ອີງຕາມ ຂໍ້ຕົກລົງ ວ່າດ້ວຍການມອບສິດໃນການອະນຸຍາດ ໃຫ້ນໍາສິນຄ້າ, ເຄື່ອງຂອງ ອອກຈາກສາງ ຫຼື ດ່ານພາສີ ກ່ອນການແຈ້ງພາສີເປັນລະອຽດ, ເລກທີ 01446/ກພສ, ລົງວັນທີ 13 ມີນາ 2020 ໄດ້ລະບຸໃວ້ວ່າ ໃນການອະນຸຍາດໃຫ້ສິນຄ້າ, ເຄື່ອງຂອງ ອອກຈາກສາງ ຫຼື ດ່ານພາສີ ບ່ອນທີ່ໄດ້ນໍາເຂົ້ານັ້ນ ຕ້ອງໄດ້ຮັບການອະນຸຍາດ ຫຼື ຢັ້ງຢືນ ຂອງຂະແໜງການລັດທີ່ກ່ຽວຂ້ອງ ເສຍກ່ອນ ແລະ ປະຕິບັດຕາມ ມາດຕາ 27 ຂອງກົດໝາຍພາສີ ສະບັບເລກທີ 04/ສພຊ, ລົງວັນທີ 20 ທັນວາ 2011.
ປະເພດສິນຄ້າທີ່ສາມາດເອົາອອກຈາກສາງ ແລະ ດ່ານພາສີສາກົນ ກ່ອນການແຈ້ງພາສີ ແມ່ນມີ 2 ປະເພດຫລັກຄື:
1. ຫົວໜ້າດ່ານພາສີສາກົນ ຈະພິຈາລະນາອະນຸຍາດອອກໃບແຈ້ງພາສີຄໍ້າປະກັນ (IM8) ໃຫ້ແກ່:
- ການນໍາເຂົ້າ ວັດຖຸດິບ, ວັດຖຸອຸປະກອນ ແລະ ອື່ນໆ ມາຮັບໃຊ້ການຜະລິດ ເປັນອັນຮີບດ່ວນ ຂອງບັນດາວິສາຫະກິດລົງທຶນ ທີ່ໄດ້ມີໜັງສືຢັ້ງຢືນຈາກຂະແໜງແຜນການ ແລະ ການລົງທຶນ ຂັ້ນສູນກາງ ຫຼື ທ້ອງຖີ່ນ;
- ການນໍາເຂົ້າ ອຸປະກອນຮັບໃຊ້ທາງການແພດ ເຊັ່ນ: ວັກແຊງ, ນໍ້າຢາວິເຄາະ ແລະ ເຄື່ອງມືການແພດ;
- ການນໍາເຂົ້າ ເຄື່ອງອຸປະໂພກ-ບໍລິໂພກ, ວັດຖຸອຸປະກອນ ແລະ ເຄື່ອງຮັບໃຊ້ໃນໄລຍະສຸກເສີນ ທີ່ເກີດໄພພິບັດ;
- ການນໍາເຂົ່້າ ສັດທີ່ມີຊີວິດ, ສິນຄ້າບູດເນົ່າໄວ ແລະ ສິນຄ້າທີ່ເກັບໃນອຸນນະພູມສະເພາະ.
2. ຫົວໜ້າກອງຄຸ້ມຄອງພາສີ ຈະພິຈາລະນາອະນຸຍາດໃຫ້ ດ່ານພາສີສາກົນ ອອກໃບແຈ້ງພາສີຄໍ້າປະກັນ (IM8) ໃຫ້ແກ່:
- ການນໍາເຂົ້າ ສິນຄ້າ, ເຄື່ອງຂອງ ທີ່ນໍາເຂົ້າມາ ເພື່ອງານວາງສະແດງ ແລະ ຈໍາໜ່າຍສິນຄ້າ;
- ການນໍາເຂົ້າວັດຖຸອຸປະກອນ, ເຄື່ອງມືສ້ອມແປງ ແລະ ການສໍາຫຼວດອອກແບບ;
ສໍາລັບດ່ານນໍາເຂົ້າສິນຄ້າ ແລະ ເຄື່ອງຂອງ ທີ່ບໍ່ນອນໃນປະເພດສິນຄ້າທີ່ກ່າວມານັ້ນ ແມ່ນກົມພາສີເປັນຜູ້ພິຈາລະນາ ອະນຸມັດ ຕາມກົດໝາຍ ແລະ ລະບຽບການ.
ລາຍລະອຽດຂອງ ຂໍ້ຕົກລົງ ວ່າດ້ວຍການມອບສິດໃນການອະນຸຍາດ ໃຫ້ນໍາສິນຄ້າ, ເຄື່ອງຂອງ ອອກຈາກສາງ ຫຼື ດ່ານພາສີ ກ່ອນການແຈ້ງພາສີເປັນລະອຽດ, ເລກທີ 01446/ກພສ, ລົງວັນທີ 13 ມີນາ 2020
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.