ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ
ກະຊວງການເງິນ
ກົມພາສີ ເລກທີ 1784/ກພສ
ນະຄອນຫລວງວຽງຈັນ, ວັນທີ 28 ມິຖຸນາ 2010
ແຈ້ງການ
ເຖິງ: ບັນດາຫົວຫນ້າພາສີປະຈໍາເຂດ, ດ່ານພາສີຊາຍແດນໃນທົ່ວປະເທດ.
ເລື່ອງ: ການຄຸ້ມຄອງອອກໃບແຈ້ງພາສີຄໍ້າປະກັນ.
- ອີງຕາມກົດໝາຍພາສີ ສະບັບເລກທີ 05/ສພຊ, ລົງວັນທີ 20.5.2005.
- ອີງຕາມ ດຳລັດນາຍົກລັດຖະມົນຕີ ສະບັບເລກທີ 362/ນຍ, ລົງວັນທີ 19.10.2007.
- ອີງຕາມແຈ້ງການແນະນຳກົມພາສີ ສະບັບເລກທີ 0204/ກພສ, ລົງວັນທີ 31.10.2007 ວ່າດ້ວຍການນໍາໃຊ້ໃບແຈ້ງພາສີຄໍ້າປະກັນ.
ຜ່ານມາກົມພາສີສັງເກດເຫັນວ່າ ການຈັດຕັ້ງປະຕິບັດລະບຽບການກ່ຽວກັບການຄຸ້ມຄອງ ໃບແຈ້ງພາສີຄໍ້າປະກັນຂອງ ບັນດາດ່ານພາສີຊາຍແດນຍັງບໍ່ທັນໄດ້ດີເທົ່າທີ່ ຄວນຊຶ່ງສະແດງອອກຍັງມີການຄ້າງຊຳລະ ເປັນຈຳນວນຫລາຍ, ຂາດກົນໄກການເລັ່ງທວງຢ່າງເປັນລະບົບ ແລະ ເຮັດເປັນປະຈຳ ແລະ ບາງດ່ານຍັງມີລັກສະນະ ເອື້ອຍອີງໃສ່ແຕ່ກົມພາສີ. ເພື່ອແກ້ໄຂບັນຫາດັ່ງກ່າວ ທັງຮັບປະກັນການຈັດຕັ້ງລະບຽບກົດໝາຍ, ກົມພາສີອອກແຈ້ງການຄື:
- ມອບໃຫ້ຫົວໜ້າດ່ານພາສີຊາຍແດນ ເປັນຜູ້ພິຈາລະນາການສະເໜີຂໍນຳສິນຄ້າ, ເຄື່ອງຂອງອອກຈາກສາງ ຫຼື ດ່ານພາສີກ່ອນການແຈ້ງພາສີເປັນລາຍລະອຽດ ຕາມເງື່ອນໄຂທີ່ກຳນົດໄວ້ໃນມາດຕາ 7 ຂອງດໍາລັດນາຍົກລັດຖະມົນຕີ ສະບັບເລກທີ 362/ນຍ ແລະ ແຈ້ງການແນະນຳກົມພາສີ ສະບັບເລກທີ 0204/ກພສ, ລົງວັນທີ 31.10.2007, ພາຍຫລັງທີ່ໄດ້ອະນຸຍາດໃຫ້ສິນຄ້າ, ເຄື່ອງຂອງອອກກ່ອນແລ້ວ ຕ້ອງໄດ້ເອົາໃຈໃສ່ເລັ່ງທວງການຊຳລະ.
ຖ້າພົບຂໍ້ຫຍຸ້ງຍາກໃນການຈັດຕັ້ງປະຕິບັດໃຫ້ລາຍງານຂໍຄຳເຫັນນຳພາສີປະຈຳເຂດ ແລະ ກົມພາສີເປັນແຕ່ລະຂັ້ນເພື່ອມີທິດຊີ້ນຳ.
- ພາຫະນະທຸກປະເພດທີ່ຕ້ອງການອອກກ່ອນ ຕ້ອງໄດ້ວາງເງິນຄ້ຳປະກັນ 120% ຂອງຄ່າພາສີ-ອາກອນຕາມອັດຕາສາລະບານ ຍົກເວັ້ນມີຄຳແນະນຳຈາກ ກົມພາສີໃນການຈັດຕັ້ງປະຕິບັດເປັນກໍລະນີພິເສດ.
- ທຸກການປະຕິບັດທີ່ບໍ່ສອດຄ່ອງກັບເນື້ອໃນແຈ້ງການສະບັບນີ້ ແມ່ນຄວາມຮັບຜິດຊອບໂດຍກົງຂອງເຈົ້າຫນ້າທີ່ພາສີແຕ່ລະຂັ້ນ.
- ມອບໃຫ້ບັນດາພາສີປະຈຳເຂດລົງຊີ້ນຳດ່ານພາສີຊາຍແດນທີ່ຂື້ນກັບເຂດຕົນ ກວດກາຄືນໃບແຈ້ງພາສີຄ້ຳປະກັນ ບ85, ບ86 ທີ່ຄ້າງຊໍາລະພ້ອມທັງຈັດຕັ້ງ ການເລັ່ງທວງໃຫ້ສໍາເລັດ ໃນສົກປີ 2009-2010.
- ແຈ້ງການສະບັບນີ້ມີຜົນສັກສິດນັບແຕ່ມື້ລົງລາຍເຊັນເປັນຕົ້ນໄປ.
ດັ່ງນັ້ນ, ຈຶ່ງແຈ້ງມາຍັງບັນດາທ່ານເພື່ອຊາບ ແລະ ພ້ອມກັນຈັດຕັ້ງປະຕິບັດຢ່າງເຂັ້ມງວດ.
ຫົວໜ້າກົມພາສີ
ອາດສະພັງທອງ ສີພັນດອນ
ສຳເນົາ:
- ຄະນະກົມພາສີ 1 ສະບັບ ເພື່ອຕິດຕາມກວດກາ
- ພະແນກການກົມພາສີ 1 ສະບັບ ເພື່ອຊາບ ແລະ ປະສານສົມທົບ
- ເກັບມ້ຽນສຳເນົາ 1 ສະບັບ
| # | ຫົວຂໍ້ | ດາວໂຫຼດ |
|---|---|---|
| 1 | Notification on the administration of the custom declaration guarantee No. 1784/CD |  PDF |
| 2 | ແຈ້ງການ ກ່ຽວກັບ ການຄຸ້ມຄອງອອກ ໃບແຈ້ງພາສີຄໍ້າປະກັນ ເລກທີ 1784/ກພສ |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.