ສາລະບານ

ມາດຕາ 1. ຈຸດປະສົງ
ມາດຕາ 2. ອະທິບາຍຄໍາສັບ
ມາດຕາ 3. ລັກສະນະທາງດ້ານນິຕິກໍາຂອງໃບແຈ້ງມູນຄ່ແຈ້ງພາສີຂາເຂົ້າ
ມາດຕາ 4. ໃບແຈ້ງມູນຄ່າແຈ້ງພາສີຂາເຂົ້າ
ມາດຕາ 5. ຫຼັກການລວມໃນການປະມູນ
ມາດຕາ 6. ການປະກອບຂໍ້ມູນລົງໃນໃບແຈ້ງ ຕາມຫຼັກການລາຄາຊື້-ຂາຍສິນຄ້າຕົວຈິງ (GATT/ພສ-01)
ມາດຕາ 7. ການປະກອບຂໍ້ມູນລົງໃນໃບແຈ້ງມູນຄ່າແຈ້ງພາສີ ຕາມຫຼັກການລາຄາຊື້-ຂາຍສິນຄ້າຄືກັນ ແລະ ຄ້າຍຄືກັນ (GATT/ພສ-02 ແລະ GATT/ພສ-03)
ມາດຕາ 8. ການປະກອບຂໍ້ມູນລົງໃນໃບແຈ້ງມູນຄ່າແຈ້ງພາສີ ຕາມຫຼັກການຫັກລົບລາຄາສິນຄ້າ (GATT/ພສ-04)
ມາດຕາ 9. ການປະກອບຂໍ້ມູນລົງໃນໃບແຈ້ງມູນຄ່າແຈ້ງພາສີ ຕາມຫຼັກການຄໍານວນລາຄາສິນຄ້າ (GATT/ພສ-05)
ມາດຕາ 10. ການປະກອບຂໍ້ມູນລົງໃນໃບແຈ້ງມູນຄ່າແຈ້ງພາສີ ຕາມຫຼັກການຢ້ອນຄືນທີ່ສົມເຫດສົມຜົນ(GATT/ພສ-06)
ມາດຕາ 11. ຄວາມຮັບຜິດຊອບຂອງເຈົ້າໜ້າທີ່ພາສີຢູ່ດ່ານພາສີ
ມາດຕາ 12. ການຈັດຕັ້ງຜັນຂະຫຍາຍ
ມາດຕາ 13. ຜົນສັກສິດ

ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ

ກະຊວງການເງິນ   ເລກທີ 00266/ກພສ
ກົມພາສີ   ນະຄອນຫຼວງວຽງຈັນ, ວັນທີ 04 ພະຈິກ 2011

ບົດແນະນໍາ
ກ່ຽວກັບການປະກອບໃບແຈ້ງມູນຄ່າແຈ້ງພາສີຂາເຂົ້າ

• ອີງຕາມກົດໝາຍວ່າດ້ວຍພາສີ ເລກທີ 05/ສພຊ ລົງວັນທີ 20 ພຶດສະພາ 2005, ໝວດ 2, ມາດຕາ 13 ກ່ຽວກັບການກໍານົດມູນຄ່າແຈ້ງພາສີ ສໍາລັບສິນຄ້ານໍາເຂົ້າ;
• ອີງຕາມ ບົດແນະນໍາຂອງລັດຖະມົນຕີວ່າການກະຊວງການເງິນ ເລກທີ 1398/ກງ, ລົງວັນທີ 16 ມິຖຸນາ 2010, ວ່າດ້ວຍມູນຄ່າແຈ້ງພາສີສິນຄ້າຂາເຂົ້າ;
• ອີງຕາມ ຂໍ້ຕົກລົງຂອງລັດຖະມົນຕີວ່າການກະຊວງການເງິນ ສະບັບເລກທີ 2095/ກງ, ລົງວັນທີ 26/9/2011, ວ່າດ້ວຍການນໍາໃຊ້ໃບແຈ້ງມູນຄ່າແຈ້ງພາສີ ສໍາລັບສິນຄ້ານໍາເຂົ້າເສຍພາສີ-ອາກອນ.
• ອີງຕາມ ບົດແນະນໍາກົມພາສີ ສະບັບເລກທີ 2401/ກພສ, ລົງວັນທີ 29/09/2010 ວ່າດ້ວຍການກໍານົດມູນຄ່າແຈ້ງພາສີສໍາລັບສິນຄ້າເຄື່ອງຂອງນໍາເຂົ້າ.

ກົມພາສີອອກບົດແນະນໍາຄື:

ມາດຕາ 1. ຈຸດປະສົງ
   ບົດແນະນໍາສະບັບນີ້ ແມ່ນເພື່ອແນະນໍາການປະກອບຂໍ້ມູນລາຄາສິນຄ້າ, ເຄື່ອງຂອງລົງໃນໃບແຈ້ງມູນຄ່າແຈ້ງພາສີ ຊຶ່ງຕິດພັນກັບການປະກອບໃບແຈ້ງພາສີ ເປັນລາຍລະອຽດສໍາລັບສິນຄ້າ, ເຄື່ອງຂອງທີ່ນໍາເຂົ້າເສຍພາສີ-ອາກອນຕາມລະບຽບກົດໝາຍ. ການປະກອບຂໍ້ມູນລົງໃນໃບແຈ້ງມູນຄ່າແຈ້ງພາສີຂາເຂົ້າໃຫ້ຖືກ ຕ້ອງຕາມແບບພິມທີ່ກໍານົດໄວ້ ແລະ ສອດຄ່ອງກັບຫຼັກການປະເມີນມູນຄ່າແຈ້ງພາສີຂາເຂົ້າທີ່ໄດ້ກໍານົດໄວ້ໃນລະບຽບກົດໝາຍ ແລະ ບົດແນະນໍາຂອງກົມພາສີ. ຂ້າງເທິງ

ມາດຕາ 2. ອະທິບາຍຄໍາສັບ
   ປະໂຫຍກ ຫຼື ຄໍາສັບທີ່ໃຊ້ໃນບົດແນະນໍາສະບັບນີ້ ແມ່ນຜັນຂະຫຍາຍຈາກລະບຽບການຂອງສາກົນຊຶ່ງເອີ້ນວ່າ: ຂໍ້ຕົກລົງທົ່ວໄປວ່າດ້ວຍພາສີ ແລະ ການຄ້າ, ຂຽນເປັນອັກສອນຫຍໍ້ ‘‘ຂວພຄ’’ ເປັນພາສາສາກົນເອີ້ນວ່າ: THE GENERAL AGREEMENT ON TARIFFS AND TRADE 1994 ຂຽນຫຍໍ້ເປັນອັກສອນ ສາກົນ (GATT 1994). ຂ້າງເທິງ

ມາດຕາ 3. ລັກສະນະທາງດ້ານນິຕິກໍາຂອງໃບແຈ້ງມູນຄ່ແຈ້ງພາສີຂາເຂົ້າ

1. ໃບແຈ້ງມູນຄ່າແຈ້ງພາສີຂາເຂົ້າແມ່ນອົງປະກອບໜຶ່ງໃນການແຈ້ງພາສີເປັນລາຍລະອຽດ ສໍາລັບການນໍາເຂົ້າເສຍພາສີ-ອາກອນຊຶ່ງຕ້ອງໄດ້ຄັດຕິດໃສ່ ໃບແຈ້ງພາສີເປັນລາຍລະອຽດທຸກຄັ້ງໃນເວລາແຈ້ງພາສີ.
2. ໃບແຈ້ງມູນຄ່າແຈ້ງພາສີຂາເຂົ້າຕ້ອງປະກອບເປັນ 3 ສະບັບ, 02 ສະບັບສໍາລັບລັດຖະການພາສີ, 01 ສະບັບສໍາລັບຜູ້ແຈ້ງພາສີ.
3. ໃບແຈ້ງມູນຄ່າແຈ້ງພາສີຂາເຂົ້າຖືກເກັບຮັກສາໄວ້້ນໍາໃບແຈ້ງພາສີເປັນລາຍລະອຽດພາຍໃນກໍານົດ 03 ປີ ຕາມລະບຽບກົດໝາຍພາສີ.
4. ຜູ້ແຈ້ງພາສີມີໜ້າທີ່ແຈ້ງບັນດາຂໍ້ມູນຕ່າງໆ ລົງໃນໃບແຈ້ງມູນຄ່າແຈ້ງພາສີຂາເຂົ້າໃຫ້ຖືກຕ້ອງຄົບຖ້ວນ, ຮັບຜິດຊອບຕໍ່ໜ້າກົດໝາຍ ກ່ຽວກັບທຸກເນື້ອໃນທີ່ໄດ້ ແຈ້ງ ແລະ ເປັນຜູ້ພິຈາລະນາດ້ວຍຕົນເອງໃນການແຈ້ງມູນຄ່າສິນຄ້າລົງໃນໃບແຈ້ງມູນຄ່າແຈ້ງພາສີຂາເຂົ້າໃນແບບພິມໃດໜຶ່ງ ໃຫ້ຖືກຕ້ອງຕາມຫຼັກການ ທີ່ໄດ້ນໍາໃຊ້ໂດຍສອດຄ່ອງກັບລະບຽບກົດໝາຍ ແລະ ບົດແນະນໍາຂອງກົມພາສີ. ຂ້າງເທິງ

ມາດຕາ 4. ໃບແຈ້ງມູນຄ່າແຈ້ງພາສີຂາເຂົ້າ
   ໃບແຈ້ງມູນຄ່າແຈ້ງພາສີຂາເຂົ້າປະກອບມີ 6 ປະເພດ, ຕາມທີ່ໄດ້ກໍານົດໄວ້ໃນຂໍ້ຕົກລົງຂອງລັດຖະມົນຕີວ່າການກະຊວງການເງິນ, ລະອຽດດັ່ງນີ້:

1. ໃບແຈ້ງມູນຄ່າແຈ້ງພາສີຂາເຂົ້າລະຫັດ GATT/ພສ-01 ແລະ ໃບຊ້ອນທ້າຍລະຫັດ GATT/ພສ-01/01 ນໍາໃຊ້ສໍາລັບການປະເມີນມູນຄ່າສິນຄ້ານໍາເຂົ້າ ຕາມຫຼັກການມູນຄ່າຊື້-ຂາຍສິນຄ້າຕົວຈິງ.
2. ໃບແຈ້ງມູນຄ່າແຈ້ງພາສີຂາເຂົ້າລະຫັດ GATT/ພສ-02, ນໍາໃຊ້ສໍາລັບການປະເມີນມູນຄ່າສິນຄ້ານໍາເຂົ້າ ຕາມຫຼັກການລາຄາຊື້-ຂາຍສິນຄ້າຄືກັນ.
3. ໃບແຈ້ງມູນຄ່າແຈ້ງພາສີຂາເຂົ້າລະຫັດ GATT/ພສ-03, ນໍາໃຊ້ສໍາລັບການປະເມີນມູນຄ່າສິນຄ້ານໍາເຂົ້າ ຕາມຫຼັກການລາຄາຊື້-ຂາຍສິນຄ້າທີ່ຄ້າຍຄືກັນ.
4. ໃບແຈ້ງມູນຄ່າແຈ້ງພາສີຂາເຂົ້າລະຫັດ GATT/ພສ-04, ນໍາໃຊ້ສໍາລັບການປະເມີນມູນຄ່າສິນຄ້ານໍາເຂົ້າ ຕາມຫຼັກການຫັກລົບລາຄາສິນຄ້າ.
5. ໃບແຈ້ງມູນຄ່າແຈ້ງພາສີຂາເຂົ້າລະຫັດ GATT/ພສ-05, ນໍາໃຊ້ສໍາລັບການປະເມີນມູນຄ່າສິນຄ້ານໍາເຂົ້າ ຕາມຫຼັກການຄໍານວນລາຄາສິນຄ້າ.
6. ໃບແຈ້ງມູນຄ່າແຈ້ງພາສີຂາເຂົ້າລະຫັດ GATT/ພສ-06, ນໍາໃຊ້ສໍາລັບການປະເມີນມູນຄ່າສິນຄ້ານໍາເຂົ້າ ຕາມຫຼັກການຢ້ອນຄືນທີ່ສົມເຫດສົມຜົນ. ຂ້າງເທິງ

ມາດຕາ 5. ຫຼັກການລວມໃນການປະມູນ

1. ມູນຄ່າສິນຄ້າທີ່ແຈ້ງລົງໃນໃບແຈ້ງມູນຄ່າແຈ້ງພາສີຂາເຂົ້າ ແມ່ນເປັນພື້ນຖານຄິດໄລ່ຄ່າພາສີ ແລະ ພັນທະອື່ນໆຂອງໜຶ່ງຫົວໜ່ວຍສິນຄ້ານໍາເຂົ້າ.
2. ໃນກໍລະນີການນໍາໃຊ້ແບບພິມໃບແຈ້ງມູນຄ່າແຈ້ງພາສີຂາເຂົ້າ ຕາມຫຼັກການ 2, 3, 4, 5, 6 ບໍ່ພຽງພໍໃນການໃຫ້ເຫດຜົນ ຫຼື ຄໍາອະທິບາຍ, ຜູ້ແຈ້ງພາສີ ສາມາດພິມຄໍາອະທິບາຍເພີ່ມເຕີມ ລົງໃນໃບເຈ້ຍຕ່າງຫາກ.
3. ຂໍ້ມູນໃນໃບແຈ້ງມູນຄ່າແຈ້ງພາສີຂາເຂົ້າຕ້ອງສອດຄ່ອງ ແລະ ກົມກຽວກັບຂໍ້ມູນທີ່ໄດ້ແຈ້ງໃນໃບແຈ້ງພາສີ ເປັນລາຍລະອຽດຕາມລໍາດັບຂອງລາຍການສິນຄ້າ.

ຕົວຢ່າງ:

• ລາຍການສິນຄ້າລໍາດັບທີ 1 ຢູ່ໃບແຈ້ງພາສີເປັນລາຍລະອຽດແມ່ນນໍ້າປາ.
• ເລກລໍາດັບສິນຄ້າທີ່ຕ້ອງລະບຸຢູ່ໃບແຈ້ງມູນຄ່າແຈ້ງພາສີຂາເຂົ້າແມ່ນເລກລໍາດັບທີ 1 ຄືກັນ (ບໍ່ຕ້ອງລະບຸລາຍການສິນຄ້າ).

4. ອັດຕາແລກປ່ຽນທີ່ໃຊ້ຄິດໄລ່ມູນຄ່າແຈ້ງພາສີເປັນເງິນຕາ ມາເປັນເງິນກີບແມ່ນໃຫ້ປະຕິບັດເປັນເອກະພາບກັບໃບແຈ້ງພາສີເປັນລາຍລະອຽດໃນຫ້ອງທີ 23. ຂ້າງເທິງ

ມາດຕາ 6. ການປະກອບຂໍ້ມູນລົງໃນໃບແຈ້ງ ຕາມຫຼັກການລາຄາຊື້-ຂາຍສິນຄ້າຕົວຈິງ (GATT/ພສ-01)
   ໃບແຈ້ງມູນຄ່າແຈ້ງພາສີຂາເຂົ້າລະຫັດ GATT/ພສ-01 ສາມາດແຈ້ງໄດ້ສູງສຸດ 10 ລາຍການ. ກໍລະນີສິນຄ້ານໍາເຂົ້າມີຫຼາຍກວ່າ 10 ລາຍການແມ່ນໃຫ້ ນໍາໃຊ້ແບບພິມໃບຊ້ອນທ້າຍລະຫັດ GATT/ພສ-01/01.

ຂ້າງເທິງ

ມາດຕາ 7. ການປະກອບຂໍ້ມູນລົງໃນໃບແຈ້ງມູນຄ່າແຈ້ງພາສີ ຕາມຫຼັກການລາຄາຊື້-ຂາຍສິນຄ້າຄືກັນ ແລະ ຄ້າຍຄືກັນ (GATT/ພສ-02 ແລະ GATT/ພສ-03)
   ການປະກອບຂໍ້ມູນລົງໃນໃບແຈ້ງມູນຄ່າແຈ້ງພາສີ ຕາມຫຼັກການລາຄາຊື້-ຂາຍສິນຄ້າຄືກັນ ແລະ ຄ້າຍຄືກັນ ແມ່ນມີຫຼັກການລວມໃນການປະກອບຂໍ້ມູນອັນດຽວກັນ ແລະ ປະຕິບັດດັ່ງນີ້:

• ຄັດຕິດໃບແຈ້ງພາສີເປັນລາຍລະອຽດ: ໃຫ້ແຈ້ງເລກທີ, ວັນເດືອນປີ ແລະ ດ່ານນໍາເຂົ້າຂອງໃບແຈ້ງພາສີເປັນລາຍລະອຽດ ທີ່ຄັດຕິດໃຫ້ຖືກຕ້ອງຄົບຖວ້ນ.
• ລໍາດັບໃບແຈ້ງມູນຄ່າແຈ້ງພາສີຂາເຂົ້າ: ໃນກໍລະນີມີ 1 ລາຍການໃຫ້ 1/1; ໃນກໍລະນີມີ 2 ລາຍການໃຫ້ໝາຍໃສ່ໃບທີ 1/2, ໃບທີ 2 ໃຫ້ໝາຍ 2/2.
• ເຫດຜົນທີ່ບໍ່ນໍາໃຊ້ຫຼັກການປະເມີນມູນຄ່າແຈ້ງພາສີ ກ່ອນຫນ້ານັ້ນ (ຫຼັກການທີ 1 ແລະ ຫຼັກການທີ 2 ຕາມແຕ່ລະກໍລະນີ): ຜູ້ແຈ້ງພາສີຕ້ອງໃຫ້ເຫດຜົນ.
• ຊື່ສິນຄ້າທີ່ຕ້ອງການປະເມີນມູນຄ່າແຈ້ງພາສີ: ໃຫ້ແຈ້ງລະອຽດຊື່ສິນຄ້າ, ຂະໜາດ, ຄຸນລັກສະນະຂອງສິນຄ້າ ໂດຍໃຫ້ສອດຄ່ອງກັບສັນຍາຊື້-ຂາຍ
  + ຂຽນເລກລໍາດັບລາຍການສິນຄ້າ ໃນໃບແຈ້ງພາສີເປັນລາຍລະອຽດ (ສິນຄ້າທີ່ຕ້ອງການປະເມີນມູນຄ່າແຈ້ງພາສີ) ລົງໃນໃບແຈ້ງມູນຄ່າແຈ້ງພາສີຂາເຂົ້າ.
  + ວັນສົ່ງອອກ: ຂຽນວັນທີ, ເດືອນ, ປີຂອງໃບຂົນສົ່ງສິນຄ້າທີ່ກໍາລັງປະເມີນມູນຄ່າແຈ້ງພາສີ
• ຊື່ສິນຄ້ານໍາເຂົ້າທີ່ຄືກັນ/ຄ້າຍຄືກັນ: ຕ້ອງເປັນສິນຄ້າທີ່ໄດ້ນໍາເຂົ້າມາ ແລະ ໄດ້ຜ່ານການແຈ້ງພາສີເປັນລາຍລະອຽດ ໃນຫຼັກການທີ 1 ຈຶ່ງສາມາດນໍາມາສົມທຽບ ດ້ານມູນຄ່າແຈ້ງພາສີໄດ້.
  + ຂຽນເລກລໍາດັບລາຍການສິນຄ້າ ໃນໃບແຈ້ງພາສີເປັນລາຍລະອຽດ (ສິນຄ້ານໍາເຂົ້າທີ່ຄືກັນ/ຄ້າຍຄືກັນທີ່ນໍາມາອ້າງອີງ) ພ້ອມທັງລະບຸດ່ານນໍາເຂົ້າ.
  + ວັນສົ່ງອອກ: ຂຽນວັນທີ, ເດືອນ, ປີຂອງໃບຂົນສົ່ງຂອງສິນຄ້າຄືກັນ/ຄ້າຍຄືກັນ ທີ່ນໍາມາອ້າງອີງ.
• ມູນຄ່າແຈ້ງພາສີຂອງສິນຄ້ານໍາເຂົ້າຄືກັນ/ຄ້າຍຄືກັນ: ແມ່ນມູນຄ່າແຈ້ງພາສີເປັນເງິນຕາ ຕໍ່ໜຶ່ງຫົວໜ່ວຍສິນຄ້າທີ່ກໍານົດໃນຫ້ອງ 23 ຂອງໃບແຈ້ງມູນຄ່າ ແຈ້ງພາສີທີ່ນໍາມາສົມທຽບ.
• ບັນດາຄ່າດັດປັບ: ກໍລະນີສິນຄ້ານໍາເຂົ້າທີ່ຄືກັນ/ຄ້າຍຄືກັນ ມີເງື່ອນໄຂທາງດ້ານການຄ້າ, ການຂົນສົ່ງ ແລະອື່ນໆ ຄືກັນກັບສິນຄ້າທີ່ກໍາລັງປະເມີນ ມູນຄ່າແຈ້ງພາສີນັ້ນ ຜູ້ແຈ້ງພາສີຕ້ອງກໍານົດບັນດາຄ່າດັດປັບ, ຖ້າຄ່າດັດປັບທີ່ເພີ່ມຂຶ້ນ ແມ່ນໃຫ້ໝາຍສັນຍາລັກບວກ ( + ), ຖ້າຄ່າດັດປັບຫຼຸດລົງແມ່ນໃຫ້ໝາຍສັນຍາລັກລົບ ( - ) ໃສ່່ດ້ານຫນ້າຂອງຄ່າດັດປັບນັ້ນ ແລະ ຂຽນໃສ່ຫ້ອງເງິນຕາຕ່າງປະເທດ
• ມູນຄ່າແຈ້ງພາສີສິນຄ້າ ທີ່ກໍາລັງປະເມີນພາຍຫຼັງມີການດັດປັບ: ແມ່ນມູນຄ່າແຈ້ງພາສີສິນຄ້າຄືກັນ/ຄ້າຍຄືກັນທີ່ນໍາມາສົມທຽບລວກ ຫຼື ລົບກັບບັນດາຄ່າດັດປັບ.
• ອະທິບາຍບັນດາຄ່າດັດປັບ: ຜູ້ແຈ້ງພາສີຕ້ອງອະທິບາຍລະອຽດ ວິທີກໍານົດບັນດາຄ່າດັດປັບ
• ເອກະສານອ້າງອີງຄັດຕິດ: ໃຫ້ສະແດງບັນດາເອກະສານອ້າງອີງ ເພື່ອເປັນບ່ອນອີງໃນການປະເມີນ ມູນຄ່າແຈ້ງພາສີຂາເຂົ້າ ຕາມລະບຽບກົດໝາຍ ແລະ ບົດແນະນໍາກົມພາສີ ພ້ອມທັງຄັດຕິດໃບແຈ້ງມູນຄ່າແຈ້ງພາສີຂາເຂົ້າ.
• ການຢັ້ງຢືນຂອງຜູ້ແຈ້ງພາສີ: ຂຽນວັນເດືອນປີ ແລະ ລົງລາຍເຊັນ, ຊື່ ແລະ ນາມສະກຸນ, ຖານະຂອງຜູ້ແຈ້ງ, ປະທັບກາບໍລິສັດລົງໃນໃບແຈ້ງມູນຄ່າແຈ້ງພາສີ. ຂ້າງເທິງ

ມາດຕາ 8. ການປະກອບຂໍ້ມູນລົງໃນໃບແຈ້ງມູນຄ່າແຈ້ງພາສີ ຕາມຫຼັກການຫັກລົບລາຄາສິນຄ້າ (GATT/ພສ-04)
   ການປະກອບຂໍ້ມູນລົງໃນໃບແຈ້ງມູນຄ່າແຈ້ງພາສີ ຕາມຫຼັກການຫັກລົບລາຄາສິນຄ້າ ແມ່ນປະຕິບັດດັ່ງນີ້:

• ຄັດຕິດໃບແຈ້ງພາສີເປັນລາຍລະອຽດ: ໃຫ້ແຈ້ງເລກທີ, ວັນເດືອນປີ ແລະ ດ່ານນໍາເຂົ້າຂອງໃບແຈ້ງພາສີເປັນລາຍລະອຽດ ທີ່ຄັດຕິດໃຫ້ຖືກຕ້ອງຄົບຖວ້ນ.
• ລໍາດັບໃບແຈ້ງມູນຄ່າແຈ້ງພາສີຂາເຂົ້າ: ໃນກໍລະນີມີ 1 ລາຍການໃຫ້ 1/1; ໃນກໍລະນີມີ 2 ລາຍການໃຫ້ໝາຍໃສ່ໃບທີ 1/2, ໃບທີ 2 ໃຫ້ໝາຍ 2/2.
• ເຫດຜົນທີ່ບໍ່ນໍາໃຊ້ ຫຼັກການປະເມີນມູນຄ່າແຈ້ງພາສີ ກ່ອນຫນ້ານັ້ນ: ຜູ້ແຈ້ງພາສີຕ້ອງໃຫ້ເຫດຜົນ.
• ຊື່ສິນຄ້າທີ່ຕ້ອງການປະເມີນມູນຄ່າແຈ້ງພາສີ: ໃຫ້ແຈ້ງລະອຽດຊື່ສິນຄ້າ, ຂະໜາດ, ຄຸນລັກສະນະຂອງສິນຄ້າ ໂດຍໃຫ້ສອດຄ່ອງກັບສັນຍາຊື້-ຂາຍ.
  + ຂຽນເລກລໍາດັບລາຍການສິນຄ້າ ໃນໃບແຈ້ງພາສີເປັນລາຍລະອຽດ (ສິນຄ້າທີ່ຕ້ອງການປະເມີນມູນຄ່າແຈ້ງພາສີ) ລົງໃນໃບແຈ້ງມູນຄ່າແຈ້ງພາສີຂາເຂົ້າ.
• ຊື່ສິນຄ້ານໍາເຂົ້າທີ່ໄດ້ຂາຍຢູ່ພາຍໃນ ສປປລາວ ຖືກຄັດເລືອກເພື່ອຫັກລົບລາຄາສິນຄ້າ: ຕ້ອງເປັນສິນຄ້ານໍາເຂົ້າ ຊະນິດດຽວກັນ ແລະ ໄດ້ຜ່ານການແຈ້ງພາສີເປັນລາຍລະອຽດ.
• ລາຄາຂາຍພາຍໃນຕະຫຼາດ ສປປລາວ: ແມ່ນລາຄາຫົວໜ່ວຍຂອງສິນຄ້ານໍາເຂົ້າ ທີ່ຄືກັນ ຫຼື ຄ້າຍຄືກັນຊຶ່ງຂາຍໃຫ້ບຸກຄົນ ທີ່ບໍ່ມີຄວາມສໍາພັນກັບຜູ້ຂາຍຢູ່ ສປປລາວ ໃນຈໍານວນຫົວໜ່ວຍຂາຍອອກ ຫຼາຍທີ່ສຸດໃນໄລຍະເວລາບໍ່ເກີນ 90 ວັນ ຫຼັງຈາກການນໍາເຂົ້າສິນຄ້າດັ່ງກ່າວ.
  + ບັນດາມູນຄ່າທີ່ສາມາດຫັກອອກໄດ້ (ຄິດໄລ່ຕໍ່ໜຶ່ງຫົວໜ່ວຍສິນຄ້າ): ຜູ້ແຈ້ງພາສີຕ້ອງອີງໃສ່ ລະບຽບກົດໝາຍພາສີ ແລະ ບົດແນະນໍາຂອງກົມພາສີ.
  + ບ້ວງເງິນກໍາໄລ ແລະ ລາຍຈ່າຍຄຸ້ມຄອງລວມ: ຜູ້ແຈ້ງພາສີຕ້ອງຄິດໄລ່ ອັດຕາສ່ວນຮ້ອຍທຽບໃສ່ລາຄາຂາຍ ແລະ ແຈ້ງລົງໃນຫ້ອງອັດຕາສ່ວນຮ້ອຍ ທຽບໃສ່ລາຄາຂາຍ.
• ມູນຄ່າແຈ້ງພາສີສິນຄ້າທີ່ກໍາລັງປະເມີນ ພາຍຫຼັງມີການຫັກລົບເປັນເງິນກີບ: ແມ່ນລາຄາຂາຍພາຍໃນຕະຫຼາດ ສປປລາວ ລົບໃຫ້ບັນດາມູນຄ່າທີ່ສາມາດຫັກອອກໄດ້.
• ອະທິບາຍບັນດາມູນຄ່າທີ່ສາມາດຫັກອອກໄດ້: ແຈ້ງລາຍລະອຽດວິທີການຄິດໄລ່ຫັກລົບ ໃຫ້ສອດຄ່ອງກັບລະບຽບກົດໝາຍ, ແຫຼ່ງຂໍ້ມູນທີ່ເປັນຕົວເລກໃຊ້ອ້າງອີງ ແລະອື່ນໆ.
• ເອກະສານອ້າງອີງຄັດຕິດ: ໃຫ້ແຈ້ງຊື່ບັນດາເອກະສານອ້າງອີງ ທີ່ໄດ້ນໍາໃຊ້ເພື່ອປະເມີນມູນຄ່າແຈ້ງພາສີຂາເຂົ້າ ແລະ ຄັດຕິດໃບແຈ້ງມູນຄ່າແຈ້ງພາສີຂາເຂົ້າ.
• ການຢັ້ງຢືນຂອງຜູ້ແຈ້ງພາສີ: ຂຽນວັນເດືອນປີ ແລະ ລົງລາຍເຊັນ, ຊື່ ແລະ ນາມສະກຸນ, ຖານະຂອງຜູ້ແຈ້ງ, ປະທັບກາບໍລິສັດລົງໃນໃບແຈ້ງມູນຄ່າແຈ້ງພາສີຂາເຂົ້າ. ຂ້າງເທິງ

ມາດຕາ 9. ການປະກອບຂໍ້ມູນລົງໃນໃບແຈ້ງມູນຄ່າແຈ້ງພາສີ ຕາມຫຼັກການຄໍານວນລາຄາສິນຄ້າ (GATT/ພສ-05)
   ການປະກອບຂໍ້ມູນລົງໃນໃບແຈ້ງມູນຄ່າແຈ້ງພາສີ ຕາມຫຼັກການຄໍານວນລາຄາສິນຄ້າ ແມ່ນປະຕິບັດດັ່ງນີ້:

• ຄັດຕິດໃບແຈ້ງພາສີເປັນລາຍລະອຽດ: ໃຫ້ແຈ້ງເລກທີ, ວັນເດືອນປີ ແລະ ດ່ານນໍາເຂົ້າຂອງໃບແຈ້ງພາສີເປັນລາຍລະອຽດ ທີ່ຄັດຕິດໃຫ້ຖືກຕ້ອງຄົບຖວ້ນ.
• ລໍາດັບໃບແຈ້ງມູນຄ່າແຈ້ງພາສີຂາເຂົ້າ: ໃນກໍລະນີມີ 1 ລາຍການໃຫ້ 1/1; ໃນກໍລະນີມີ 2 ລາຍການໃຫ້ໝາຍໃສ່ໃບທີ 1/2, ໃບທີ 2 ໃຫ້ໝາຍ 2/2.
• ເຫດຜົນທີ່ບໍ່ນໍາໃຊ້ຫຼັກການປະເມີນມູນຄ່າແຈ້ງພາສີ ກ່ອນຫນ້ານັ້ນ: ຜູ້ແຈ້ງພາສີຕ້ອງໃຫ້ເຫດຜົນ.
• ຊື່ສິນຄ້າທີ່ຕ້ອງການປະເມີນມູນຄ່າແຈ້ງພາສີ: ໃຫ້ແຈ້ງລະອຽດຊື່ສິນຄ້າ, ຂະໜາດຕ່າງໆ, ຄຸນລັກສະນະສິນຄ້າ ໂດຍໃຫ້ສອດຄ່ອງກັບສັນຍາຊື້-ຂາຍ.
  + ຂຽນເລກລໍາດັບລາຍການສິນຄ້າ ໃນໃບແຈ້ງພາສີເປັນລາຍລະອຽດ (ສິນຄ້າທີ່ຕ້ອງການກໍານົດມູນຄ່າແຈ້ງພາສີ) ລົງໃນໃບແຈ້ງມູນຄ່າແຈ້ງພາສີຂາເຂົ້າ.
• ຊື່, ທີ່ຢູ່ຂອງຫົວໜ່ວຍສະໜອງຂໍ້ມູນ ກ່ຽວກັບລາຍຈ່າຍໃນການຜະລິດ: ໃຫ້ແຈ້ງລະອຽດຊື່, ທີ່ຢູ່ຂອງຜູ້ຜະລິດ ຫຼື ຕາງໜ້າຂອງຜູ້ຜະລິດ, ທີ່ໄດ້ສະໜອງຂໍ້ມູນເພື່ອປະເມີນມູນຄ່າແຈ້ງພາສີ.
• ມູນຄ່າແຈ້ງພາສີຕາມຫຼັກການຄໍານວນລາຄາສິນຄ້າ: ແມ່ນມູນຄ່າລວມຂອງຕົ້ນທຶນການຜະລິດ ແລະ ຄ່າດັດປັບອື່ນໆ ຕາມລະບຽບກົດໝາຍ ແລະ ບົດແນະນໍາຂອງກົມພາສີ.
• ລະບົບບັນຊີທີ່ນໍາໃຊ້ ແລະ ບັນດາເອກະສານອ້າງອີງທີ່ນໍາໃຊ້: ໃຫ້ແຈ້ງລະອຽດກ່ຽວກັບລະບົບບັນຊີ, ເອກະສານອ້າງອີງທີ່ນໍາໃຊ້ ແລະ ບັນດາເອກະສານທີ່ນໍາໃຊ້ ເພື່ອປະເມີນມູນຄ່າແຈ້ງພາສີ.
• ການຢັ້ງຢືນຂອງຜູ້ແຈ້ງພາສີ: ຂຽນວັນເດືອນປີ ແລະ ລົງລາຍເຊັນ, ຊື່ ແລະ ນາມສະກຸນ, ຖານະຂອງຜູ້ແຈ້ງ, ປະທັບກາບໍລິສັດລົງໃນໃບແຈ້ງມູນຄ່າ ແຈ້ງພາສີຂາເຂົ້າ. ຂ້າງເທິງ

ມາດຕາ 10. ການປະກອບຂໍ້ມູນລົງໃນໃບແຈ້ງມູນຄ່າແຈ້ງພາສີ ຕາມຫຼັກການຢ້ອນຄືນທີ່ສົມເຫດສົມຜົນ(GATT/ພສ-06)
   ການປະກອບຂໍ້ມູນລົງໃນໃບແຈ້ງມູນຄ່າແຈ້ງພາສີ ຕາມຫຼັກການຢ້ອນຄືນທີ່ສົມເຫດສົມຜົນ ແມ່ນປະຕິບັດດັ່ງນີ້:

• ຄັດຕິດໃບແຈ້ງພາສີເປັນລາຍລະອຽດ: ໃຫ້ແຈ້ງເລກທີ, ວັນເດືອນປີ ແລະ ດ່ານນໍາເຂົ້າຂອງໃບແຈ້ງພາສີເປັນລາຍລະອຽດ ທີ່ຄັດຕິດໃຫ້ຖືກຕ້ອງຄົບຖວ້ນ.
• ລໍາດັບໃບແຈ້ງມູນຄ່າແຈ້ງພາສີຂາເຂົ້າ: ໃນກໍລະນີມີ 1 ລາຍການໃຫ້ 1/1; ໃນກໍລະນີມີ 2 ລາຍການໃຫ້ໝາຍໃສ່ໃບທີ 1/2, ໃບທີ 2 ໃຫ້ໝາຍ 2/2.
• ເຫດຜົນທີ່ບໍ່ນໍາໃຊ້ຫຼັກການປະເມີນມູນຄ່າແຈ້ງພາສີ ກ່ອນຫນ້ານັ້ນ: ຜູ້ແຈ້ງພາສີຕ້ອງໃຫ້ເຫດຜົນ.
• ຊື່ສິນຄ້າທີ່ຕ້ອງການປະເມີນມູນຄ່າແຈ້ງພາສີ: ໃຫ້ແຈ້ງລະອຽດຊື່ສິນຄ້າ, ຂະໜາດ, ຄຸນລັກສະນະສິນຄ້າ ໂດຍໃຫ້ສອດຄ່ອງກັບສັນຍາຊື້-ຂາຍ.
  + ຂຽນເລກລໍາດັບລາຍການສິນຄ້າ ໃນໃບແຈ້ງພາສີເປັນລາຍລະອຽດ (ສິນຄ້າທີ່ຕ້ອງການປະເມີນມູນຄ່າແຈ້ງພາສີ) ລົງໃນໃບແຈ້ງມູນຄ່າແຈ້ງພາສີຂາເຂົ້າ.
  + ບັນດາຂໍ້ມູນຖືກນໍາໃຊ້ ເພື່ອປະເມີນມູນຄ່າແຈ້ງພາສີ: ໃຫ້ແຈ້ງລະອຽດແຫຼ່ງທີ່ມາຂອງຂໍ້ມູນ ເພື່ອໃຊ້ໃນການປະເມີນມູນຄ່າແຈ້ງພາສີ.
  + ເອກະສານຢັ້ງຢືນຄັດຕິດ: ໃຫ້ແຈ້ງລະອຽດເອກະສານທີ່ນໍາມາອ້າງອີງ ເພື່ອປະເມີນມູນຄ່າແຈ້ງພາສີເຊັ່ນ: ໃບແຈ້ງພາສີເປັນລາຍລະອຽດ ທີ່ໄດ້ຜ່ານການປະເມີນມູນຄ່າແຈ້ງພາສີ ແຕ່ຫຼັກການທີ 1-5; ໃບບິນຂາຍສິນຄ້າຢູ່ພາຍໃນ ສປປລາວ ຂໍ້ມູນທີ່ໄດ້ຈາກຜູ້ຜະລິດ ແລະອື່ນໆ.
• ເລືອກຫຼັກການປະເມີນມູນຄ່າແຈ້ງພາສີ: ຜູ້ແຈ້ງພາສີຕ້ອງໄດ້ພິຈາລະນາເລືອກ ຫຼັກການປະເມີນມູນຄ່າແຈ້ງພາສີ ແຕ່ຫຼັກການທີ 1 ເຖິງ 5 ຢ່າງສົມເຫດສົມຜົນ ໂດຍສອດຄ່ອງກັບລະບຽບກົດໝາຍ ແລະ ບົດແນະນໍາຂອງກົມພາສີ.
• ອະທິບາຍ: ໃຫ້ອະທິບາຍລະອຽດເຫດຜົນໃນການເລືອກ ຫຼັກການປະເມີນມູນຄ່າແຈ້ງພາສີ.
• ການຢັ້ງຢືນຂອງຜູ້ແຈ້ງພາສີ: ຂຽນວັນເດືອນປີ ແລະ ລົງລາຍເຊັນ, ຊື່ ແລະ ນາມສະກຸນ, ຖານະຂອງຜູ້ແຈ້ງ, ປະທັບກາບໍລິສັດລົງໃນໃບແຈ້ງມູນຄ່າ ແຈ້ງພາສີຂາເຂົ້າ. ຂ້າງເທິງ

ມາດຕາ 11. ຄວາມຮັບຜິດຊອບຂອງເຈົ້າໜ້າທີ່ພາສີ ຢູ່ດ່ານພາສີ

• ເຈົ້າໜ້າທີ່ພາສີປະຈໍາດ່ານ ມີໜ້າທີ່ໃນການໃຫ້ຄໍາແນະນໍາແກ່ຜູ້ແຈ້ງພາສີ ໃນການປະກອບຂໍ້ມູນ ລົງໃນໃບແຈ້ງມູນຄ່າແຈ້ງພາສີ, ຄຸ້ມຄອງກວດກາມູນຄ່າ ແຈ້ງພາສີທີ່ຜູ້ແຈ້ງພາສີໄດ້ແຈ້ງລົງໃນແບບພິມ GATT/ພສ-01 ເຖິງແບບພິມ GATT/ພສ-06.
• ເຈົ້າໜ້າທີ່ພາສີຜູ້ຮັບເອກະສານ: ກວດກາບັນດາເນື້ອໃນຂໍ້ມູນທີ່ໄດ້ແຈ້ງລົງ ໃນໃບແຈ້ງມູນຄ່າແຈ້ງພາສີຂາເຂົ້າ ໃຫ້ຄົບຖ້ວນ, ບໍ່ໃຫ້ມີຮອຍຂີດຂ້າ ຫຼື ເປິເປື້ອນ. ຈາກນັ້ນໃຫ້ລົງລາຍເຊັນ ແລະ ຊື່ນາມສະກຸນ, ຈັດສົ່ງເອກະສານ ໃຫ້ເຈົ້າໜ້າທີ່ພາສີຜູ້ຮັບຜິດຊອບ ກວດກາມູນຄ່າແຈ້ງ.
• ເຈົ້າໜ້າທີ່ພາສີຜູ້ກວດກາມູນຄ່າແຈ້ງພາສີ: ກວດກາມູນຄ່າແຈ້ງພາສີ ໂດຍສົມທຽບກັບຖານຂໍ້ມູນ ແລະ ລະບຽບກົດໝາຍ, ແລ້ວຂຽນຄໍາເຫັນກ່ຽວກັບຜົນ ການກວດກາ ມູນຄ່າແຈ້ງພາສີລົງໃນໃບມູນຄ່າແຈ້ງພາສີຂາເຂົ້າ ສະບັບສໍາເນົາຂອງລັດຖະການພາສີ, ສ່ວນສະບັບຂອງຜູ້ແຈ້ງພາສີໃຫ້ລົງລາຍເຊັນ, ຊື່ ແລະ ນາມສະກຸນເທົ່ານັ້ນ.
• ການຂຽນຄໍາເຫັນດ້ານວິຊາການໃຫ້ປະຕິບັດຕາມເນື້ອໃນລະອຽດຄື:
  + ຮັບຮອງເບື້ອງຕົ້ນຕໍ່ມູນຄ່າແຈ້ງພາສີຂອງຜູ້ນໍາເຂົ້າ.
  + ບໍ່ຍອມຮັບມູນຄ່າແຈ້ງພາສີ ທີ່ຜູ້ນໍາເຂົ້າໄດ້ແຈ້ງ: ຕ້ອງປະເມີນຄືນມູນຄ່າແຈ້ງພາສີ ໂດຍໃຫ້ຂຽນລະອຽດຫຼັກການປະເມີນທີ່ຄວນຈະນໍາໃຊ້ຕາມລະບຽບການ.
  + ຮຽກຮ້ອງໃຫ້ມີການກວດສອບຄືນການແຈ້ງພາສີ, ພ້ອມດ້ວຍໃຫ້ເຫດຜົນ.
  + ບັນດາເນື້ອໃນທີ່ຕ້ອງໄດ້ສືບຕໍ່ກວດກາ.
  + ຂຽນຄໍາເຫັນວິຊາການອື່ນໆ.
  + ລົງລາຍເຊັນ ແລະ ຊື່ນາມສະກຸນ. ຂ້າງເທິງ

ມາດຕາ 12. ການຈັດຕັ້ງຜັນຂະຫຍາຍ
   ມອບໃຫ້ພະແນກຈັດຕັ້ງ, ບໍລິຫານ ແລະ ສູນຝຶກ ເປັນຜູ້ຈັດພິມແຈກຢາຍ ໃບແຈ້ງມູນຄ່າແຈ້ງພາສີ ໃນໄລຍະປະຕິບັດເບື້ອງຕົ້ນ ເພື່ອເປັນການແນະນໍາ ແລະ ໃນຕໍ່ໜ້າຈະສ້າງເປັນລະຫັດ ເພື່ອມອບໃຫ້ຜູ້ປະກອບການຈັດພິມເອງ.
   ມອບໃຫ້ບັນດາພະແນກການອ້ອມຂ້າງກົມພາສີ, ພາສີປະຈໍາເຂດ, ດ່ານພາສີຊາຍແດນໃນຂອບເຂດທົ່ວປະເທດ ຈັດຕັ້ງຜັນຂະຫຍາຍບົດແນະນໍາສະບັບນີ້ ໃຫ້ໄດ້ຮັບຜົນດີ, ພ້ອມທັງເອົາໃຈໃສ່ຈັດຕັ້ງ ຝຶກອົບຮົມເຜີຍແຜ່ ໃຫ້ພະນັກງານພາສີ ແລະ ຜູ້ປະກອບການໃຫ້ເຂົ້າໃຈເຊື່ອມຊຶມ ບົດແນະນໍາສະບັບນີ້ ເພື່ອພ້ອມກັນຈັດຕັ້ງປະຕິບັດ ໃຫ້ໄດ້ຮັບຜົນຕາມລະດັບຄາດໝາຍ. ຂ້າງເທິງ

ມາດຕາ 13. ຜົນສັກສິດ
   ບົດແນະນໍາສະບັບນີ້ມີຜົນສັກສິດນັບແຕ່ວັນລົງລາຍເຊັນເປັນຕົ້ນໄປ. ຂ້າງເທິງ

ຫົວຫນ້າກົມພາສີ
ສັນຕິພາບ ພົມວິຫານ

#	ຫົວຂໍ້	ດາວໂຫຼດ
1	Instruction on Completing the Customs Valuation Form No. 00266/CD	PDF
2	ບົດແນະນໍາ ກ່ຽວກັບ ການປະກອບ ໃບແຈ້ງມູນຄ່າແຈ້ງພາສີ ຂາເຂົ້າ ເລກທີ 00266/ກພສ	PDF

ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.

Your opinion matters!

ຂອບໃຈ ສຳລັບຄຳຄິດເຫັນຂອງທ່ານ.

Close