ການຜະລິດສິນຄ້າກະສິກໍາ ເພື່ອສົ່ງອອກ ເປັນຂະແໜງໜຶ່ງທີ່ລັດຖະບານລາວ ໄດ້ຊຸກຍູ້ສົ່ງເສີມໃຫ້ເປັນບູລິມະສິດ ໂດຍອໍານວຍຄວາມສະດວກທາງດ້ານທຶນດອກເບ້ຍຕໍ່າ, ຍົກເວັ້ນພາສີອາກອນໄລຍະຍາວ ແລະ ສ້າງເງື່ອນໄຂສະດວກໃນການດໍາເນີນການຜະລິດ ເຊິ່ງໄດ້ຮັບຄວາມສົນໃຈຈາກນັກລົງທຶນທັງພາຍໃນ ແລະ ຕ່າງປະເທດ ໃນການພັດທະນາຂົງເຂດກະສິກໍາ ໂດຍສະເພາະ ແມ່ນການລ້ງງສັດ (ງົວ ແລະ ຄວາຍ) ເຊິ່ງມີປະເທດເພື່ອນບ້ານເປັນຕະຫຼາດຮັບຮອງການນໍາເຂົ້າງົວຄວາຍຈາກລາວ. ປະຈຸບັນ ທົ່ວປະເທດລາວ ມີ 326 ຟາມລ້ຽງງົວ (45,537 ໂຕ), 9 ຟາມລ້ຽງຄວາຍ (1,107 ໂຕ), 370 ກຸ່ມລ້ຽງງົວ (16,002ໂຕ), 75 ກຸ່ມລ້ຽງຄວາຍ (2,232 ໂຕ), 217 ຄອບຄົວລ້ຽງງົວ (52,661 ໂຕ) ແລະ 105 ຄອບຄົວລ້ຽງຄວາຍ (35,928 ໂຕ) ລວມທັງງົວ ແລະ ຄວາຍມີຈໍານວນ 153,467 ໂຕ.
ສະພາບການລ້ຽງງົວຢູ່ພາກເໜືອ:
- ຟາມລ້ຽງງົວຢູ່ພາກເໜືອ ມີທັງໝົດ 121 ຟາມ, ງົວ 7,385 ໂຕ. ແຂວງອຸດົມໄຊ ມີ 44 ຟາມ, ງົວ 2,607 ໂຕ, ບໍ່ແກ້ວ ມີ 15 ຟາມ, ງົວ 1,120 ໂຕ, ຫຼວງພະບາງ ມີ 10 ຟາມ, 922 ໂຕ, ໄຊຍະບູລີ ມີ 49 ຟາມ, ງົວ 2,657 ໂຕ.
- ກຸ່ມລ້ຽງງົວທັງໝົດ 116 ກຸ່ມ, ງົວ 7,518 ໂຕ. ແຂວງຫຼວງພະບາງ ມີ 80 ກຸ່ມ, 1,869 ໂຕ, ຫົວພັນ ມີ 16 ກຸ່ມ, ງົວ 683 ໂຕ, ຫຼວງນໍ້າທາ ມີ 10 ກຸ່ມ, ງົວ 4,296 ໂຕ, ໄຊຍະບູລີ ມີ 8 ກຸ່ມ ງົວ 664 ໂຕ.
- ລ້ຽງແບບຄອບຄົວ 116 ຄອບຄົວ, ງົວ 7,518. ແຂວງ ຫຼວງພະບາງ ມີ 80 ຄອບຄົວ, ງົວ 1,869 ໂຕ, ຫຼວງນໍ້າທາ ມີ 10 ຄອບຄົວ, ງົວ 4,296 ໂຕ, ຫົວພັນ ມີ 16 ຄອບຄົວ, ງົວ 683 ໂຕ.
ສະພາບການລ້ຽງງົວຢູ່ພາກກາງ:
- ຟາມລ້ຽງງົວຢູ່ພາກາງ ມີທັງໝົດ 129 ຟາມ, ງົວ 12,449 ໂຕ. ນະຄອນຫຼວງວຽງຈັນ ມີ 35 ຟາມ, ງົວ 3,586 ໂຕ, ບໍລິຄໍາໄຊ ມີ 34 ຟາມ, ງົວ 965 ໂຕ, ວຽງຈັນ ມີ 8 ຟາມ, ງົວ 2,754 ໂຕ, ຊຽງຂວາງ ມີ 10 ຟາມ, ງົວ 956 ໂຕ, ສະຫວັນນະເຂດ ມີ 19 ຟາມ, ງົວ 3,201 ໂຕ, ຄໍາມ່ວນ ມີ 19 ຟາມ, ງົວ 987 ໂຕ.
- ກຸ່ມລ້ຽງງົວທັງໝົດ ມີ 254 ກຸ່ມ, ງົວ 8,484 ໂຕ. ແຂວງຊຽງຂວາງ ມີ 69 ກຸ່ມ, ງົວ 1,596 ກຸ່ມ, ບໍລິຄໍາໄຊ ມີ 173 ກຸ່ມ, ງົວ 6,310 ໂຕ, ນະຄອນຫຼວງວຽງຈັນ ມີ 12 ກຸ່ມ, ງົວ 578 ໂຕ.
ສະພາບການລ້ຽງງົວຢູ່ພາກໃຕ້:
- ຟາມລ້ຽງງົວຢູ່ພາກໃຕ້ທັງໝົດ 76 ຟາມ, ງົວ 25,703 ໂຕ. ແຂວງອັດຕະປື ມີ 26 ຟາມ, ງົວ 13,666 ໂຕ, ຈໍາປາສັກ ມີ 25 ຟາມ, ງົວ 7,032 ໂຕ, ສາລະວັນ ມີ 20 ຟາມ, ງົວ 770 ໂຕ, ເຊກອງ ມີ 5 ຟາມ, ງົວ 4,235 ໂຕ.
- ຄອບຄົວລ້ຽງງົວ ມີ 30 ຄອບຄົວ, ງົວ 43,410 ໂຕ. ແຂວງສາລະວັນ ມີ 30 ຄອບຄົວ, ງົວ 43,410 ໂຕ.
ຕະຫຼາດສົ່ງອອກ: ການສົ່ງອອກງົວຄວາຍຂອງ ສປປ ລາວ ມີການຂະຫຍາຍຕົວ ຢ່າງຕໍ່ເນື່ອງ ແຕ່ປີ 2015-2019 ມູນຄ່າການສົ່ງອອກ ແມ່ນ 23.52 ລ້ານໂດລາສະຫະລັດ, 45.54 ລ້ານໂດລາສະຫະລັດ, 36.66 ລ້ານໂດລາສະຫະລັດ, 90.30 ລ້ານໂດລາສະຫະລັດ ແລະ 226.86 ລ້ານໂດລາສະຫະລັດ ຕາມລໍາດັບ (ມູນຄ່າການສົ່ງອອກດັ່ງກ່າວລວມທັງມູນຄ່າຂອງສິນຄ້າຜ່ານແດນ). ສປປ ຈີນ ແລະ ສສ ຫວຽດນາມ ເປັນຕະຫຼາດງົວຄວາຍ ທີ່ໃຫຍ່ ທີ່ສຸດຂອງ ສປປ ລາວ ແຕ່ລະປີ ສປ ຈີນ ມີຄວາມຕ້ອງການນໍາເຂົ້າງົວຈາກລາວ 500,000 ໂຕ, ສສ ຫວຽດນາມ ມີຄວາມຕ້ອງການນໍາເຂົ້າງົວຈາກປະເທດຕ່າງໆ 300,000-400,000 ໂຕ ເຊິ່ງໃນນັ້ນ ລາວ ມີສິດທິພິເສດທາງດ້ານການຄ້າດ້ານການຫຼຸດຜ່ອນອັດຕາພາສີນໍາເຂົ້າລະຫວ່າງສອງຝ່າຍ (ຕົວເລກຄາດຄະເນ).
ຄວາມພ້ອມໃນການສົ່ງອອກຂອງບາງບໍລິສັດ:
ອີງຕາມແຫຼ່ງຂ່າວຂອງເວັບໄຊເສດຖະກິດການຄ້າໃຫ້ຮູ້ວ່າ:
- ບໍລິສັດ ພັດທະນາກະສິກຳ ລາວ – ຍີ່ປຸ່ນ ຊຽງຂວາງ ຈໍາກັດ ຫຼື Lao-Jagro Development XiengkhoangCo.LTD ( Lao-Jagro ) ເປັນບໍລິສັດຫຸ້ນສ່ວນລະຫວ່າງນັກລົງທຶນຂອງລາວ ແລະ ຍີ່ປຸ່ນ ເພື່ອພັດທະນາຟາມລ້ຽງງົວນົມ, ງົວຊີ້ນ ແລະ ປູກຝັງບັນດາຜະລິດຕະພັນອິນຊີ ທີ່ມີແຫຼ່ງກຳເນີດຈາກປະເທດຍີ່ປຸ່ນ ເພື່ອການບໍລິໂພກທັງພາຍໃນ ແລະ ຕ່າງປະເທດ. ເຊິ່ງບໍລິສັດດັ່ງກ່າວໄດ້ກໍ່ຕັ້ງ ນັບແຕ່ປີ 2015 ໂດຍສ້າງຟາມລ້ຽງງົວຢູ່ເທິງພູພຽງຊຽງຂວາງ. ບໍລິສັດມີການຄາດຄະເນ່ຈະສົ່ງອອກງົວຊີ້ນຍີ່ປຸ່ນ ງວດທໍາອິດ ໃນທ້າຍເດືອນກຸມພານີ້ ແລະ ເປັນຜະລິດຕະພັນຈາກ ປະເທດລາວ ອອກໄປຫາຄູ່ຄ້າຕ່າງປະເທດ ເຊັ່ນ: ສ.ຫວຽດນາມ ແລະ ອິນໂດເນເຊຍ.
- ບໍລິສັດ ພັດທະນາກະສິກຳ ລາວ – ຍີ່ປຸ່ນ ຊຽງຂວາງ ທີ່ມີເນື້ອທີ່ 5.000 ເຮັກຕາ ຕັ້ງເປົ້າລ້ຽງງົວ 24.000 ໂຕ ມູນຄ່າ 120 ລ້ານໂດລາສະຫະລັດ ແລະ ໄລຍະທີ່ 2 ຈະເພີ່ມຈຳນວນງົວໃຫ້ໄດ້ 100.000 ໂຕ ລວມເນື້ອທີ່ 20.000 ເຮັກຕາ. ເຊິ່ງຈະມີມູນຄ່າການລົງທຶນທັງ 2 ໄລຍະ ປະມານ 500 ລ້ານໂດລາສະຫະລັດ. ປະຈຸບັນນີ້, ບໍລິສັດ ພັດທະນາກະສິກຳ ລາວ – ຍີ່ປຸ່ນ ຊຽງຂວາງ ຈໍາກັດ ມີງົວທັງໝົດ 1.800 ກວ່າໂຕ. ໃນນັ້ນ, ງົວພັນຊີ້ນ 1.600 ໂຕ ໂດຍມີແຜນສົ່ງອອກທ້າຍເດືອນກຸມພາ ເປັນງວດທຳອິດ ປະມານ 25 – 50 ໂຕ ເຊິ່ງຕະຫຼາດຫຼັກແມ່ນ ສ.ຫວຽດນາມ ແລະ ອິນໂດເນເຊຍ ແລະ ອີກຫລາຍປະເທດທີ່ໄດ້ມີການຕິດຕໍ່ພົວພັນຊື້ຂາຍແຕ່ຍັງບໍ່ທັນສາມາດຕອບສະໜອງໄດ້ ເນື່ອງຈາກວ່າງົວທີ່ເໝາະສົມຍັງບໍ່ມີພຽງພໍ.
ແຫລ່ງຂໍ້ມູນ:
- ໜັງສືພີມ ເສດຖະກິດການຄ້າ https://laoedaily.com.la/2020/02/20/72493/
- ກົມລ້ຽງສັດ ແລະ ການປະມົງ, ກະຊວງ ກະສິກໍາ ແລະ ປ່າໄມ້
- ກົມການນໍາເຂົ້າ ແລະ ສົ່ງອອກ, ກະຊວງອຸດສາຫະກໍາ ແລະ ການຄ້າ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.