ຂັ້ນຕອນການເລິ່ມຕົ້ນທຸລະກິດ ແມ່ນຂັ້ນຕອນຕ່າງໆ ທີ່ຕິດພັນກັບການຂື້ນທະບຽນສ້າງຕັ້ງວິສາຫະກິດສ່ວນບຸກຄົນ ຫຼື ນິຕິບຸກຄົນເທົ່ານັ້ນ ແລະ ບໍ່ລວມເອົາຂັ້ນຕອນການຂໍອະນຸຍາດລົງທຶນ ຫຼື ຂໍອະນຸຍາດດໍາເນີນທຸລະກິດ ຂອງບັນດາຂະແໜງການ.
ຂັ້ນຕອນການເລີ່ມຕົ້ນທຸລະກິດ ທີ່ຍັງຕ້ອງໄດ້ປະຕິບັດ ເຊິ່ງມີພຽງ 3 ຂັ້ນຕອນດັ່ງນີ້:
ຂັ້ນຕອນທີ 1 - ການແຈ້ງຂື້ນທະບຽນສ້າງຕັ້ງວິສາຫະກິດ ແມ່ນຈະໃຊ້ເວລາບໍ່ເກີນ 10 ວັນລັດຖະການ ໂດຍອີງຕາມ ຂໍ້ຕົກລົງເລກທີ 0023/ອຄ.ກທຄວ, ລົງວັນທີ 09 ມັງກອນ 2019;
ຂັ້ນຕອນທີ 2 - ການຄວັດຕາປະທັບ ແລະ ການອະນຸຍາດນໍາໃຊ້ຕາປະທັບ ແມ່ນຈະໃຊ້ເວລາບໍ່ເກີນ 5 ວັນລັດຖະການ ໂດຍອີງຕາມ ຂໍ້ຕົກລົງ ເລກທີ 1784/ປກສ, ລົງວັນທີ 02 ຕຸລາ່ 2018;
ຂັ້ນຕອນທີ 3 - ການຈົດທະບຽນປະກັນສັງຄົມ ແມ່ນຈະໃຊ້ເວລາບໍ່ເກີນ 2 ວັນລັດຖະການ ໂດຍອີງຕາມ ຄໍາແນະນໍາ ເລກທີ 1206/ຮສສ, ລົງວັນທີ 23 ເມສາ 2019.
ອີງຕາມແຈ້ງການ ຂັ້ນຕອນການເລິ່ມທຸລະກິດ ເລກທີ 0115/ຫອຄ.ກທຄວ, ລົງວັນທີ 29 ມັງກອນ 2020 ໄດ້ມີການປັບປຸງ ແລະ ແກ້ໄຂ ບາງຂັ້ນຕອນ ດັ່ງນີ້:
1. ລົບລ້າງ ການນໍາໃຊ້ແບບຟອມໃບຢັ້ງຢືນທີ່ຕັ້ງສໍານັກງານ ຫຼື ສາຂາ ຂອງວິສາຫະກິດ ໂດຍອີງຕາມແຈ້ງການ ສະບັບເລກທີ 1596/ກທຄວ.ອຄ, ລົງວັນທີ 15 ພະຈິກ 2018 ແລະ ການລົບລ້າງ ການແຈ້ງຂື້ນທະບຽນວິສາຫະກິດ ໃນກິດຈະການບໍລິການ ຂອງຂະແໜງການທະນາຄານ;
2. ການຈົດທະບຽນກົດລະບຽບບໍລິສັດ ແມ່ນຖືກຍົກໃຫ້ຢູ່ໃນຂັ້ນຕອນຕໍ່ໄປ ພາຍຫລັງທີ່ທຸລະກິດໄດ້ດໍາເນີນໄປແລ້ວນັ້ນ ໂດຍອີງຕາມ ແຈ້ງການ ເລກທີ 1618/ກງ, ລົງວັນທີ 30 ພຶດສະພາ 2019;
3. ການຂໍເລກປະຈໍາຕົວຜູ້ເສຍອາກອນ ແມ່ນຈະມີເລກລະຫັດປະຈໍາຜູ້ເສຍອາກອນ ມາພ້ອມພາຍຫລັງໄດ້ຮັບການຂື້ນທະບຽນວິສາຫະກິດ ໂດຍອີງຕາມ ແຈ້ງການ ເລກທີ 5489/ກສອ, ລົງວັນທີ 17 ຕຸລາ 2018;
4. ການປະຖົມນິເທດ ແລະ ມອບເລກປະຈໍາຕົວຜູ້ເສຍອາກອນ ແມ່ນຖືກເລື່ອນໃຫ້ຢູ່ໃນຂັ້ນຕອນຕໍ່ໄປ ພາຍຫລັງທີ່ທຸລະກິດໄດ້ດໍາເນີນໄປແລ້ວນັ້ນ ໂດຍອີງຕາມ ແຈ້ງການ ເລກທີ 5489/ກສອ, ລົງວັນທີ 17 ຕຸລາ 2018 ແລະ ແຈ້ງການ ເລກທີ 0489/ຫກງ, ລົງວັນທີ 05 ມີນາ 2019;
5. ການຈົດທະບຽນອາກອນມູນຄ່າເພີ່ມ ແມ່ນໄດ້ຖືກຍົກເລີກ ໂດຍອີງຕາມແຈ້ງການ ເລກທີ 2720/ຫກງ, ລົງວັນທີ 12 ພະຈິກ 2019;
6. ການຈົດທະບຽນນໍາໃຊ້ຕາປະທັບ ແມ່ນໄດ້ຖືກລວມເຂົ້າເປັນຂັ້ນຕອນດຽວກັນກັບ ການຄວັດຕາປະທັບ ໂດຍອີງຕາມ ຂໍ້ຕົກລົງ ເລກທີ 1784/ປກສ, ລົງວັນທີ 02 ຕຸລາ 2018 ແລະ ແຈ້ງການ ເລກທີ 2140/ຫອຄ.ກທຄວ, ລົງວັນທີ 03 ຕຸລາ 2019;
7. ການຂໍອະນຸຍາດເນື້ອໃນປ້າຍຊື່ວິສາຫະກິດ ໄດ້ຖືກຍົກເລີກ ໂດຍອີງຕາມສະໂນດນໍາສົ່ງ ເລກທີ 49/ຫກ, ລົງວັນທີ 10 ມີນາ 2019 ກ່ຽວກັບການປັບປຸງປ້າຍຊື່ວິສາຫະກິດ ຕາມແຈ້ງການຂອງຫ້ອງ ການ, ກະຊວງອຸດສາຫະກໍາ ແລະ ການຄ້າ ສະບັບເລກທີ 2823/ຫອຄ.ກທຄວ, ລົງວັນທີ 26 ພະຈິກ 2018..
ລາຍລະອຽດຂອງແຈ້ງການກ່ຽວກັບ ຂັ້ນຕອນການເລິ່ມທຸລະກິດ ເລກທີ 0115/ຫອຄ.ກທຄວ, ລົງວັນທີ 29 ມັງກອນ 2020
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.