ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ

ກະຊວງອຸດສາຫະກໍາ ແລະ ການຄ້າ

ເລກທີ 1206/ອຄ.ກຂອ

ນະຄອນຫຼວງວຽງຈັນ

ວັນທີ 25 ທັນວາ 2020       

 

ຂໍ້ຕົກລົງ

ວ່າດ້ວຍ ການຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງ ພາຍ​ໃຕ້​ສັນ​ຍາ​ການ​ຄ້າ​ດ້ານ​ສິນ​ຄ້າອາຊຽນ

  • ອີງຕາມ ດໍາລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ກະຊວງອຸດສາຫະກໍາ ແລະ ການຄ້າ ສະບັບເລກທີ 230/ນຍ, ລົງວັນທີ 24 ກໍລະກົດ 2017;
  • ອີງຕາມ ດໍາລັດວ່າດ້ວຍແຫຼ່ງກໍາເນີດສິນຄ້ານໍາເຂົ້າ ແລະ ສົ່ງອອກ ສະບັບເລກທີ 228/ນຍ, ລົງວັນທີ 22 ເມສາ 2010;
  • ອີງຕາມ ໜັງສືສະເໜີຂອງ ກົມການນໍາເຂົ້າ ແລະ ສົ່ງອອກ ສະບັບເລກທີ 3523/ກຂອ.ຄຄ, ລົງວັນທີ 18 ພະຈິກ 2020.

ລັດຖະມົນຕີ ກະຊວງອຸດສາຫະກໍາ ແລະ ການຄ້າ ອອກຂໍ້ຕົກລົງ:

ໝວດທີ 1
ບົດບັນຍັດທົ່ວໄປ

ມາດຕາ 1 ຈຸດປະສົງ

  ຂໍ້ຕົກລົງສະບັບນີ້ ກໍານົດຫຼັກການ ແລະ ລະບຽບການ ກ່ຽວກັບ ການຄຸ້ມຄອງການຈັດຕັ້ງປະຕິບັດວຽກງານຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງ ພາຍໃຕ້ສັນຍາການຄ້າດ້ານສິນຄ້າອາຊຽນ ເພື່ອອຳນວຍຄວາມສະດວກໃຫ້ຜູ້ສົ່ງອອກສິນຄ້າ ແນໃສ່ເຮັດໃຫ້ການຈັດຕັ້ງປະຕິບັດວຽກງານດັ່ງກ່າວ ຖືກຕ້ອງ, ສອດຄ່ອງກັບກົດໝາຍ ແລະ ລະບຽບການຂອງ ສປປ ລາວ ແລະ ອາຊຽນ.

ມາດຕາ 2 ການຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງ ພາຍໃຕ້ສັນຍາການຄ້າດ້ານສິນຄ້າອາຊຽນ

  ການຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງ ພາຍໃຕ້ສັນຍາການຄ້າດ້ານສິນຄ້າອາຊຽນ ແມ່ນການດໍາເນີນຂັ້ນຕອນຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງຂອງຜູ້ສົ່ງອອກສິນຄ້າ ໂດຍນຳໃຊ້ໃບແຈ້ງລາຍລະອຽດແຫຼ່ງກໍາເນີດສິນຄ້າ ໃນການສົ່ງອອກແຕ່ລະຄັ້ງຕາມລະບຽບແຫຼ່ງກໍາເນີດສິນຄ້າ ພາຍໃຕ້ສັນຍາການຄ້າດ້ານສິນຄ້າອາຊຽນ.

ມາດຕາ 3  ການອະທິບາຍຄໍາສັບ

  ຄໍາສັບທີ່ນໍາໃຊ້ໃນຂໍ້ຕົກລົງສະບັບນີ້ ມີຄວາມໝາຍ ດັ່ງນີ້:

  1. ຜູ້ສົ່ງອອກ ໝາຍເຖິງ ໂຮງງານຜະລິດ ແລະ ບໍລິສັດນໍາເຂົ້າ-ສົ່ງອອກ ທີ່ມີສິດສົ່ງອອກສິນຄ້າ;
  2. ຜູ້ສົ່ງອອກທີ່​ໄດ້​ຮັບ​ສິດຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ (Certified Exporter: CE) ໝາຍ​ເຖິງ ຜູ້ສົ່ງອອກທີ່ໄດ້ຮັບອະນຸຍາດຈາກ ກົມການນຳເຂົ້າ ແລະ ສົ່ງອອກ ໃຫ້ຢັ້ງ​ຢືນແຫຼ່ງກໍາເນີດສິນຄ້າດ້ວຍຕົນເອງພາຍໃຕ້ສັນຍາການຄ້າດ້ານສິນຄ້າອາຊຽນ (ASEAN Trade in Goods Agreement: ATIGA);
  3. ໃບຢັ້ງຢືນສິດ (Certificate of Certified Exporter) ໝາຍ​ເຖິງ ເອກະສານທາງການ ທີ່ຢັ້ງຢືນການໄດ້ຮັບສິດເປັນຜູ້ສົ່ງອອກ ທີ່ສາມາດຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງ ພາຍໃຕ້ສັນຍາການຄ້າດ້ານສິນຄ້າອາຊຽນ;
  4. ໃບແຈ້ງລາຍລະອຽດແຫຼ່ງກໍາເນີດສິນຄ້າ (Origin Declaration) ໝາຍເຖິງ ເອກະສານແຈ້ງຂໍ້ມູນລະອຽດ ກ່ຽວກັບ ແຫຼ່ງກໍາເນີດຂອງສິນຄ້າທີ່ຜູ້ສົ່ງອອກດຳເນີນການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ  ເພື່ອແຈ້ງຕໍ່ເຈົ້າໜ້າທີ່ພາສີຂອງປະເທດນຳເຂົ້າ ໃນການຂໍນໍາໃຊ້ສິດທິພິເສດ ຫຼຸດຜ່ອນ ຫຼື ຍົກເວັ້ນ ອັດຕາພາສີນໍາເຂົ້າ ຕາມທີ່ໄດ້ກໍານົດໄວ້ໃນລະບຽບຂັ້ນຕອນການອອກໃບຢັ້ງຢືນແຫຼ່ງກໍາເນີດສິນຄ້າພາຍໃຕ້ສັນຍາການຄ້າດ້ານສິນຄ້າອາຊຽນ;
  5. ການຢັ້ງ​ຢືນ​ແຫຼ່ງ​ກຳ​ເນີດ​ສິນ​ຄ້າດ້ວຍ​ຕົນ​ເອງ​ ໝາຍ​ເຖິງ ການຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງ  ພາຍ​ໃຕ້​ສັນ​ຍາ​ການ​ຄ້າ​ດ້ານ​ສິນ​ຄ້າອາຊຽນ.

ມາດຕາ 4  ຂອບເຂດການນໍາໃຊ້

  ຂໍ້ຕົກລົງສະບັບນີ້ ນໍາໃຊ້ສໍາລັບ ບຸກຄົນ ແລະ ນິຕິບຸກຄົນ ທັງພາຍໃນ ແລະ ຕ່າງປະເທດ ທີ່ດໍາເນີນການຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງ ພາຍໃຕ້ສັນຍາການຄ້າດ້ານສິນຄ້າອາຊຽນ ຢູ່ ສປປ ລາວ.

ໝວດທີ 2
ການດຳເນີນການຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງ

ມາດຕາ 5  ການດຳເນີນການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ  

  ການດຳເນີນການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ແມ່ນຜູ້ສົ່ງອອກເປັນຜູ້ດຳເນີນການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ຕາມໃບຢັ້ງຢືນສິດ ທີ່ອອກໃຫ້ໂດຍ ກົມການນຳເຂົ້າ ແລະ ສົ່ງອອກ ຊຶ່ງຜູ້ສົ່ງອອກບໍ່ຕ້ອງສະເໜີເຖິງຫ້ອງການເຈົ້າໜ້າທີ່ຢັ້ງຢືນແຫຼ່ງກຳເນີດສິນຄ້າທີ່ໄດ້ຮັບສິດທິພິເສດ ໃນການສົ່ງອອກສິນຄ້າແຕ່ລະຄັ້ງ.

  ການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ໃນການສົ່ງອອກສິນຄ້າແຕ່ລະຄັ້ງ ຕ້ອງມີໃບຢັ້ງຢືນສິດທີ່ຍັງມີຜົນບັງຄັບໃຊ້ຕາມລະບຽບກົດໝາຍ ແລະ  ຕ້ອງມີໃບແຈ້ງລາຍລະອຽດແຫຼ່ງກຳເນີດສິນຄ້າ ​ທີ່​ປະ​ກອບ​ມີຂໍ້ມູນ ດັ່ງນີ້:

  1. ຂໍ້ມູນ ແລະ ລະຫັດຜູ້ສົ່ງອອກທີ່ໄດ້ຮັບສິດຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ;
  2. ຊື່ຂອງສິນຄ້າ, ລະຫັດສິນຄ້າຕາມສາລະບານອັດຕາພາສີ (HS Code) ໃນລະດັບ 06 ຕົວເລກ, ຈຳນວນ ແລະ ປະລິມານຂອງສິນຄ້າ;
  3. ເງື່ອນໄຂແຫຼ່ງກໍາເນີດສິນຄ້າ ແລະ ປະເທດທີ່ໄດ້ແຫຼ່ງກໍາເນີດຂອງສິນຄ້າ;
  4. ລາຄາ FOB ໃນກໍລະນີນໍາໃຊ້ກົດການສ້າງມູນຄ່າເພີ່ມໃນພາກພື້ນ;
  5. ເຄື່ອງໝາຍການຄ້າ (ຖ້າມີ);
  6. ໃນກໍລະນີຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງແບບຕໍ່ເນື່ອງ (Back-to-Back) ຕ້ອງມີ ເລກທີ ແລະ ວັນທີ ຂອງເອກະສານຢັ້ງຢືນແຫຼ່ງກຳເນີດສິນຄ້າ ສະບັບຕົ້ນ ແລະ ລະຫັດຜູ້ສົ່ງອອກທີ່ໄດ້ຮັບສິດຢັ້ງຢືນແຫຼ່ງກຳເນີດສິນຄ້າດ້ວຍຕົນເອງຂອງປະເທດຜູ້ສົ່ງອອກທໍາອິດ.

ມາດຕາ 6  ການສະ​ເໜີ​ອອກ​ໃບ​​ຢັັ້ງຢືນສິດ

  ຜູ້ສົ່ງອອກ ທີ່​ມີ​ຈຸດ​ປະ​ສົງດຳເນີນການຢັ້ງ​ຢືນ​ແຫຼ່ງ​ກຳ​ເນີດສິນຄ້າ​ດ້ວຍ​ຕົນ​ເອງ​ ພາຍໃຕ້ສັນຍາການຄ້າດ້ານສິນຄ້າອາຊຽນ ຕ້ອງມີເງື່ອນໄຂຄົບຖ້ວນ ຕາມທີ່ກຳນົດໄວ້ໃນມາດຕາ 7 ແລະ ຕ້ອງປະກອບເອກະສານ ຕາມທີ່ກຳນົດໃນມາດຕາ 8 ຂອງຂໍ້ຕົກລົງສະບັບນີ້ ສະເໜີຕໍ່ ກົມການນໍາເຂົ້າ ແລະ ສົ່ງອອກ ເພື່ອພິຈາລະນາອອກໃບຢັ້ງຢືນສິດ.

ມາດຕາ 7  ເງື່ອນໄຂຂອງຜູ້ສະເໜີອອກໃບຢັ້ງຢືນສິດ

  ຜູ້ສົ່ງອອກ ທີ່ມີຈຸດປະສົງສະເໜີອອກໃບຢັ້ງຢືນສິດ ຕ້ອງມີເງື່ອນໄຂ ດັ່ງນີ້:

  1. ເປັນ​ຜູ້​ສົ່ງ​ອອກ​ສິນ​ຄ້າ​ທີ່​ຖືກ​ຕ້ອງ​ຕາມ​ກົດໝາຍ ແລະ ລະ​ບຽບ​ການ​ຂອງ ສ​ປ​ປ ລາວ;
  2. ຮັບຮູ້ ແລະ ເຂົ້າໃຈລະບຽບແຫຼ່ງກໍາເນີດສິນຄ້າຂອງສັນຍາການຄ້າດ້ານສິນຄ້າອາຊຽນ;
  3. ມີປະສົບການໃນການສົ່ງອອກສິນຄ້າ ແລະ ນໍາໃຊ້ ແບບພິມ ດີ (Form D) ຢ່າງໜ້ອຍ ສິບ ຄັ້ງ;
  4. ບໍ່ມີປະຫວັດສໍ້ໂກງໃນການຢັ້ງຢືນແຫຼ່ງກຳເນີດສິນຄ້າ;
  5. ຕ້ອງມີລະບົບການບັນທຶກ ແລະ ການຕິດຕາມຂໍ້ມູນ ກ່ຽວ​ກັບ ການຢັ້ງ​ຢືນ​ແຫຼ່ງ​ກຳ​ເນີດ​ສິ​ນ​ຄ້າທີ່ລະອຽດຊັດເຈນ ຢ່າງໜ້ອຍ ສາມ ປີ;
  6. ປະຕິບັດພັນທະຕ່າງໆຕໍ່ລັດ ຄົບຖ້ວນ ແລະ ເປັນປົກກະຕິ.

ມາດຕາ 8  ເອກະສານປະກອບການສະເໜີອອກໃບຢັ້ງຢືນສິດ

  ການປະກອບເອກະສານເພື່ອສະເໜີອອກໃບຢັ້ງຢືນສິດ ມີເອກະສານ ດັ່ງນີ້:

  1. ຄໍາຮ້ອງ ຕາມແບບພິມທີ່ ກົມການນໍາເຂົ້າ ແລະ ສົ່ງອອກ ໄດ້ກໍານົດ;
  2. ຂໍ້ມູນຜູ້ສົ່ງອອກ ຕາມແບບພິມທີ່ ກົມການນໍາເຂົ້າ ແລະ ສົ່ງອອກ ໄດ້ກໍານົດ;
  3. ສຳ​ເນົາໃບຮັບຮອງສິນຄ້າໄດ້ແຫຼ່ງກຳເນີດ (Confirmation of Product Eligibility: CPE) ທີ່ອອກໃຫ້ໂດຍ ຫ້ອງການເຈົ້າໜ້າທີ່ຢັ້ງຢືນແຫຼ່ງກຳເນີດສິນຄ້າທີ່ໄດ້ຮັບສິດທິພິເສດ.

ມາດຕາ 9  ການພິຈາລະນາອອກໃບຢັ້ງຢືນສິດ

  ພາຍຫຼັງທີ່ໄດ້ຮັບເອກະສານຄົບຖ້ວນ ແລະ ຖືກຕ້ອງ, ກົມການນໍາເຂົ້າ ແລະ ສົ່ງອອກ ຕ້ອງອອກໃບຢັ້ງຢືນສິດພາຍໃນ ສອງ ວັນລັດຖະການ. ຫຼັງຈາກ​ອອກ​ໃບ​ຢັ້ງ​ຢືນ​ສິດ, ກົມການນໍາເຂົ້າ ແລະ ສົ່ງອອກ ຕ້ອງບັນທຶກຂໍ້ມູນຜູ້ສົ່ງອອກທີ່ໄດ້ຮັບສິດ ເຂົ້າໃນລະບົບຖານຂໍ້ມູນການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງຂອງອາຊຽນ.

  ກໍລະນີເອກະສານບໍ່ຄົບຖ້ວນ ຫຼື ບໍ່ຖືກຕ້ອງ, ກົມການນໍາເຂົ້າ ແລະ ສົ່ງອອກ ຕ້ອງແຈ້ງໃຫ້ຜູ້ສະເໜີ ຊາບ ພາຍໃນ ໜຶ່ງ ວັນລັດຖະການ ນັບແຕ່ວັນທີ່ໄດ້ຮັບເອກະສານ ພ້ອມທັງໃຫ້ຄໍາແນະນໍາ ເພື່ອໃຫ້ຜູ້ສະເໜີແກ້ໄຂໃຫ້ຖືກຕ້ອງ ແລະ ຄົບຖ້ວນ.

  ກໍລະນີບໍ່ສາມາດອອກໃບຢັ້ງຢືນສິດ,  ກົມການນໍາເຂົ້າ ແລະ ສົ່ງອອກ ຕ້ອງແຈ້ງໃຫ້ຜູ້ສະເໜີຊາບ ພາຍໃນ ສອງ ວັນລັດຖະການ ນັບແຕ່ວັນທີ່ໄດ້ຮັບເອກະສານ.

ມາດ​ຕາ 10  ອາ​ຍຸ ແລະ ການ​ຕໍ່ອາ​ຍຸ​ໃບ​ຢັ້ງ​ຢືນ​ສິດ

  ໃບ​ຢັ້ງ​ຢືນ​ສິດ ມີ​ອາ​ຍຸ​ນຳ​ໃຊ້ ສອງ ປີ ແລະ ສາ​ມາດຕໍ່​ໄດ້ ໂດຍບໍ່ຈຳກັດຈຳນວນຄັ້ງ.

  ການສະເໜີຕໍ່ອາຍຸແຕ່ລະຄັ້ງ ໃຫ້ປະກອບເອກະສານສະເໜີຕໍ່ ກົມການນຳເຂົ້າ ແລະ ສົ່ງອອກ ກ່ອນໃບຢັ້ງຢືນສິດຈະໝົດອາຍຸ ສາມສິບ ວັນ ໂດຍປະກອບມີເອກະສານ ດັ່ງນີ້: 

  1.  ຄໍາຮ້ອງຂໍ​ຕໍ່ອາຍຸໃບຢັ້ງຢືນສິດ ຕາມແບບພິມທີ່ ກົມການນໍາເຂົ້າ ແລະ ສົ່ງອອກ ໄດ້ກໍານົດ;
  2.  ໃບ​ຢັ້ງ​ຢືນ​ສິດ ​ສະ​ບັບຕົ້ນ​;
  3. ສຳ​ເນົາໃບຮັບຮອງສິນຄ້າໄດ້ແຫຼ່ງກຳເນີດ ທີ່ອອກໃຫ້ໂດຍ ຫ້ອງການເຈົ້າໜ້າທີ່ຢັ້ງຢືນແຫຼ່ງກຳເນີດສິນຄ້າທີ່ໄດ້ຮັບສິດທິພິເສດ.

ໝວດທີ 3
ສິດ ແລະ ພັນທະຂອງຜູ້ສົ່ງອອກທີ່​ໄດ້​ຮັບ​ສິດຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ

ມາດຕາ 11  ສິດຂອງຜູ້ສົ່ງອອກທີ່​ໄດ້​ຮັບ​ສິດຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ

  ຜູ້ສົ່ງອອກທີ່​ໄດ້​ຮັບ​ສິດຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ມີສິດ ດັ່ງນີ້:

  1. ຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງ ໃນການສົ່ງອອກສິນຄ້າໄປບັນດາປະເທດສະມາຊິກອາຊຽນ ຕາມລາຍການສິນຄ້າທີ່ກຳນົດໄວ້ໃນໃບຢັ້ງຢືນສິດ;
  2. ສະເໜີປັບປຸງຂໍ້ມູນຂອງໃບຢັ້ງຢືນສິດ ໃນກໍລະນີມີການປ່ຽນແປງຂໍ້ມູນ ກ່ຽວກັບ ແຫຼ່ງກໍາເນີດສິນຄ້າ  ຫຼື ຕ້ອງການເພີ່ມລາຍການສິນຄ້າສົ່ງອອກ;     
  3. ໄດ້ຮັບສິດອື່ນຕາມທີ່ກຳນົດໄວ້ໃນກົດໝາຍ ແລະ ລະບຽບການທີ່ກ່ຽວຂ້ອງຂອງ ສປປ ລາວ.

ມາດຕາ 12  ພັນທະຂອງຜູ້ສົ່ງອອກທີ່​ໄດ້​ຮັບ​ສິດຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ

  ຜູ້ສົ່ງອອກທີ່​ໄດ້​ຮັບ​ສິດຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ມີພັນທະ ດັ່ງນີ້:

  1. ແຈ້ງ ກົມການນໍາເຂົ້າ ແລະ ສົ່ງອອກ ໃນ​ກໍ​ລະ​ນີ​ຕ້ອງ​ການປ່ຽນຊື່, ສະຖານທີ່ຕັ້ງ, ຜູ້ອໍານວຍການຫົວໜ່ວຍວິສາຫະກິດຂອງຜູ້ສົ່ງອອກ;
  2. ເກັບຮັກສາເອກະສານທີ່ກ່ຽວຂ້ອງກັບການຜະລິດສິນຄ້າ ແລະ ການຢັ້ງຢືນແຫຼ່ງກໍາເນີດສິນຄ້າ ຄົບຊຸດ ຢ່າງໜ້ອຍ ສາມ ປີ ນັບແຕ່ວັນທີຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງ;   
  3. ໃຫ້ການຮ່ວມມືໃນການອະທິບາຍ, ຊີ້ແຈງ ແລະ ໃຫ້ຂໍ້ມູນລາຍລະອຽດ ກ່ຽວ​ກັບ ການ​ຈັດ​ຕັ້ງ​ປະ​ຕິ​ບັດ​ການຢັ້ງ​ຢືນ​ແຫຼ່ງ​ກຳ​ເນີດ​ສິນ​ຄ້າ​ດ້ວຍ​ຕົນ​ເອງ ຕໍ່ເຈົ້າໜ້າທີ່ກ່ຽວຂ້ອງທັງພາຍໃນ ແລະ ຕ່າງປະເທດ;
  4. ​ສະຫຼຸບ​ລາຍ​ງານໃຫ້ກົມການນໍາເຂົ້າ ແລະ ສົ່ງອອກ ປ​ະ​ຈຳເດືອນ ຊ້າສຸດບໍ່ໃຫ້ກາຍ ວັນທີ 10 ຂອງເດືອນຖັດໄປ;
  5. ປະຕິບັດພັນທະອື່ນ ຕາມທີ່ກຳນົດໄວ້ໃນກົດໝາຍ ແລະ ລະບຽບການທີ່ກ່ຽວຂ້ອງຂອງ ສປປ ລາວ ແລະ ອາຊຽນ.

ໝວດທີ 4
ຂໍ້ຫ້າມ ແລະ ມາດຕະການຕໍ່ຜູ້ລະເມີດ

ມາດຕາ 13  ຂໍ້ຫ້າມ   

  ຫ້າມຜູ້ສົ່ງອອກທີ່ໄດ້ຮັບສິດຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ມີພຶດຕິກຳ ດັ່ງນີ້:

  1. ແຈ້ງຂໍ້ມູນທີ່ບໍ່ຖືກຕ້ອງຕາມຄວາມເປັນຈິງ;
  2. ປອມແປງເອກະສານ ຫຼື ນໍາໃຊ້​ເອກະສານ​ປອມ;
  3. ຢັ້ງຢືນແຫຼ່ງກຳເນີດຂອງສິນຄ້າ ທີ່ບໍ່ໄດ້ກຳນົດໃນໃບຢັ້ງຢືນສິດ;
  4. ມີພຶດຕິກຳອື່ນ ທີ່ເປັນການລະເມີດຕໍ່ກົດໝາຍ ແລະ ລະບຽບການທີ່ກ່ຽວຂ້ອງຂອງ ສປປ ລາວ ແລະ ອາຊຽນ.

ມາດຕາ 14  ມາດຕະການຕໍ່ຜູ້ລະເມີດ

  ຜູ້ສົ່ງອອກທີ່ໄດ້ຮັບສິດຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ທີ່ລະເມີດຂໍ້ຕົກລົງສະບັບນີ້ ຈະຖືກປະຕິບັດມາດຕະການ ດັ່ງນີ້:

  1. ການກະທໍາຜິດ ຄັ້ງທີ ໜຶ່ງ ຈະໄດ້ຖືກກ່າວເຕືອນ ແລະ ຂຽນບົດບັນທຶກຮັບຮູ້ຄວາມຜິດຂອງຕົນ, ຄັ້ງທີ ສອງ ຈະຖືກໂຈະໃບຢັ້ງຢືນສິດ ແລະ ຄັ້ງທີ ສາມ ຈະຖືກຖອນໃບຢັ້ງຢືນສິດ;
  2. ຮັບຜິດຊອບໃຊ້ຈ່າຍຄ່າພາສີນໍາເຂົ້າຢ້ອນຫຼັງໃຫ້ປະເທດນຳເຂົ້າ ແລະ ຄວາມຮັບຜິດຊອບອື່ນໆ ຕາມທີ່ກຳນົດໃນກົດໝາຍ ແລະ ລະບຽບການຂອງປະເທດນໍາເຂົ້າ.

ໝວດທີ 5
ວຽກງານການຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງ

ມາດຕາ 15  ການຈັດຕັ້ງປະຕິບັດວຽກງານການຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງ

  ການຈັດຕັ້ງປະຕິບັດວຽກງານການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ປະກອບມີ ສອງ ຂັ້ນ ດັ່ງນີ້:

  1. ຂັ້ນສູນກາງ ແມ່ນ ກົມການນຳເຂົ້າ ແລະ ສົ່ງອອກ;
  2. ຂັ້ນແຂວງ ແມ່ນ ພະແນກອຸດສາຫະກໍາ ແລະ ການຄ້າ ແຂວງ, ນະຄອນຫຼວງ.  

ມາດຕາ 16  ສິດ ແລະ ໜ້າທີ່ຂອງກົມການນຳເຂົ້າ ແລະ ສົ່ງອອກ

   ກົມການນຳເຂົ້າ ແລະ ສົ່ງອອກ ມີສິດ ແລະ ໜ້າທີ່ ໃນການຈັດຕັ້ງປະຕິບັດວຽກງານການຢັ້ງຢືນແຫຼ່ງກຳ​ເນີດສິນຄ້າດ້ວຍຕົນເອງ ດັ່ງນີ້:

  1. ຄົ້ນຄວ້າ ສ້າງນິຕິກໍາ ແລະ ລະບຽບການ ກ່ຽວກັບ ການຈັດຕັ້ງປະຕິບັດວຽກງານຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ເພື່ອນໍາສະເໜີຂັ້ນເທິງພິຈາລະນາ;
  2. ເຜີຍແຜ່, ແນະນໍາ ການຈັດຕັ້ງປະຕິບັດຂໍ້ຕົກລົງສະບັບນີ້ ແລະ ລະບຽບການ ກ່ຽວກັບ ການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ໃຫ້ພະນັກງານທີ່່ກ່ຽວຂ້ອງຂອງພາກລັດ ແລະ ພາກທຸລະກິດ ຮັບຊາບຢ່າງທົ່ວເຖິງໃນຂອບເຂດທົ່ວປະເທດ;
  3. ພິຈາລະນາ ອອກ, ໂຈະ, ຖອນ ໃບຢັ້ງຢືນສິດ ພ້ອມທັງ ປະຕິບັດມາດຕະການກ່າວເຕືອນ ແລະ ເຮັດ ບົດບັນທຶກຮັບຮູ້ຄວາມຜິດຂອງຜູ້ລະເມີດຂໍ້ຕົກລົງສະບັບນີ້;    
  4. ບັນທຶກ, ດັດແກ້, ຍົກເລີກ ຂໍ້ມູນຂອງຜູ້ສົ່ງອອກທີ່ໄດ້ຮັບສິດຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ຂອງ ສປປ ລາວ ໃນລະບົບຖານຂໍ້ມູນການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງຂອງອາຊຽນ;
  5. ເປັນຈຸດປະສານງານວຽກງານຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ເພື່ອປະສານງານກັບພາກສ່ວນທີ່ກ່ຽວຂ້ອງ ທັງພາຍໃນ ແລະ ຕ່າງປະເທດ;
  6. ເປັນເຈົ້າການໃນການຈັດຝຶກອົບຮົມໃຫ້ແກ່ພະນັກງານທີ່ກ່ຽວຂ້ອງ ແລະ ຜູ້ສົ່ງອອກ ກ່ຽວກັບລະບຽບການ ແລະ ວິທີການຈັດຕັ້ງປະຕິບັດການຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງ;
  7. ລົງຕິດຕາມ ແລະ ກວດກາ ຂະບວນການຜະລິດສິນຄ້າຢູ່ໂຮງງານຂອງຜູ້ສົ່ງອອກທີ່ໄດ້ຮັບສິດຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ໃນກໍລະນີມີການກວດສອບແຫຼ່ງກໍາເນີດສິນຄ້າຄືນຂອງເຈົ້າໜ້າທີ່ພາສີປະເທດນຳເຂົ້າ;
  8. ສະຫຼຸບ ແລະ ລາຍງານ ກ່ຽວກັບການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງອາຊຽນ ໃຫ້ຄະນະນໍາກະຊວງ ແລະ ກອງເລຂາອາຊຽນ ເປັນແຕ່ລະໄລຍະ;
  9. ນຳໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ກຳນົດໄວ້ໃນກົດໝາຍ ແລະ ລະບຽບການທີ່ກ່ຽວຂ້ອງຂອງ ສປປ ລາວ.

ມາດຕາ 17  ສິດ ແລະ ໜ້າທີ່ຂອງພະ​ແນກ​ອຸດ​ສາ​ຫະ​ກຳ ແລະ ການ​ຄ້າ ແຂວງ, ນະ​ຄອນຫຼວງ

  ພະ​ແນກ​ອຸດ​ສາ​ຫະ​ກຳ ແລະ ການ​ຄ້າ ແຂວງ, ນະ​ຄອນຫຼວງ ມີ​ສິດ ແລະ ໜ້າທີ່ ໃນການຈັດຕັ້ງປະຕິບັດວຽກງານການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ດັ່ງນີ້:

  1. ເຜີຍແຜ່, ແນະນໍາ ການຈັດຕັ້ງປະຕິບັດຂໍ້ຕົກລົງສະບັບນີ້ ແລະ ລະບຽບການອື່ນທີ່ກ່ຽວຂ້ອງ ໃຫ້ພະນັກງານທີ່່ກ່ຽວຂ້ອງຂອງພາກລັດ ແລະ ພາກທຸລະກິດ ຮັບຊາບຢ່າງທົ່ວເຖິງ ໃນຂອບເຂດແຂວງ, ນະຄອນ ຫຼວງ ຂອງຕົນ;
  2. ສົມທົບກັບ ກົມການນຳເຂົ້າ ແລະ ສົ່ງອອກ ໃນ​ການລົງ​ຕິດຕາມ ແລະ ກວດ​ກາສະ​ຖານ​ທີ່ຂອງໂຮງງານຜູ້ສົ່ງອອກທີ່ໄດ້ຮັບສິດຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ;   
  3. ຕິດຕາມການຜະລິດ ແລະ ການສົ່ງອອກ ຂອງຜູ້ສົ່ງອອກທີ່ໄດ້ຮັບສິດຢັ້ງຢືນແຫຼ່ງກຳເນີດສິນຄ້າ ດ້ວຍຕົນເອງ ໃນຂອບເຂດແຂວງ, ນະຄອນຫຼວງ ຂອງຕົນ ເພື່ອສະຫຼຸບລາຍງານໃຫ້ ກົມ​ການ​ນຳ​ເຂົ້າ ແລະ ສົ່ງ​ອອກ;
  4. ນຳໃຊ້ສິດ ແລະ ປະຕິບັດໜ້າທີ່ອື່ນຕາມການມອບໝາຍຂອງ ກະຊວງອຸດສາຫະກຳ ແລະ ການຄ້າ.

ໝວດທີ 6
ບົດບັນຍັດສຸດທ້າຍ

ມາດຕາ 18  ການຈັດຕັ້ງປະຕິບັດ

  ມອບໃຫ້ ກົມການນຳເຂົ້າ ແລະ ສົ່ງອອກ ແລະ ພະແນກອຸດສາຫະກຳ ແລະ ການຄ້າ ແຂວງ, ນະຄອນຫຼວງ ເປັນເຈົ້າການປະສານສົມທົບ ກັບພາກສ່ວນກ່ຽວຂ້ອງ ຈັດຕັ້ງປະຕິບັດຂໍ້ຕົກລົງສະບັບນີ້ ໃຫ້ໄດ້ຮັບປະສິດທິຜົນສູງ.

ມາດຕາ 19  ຜົນສັກສິດ

  ຂໍ້ຕົກລົງສະບັບນີ້ ມີ​​ຜົນ​ສັກ​ສິດ ພາຍຫຼັງລົງລາຍເຊັນ ແລະ ໄດ້ລົງ​​ຈົດ​ໝາຍ​ເຫດ​ທາງ​ລັດ​ຖະ​ການ ສິບຫ້າ ວັນ.       

  ຂໍ້ຕົກລົງສະບັບນີ້ ປ່ຽນແທນ ຂໍ້ຕົກລົງວ່າດ້ວຍການຄຸ້ມຄອງການຈັດຕັ້ງປະຕິບັດໂຄງການທົດລອງຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ທີ II ຂອງອາຊຽນ ສະບັບເລກທີ 0442/ອຄ.ກຂອ, ລົງວັນທີ 06 ມີນາ 2013.

     

ລັດຖະມົນຕີ​

ນ. ເຂັມມະນີ ພົນເສນາ

 

# ຫົວຂໍ້ ດາວໂຫຼດ
1 Decision on Self Certification of Origin under the ASEAN Trade Preference, No. 1206/MOIC.DIMEX, dated 25 December 2020 PDF
2 ຂໍ້ຕົກລົງ ວ່າດ້ວຍ ການຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງ ພາຍໃຕ້ສັນຍາການຄ້າດ້ານສິນຄ້າອາຊຽນ, ເລກທີ 1206/ອຄ.ກຂອ, ລົງວັນທີ 25 ທັນວາ 2020 PDF
ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.