງ;
ກວດພົບສັດຕູພືດຄວບຄຸມໃນຊຸດສິນຄ້າ: ດ່ານກັກກັນພືດ ຕ້ອງນຳໃຊ້ມາດຕະການໃດໜຶ່ງ ທີ່ເໝາະສົມ ເປັນຕົ້ນ ກັກຊຸດສິນຄ້າ ໂດຍປະສານສົມທົບກັບເຈົ້າໜ້າທີ່ພາສີ ດຳເນີນການບໍາບັດຊຸດສິນຄ້າ ຖ້າມີຄວາມເປັນໄປໄດ້ໃນການກຳຈັດສັດຕູພືດ, ໃຫ້ຜູ້ນຳເຂົ້າ ສົ່ງຊຸດສິນຄ້າກັບຄືນປະເທດສົ່ງອອກ ຫຼື ໃນກໍລະນີ ປະເທດສົ່ງອອກຫາກປະຕິເສດການສົ່ງກັບ ແລະ ສປປ ລາວ ກໍ່ບໍ່ມີມາດຕະການສຸຂານາໄມພືດ ຫຼື ທາງເລືອກທີ່ສາມາດນຳໃຊ້ເພື່ອຫຼຸດຜ່ອນຄວາມສ່ຽງ ແມ່ນໃຫ້ ກົມປູກຝັງ ດຳເນີນການຍຶດ ແລະ ທໍາລາຍຖີ້ມຊຸດສິນຄ້າດັ່ງກ່າວ. ສຳລັບ ຄ່າໃຊ້ຈ່າຍໃນການນຳໃຊ້ມາດຕະການສຸຂານາໄມພືດ ແມ່ນຄວາມຮັບຜິດຊອບຂອງຜູ້ນຳເຂົ້າ;
ກວດພົບສັດຕູພືດທີ່ບໍ່ກັກກັນແຕ່ຕ້ອງຄວບຄຸມ: ເຈົ້າໜ້າທີ່ກັກກັນພືດ ຕ້ອງກັກຊຸດສິນຄ້າ ຈົນກວ່າສາມາດສະຫຼຸບໄດ້ວ່າ ສັດຕູພືດທີ່ບໍ່ກັກກັນແຕ່ຕ້ອງຄວບຄຸມ ຢູ່ໃນລະດັບທີ່ຍອມຮັບໄດ້, ຖ້າເຫັນວ່າມີການຕິດແປດເກີນລະດັບຍອມຮັບໄດ້ ດ່ານກັກກັນພືດ ຕ້ອງນຳໃຊ້ມາດຕະການສຸຂານາໄມພືດ ທີ່ສອດຄ່ອງກັບເງື່ອນໄຂພາຍໃນປະເທດ ແລະ ໃຊ້ສະເພາະເພື່ອຢັບຢັ້ງໃຫ້ຢູ່ໃນລະດັບທີ່ຍອມຮັບໄດ້ ຫຼື ອາດບຳບັດຊຸດສີນຄ້າ, ແຍກຊຸດສິນຄ້າທີ່ຕິດແປດສັດຕູພືດນັ້ນອອກ ເພື່ອໃຫ້ຊຸດສີນຄ້າທີ່ບໍ່ຕິດແປດສັດຕູພືດ ສາມາດອະນຸຍາດນຳເຂົ້າໄດ້ ໂດຍປະຕິບັດຄວາມເທົ່າທຽມກັບມາດຕະການສຸຂານາໄມພືດ ທີ່ປະຕິບັດຢູ່ພາຍໃນປະເທດ. ໃນກໍລະນີ ບໍ່ມີມາດຕະການສຸຂານາໄມພືດ ທີ່ເຮັດໃຫ້ລະດັບສັດຕູພືດທີ່ບໍ່ກັກກັນແຕ່ຕ້ອງຄວບຄຸມຫຼຸດລົງເຖິງລະດັບຍອມຮັບໄດ້, ກົມປູກຝັງ ຕ້ອງສົ່ງຊຸດສິນຄ້າກັບຄືນປະເທດສົ່ງອອກ ແລະ ຖ້າປະເທດສົ່ງອອກປະຕິເສດການສົ່ງກັບ ຕ້ອງດຳເນີນການຍຶດ ແລະ ທໍາລາຍຖີ້ມຊຸດສິນຄ້າດັ່ງກ່າວ.

ເຈົ້າໜ້າທີ່ກັກກັນພືດ ສາມາດປະຕິເສດການຳໃຊ້ມາດຕະການສຸຂານາໄມພືດ ຕໍ່ກັບສັດຕູພືດທີ່ບໍ່ກັກກັນແຕ່ຕ້ອງຄວບຄຸມ ໃນກໍລະນີ ບໍ່ມີຄວາມສ່ຽງສັດຕູພືດເກີດຂື້ນ ຫຼື ແຜ່ກະຈາຍ ໂດຍມີການຢັ້ງຢືນທາງດ້ານວິຊາການ.

ເຈົ້າໜ້າທີ່ກັກກັນພືດ ຕ້ອງລາຍງານຜົນການກວດກາ, ການວິໄຈ ແລະ ການນຳໃຊ້ມາດຕະການສຸຂານາໄມພືດ ໃຫ້ກົມປູກຝັງ, ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ ແລະ ຜູ້ນຳເຂົ້າ.

ມາດຕາ 25 ການປະຕິບັດດ້ານສຸຂານາໄມພືດ ຕໍ່ຊຸດສິນຄ້ານໍາເຂົ້າທີ່ບໍ່ຖືກຕ້ອງ ແລະ ແບບສຸກເສີນ

ເມື່ອກວດພົບ ຊຸດສິນຄ້ານໍາເຂົ້າ ທີ່ບໍ່ຖືກຕ້ອງ ເປັນຕົ້ນ ຊຸດສິນຄ້າ ທີ່ມີຫຼັກຖານສະແດງເຖິງຄວາມລົ້ມເຫຼວໃນການປະຕິບັດດ້ານສຸຂານາໄມພືດ ຕາມທີ່ໄດ້ສັນຍາສອງຝ່າຍ, ລະບຽບການ ແລະ ເງື່ອນໄຂດ້ານສຸຂານາໄມພືດສຳລັບການນຳເຂົ້າ, ໃບຢັ້ງຢືນສຸຂານາໄມພືດບໍ່ຖືກຕ້ອງ ແລະ ວັດຖຸຕ້ອງຄວບຄຸມທີ່ນຳເຂົ້າເປັນສິ່ງຕ້ອງຫ້າມ, ເຈົ້າໜ້າທີ່ກັກກັນພືດ ຕ້ອງປະຕິບັດດ້ານສຸຂານາໄມພືດ ຕາມສະພາບຂອງຊຸດສີນຄ້າ ແລະ ຄວາມສ່ຽງຂອງສັດຕູພືດ. ສຳລັບຂັ້ນຕອນ ແລະ ວີທີການປະຕິບັດດ້ານສຸຂານາໄມພືດ ສຳລັບຊຸດສິນຄ້ານຳເຂົ້າທີ່ບໍ່ຖືກຕ້ອງ ໄດ້ກຳນົດໄວ້ໃນບົດແນະນຳ ຂອງກົມປູກຝັງ.

ດ່ານກັກກັນພືດ ຕ້ອງປະຕິບັດດ້ານສຸຂານາໄມພືດແບບສຸກເສີນທັນທີ ຖ້າພົບວ່າ ຊຸດສິນຄ້າທີ່ບໍ່ທັນໄດ້ກຳນົດມາດຕະການສຸຂານາໄມພືດ, ມີການປົນເປື້ອນຂອງພາຫະນະຂົນສົ່ງ, ສາງເກັບມ້ຽນ ຫຼື ສະຖານທີ່ອື່ນ ທີ່ພົວພັນກັບຊຸດສິນຄ້າທີ່ນຳເຂົ້າ, ພົບສັດຕູພືດຊະນິດໃໝ່ໃນຊຸດສິນຄ້າທີ່ບໍ່ໄດ້ຜ່ານການປະເມີນຄວາມສ່ຽງມາກ່ອນ ແລະ ມີສັດຕູພືດຕິດແປດມານຳພາຫະອື່ນ ພ້ອມທັງ ລາຍງານໃຫ້ກົມປູກຝັງ ເພື່ອແຈ້ງຜົນການປະຕິບັດດ້ານສຸຂານາໄມພືດແບບສຸກເສີນ ຕໍ່ອົງການປ້ອງກັນພືດແຫ່ງຊາດ (NPPO) ຂອງປະເທດສົ່ງອອກ. ສຳລັບຂັ້ນຕອນ ແລະ ວີທີການປະຕິບັດດ້ານສຸຂານາໄມພືດແບບສຸກເສີນ ຕ້ອງປະຕິບັດຕາມບົດແນະນຳ ຂອງກົມປູກຝັງ.

ໃນກໍລະນີ ກວດພົບສັດຕູພືດທີ່ບໍ່ສາມາດຈຳແນກຊະນິດສັດຕູພືດໄດ້, ກົມປູກຝັງ ແລະ ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ ສາມາດປະຕິບັດມາດຕະການສຸຂານາໄມພືດຊົ່ວຄາວ ແລະ ເກັບຕົວຢ່າງເພີ່ມ ພ້ອມທັງສົມທົບກັບອົງການປ້ອງກັນພືດແຫ່ງຊາດ (NPPO) ຂອງປະເທດສົ່ງອອກ ເພື່ອຊ່ວຍໃນການຈຳແນກສັດຕູພືດດັ່ງກ່າວ. ພາຍຫຼັງວິໄຈຄວາມສ່ຽງສັດຕູພືດ ຫາກຢັ້ງຢືນວ່າສັດຕູພືດມີຄວາມຈຳເປັນຕ້ອງປະຕິບັດດ້ານສຸຂານາໄມພືດ, ກົມປູກຝັງ ແລະ ພະແນກກະສິກຳແລະປ່າໄມ້ແຂວງ, ນະຄອນຫຼວງ ຕ້ອງເພີ່ມສັດຕູພືດດັ່ງກ່າວ ເຂົ້າໃນບັນຊີສັດຕູພືດຄວບຄຸມ ໃນ ສປປ ລາວ.

ມາດຕາ 26 ການປ່ອຍຊຸດສິນຄ້າຢ່າງເປັນທາງການ

ພາຍຫຼັງການກວດກາຊຸດສີນຄ້າ ນຳເຂົ້າດັ່ງກ່າວ ແລ້ວ, ເຈົ້າໜ້າທີ່ກັກກັນພືດ ຕ້ອງຈ້ຳກາປະທັບຕາຜ່ານ ໃສ່ໃບແຈ້ງຜ່ານ, ເພື່ອປ່ອຍຊຸດສີນຄ້າຢ່າງເປັນທາງການ ດ້ວຍຕາປະທັບ ຕາມທີ່ໄດ້ກຳນົດໄວ້ໃນບົດແນະນຳຂອງກົມປູກຝັງ.

ມາດຕາ 27 ການປ່ອຍຊຸດສິນຄ້າແບບມີເງື່ອນໄຂ

ການປ່ອຍຊຸດສິນຄ້າແບບມີເງື່ອນໄຂ ແມ່ນການກຳນົດໃຫ້ມີການກວດກາພາຍຫຼັງການນຳເຂົ້າຊຸດສິນຄ້າ ຢູ່ສະຖານທີ່ໃດໜຶ່ງ ໂດຍເຈົ້າໜ້າທີ່ກັກກັນພືດ ໃນກໍລະນີເຫັນວ່າ ມີການເຄື່ອນຍ້າຍຊຸດສິນຄ້າເຂົ້າມາໃນສະຖານທີ່ກວດກາ ຕາມໄລຍະເວລາທີ່ກຳນົດໃຫ້ໂດຍກົມປູກຝັງ ຫຼື ຕ້ອງໄດ້ປະຕິບັດຕາມຂໍ້ກໍານົດເງື່ອນໄຂດ້ານສຸຂານາໄມພືດ ທີ່ໄດ້ກຳນົດໄວ້ໃນໃບອະນຸຍາດນຳເຂົ້າ ຫຼື ຂໍ້ຕົກລົງ ກ່ຽວກັບ ການກັກ, ແຍກປ່ຽວ ແລະ ກັກກັນ, ລວມທັງໄລຍະເວລາທີ່ວັດຖຸຕ້ອງຄວບຄຸມ ຕ້ອງຖືກກັກໄວ້ເພື່ອຕິດຕາມ.

ໃນກໍລະນີ ກົມປູກຝັງ ແລະ ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ ກຳນົດໃຫ້ມີການກວດກາພາຍຫຼັງການເຂົ້າ ຢູ່ສະຖານທີ່ໃດໜຶ່ງນອກດ່ານກັກກັນພືດ, ເຈົ້າໜ້າທີ່ກັກກັນພືດ ຕ້ອງປ່ອຍຊຸດສິນຄ້າແບບມີເງື່ອນໄຂ ເພື່ອແຈ້ງຕໍ່ເຈົ້າໜ້າທີ່ພາສີໃນຂັ້ນຕໍ່ໄປ. ພ້ອມທັງລາຍງານຕໍ່ກົມປູກຝັງ ຫຼື ພະແນກກະສິກຳ ແລະປ່າໄມ້ແຂວງ, ນະຄອນຫຼວງ ກ່ຽວກັບ ສະຖານທີ່, ຈຳນວນ ແລະ ລາຍລະອຽດຂອງຊຸດສິນຄ້າດັ່ງກ່າວ. ການກວດກາພາຍຫຼັງການນຳເຂົ້າ ແມ່ນບໍ່ໃຫ້ເກີນ ສາມ ວັນລັດຖະການ ນັບແຕ່ວັນປ່ອຍຊຸດສິນຄ້າແບບມີເງື່ອນໄຂ ເປັນຕົ້ນໄປ.

ມາດຕາ 28 ການແຈ້ງຂໍ້ມູນສັດຕູພືດຄວບຄຸມໃຫ້ອົງການປ້ອງກັນພືດສາກົນ (IPPC)

ກົມປູກຝັງ ຕ້ອງແຈ້ງຂໍ້ມູນສັດຕູພືດຄວບຄຸມໃຫ້ຜູ້ນຳເຂົ້າ, ອົງການປ້ອງກັນພືດ ແຫ່ງຊາດ (NPPO) ຂອງປະເທດສົ່ງອອກ ແລະ ກອງເລຂາ ຂອງອົງການປ້ອງກັນພືດພາກພື້ນ ແລະ ສາກົນ (IPPC) ແລະ ສາກົນ (APPPO) ເປັນແຕ່ລະໄລຍະ ໂດຍສະເພາະຂໍ້ມູນ ກ່ຽວກັບ ສັດຕູພືດຄວບຄຸມ, ການກວດກາ ແລະ ມາດຕະການສຸຂານາໄມພືດແບບສຸກເສີນທີ່ນຳໃຊ້, ຜົນການທົດສອບ, ເອກະສານຢັ້ງຢືນການບໍາບັດ, ໃບຢັ້ງຢືນການຍຶດ ແລະ ທໍາລາຍຖີ້ມຊຸດສິນຄ້າ ແລະ ເອກະສານອື່ນທີ່ກ່ຽວຂ້ອງ.

ມາດຕາ 29 ການທົບທວນຄືນມາດຕະການສຸຂານາໄມພືດ

ກົມປູກຝັງ ແລະ ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ ຕ້ອງທົບທວນຄືນການຈັດຕັ້ງປະຕິບັດບັນດາມາດຕະການສຸຂານາໄມພືດ ໃນແຕ່ລະໄລຍະ. ຫາກມີການລະເມີດ ຫຼື ບໍ່ປະຕິບັດຕາມ ເງື່ອນໄຂການນຳເຂົ້າ ໃຫ້ດຳເນີນການປະຕິບັດ ມາດຕະການສຸຂານາໄມພືດແບບສຸກເສີນ ຫຼື ສາມາດດັດແກ້ມາດຕະການດັ່ງກ່າວ ໃຫ້ສອດຄ່ອງກັບເງື່ອນໄຂສຸຂານາໄມພືດສໍາລັບການນໍາເຂົ້າ.

ໝວດທີ 4

ການກວດກາພາຍຫຼັງການນຳເຂົ້າ

ມາດຕາ 30 ສະຖານທີ່ກັກກັນພາຍຫຼັງການນໍາເຂົ້າ

ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ມີຈຸດປະສົງ ສ້າງຕັ້ງສະຖານທີ່ກັກກັນພາຍຫຼັງການນຳເຂົ້າຕ້ອງໄດ້ຮັບອະນຸຍາດ ຈາກກົມປູກຝັງ ແລະ ປະຕິບັດຕາມເງື່ອນໄຂດ້ານສຸຂານາໄມພືດ ທີ່ໄດ້ກໍານົດໄວ້ໃນບົດແນະນຳຂອງກົມປູກຝັງ.

ພາຍຫຼັງໄດ້ຮັບໃບຄຳຮ້ອງ, ກົມປູກຝັງ ຕ້ອງກວດກາສະຖານທີ່ກັກກັນ ແລະ ຖ້າຫາກຖືກຕ້ອງຕາມຂໍ້ກໍານົດເງື່ອນໄຂທີ່ກຳນົດດ້ານສຸຂານາໄມພືດ ແລ້ວ ຕ້ອງອອກໃບອະນຸຍາດທາງດ້ານວິຊາການ ພ້ອມທັງກຳນົດໄລຍະເວລາ ຫຼື ຄວາມຖີ່ຂອງການກວດກາໃນໃບອະນຸຍາດດັ່ງກ່າວ.

ມາດຕາ 31 ການກວດກາພາຍຫຼັງການນຳເຂົ້າຢູ່ພາກສະໜາມ

ການກວດກາພາຍຫຼັງການນຳເຂົ້າຢູ່ພາກສະໜາມ, ເຈົ້າໜ້າທີ່ກັກກັນພືດ ປະຕິບັດ ດັ່ງນີ້:

ພາຍຫຼັງການນຳເຂົ້າ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ເຈົ້າໜ້າທີ່ກັກກັນພືດຕ້ອງກວດກາຊຸດສິນຄ້າ ແລະ ຢູ່ສະຖານທີ່ກວດກາ ແລະ ສະຖານທີ່ກັກກັນພາຍຫຼັງການນໍາເຂົ້າ ທີ່ກຳນົດໄວ້;
ອອກໃບອະນຸຍາດໃຫ້ແກ່ວັດຖຸຕ້ອງຄວບຄຸມ ຈາກການກັກກັນພືດພາຍຫຼັງການນຳເຂົ້າ ໃນກໍລະນີ ທີ່ວັັດຖຸຕ້ອງຄວບຄຸມ ມີສັດຕູພືດ ແລະ ບໍ່ຕິດແປດ ຈາກສັດຕູພືດພາຍໃນໄລຍະເວລາຕິດຕາມທີ່ກຳນົດໄວ້;
ໃນກໍລະນີ ຊຸດສິນຄ້າຕິດແປດສັດຕູພືດຄວບຄຸມ, ມີສັດຕູພືດ ຫຼື ຕິດແປດຈາກສັດຕູພືດຈາກຕ່າງປະເທດ ເຈົ້າໜ້າທີ່ກັກກັນພືດ ຕ້ອງອອກຄຳສັ່ງໃຫ້ທຳລາຍຊຸດສິນຄ້າທັງໝົດ ຫຼື ບາງສ່ວນ ພ້ອມທັງແນະນຳໃຫ້ຜູ້ນຳເຂົ້າ ປະຕິບັດມາດຕະການສຸຂານາໄມພືດ ເປັນຕົ້້ນ ການບຳບັດຊຸດສິນຄ້າດ້ວຍວິທີການຕ່າງໆ ຕາມຫຼັກວິຊາການ.

ເມື່ອຊຸດສິນຄ້າໄດ້ຜ່ານການກວດກາ ຢູ່ສະຖານທີ່ເກັບມ້ຽນ, ສະຖານທີ່ກັກກັນພາຍຫຼັງການນຳເຂົ້າແລ້ວ ຕ້ອງມີບົດລາຍງານ ແລະ ລົງລາຍເຊັນ ຈາກພະນັກງານ ແລະ ເຈົ້າໜ້າທີ່ກັກກັນພືດ ທີ່ໄດ້ລົງກວດກາ ແລະ ເຊັນຢັ້ງຢືນຜູ້ນຳເຂົ້າ ຫຼື ຜູ້ທີ່ຖືກມອບສິດຈາກຜູ້ນຳເຂົ້າ.

ໝວດທີ 5

ການສົ່ງຜ່ານ

ມາດຕາ 32 ການສະເໜີຂໍອະນຸຍາດດ້ານສຸຂານາໄມພືດໃນການສົ່ງຜ່ານ

ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ມີຈຸດປະສົງໃນການສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ຜ່ານດິນແດນ ຂອງ ສປປ ລາວ ຕ້ອງໄດ້ຮັບອະນຸຍາດຈາກ ກົມປູກຝັງ ຫຼື ພະແນກກະສິກຳ ແລະ ປ່າໄມ້ ແຂວງ, ນະຄອນຫຼວງ ໂດຍຍື່ນຄຳຮ້ອງ ຕາມແບບພິມ ທີ່ກົມປູກຝັງກຳນົດ ຢ່າງໜ້ອຍ ສິບຫ້າ ວັນ ກ່ອນວັນທີ່ຕ້ອງການສົ່ງຜ່ານຊຸດສິນຄ້າ.

ມາດຕາ 33 ການອອກອະນຸຍາດດ້ານສຸຂານາໄມພືດໃຫ້ສົ່ງຜ່ານ

ກົມປູກຝັງ ແລະ ພະແນກກະສິກໍາ ແລະ ປ່າໄມ້ແຂວງ, ນະຄອນຫຼວງ ຕ້ອງອະນຸຍາດສົ່ງຜ່ານທາງດ້ານສຸຂານາໄມພືດ ຕາມແບບພິມທີ່ກຳນົດໃນບົດແນະນຳຂອງກົມປູກຝັງ ບົນພື້ນຖານການວິໄຈຄວາມສ່ຽງສັດຕູພືດ ຕໍ່ກັບຊຸດສິນຄ້າທີ່ເຫັນວ່າບໍ່ມີຄວາມສ່ຽງຕໍ່ສຸຂະພາບພືດ.

ໃບອະນຸຍາດສົ່ງຜ່ານດ້ານສຸຂານາໄມພືດ ມີອາຍຸການນຳໃຊ້ ເຈັດ ວັນ ແລະ ສາມາດຕໍ່ໄດ້ ແຕ່ບໍ່ໃຫ້ກາຍ ຊາວເອັດ ວັນ ໂດຍຂື້ນກັບການສະເໜີຂອງຜູ້ດໍາເນີນການສົ່ງຜ່ານ ຊຶ່ງກຳນົດໂດຍກົມປູກຝັງ.

ໃນກໍລະນີ ທີ່ຊຸດສິນຄ້າມີຄວາມສ່ຽງຕໍ່ສຸຂະພາບພືດ, ກົມປູກຝັງ ແລະ ພະແນກກະສິກໍາ ແລະ ປ່າໄມ້ແຂວງ, ນະຄອນຫຼວງຕ້ອງກຳນົດມາດຕະການສຸຂານາໄມພືດ ເພື່ອຮັບປະກັນຄວາມປອດໄພ ແລະ ຖືກຕ້ອງດ້ານສຸຂານາໄມພືດ ສໍາລັບຊຸດສິນຄ້າໃນໄລຍະສົ່ງຜ່ານ ສປປ ລາວ ດັ່ງນີ້:

ກຳນົດຮູບແບບຂອງການຂົນສົ່ງ ແລະ ເສັ້ນທາງການຂົນສົ່ງສະເພາະ;
ຄວບຄຸມການປ່ຽນແປງຊຸດສິນຄ້າ;
ນໍາໃຊ້ອຸປະກອນ ຫຼື ສິ່ງອໍານວຍຄວາມສະດວກ ທີ່ກໍານົດໃຫ້ໂດຍກົມປູກຝັງ ແລະ ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ;
ສາງເກັບມ້ຽນຂອງພາສີຕ້ອງ ຖືກຮັບຮອງໂດຍກົມປູກຝັງ ແລະ ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ;
ດຳເນີນການບຳບັດດ້ານສຸຂານາໄມພືດ ເຊັ່ນ ບຳບັດກ່ອນສົ່ງອອກ ຫຼື ບໍາບັດຊຸດສິນຄ້າໃນກໍລະນີສົງໄສຕິດແປດສັດຕູພືດ;
ຕິດຕາມຊຸດສິນຄ້າໃນລະຫວ່າງການຂົນສົ່ງ;
ກໍານົດເງື່ອນໄຂທາງກາຍຍະພາບເຊັ່ນ: ການໃຊ້ຕູ້ປັບອາກາດ, ການຫຸ້ມຫໍ່, ການປົກຫຸ້ມເພື່ອກັນສັດຕູພືດ ຫຼື ນຳໃຊ້ຕູ້ຂົນສົ່ງທີ່ປ້ອງກັນການຮົ່ວຊຶມ;
ນຳໃຊ້ເຄື່ອງປິດລັອກສະເພາະ ຂອງອົງການປ້ອງກັນພືດແຫ່ງຊາດ ສຳລັບຕູ້ຂົນສົ່ງ ຫຼື ຊຸດສິນຄ້າ;
ຈຳກັດເວລາຂົນສົ່ງ ຫຼື ລະດູການ;
ກວດກາຊຸດສິນຄ້າທີ່ສົ່ງຜ່ານດ່ານກັກກັນພືດ;
ກຳຈັດສິ່ງເສດເຫຼືອ;
ນໍາໃຊ້ມາດຕະການອື່ນທີ່ຈຳເປັນ ເພື່ອຮັບປະກັນດ້ານຄວາມປອດໄພ ແລະ ຄວາມຄົບຖ້ວນຖືກຕ້ອງດ້ານສຸຂານາໄມພືດ.

ຜູ່້ສົ່ງຜ່ານ ຕ້ອງປະຕິບັດຕາມມາດຕະຖານສຸຂານາໄມພືດ ທີ່ກຳນົດໄວ້ໃນບົດແນະນຳ ຂອງກົມປູກຝັງ.

ມາດຕາ 34 ການປະຕິບັດມາດຕະການສຸຂານາໄມພືດສຸກເສີນຕໍ່ຊຸດສິນຄ້າ

ໃນກໍລະນີ ທີ່ກົມປູກຝັງ ແລະ ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ ມີຫຼັກຖານສະແດງໃຫ້ເຫັນວ່າ ຄວາມຖືກຕ້ອງດ້ານສຸຂານາໄມພືດຂອງຊຸດສິນຄ້າ ມີິການປ່ຽນແປງ ຫຼື ກວດພົບສັດຕູພືດໃນຊຸດສິນຄ້າສົ່ງຜ່ານ, ພັດສະດຸຫຸ້ມຫໍ່ ຫຼື ພາຫະນະຂົນສົ່ງ ຕ້ອງປະຕິບັດມາດຕະການສຸຂານາໄມພືດ ຕາມທີ່ກຳນົດໄວ້ໃນມາດຕາ 24 ແລະ 25 ຂອງຂໍ້ຕົກລົງສະບັບນີ້.

ໃນກໍລະນີ ທີ່ກົມປູກຝັງ ແລະ ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງນຳໃຊ້ການປະຕິບັດດ້ານສຸຂານາໄມພືດຕໍ່ຊຸດສິນຄ້າສົ່ງຜ່ານ ຕ້ອງແຈ້ງໃຫ້ຜູ້ດຳເນີນການສົ່ງຜ່ານພາຍໃນ ຊາວສີ່ຊົ່ວໂມງ ແລະ ສະແດງຫຼັກຖານທີ່ປະຕິບັດມາດຕະການສຸຂານາໄມພືດດັ່ງກ່າວ ລວມທັງຜົນໄດ້ຮັບ ແລະ ກໍລະນີຄວາມບໍ່ຖືກຕ້ອງ.

ມາດຕາ 35 ຖານຂໍ້ມູນດ້ານສຸຂານາໄມພືດໃນການນໍາເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ

ກົມປູກຝັງ ແລະ ພະແນກກະສິກໍາ ແລະ ປ່າໄມ້ແຂວງ, ນະຄອນຫຼວງ ຮັບຜິດຊອບໃນການສັງລວມ ແລະ ເກັບຮັກສາຂໍ້ມູນ ກ່ຽວກັບ ການນໍາເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ຕາມຂອບເຂດຄວາມຮັບຜິດຊອບຂອງຕົນ ດັ່ງນີ້:

ປະເພດ ແລະ ປະລິມານຂອງຊຸດສິນຄ້າ;
ໃບຢັ້ງຢືນສຸຂານາໄມພືດຂອງປະເທດສົ່ງອອກ, ໃບອະນຸຍາດນຳເຂົ້າ ແລະ ໃບອະນຸຍາດສົ່ງຜ່ານ ຂອງ ສປປ ລາວ;
ບົດລາຍງານ ການກວດກາດ້ານສຸຂານາໄມພືດ ແລະ ບົດບັນທຶກຜົນຂອງການກວດກາ, ການເກັບຕົວຢ່າງ ແລະ ການທົດສອບ ລວມທັງເອກະສານ ກ່ຽວກັບ ການວິໄຈຄວາມສ່ຽງສັດຕູພືດ;
ບັນຊີຜູ້ນໍາເຂົ້າ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ຂອງ ສປປ ລາວ ;
ບົດບັນທຶກ ກ່ຽວກັບ ການປະຕິບັດດ້ານສຸຂານາໄມພືດ;
ການລະເມີດຂໍ້ກຳນົດເງື່ອນໄຂດ້ານສຸຂານາໄມພືດ ແລະ ກໍລະນີອື່ນ;
ສະຫຼຸບ ແລະ ສັງລວມສິ່ງທີ່ໄດ້ເກີດຂື້ນ ແລະ ມາດຕະການສຸຂານາໄມພືດທີ່ນຳໃຊ້ໂດຍຜູ້ນຳເຂົ້າເພື່ອປ້ອງກັນຄວາມສ່ຽງສັດຕູພືດ;
ວັນ, ເດືອນ, ປີ ແລະ ວິທີການຂົນສົ່ງຊຸດສິນຄ້າ ລວມທັງເສັ້ນທາງຂົນສົ່ງຂອງຊຸດສິນຄ້ານຳເຂົ້າ;
ຂໍ້ມູນດ້ານສຸຂານາໄມພືດອື່ນທີ່ກ່ຽວຂ້ອງ.
, ຕ້ອງເກັບກໍາ ແລະ ບັນທຶກຂໍ້ມູນ ກ່ຽວກັບ ຊຸດສິນຄ້າທີ່ນໍາເຂົ້າ ເພື່ອເປັນບ່ອນອີງໃນການຈັດການລະບົບການຄຸ້ມຄອງການນຳເຂົ້າ ດັ່ງນີ້:

ເປົ້າໝາຍການນຳໃຊ້;
ການກັກ, ແຍກປ່ຽວ ພາຍຫຼັງການນຳເຂົ້າ ຫຼື ວິທີການບຳບັດ;
ການກວດກາ ແລະ ຕິດຕາມສັດຕູພືດທີ່ຈຳເປັນ ຕາມຄວາມສ່ຽງສັດຕູພືດ.

ໝວດ 6

ສິດ ແລະ ພັນທະ ຂອງ ຜູ້ນຳເຂົ້າ ແລະ ສົ່ງຜ່ານ

ມາດຕາ 36 ສິດ ຂອງ ຜູ້ນຳເຂົ້າ ແລະ ສົ່ງຜ່ານ

ນອກຈາກ ສິດ ແລະ ພັນທະ ທີ່ກຳນົດໄວ້ໃນມາດຕາ 57 ຂອງກົດໝາຍວ່າດ້ວຍການປ້ອງກັນ ແລະ ກັກກັນພືດ (ສະບັບປັບປຸງ) ແລ້ວ, ຜູ້ນຳເຂົ້າ ແລະ ສົ່ງຜ່ານ ຍັງມີສິດ ດັ່ງນີ້:

ດຳເນີນທຸລະກິດຂອງຕົນ ກ່ຽວກັບ ການນຳເຂົ້າ ແລະ ສົ່ງຜ່ານ ໃຫ້ຖືກ ຕ້ອງຕາມການອະນຸຍາດ, ມາດຕະຖານເຕັກນິກ, ກົດໝາຍ ແລະ ລະບຽບການ ຢ່າງເຂັ້ມງວດ;
ໄດ້ຮັບຂໍ້ມູນ ກ່ຽວກັບ ມາດຕະການດ້ານສຸຂານາໄມພືດທີ່ເປັນຂໍ້ບັງຄັບ ຊຶ່ງກຳນົດໂດຍອົງການຄຸ້ມຄອງວຽກງານ ປ້ອງກັນ ແລະ ກັກກັນພືດ;
ຂໍຂໍ້ມູນການກວດກາ ຈາກເຈົ້າໜ້າທີ່ກັກກັນພືດປະຈຳດ່ານກັກກັນພືດ;
ປ້ອງກັນບໍ່ໃຫ້ຜູ້ອື່ນ ເປີດເຜີຍ, ຄອບຄອງ ຫຼື ນຳໃຊ້ຂໍ້ມູນຄວາມລັບທາງກ້ານຄ້າຂອງຕົນ;
ຮ້ອງທຸກ ຕໍ່ອົງການທີ່ກ່ຽວຂ້ອງ ກ່ຽວກັບ ການລະເມີດກົດໝາຍ ແລະ ລະບຽບການ ຂອງພະນັກງານ ແລະ ເຈົ້າໜ້າທີ່ກັກກັນພືດ.

ມາດຕາ 37 ພັນທະ ຂອງຜູ່ນຳເຂົ້າ ແລະ ສົ່ງຜ່ານ

ນອກຈາກ ສິດ ແລະ ພັນທະ ທີ່ກຳນົດໄວ້ໃນມາດຕາ 57 ຂອງກົດໝາຍວ່າດ້ວຍການປ້ອງກັນ ແລະ ກັກກັນພືດ (ສະບັບປັບປຸງ) ແລ້ວ, ຜູ້ນຳເຂົ້າ ແລະ ສົ່ງຜ່ານ ຍັງມີ ພັນທະ ດັ່ງນີ້:

ແຈ້ງໃຫ້ກົມປູກຝັງຊາບ ກ່ຽວກັບ ວັນ, ເດືອນ, ປີ ທີ່ນຳເຂົ້າຊຸດສິນຄ້າ;
ເປັນເຈົ້າການ ກັກກັນ, ຄວບຄຸມ ແລະ ກຳຈັດສັດຕູພືດ, ຂ້າເຊື້ອພະຍາດພືດ ພ້ອມທັງນຳໃຊ້ທຸກວິທີການເພື່ອສະກັດກັ້ນ ແລະ ແກ້ໄຂປະກົດການ ທີ່ເປັນສາເຫດໃຫ້ເກີດການແຜ່ລະບາດຂອງສັດຕູພືດ ໃນລະຫວ່າງ ການນຳເຂົ້າ ຫຼື ສົ່ງຜ່ານພືດ;
ບໍ່ປ່ອຍ ຫຼື ປົນຊຸດສິນຄ້າ ໃນໄລຍະເວລາການກັກກັນພາຍຫຼັງການນຳເຂົ້າ, ຍົກເວັ້ນມີການອະນຸຍາດຢ່າງເປັນລາຍລັກສອນ ຈາກກົມປູກຝັງ;
ໃຫ້ຄວາມຮ່ວມມືແກ່ກົມປູກຝັງ ແລະ ພະແນກກະສິກຳ ແລະ ປ່າໄມ້ ແຂວງ, ນະຄອນຫຼວງ ຫຼື ດ່ານກັກກັນພືດ ເຂົ້າເຖິງສະຖານທີ່ກັກແຍກປ່ຽວໄດ້ ຫຼື ປະຕິບັດ ຕາມບົດແນະນຳຂອງກົມປູກຝັງ ກ່ຽວກັບ ສະຖະຖານທີ່ກັກກັນດັ່ງກ່າວ ຫຼື ນຳໃຊ້ມາດຕະການສຸຂານາໄມພືດ ຕໍ່ຊຸດສິນຄ້າທີ່ນເຂົ້ານັ້ນ;
ເກັບຮັກສາຊຸດກວດກາທີ່ກຳນົດລາຍການໄວ້ເພື່ອຊ່ວຍໃນການກວດກາ ແລະ ຮັບປະກັນການປ້ອງກັນພືດທີ່ເໝາະສົມ ແລະ ບັນທືກຂໍ້ມູນໃນສວນກ້າ;
ຮັບຜິດຊອບຄ່າໃຊ້ຈ່າຍທັງໝົດ ກ່ຽວກັບ ການກວດກາຫຼັງການນຳເຂົ້າ.

ໝວດທີ 7

ຂໍ້ຫ້າມ

ມາດຕາ 37 ຂໍ້ຫ້າມທົ່ວໄປ

ຫ້າມ ບຸກຄົນ, ນິຕິບຸກຄົນ ແລະ ການຈັດຕັ້ງ ມີພຶດຕິກຳ ດັ່ງນີ້:

ນຳເອົາພືດ, ຜະລິດຕະພັນພືດ ແລະ ວັດຸຖຸຕ້ອງຄວບຄຸມ ທີ່ເປັນອັນຕະລາຍ ຕໍ່ ພືດ, ຄົນ, ສັດ ແລະ ສິ່ງແວດລ້ອມ ເຂົ້າ ແລະ ສົ່ງຜ່ານ ສປປ ລາວ;
ນຳເຂົ້າ, ສົ່ງຜ່ານ ແລະ ເຄື່ອນຍ້າຍ ພືດ, ຜະລິດຕະພັນພືດ ແລະ ວັດຸຖຸຕ້ອງຄວບຄຸມ ໂດຍບໍ່ໄດ້ຮັບອະນຸຍາດ ຈາກອົງການຄຸ້ມຄອງວຽກງງານປ້ອງກັນ ແລະ ກັກກັນພືດ;
ນຳເຂົ້າ, ສົ່ງຜ່ານ, ຂະຫຍາຍ ຫຼື ມີໄວ້ໃນຄອບຄອງ ສັດຕູພືດຄວບຄຸມ ໂດຍບໍ່ໄດ້ຮັບອະນຸຍາດ;
ດຳເນີນທຸລະກິດ ນຳເຂົ້າ ຫຼື ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ໂດຍບໍ່ໄດ້ຮັບອະນຸຍາດ;
ອອກໃບອະນຸຍາດນຳເຂົ້າ ຫຼື ສົ່ງຜ່ານ ໂດຍບໍ່ໄດ້ຮັບມອບໝາຍ;
ໃຫ້ສິນບົນ, ໃຫ້ຂໍ້ມູນທີ່ບໍ່ຖືກຕ້ອງ ຕໍ່ພະນັກງານ ແລະ ເຈົ້າໜ້າທີ່ກັກກັນພືດ, ປອມແປງເອກະສານ ແລະ ປະທັບຕາ ກ່ຽວກັບ ການປ້ອງກັນ ແລະ ກັກກັນພືດ;
ນາບຂູ່, ກົດໜ່ວງຖ່ວງດຶງ ແລະ ຂັດຂວາງການປະຕິບັດໜ້າທີ່ ຂອງພະນັກງານ ແລະ ເຈົ້າໜ້າທີ່ກັກກັນພືດ;
ໂຄສະນາ ກ່ຽວກັບ ວຽກງານນຳເຂົ້າ ຫຼື ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ເກີນຄວາມເປັນຈິງ;
ຫຼຸດ ຫຼື ເພີ່ມ ປະລິມານຊຸດສິນຄ້າ ຫຼື ປ່ຽນແປງປະພດສິນຄ້າ ພາຍຫຼັງການຢັ້ງຢືນສຸຂານາໄມພືດໄດ້ຮັບອະນຸຍາດ ໃຫ້ນຳເຂົ້າ ຫຼື ສົ່ງຜ່ານ;
ມີພຶດຕິກຳອື່ນ ທີ່ເປັນການລະເມີດກົດໝາຍ ແລະ ລະບຽບການ.

ມາດຕາ 39 ຂໍ້ຫ້າມສຳລັບພະນັກງານ ແລະ ເຈົ້າໜ້າທີ່ກັກກັນພືດ

ນອກຈາກຂໍ້ຫ້າມທົ່ວໄປ ທີ່ກຳນົດໄວ້ໃນມາດຕາ 38 ຂອງຂໍ້ຕົກລົງສະບັບນີ້ ຫ້າມ ພະນັກງານ ແລະ ເຈົ້າໜ້າທີ່ກັກກັນພືດ ມີພຶດຕິກຳ ດັ່ງນີ້:

ສວຍໃຊ້ ສິດ, ໜ້າທີ່ ແລະ ຕຳແໜ່ງ, ຮັບສິນບົນ, ສ້າງຄວາມເສຍຫາຍໃຫ້ແກ່ຜົນປະໂຫຍດ ຂອງລັດ, ລວມໝູ່ ຫຼື ບຸກຄົນ;
ເປີດເຜີຍຄວາມລັບ ຂອງ ລັດ ຫຼື ທາງລັດຖະການ ລວມທັງຂໍ້ມູນຂອງຜູ້ປະກອບການ;
ປອມແປງເອກະສານ ຫຼື ເອກະສານບໍ່ຖືກຕ້ອງ ຕາມລະບຽບການ;
ອອກໃບຢັ້ງຢືນສຸຂານາໄມພືດ ພາຍຫຼັງສົ່ງອອກສິນຄ້າ;
ຂາດຄວາມຮັບຜິດຊອບ ຫຼື ປະຕິບັດໜ້າທີ່ດ້ວຍຄວາມປະໝາດທີ່ກໍ່ໃຫ້ເກີດຄວາມເສຍຫາຍ;
ເມີນເສີຍຕໍ່ລະບຽບການ, ຫຼັກການໃນການກວດກາ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ, ແກ້ໄຂວຽກງານ ໂດຍບໍ່ຖືກຕ້ອງຕາມມາດຕະການເຕັກນິກ;
ເພີ່ມ ຫຼື ຫຼຸດ ອັດຕາຄ່າທຳນຽມ, ຄ່າບໍລິການວິຊາການ ຫຼື ນຳໃຊ້ລາຍຮັບດັ່ງກ່າວ;
ພົວພັນ ດ້ານການເງິນ, ສ່ວນຕົວ ແລະ ຜົນປະໂຫຍດ ໃນການຂຶ້ນທະບຽນສະຖານທີ່ປະກອບການຜະລິດ, ອອກໃບຢັ້ງຢືນສຸຂານາໄມພືດ ສຳລັບສົ່ງອອກ ຫຼື ໃບຢັ້ງຢືນສຸຂານາໄມພືດ ສຳລັບສົ່ງອອກຕໍ່;
ມີພຶດຕິກຳອື່ນ ທີ່ເປັນການລະເມີດກົດໝາຍ ແລະ ລະບຽບການ.

ໝວດທີ 8

ການຄຸ້ມຄອງການນຳເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ

ມາດຕາ 40 ການຄຸ້ມຄອງການນຳເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ

ກະຊວງກະສິກຳ ແລະ ປ່າໄມ້ ຄຸ້ມຄອງການນຳເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ຢ່າງລວມສູນ ແລະ ເປັນເອກະພາບ ໃນຂອບເຂດທົ່ວປະເທດ ໂດຍມອບໃຫ້ກົມປູກຝັງ ເປັນເຈົ້າການຮັບຜິດຊອບໂດຍກົງ ແລະ ປະສານສົມທົບກັບພາກສ່ວນກ່ຽວຂ້ອງ ເປັນຕົ້ນ ຂະແໜງການອຸດສາຫະກຳ ແລະ ການຄ້າ, ສາທາລະນະສຸກ, ການເງິນ, ປ້ອງກັນຄວາມສະຫງົບ ແລະ ອົງການປົກຄອງທ້ອງຖິ່ນທີ່ກ່ຽວຂ້ອງ.

ອົງການຄຸ້ມຄອງການນຳເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ແມ່ນອົງການດຽວກັນກັບອົງການຄຸ້ມຄອງວຽກງານປ້ອງກັນພືດ ແລະ ກັກກັນພືດ ຕາມທີ່ກຳນົດໄວ້ໃນມາດຕາ 67 ຂອງກົດໝາຍວ່າດ້ວຍການປ້ອງກັນ ແລະ ກັກກັນພືດ (ສະບັບປັບປຸງ) ຊຶ່ງປະກອບດ້ວຍ:

ກະຊວງກະສິກຳ ແລະ ປ່າໄມ້ ໂດຍແມ່ນ ກົມປູກຝັງ ເປັນເສນາທິການ;
ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ ໂດຍແມ່ນ ຂະແໜງປູກຝັງ ເປັນເສນາທິການ;
ດ່ານກັກກັນພືດສາກົນ,

ມາດຕາ 41 ສິດ ແລະ ໜ້າທີ່ ຂອງ ກົມປູກຝັງ

ໃນການຄຸ້ມຄອງການນຳເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມກົມປູກຝັງ, ກະຊວງກະສິກຳ ແລະ ປ່າໄມ້ ມີ ສິດ ແລະ ໜ້າທີ່ຕົ້ນຕໍ ດັ່ງນີ້:

ສ້າງຄູ່ມື ແລະ ບົດແນະນຳ ໃນການຈັດຕັ້ງປະຕິບັດລະບົບຄຸ້ມຄອງການນຳເຂົ້າ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ໃຫ້ມີຄວາມເອກະພາບ ແລະ ສອດຄ່ອງໃນຂອບເຂດທົ່ວປະເທດ;
ໂຄສະນາເຜີຍແຜ່ຂໍ້ມູນ ຂ່າວສານ ກ່ຽວກັບ ເງື່ອນໄຂ ແລະ ລະບຽບການ ນຳເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ດ້ວຍຫຼາຍຮູບການ ເປັນຕົ້ນ ຈົດໝາຍເຫດທາງລັດຖະການ, ເວັບໄຊຂອງກົມປູກຝັງ, ວິທະຍຸ, ໜັງສືພິມ, ຕິດປະກາດຢູ່ດ່ານນຳເຂົ້າ, ປ່ອງເອກະສານຂາອອກ-ຂາເຂົ້າ ຂອງກົມປູກຝັງ, ສະຖານທີ່ສາທາລະນະອື່ນ ທີ່ກ່ຽວຂ້ອງ;
ດຳເນີນການວິໄຈຄວາມສ່ຽງສັດຕູພືດ ຫຼື ຮັບຮອງເອົາ ເງື່ອນໄຂດ້ານສຸຂານາໄມພືດ ສໍາລັບການນຳເຂົ້າທີ່ເຫັນວ່າເທົ່າທຽມກັບປະເທດຄູ່ຄ້າ ຫຼື ພາກພື້ນ, ສ້າງບັນຊີສັດຕູພືດກັກກັນ, ບັນຊີສັດຕູພືດຄວບຄຸມ, ບັນຊີພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ທີ່ຕ້ອງຂໍອະນຸຍາດນຳເຂົ້າ;
ດຳເນີນການກວດກາກ່ອນການນຳເຂົ້າຢູ່ປະເທດແຫຼ່ງກຳເນີດ;
ອອກ,ໂຈະ ຫຼື ຍົກເລີກການອະນຸຍາດນໍາເຂົ້າ ແລະ ສົ່ງຜ່ານ, ສະຖານທີ່ກັກກັນພາຍຫຼັງນຳເຂົ້າ;
ຄົ້ນຄວ້າ ແລະ ມອບໝາຍສິດໃຫ້ ພະແນກກະສິກໍາ ແລະ ປ່າໄມ້ ແຂວງ, ນະຄອນຫຼວງ ທີ່ມີເງື່ອນໄຂໃນການອອກໃບອະນຸຍາດນໍາເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຄວບຄຸມ ທີ່ບໍ່ນອນຢູ່ໃນບັນຊີທີ່ຕ້ອງຂໍອະນຸຍາດນໍາເຂົ້າ ແລະ ກໍານົດດ່ານນໍາເຂົ້າສະເພາະ;
ນຳໃຊ້ມາດຕະການສຸຂານາໄມພືດ ຕໍ່ກັບຊຸດສິນຄ້າ ແລະ ຜູ້ລະເມີດຂໍ້ກຳນົດເງື່ອນໄຂດ້ານສຸຂານາໄມພືດ ຂອງ ສປປ ລາວ ຫຼື ການປະຕິບັດດ້ານສຸຂານາໄມພືດແບບສຸກເສີນ ລວມທັງການບຳບັດຊຸດສິນຄ້າ, ການສົ່ງກັບຄືນປະເທດສົ່ງອອກ ຫຼື ການທໍາລາຍຖີ້ມ ຕາມຫຼັກວິຊາການ;
ແຈ້ງ ແລະ ປະສານສົມທົບສອງຝ່າຍ ກັບ ເລຂາທິການສົນທິສັນຍາປ້ອງກັນພືດສາກົນ (IPPC), ອົງການປ້ອງກັນພືດແຫ່ງຊາດ (NPPO) ຂອງປະເທດສົ່ງອອກ, ອົງການປ້ອງກັນພືດພາກພື້ນ ໃນກໍລະນີ ທີ່ຕ້ອງໄດ້ປະຕິບັດມາດຕະການສຸຂານາໄມພືດ ແລະ ແຈ້ງກໍລະນີທີ່ບໍ່ສອດຄ່ອງໃຫ້ປະເທດຄູ່ຄ້າຊາບ;
ຝຶກອົບຮົມ ແລະ ສ້າງຄວາມເຂັ້ມແຂງ ໃຫ້ແກ່ບຸກຄະລາກອນ ຜູ້ທີ່ຮັບຜິດຊອບຄຸ້ມຄອງການນໍາເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ;
ຊີ້ນຳ, ຕິດຕາມ ແລະ ປະເມີນຜົນ ການຈັດຕັ້ງປະຕິບັດວຽກງານການນໍາເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ໃນຂອບເຂດທົ່ວປະເທດ;
ແຈ້ງໃຫ້ປະເທດພາຄີຂອງສົນທິສັນຍາປ້ອງກັນພືດສາກົນ (IPPC) ກ່ຽວກັບ ກໍລະນີມີການລະເມີດຂໍ້ກຳນົດເງື່ອນໄຂດ້ານສຸຂານາໄມພືດ ໃນການນຳເຂົ້າ, ກວດກາພົບສັດຕູພືດກັກກັັນ ຫຼື ສັດຕຸພືດ ທີ່ບໍ່ຕ້ອງກັກກັນແຕ່ຕ້ອງຄວບຄຸມ ແລະ ການປະຕິບັດ ມາດຕະການສຸຂານາໄມພືດສຸກເສີນ;
ສະຫຼຸບ ແລະ ລາຍງານ ການຈັດຕັ້ງປະຕິບັດວຽກງານການນໍາເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ໃຫ້ການນຳກະຊວງກະສິກຳ ແລະ ປ່າໄມ້ ຢ່າງເປັນລະບົບ ແລະ ຕໍ່ເນື່ອງ.
ນໍາໃຊ້ສິດ ແລະ ປະຕິບັດຕາມໜ້າທີ່ອື່ນ ຕາມກົດໝາຍ ແລະ ລະບຽບການ.

ມາດຕາ 42 ສິດ ແລະ ໜ້າທີ່ ຂອງ ພະແນກກະສິກຳ ແລະ ປ່າໄມ້ ແຂວງ, ນະຄອນຫຼວງ

ໃນການຄຸ້ມຄອງການນຳເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ພະແນກກະສິກຳ ແລະ ປ່າໄມ້ ແຂວງ, ນະຄອນຫຼວງ ມີສິດ ແລະ ໜ້າທີ່ ຕົ້ນຕໍ ດັ່ງນີ້:

ໂຄສະນາເຜີຍແຜ່ຂໍ້ມູນຂ່າວສານ ກ່ຽວກັບ ເງື່ອນໄຂ ແລະ ລະບຽບນຳເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ດ້ວຍຫຼາຍຮູບການ ເປັນຕົ້ນ ວິທະຍຸ, ໜັງສືພິມ, ຕິດປະກາດຢູ່ດ່ານນຳເຂົ້າ, ປ່ອງເອກະສານຂາອອກ-ຂາເຂົ້າ ພະແນກກະສິກຳ ແລະ ປ່າໄມ້, ສະຖານທີ່ສາທາລະນະອື່ນທີ່ກ່ຽວຂ້ອງ;
ອອກ, ໂຈະ ຫຼື ຍົກເລີກໃບອະນຸຍາດນຳເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ທີ່ບໍ່ນອນໃນບັນຊີທີ່ຕ້ອງຂໍອະນຸຍາດນຳເຂົ້າ ຕາມການມອບໝາຍຂອງກົມປູກຝັງ;
ແຈ້ງ ແລະ ລາຍງານ ໃຫ້ກົມປູກຝັງຊາບທັນທີ ກ່ຽວກັບ ການກວດພົບຄວາມບໍ່ຖືກຕ້ອງ ແລະ ບໍ່ສອດຄ່ອງ;
ປະສານສົມທົບກັບພະແນກການ ແລະ ພາກສ່ວນອື່ນທີ່ກ່ຽວຂ້ອງ ຂອງແຂວງ, ນະຄອນຫຼວງ ໃນການຈັດຕັ້ງປະຕິບັດວຽກງານຄຸ້ມຄອງການນຳເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ;
ຝຶກອົບຮົມ ແລະ ສ້າງຄວາມເຂັ້ມແຂງໃຫ້ແກ່ບຸກຄະລາກອນ ຜູ້ທີ່ຮັບຜິດຊອບຄຸ້ມຄອງການນໍາເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ;
ມອບສຳເນົາບົດລາຍງານການກວດກາ ແລະ ລາຍງານເປັນແຕ່ລະໄລຍະ ໃຫ້ກົມປູກຝັງ;
ນໍາໃຊ້ສິດ ແລະ ປະຕິບັດຕາມໜ້າທີ່ອື່ນ ຕາມກົດໝາຍ ແລະ ລະບຽບການ;

ມາດຕາ 43 ສິດ ແລະ ໜ້າທີ່ ຂອງ ດ່ານກັກກັນພືດ

ໃນການຄຸ້ມຄອງການນຳເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ດ່ານກັກກັນພືດ ທີ່ໄດ້ຮັບມອບໝາຍຈາກກົມປູກຝັງ ຫຼື ອົງການປ້ອງກັນພືດແຫ່ງຊາດ ຂອງ ສປປ ລາວ ມີສິດ ແລະ ໜ້າທີ່ ຕາມຂອບເຂດຄວາມຮັບຜິດຊອບ ດັ່ງນີ້:

ແຈ້ງ ແລະ ລາຍງານ ໃຫ້ພະແນກກະສິກຳ ແລະ ປ່າໄມ້ ແລະ ກົມປູກຝັງຊາບທັນທີ ກ່ຽວ ກັບການກວດພົບຄວາມບໍ່ຖືກຕ້ອງ ແລະ ບໍ່ສອດຄ່ອງ;
ດຳເນີນການສຳຫຼວດ ແລະ ກວດກາສັດຕູພືດ ໃນເວລາການນຳເຂົ້າ ພືດ, ຜະລິດຕະພັນພືດ ແລະ ວັດຖຸຄວບຄຸມ;
ກັກ, ແຍກປ່ຽວ, ສົ່ງຕົວຢ່າງໄປວິໄຈ, ບຳບັດ, ປະຕິເສດການນຳເຂົ້າ, ສົ່ງກັບຄືນ, ທຳລາຍ ຫຼື ນຳໃຊ້ມາດຕະການອື່ນຕໍ່ ພືດ, ຜະລິດຕະພັນພືດ ຫຼື ວັດຖຸຕ້ອງຄວບຄຸມ ທີ່ມີສັດຕູພືດຄວບຄຸມ;
ນຳໃຊ້ມາດຕະການສຸຂານາໄມພືດຕໍ່ຊຸດສິນຄ້າ ແລະ ຜູ້ລະເມີດເງື່ອນໄຂດ້ານສຸຂານາໄມພືດ ຂອງ ສປປ ລາວ ຫຼື ການປະຕິບັດມາດຕະການສຸຂານາໄມພືດແບບສຸກເສີນ ລວມທັງການບຳບັດວັດຖຸຕ້ອງຄວບຄຸມ, ການສົ່ງກັບຄືນປະເທດສົ່ງອອກ ຫຼື ທຳລາຍຖິ້ມ;
ມອບສຳເນົາບົດລາຍງານການກວດກາ ແລະ ລາຍງານເປັນແຕ່ລະໄລຍະ;
ນໍາໃຊ້ສິດ ແລະ ປະຕິບັດຕາມໜ້າທີ່ອື່ນ ຕາມກົດໝາຍ ແລະ ລະບຽບການ;

ໝວດທີ 9

ບົດບັນຍັດສຸດທ້າຍ

ມາດຕາ 44 ການເກັບຄ່າທໍານຽມ ແລະ ຄ່າບໍລິການ

ກົມປູກຝັງ, ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ ແລະ ດ່ານກັກກັນພືດ ຕ້ອງເກັບຄ່າທໍານຽມ ແລະ ຄ່າບໍລິການ ສໍາລັບການກວດກາ, ເກັບຕົວຢ່າງ, ການວິໄຈ, ການບໍາບັດ ແລະ ການອອກໃບອະນຸຍາດນໍາເຂົ້າ, ໃບອະນຸຍາດສົ່ງຜ່ານ ລວມທັງ ຄ່າທຳນຽມ ແລະ ຄ່າບໍລິການອື່ນ ກ່ຽວກັບ ການນຳເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ຕາມທີ່ກຳນົດໄວ້ໃນ ລັດຖະບັນຍັດຂອງປະທານປະເທດ ວ່າດ້ວຍຄ່າທຳນຽມ ແລະ ຄ່າບໍລິການ ທີ່ປະກາດໃຊ້ໃນແຕ່ລະໄລຍະ.

ມາດຕາ 45 ການຈັດຕັ້ງປະຕິບັດ

ກົມປູກຝັງ ແລະ ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ ແລະ ດ່ານກັກກັນພືດ ເປັນເຈົ້າການໃນການຈັດຕັ້ງປະຕິບັດຂໍ້ຕົກລົງສະບັບນີ້ ໂດຍປະສານສົມທົບກັບຂະແໜງການ ແລະ ອົງການອື່ນທີ່ກ່ຽວຂ້ອງ ເພື່ອຈັດຕັ້ງປະຕິບັດ ໃຫ້ມີປະສິດທິຜົນ.

ມາດຕາ 46 ຜົນສັກສິດ

ຂໍ້ຕົກລົງສະບັບນີ້ ມີຜົນສັກສິດ ນັບແຕ່ວັນລົງລາຍເຊັນ ແລະ ພາຍຫຼັງໄດ້ລົງເຜີຍແຜ່ໃນຈົດໝາຍເຫດທາງລັດຖະການ ສິບຫ້າ ວັນ.

ເຊັນແທນ ລັດຖະມົນຕີກະຊວງກະສິກຳ ແລະ ປ່າໄມ້

ບຸນຂວາງ ຄຳບຸນເຮືອງ

#	ຫົວຂໍ້	ດາວໂຫຼດ
1	Decision on the Phytosanitary Measures for Import and Transit of plants, plant product, and control materials No. 2985/MAF, dated 28 June 2019	PDF
2	ຂໍ້ຕົກລົງ ວ່າດ້ວຍ ມາດຕະການສຸຂານາໄມພືດ ສຳລັບການນຳເຂົ້າ ແລະ ສົ່ງຜ່ານພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ເລກທີ 2985/ກປ, ລົງວັນທີ 28 ມິຖຸນາ 2019	PDF

ມາດຕະການ / ມາດຕະຖານ

#	ຊື່	ປະເພດ	ອົງກອນ	ລາຍລະອຽດ	ກົດໝາຍ	ສຶ້ນສຸດ	ໃຊ້ກັບ
1	ການນຳເຂົ້າພຶດ, ຜະລິດຕະພັນພືດ ຫຼື ວັດຖຸຄວບຄຸມຕ້ອງຜ່ານຈຸດກວດກາສະເພາະ	ທົ່ວໄປ	ກະຊວງ ກະສິກຳ ແລະ ປ່າໄມ້	ການນຳເຂົ້າພຶດ, ຜະລິດຕະພັນພືດ ຫຼື ວັດຖຸຄວບຄຸມ ທຸກຄັ້ງຕ້ອງຜ່ານຈຸດກວດກາ ທີ່ໄດ້ຮັບອານຸຍາດຈາກ ກະຊວງກະສິກຳ ແລະ ປ່າໄມ້	ກົດໝາຍ ວ່າດ້ວຍ ການປ້ອງກັນ ແລະ ການກັກກັນພືດ (ສະບັບປັບປຸງ) ເລກທີ 13/ສພຊ, ລົງວັນທີ 15 ພະຈິກ 2016 ຂໍ້ຕົກລົງ ວ່າດ້ວຍ ມາດຕະການສຸຂານາໄມພືດ ສຳລັບການນຳເຂົ້າ ແລະ ສົ່ງຜ່ານພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ເລກທີ 2985/ກປ, ລົງວັນທີ 28 ມິຖຸນາ 2019	9999-12-31	ALL
2	ຮຽກຮ້ອງໃຫ້ກວດກາພືດ, ຜະລິດຕະພັນພືດ ຫຼື ວັດຖຸຕ້ອງຄວບຄຸມຢູ່ເບື້ອງນຳເຂົ້າ	ຮຽກຮ້ອງໃຫ້ມີການກວດກາ	ກະຊວງ ກະສິກຳ ແລະ ປ່າໄມ້	ການນຳເຂົ້າພືດທຸກປະເພດ ຕ້ອງໄດ້ຮັບການກວດກາຈາກ ເຈົ້າໜ້າທີປ້ອງກັນພືດ ຢູ່ດ່ານກວດກາ.	ກົດໝາຍ ວ່າດ້ວຍ ການປ້ອງກັນ ແລະ ການກັກກັນພືດ (ສະບັບປັບປຸງ) ເລກທີ 13/ສພຊ, ລົງວັນທີ 15 ພະຈິກ 2016 ຂໍ້ຕົກລົງ ວ່າດ້ວຍ ມາດຕະການສຸຂານາໄມພືດ ສຳລັບການນຳເຂົ້າ ແລະ ສົ່ງຜ່ານພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ເລກທີ 2985/ກປ, ລົງວັນທີ 28 ມິຖຸນາ 2019	9999-12-31	ALL
3	ຕ້ອງໄດ້ຮັບອະນຸຍາດນຳເຂົ້າ - ພືດ, ຜະລິດຕະພັນພືດ ຫຼື ວັດຖຸຕ້ອງຄວບຄຸມຢູ່	ຕ້ອງໄດ້ຮັບອະນຸມັດ	ກະຊວງ ກະສິກຳ ແລະ ປ່າໄມ້	ການນຳເຂົ້າພືດ, ຜະລິດຕະພັນພືດ ຫຼື ວັດຖຸຕ້ອງຄວບຄຸມຢູ່ ຕ້ອງໄດ້ຮັບອະນຸຍາດນຳເຂົ້າຈາກກົມປູກຝັງ, ກະຊວງກະສິກໍາ ແລະ ປ່າໄມ້	ກົດໝາຍ ວ່າດ້ວຍ ການປ້ອງກັນ ແລະ ການກັກກັນພືດ (ສະບັບປັບປຸງ) ເລກທີ 13/ສພຊ, ລົງວັນທີ 15 ພະຈິກ 2016 ຂໍ້ຕົກລົງ ວ່າດ້ວຍ ມາດຕະການສຸຂານາໄມພືດ ສຳລັບການນຳເຂົ້າ ແລະ ສົ່ງຜ່ານພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ເລກທີ 2985/ກປ, ລົງວັນທີ 28 ມິຖຸນາ 2019 ບົດແນະນໍາ ກ່ຽວກັບ ການນໍາເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ, ເລກທີ 2881/ກປຝ, ລົງວັນທີ 11 ທັນວາ 2019.	9999-12-31	ALL
4	ຕ້ອງຕິດສະຫຼາກພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມນໍາເຂົ້າ	SPS	ກະຊວງ ກະສິກຳ ແລະ ປ່າໄມ້	ພືດ ແລະ ຜະລິດຕະພັນພືດນໍາເຂົ້າຜ່ານທາງໄປສະນີ ຫຼື ຂົນສົ່ງທາງອາກາດຕ້ອງໄດ້ຕິດສະຫຼາກຕາມບົດແນະນໍາຂອງກະຊວງກະສິກໍາ ແລະ ປ່າໄມ້	ຂໍ້ຕົກລົງ ວ່າດ້ວຍ ມາດຕະການສຸຂານາໄມພືດ ສຳລັບການນຳເຂົ້າ ແລະ ສົ່ງຜ່ານພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ເລກທີ 2985/ກປ, ລົງວັນທີ 28 ມິຖຸນາ 2019	9999-12-31	ALL
5	ຮຽກຮ້ອງໃຫ້ມີການກວດກາ - ໝາກໄມ້ນໍາເຂົ້າ	ຮຽກຮ້ອງໃຫ້ມີການກວດກາ	ກະຊວງ ກະສິກຳ ແລະ ປ່າໄມ້	ໝາກໄມ້ສົດນໍາເຂົ້າ ຕ້ອງໄດ້ຮັບການກວດກາ ໂດຍສອດຄ່ອງຕາມມາດຕະຖານຄວາມປອດໄພຂອງອາຫານ	ຂໍ້ຕົກລົງ ວ່າດ້ວຍ ມາດຕະການສຸຂານາໄມພືດ ສຳລັບການນຳເຂົ້າ ແລະ ສົ່ງຜ່ານພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ເລກທີ 2985/ກປ, ລົງວັນທີ 28 ມິຖຸນາ 2019 ບົດແນະນໍາ ກ່ຽວກັບ ການນໍາເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ, ເລກທີ 2881/ກປຝ, ລົງວັນທີ 11 ທັນວາ 2019.	9999-12-31	ALL
6	ຮຽກຮ້ອງໃຫ້ມີການກວດກາ - ຜັກນໍາເຂົ້າ	ຮຽກຮ້ອງໃຫ້ມີການກວດກາ	ກະຊວງ ກະສິກຳ ແລະ ປ່າໄມ້	ພືດຜັກນໍາເຂົ້າ ຕ້ອງໄດ້ຮັບການກວດກາ ໂດຍສອດຄ່ອງຕາມມາດຕະຖານຄວາມປອດໄພຂອງອາຫານ	ຂໍ້ຕົກລົງ ວ່າດ້ວຍ ມາດຕະການສຸຂານາໄມພືດ ສຳລັບການນຳເຂົ້າ ແລະ ສົ່ງຜ່ານພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ ເລກທີ 2985/ກປ, ລົງວັນທີ 28 ມິຖຸນາ 2019 ບົດແນະນໍາ ກ່ຽວກັບ ການນໍາເຂົ້າ ແລະ ສົ່ງຜ່ານ ພືດ, ຜະລິດຕະພັນພືດ ແລະ ວັດຖຸຕ້ອງຄວບຄຸມ, ເລກທີ 2881/ກປຝ, ລົງວັນທີ 11 ທັນວາ 2019.	9999-12-31	ALL

ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.

ຂໍ້​ຕົກ­ລົງ

Your opinion matters!

ຂອບໃຈ ສຳລັບຄຳຄິດເຫັນຂອງທ່ານ.

ຂໍ້ຕົກລົງ