ອີງຕາມແຫຼ່ງຂ່າວຈາກເວັບໄຊກົມອາຫານ ແລະ ຢາ, ກະຊວງສາທາລະນະສຸກ (http://www.fdd.gov.la) ໃຫ້ຮູ້ວ່າ ໃນວັນທີ 23 ຕຸລາ 2020 ຜ່ານມາ ກະຊວງສາທາລະນະສຸກ ໄດ້ຈັດກອງປະຊຸມ ປຶກສາຫາລື ກ່ຽວກັບວຽກງານການຄຸ້ມຄອງຊັບພະຍາກອນທຳມະຊາດທີ່ເປັນຢາຂຶ້ນ ທີ່ໂຮງແຮມວຽງຈັນພຣາຊາ, ນະຄອນຫຼວງວຽງຈັນ. ໃຫ້ກຽດເປັນປະທານຮ່ວມໂດຍ ທ່ານ ຮສ. ດຣ. ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ທ່ານ ນາງ ບຸນຄຳ ວໍລະຈິດ ຮອງລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ແລະ ທ່ານ ປອ. ດຣ. ບຸນແຝງ ພູມມະໄລສິດ ຮອງລັດຖະມົນຕີ ກະຊວງສາທາລະນະສຸກ ພ້ອມດ້ວຍຜູ້ເຂົ້າຮ່ວມທີ່ຕາງໜ້າຈາກຂະແໜງການກ່ຽວຂ້ອງລວມທັງໝົດ 31 ທ່ານ.
ຈຸດປະສົງກອງປະຊຸມ ແມ່ນປຶກສາຫາລື ແລະ ຄົ້ນຄ້ວາຊອກຫາກົນໄກການປະສານງານລະຫວ່າງຂະແໜງ ການທີ່ກ່ຽວຂ້ອງ ໃນການຄຸ້ມຄອງຊັບພະຍາກອນທຳມະຊາດທີ່ເປັນຢາ, ທົບທວນຄືນບັນດາລະບຽບການ, ແຈ້ງການ ແລະ ນິຕິກຳ, ການກຳນົດບັນຊີລາຍການລະຫວ່າງຊັບພະຍາກອນທຳມະຊາດທີ່ເປັນຢາ ແລະ ບັນຊີເຄື່ອງປ່າຂອງດົງ, ການອອກອະນຸຍາດຂຸດຄົ້ນ, ການອອກອະນຸຍາດສ້າງຕັ້ງໂຮງງານ ຫຼື ຫ້ອງປຸງແຕ່ງ, ການນຳເຂົ້າ ແລະ ນຳໃຊ້ເຄມີທີ່ບໍ່ໄດ້ຮັບອະນຸຍາດ ທີ່ເຮັດໃຫ້ມີຜົນກະທົບຕໍ່ສິ່ງແວດລ້ອມ.
ພາຍຫຼັງແຕ່ລະຂະແໜງການໄດ້ປຶກສາຫາລືແລ້ວ ເຫັນດີເປັນເອກະພາບກັນວ່າ: ຄວນປັບປຸງກົນໄກການປະສານງານໃຫ້ໄປລວງດຽວກັນໂດຍປະຕິບັດຕາມນິຕິກຳ, ຫຼີກເວັ້ນການຊ້ຳຊ້ອນກັນ ໂດຍສະເພາະແມ່ນບັນຊີລາຍການຊັບພະຍາກອນທຳມະຊາດທີ່ເປັນຢາ ແລະ ເຄື່ອງປ່າຂອງດົງ, ກະຊວງສາທາລະນະສຸກ ຈະແຕ່ງຕັ້ງຄະນະກຳມະການຄຸ້ມຄອງຊັບພະຍາກອນທຳມະຊາດທີ່ເປັນຢາ ເຊິ່ງຄະນະດັ່ງກ່າວ ມີໜ້າທີ່ເບິ່ງຄືນບັນດານິຕິກຳ, ກົນໄກການປະສານງານ ແລະ ລົງເລິກເບິ່ງຄືນບັນດາໂຮງງານ, ຫ້ອງປຸງແຕ່ງທີ່ບໍ່ໄດ້ມາດຕະຖານ ແລະ ການຈັດຕັ້ງປະຕິບັດຜ່ານມາ ເພື່ອເປັນບ່ອນອີງໃນການປັບປຸງນິຕິກຳ ແລະ ສະເໜີໃຫ້ກົມອາຫານ ແລະ ຢາ, ກົມປ່າໄມ້, ກົມອຸດສາຫະກຳ ແລະ ຫັດຖະກໍາ, ກົມທະບຽນ ແລະ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ຄົ້ນຄ້ວາດ້ານວິຊາການກ່ອນ ຈິ່ງສະເໜີຕໍ່ທິດທາງແກ້ໄຂທີ່ຈະມີກອງປະຊຸມເຖິງທ່ານ ນາຍົກ-ຮອງນາຍົກ ກ່ຽວກັບບັນຫາການຄຸ້ມຄອງຊັບພະຍາກອນທຳມະຊາດທີ່ເປັນຢາ ເພື່ອຂໍທິດຊີ້ນຳ.
ໃນຕອນທ້າຍຂອງກອງປະຊຸມ, ທ່ານ ຮສ. ດຣ. ບຸນກອງ ສີຫາວົງ, ລັດຖະມົນຕີ ກະຊວງສາທາລະນະສຸກ ໄດ້ກ່າວແນະນໍາເພີ່ມເຕີບໃນທີ່ປະຊຸມ ກ່ຽວກັບຫຼາຍໆ ບັນຫາທີ່ຕິດພັນກັນຄື: ການປູກ, ການລ້ຽງ, ເກັບກູ້, ຜະລິດ, ຈຳໜ່າຍ . . . ເຊິ່ງຜ່ານມາຈົນເຖິງປະຈຸບັນ ແມ່ນມີນິຕິກຳຫຼາຍສະບັບທີ່ທັບຊ້ອນກັນດ້ານເນື້ອໃນ ຈົນເປັນເຫດໃຫ້ ການຈັດຕັ້ງປະຕິບັດຍັງມີຄວາມສັບສົນ. ສະນັ້ນ, ຈຶ່ງຮຽກຮ້ອງໃຫ້ແຕ່ຂະແໜງການເຮັດວຽກຮ່ວມກັນຢ່າງຈິງຈັງ ເອົາໃຈໃສ່ປັບປຸງຈຸດໃດ ທີ່ຍັງມີຄໍາເຫັນຕ່າງກັນ ກະໃຫ້ຮ່ວມກັນແກ້ໄຂ ໃຫ້ແບ່ງຂອບເຂດຮັບຜິດຊອບຊັດເຈນ ເພື່ອອໍານວຍຄວາມສະດວກໃຫ້ຜູ້ດໍາເນີນທຸລະກິດ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.