ໃນລະຫວ່າງວັນທີ 06 - 10 ກໍລະກົດ 2020 ທີ່ຫ້ອງປະຊຸມຂອງ ກະຊວງອຸດສາຫະກຳ ແລະ ການຄ້າ ໄດ້ມີການຈັດຝຶກອົບຮົມ ກ່ຽວກັບ ວຽກງານການຢັ້ງຢືນແຫຼ່ງກໍາເນີດສິນຄ້າ ພາຍໃຕ້ສິດທິພິເສດທາງການຄ້າ ໃຫ້ແກ່ ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ແລະ ຄະນະສະພາບໍລິຫານເຂດນິຄົມອຸດສາຫະກໍາ ແລະ ການຄ້າວຽງຈັນ -ໂນນທອງ ຕາມການສະເໜີຂອງພາກສ່ວນດັ່ງກ່າວ. ຊຸດຝຶກອົບຮົມຄັ້ງນີ້ໄດ້ດຳເນີນພາຍໃຕ້ການເປັນປະທານຂອງ ທ່ານ ນາງ ມະນີວອນ ວົງໄຊ ຮອງຫົວໜ້າກົມ ການນຳເຂົ້າ ແລະ ສົ່ງອອກ (ກຂອ) ໂດຍມີຜູ້ເຂົ້າຮ່ວມທັງໝົດ ຈຳນວນ 15 ທ່ານ.
ເນື້ອໃນຈິດໃຈຂອງການຝຶກອົບຮົມໃນຄັ້ງນີ້ແມ່ນ ເນັ້ນໜັກໃຫ້ຜູ້ເຂົ້າຮ່ວມ ຮັບຮູ້ ແລະ ເຂົ້າໃຈ ກ່ຽວກັບ ການຈັດຕັ້ງປະຕິບັດລະບຽບແຫຼ່ງກຳເນີດສິນຄ້າພາຍໃຕ້ຂອບສັນຍາຕ່າງໆ. ປະຈຸບັນໃບຢັ້ງຢືນແຫຼ່ງກຳເນີດສິນຄ້າທີ່ໄດ້ຮັບສິດທິພິເສດ ແບບພິມ (Form) ມີຈໍານວນ 13 ຊະນິດ ຄື: A, DFTP, SPT, CO KOREA, S, APTA, D, E, AI, AK, AJ, AANZ ແລະ AHK. ໃນນັ້ນ, ໄດ້ນຳສະເໜີ ກ່ຽວກັບ ວິທີການອອກໃບຢັ້ງຢືນແຫຼ່ງກຳເນີດສິນຄ້າທີ່ໄດ້ຮັບສິດທິພິເສດທີ່ ສປປ ລາວ ນຳໃຊ້ໃນປະຈຸບັນນີ້, ຊຶ່ງມີທັງໝົດ 03 ວິທີດ້ວຍກັນຄື: ການອອກໃບຢັ້ງຢືນແຫຼ່ງກຳເນີດສິນຄ້າທີ່ໄດ້ຮັບສິດທິພິເສດແບບປົກກະຕິ )Manual), ການອອກໃບຢັ້ງຢືນແຫຼ່ງກຳເນີດສິນຄ້າທີ່ໄດ້ຮັບສິດທິພິເສດຜ່ານທາງລະບົບເອເລັກໂຕຣນິກ (Electronic Certificate of Origin Issuing System: e-CO) ແລະ ການຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງ (Self-Certification).
ພ້ອມກັນນັ້ນ ຄະນະຮັບຜິດຊອບຝຶກອົບຮົມຍັງໄດ້ລົງເລິກວິທີໃນການກໍານົດເງື່ອນໄຂແຫຼ່ງກຳເນີດສິນຄ້າ ພາຍໃຕ້ສັນຍາການຄ້າຂອບຕ່າງໆ, ຂັ້ນຕອນໃນການອອກໃບຮັບຮອງສິນຄ້າໄດ້ແຫຼ່ງກຳເນີດ, ການອອກໃບຢັ້ງຢືນແຫຼ່ງກຳເນີດສິນຄ້າທີ່ໄດ້ຮັບສິດທິພິເສດ, ວິທີໃນການເກັບກຳສະຖິຕິ, ການສັງລວມຂໍ້ມູນລາຍລະອຽດຂອງບໍລິສັດ ແລະ ລະບຽບການຕ່າງໆ ທີ່ປິ່ນອ້ອມວຽກງານການອອກໃບຢັ້ງຢືນແຫຼ່ງກຳເນີດສິນຄ້າທີ່ໄດ້ຮັບສິດທິພິເສດ. ນອກຈາກການແນະນຳດ້ານທິດສະດີແລ້ວຄະນະຮັບຜິດຊອບຝຶກອົບຮົມຂອງ ກົມ ຂອ ກໍ່ຍັງໄດ້ແນະນຳວິທີ ແລະ ຂັ້ນ ຕອນຕ່າງໆໃນການລົງເບິ່ງຂະບວນການຜະລິດຕົວຈິງຂອງບັນດາ ໂຮງງານ/ບໍລິສັດ ທີ່ຈະມາຂໍອອກໃບຢັ້ງຢືນ ແຫຼ່ງກຳເນີດສິນຄ້າທີ່ໄດ້ຮັບສິດທິພິເສດ.
ພາຍຫຼັງທີ່ສຳເລັດການຝຶກອົບຮົມຄະນະຮັບຜິດຊອບຝຶກອົບຮົມຂອງ ກົມການນໍາເຂົ້າ ແລະ ສົ່ງອອກ ກໍ່ໄດ້ມີການປະເມີນຄືນ ດ້ວຍການໃຫ້ບັນດານັກສໍາມະນາກອນ ທົດລອງອອກໃບຢັ້ງຢືນແຫຼ່ງກໍາເນີດສິນຄ້າຈໍາລອງ ເພື່ອໃຫ້ໝັ້ນໃຈວ່າ ຫຼັງການຝຶກອົບຮົມ ແມ່ນໄດ້ກໍາແໜ້ນ ແລະ ເຂົ້າໃຈເລີກເຊິງ ທັງທິດສະດີ ແລະ ການປະຕິບັດຕົວຈິງ ໃນການອອກໃບຢັ້ງຢືນແຫຼ່ງສິນຄ້າປະເພດຕ່າງໆ ຕາມທີ່ໄດ້ຮຽນມາ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.