ປະຈຸບັນ ໃນ ສປປ ລາວ ລະບົບການຊໍາລະທຸລະກໍາຍ່ອຍມີ 3 ປະເພດ ຄື: ລະບົບການໂອນເງິນທຸລະກໍາຍ່ອຍລະຫວ່າງສະມາຊິກ, ລະບົບເຄືອຂ່າຍບັດ ແລະ ລະບົບການຫັກບັນຊີ.
ລະບົບການໂອນເງິນທຸລະກໍາຍ່ອຍລະຫວ່າງສະມາຊິກ ແມ່ນ ລະບົບທີ່ເປັນສູນກາງ ຫຼື ຈຸດເຊື່ອມຕໍ່ຮັບສົ່ງຂໍ້ມູນລາຍການຊໍາລະເງິນທາງເອເລັກໂຕຣນິກລະຫວ່າງສະມາຊິກ ຫຼື ເຮັດໜ້າທີ່ໃຫ້ບໍລິການ ການຫັກບັນຊີ ເພື່ອໃຫ້ສະມາຊິກ ສາມາດໃຫ້ບໍລິການຝາກ, ຖອນ, ໂອນ ແລະ ການຊໍາລະເງິນແກ່ລຸກຄ້າ.
ລະບົບເຄືອຂ່າຍບັດ ແມ່ນລະບົບທີ່ເປັນສູນກາງ ຫຼື ຈຸດເຊື່ອມຕໍ່ຮັບສົ່ງຂໍ້ມູນລາຍການຊໍາລະເງິນທາງເອເລັກໂຕຣນິກລະຫວ່າງສະມາຊິກ, ໃຫ້ບໍລິການການຫັກບັນຊີ ແລະ ໃຫ້ບໍລິການດ້ານການຕະຫຼາດ ພາຍໃຕ້ຊື່ທາງທຸລະກິດຂອງຕົນ ເພື່ອສະມາຊິກຊື່ເປັນຜູ້ອອກບັດ ແລະ ຜູ້ໃຫ້ບໍລິການແກ່ຜູ້ຮັບບັດ ໃນ ສປປ ລາວ ສາມາດໃຫ້ບໍລິການການຊໍາລະເງິນຈາກບັດສິນເຊື້ອ, ບັດເງິນຝາກ, ເງິນເອເລັກໂຕຣນິກ ຫຼື ບັດ ເອເລັກໂຕຣນິກອື່ນໆ.
ລະບົບຫັກບັນຊີ ແມ່ນລະບົບທີ່ໃຫ້ບໍລິການການຫັກບັນຊີແກ່ສະມາຊິກຂອງລະບົບ ໂດຍເຮັດການຫັກບັນຊີເງິນຝາກຂອງສະມາຊິກຂອງລະບົບ ຊຶ່ງມີຖານະເປັນລູກໜີ້ ຫຼື ຮັບຊໍາລະໜີ້ດ້ວຍວິທີໃດໜຶ່ງຕາມທີ່ຕົກລົງກັນ ແລ້ວປັບບັນຊີເງິນຝາກຂອງສະມາຊິກຂອງລະບົບ ຊຶ່ງມີຖານະເປັນເຈົ້າໜີ້ ຫຼື ຊໍາລະເງິນດ້ວຍວິທີໃດໜຶ່ງ ເພື່ອໃຫ້ໜີ້ດັ່ງກ່າວສິ້ນສຸດ.
ເງື່ອນໄຂການເປັນຜູ້ຄວບຄຸມລະບົບຍ່ອຍ: ຜູ້ທີ່ມີຈຸດປະສົງເປັນຜູ້ຄວບຄຸມລະບົບຍ່ອຍ ຕ້ອງມີເງື່ອນໄຂຕາມທີ່ໄດ້ກໍານົດໄວ້ໃນ ມາດຕາ 28 ຂອງກົດໝາຍວ່າດ້ວຍລະບົບຊໍາລະສະບັບເລກທີ 32/ສພຊ, ລົງວັນທີ 7 ພະຈິກ 2017 ແລະ ມີເງື່ອນໄຂເພີ່ມຕື່ມຕາມ ຂໍ້ຕົກລົງ ວ່າດ້ວຍລະບົບການຊໍາລະທຸລະກິດຍ່ອຍເລກທີ 293/ທຫລ, ລົງວັນທີ 01 ເມາສາ 2019.ດັ່ງນີ້້:
- ເປັນບໍລິສັດທີ່ຂື້ນທະບຽນວິສາຫະກິດໃນ ສປປ ລາວ ຍົກເວັ້ນບໍລິສັດຈໍາກັດຜູ້ດຽວ
- ສະຖາບັນການເງິນ ແລະ ນິຕິບຸກຄົນອື່ນ ທີ່ມີຈຸດປະສົງເປັນຜູ້ຄວບຄຸມລະບົບຍ່ອຍ ຕ້ອງສ້າງເປັນນິຕິບຸກຄົນສະເພາະ ຍົກເວັ້ນ ລະບົບການຫັກບັນຊີ ທະນາຄານທຸລະກິດສາມາດເປັນຜູ້ຄວບຄຸມລະບົບຍ່ອຍໄດ້
- ມີທຶນຈົດທະບຽນ ຕາມທີ່ໄດ້ກໍານົດໄວ້ໃນມາດຕາ 12 ຂອງຂໍ້ຕົກລົງສະບັບນີ້
- ມີຜູ້ຖືຮຸ້ນ ທີ່ຖືສັນຊາດລາວ ແລະ ພູມລໍາເນົາຢູ່ ສປປ ລາວ ຖືຮຸ້ນຢ່າງໜ້ອຍ ສິບສ່ວນຮ້ອຍຂອງຈໍານວນຮຸ້ນທັງໝົດ.
- ມີຜູ້ບໍລິຫານ ທີ່ຖືສັນຊາດລາວ ແລະ ມີພູມລໍາເນົາຢູ່ ສປປ ລາວ ຢ່າງໜ້ອຍ ໜຶ່ງຄົນ
- ມີແຜນການດໍາເນີນທຸລະກິດຂອງຕົນຢ່າງລະອຽດ ສາມປີ ຕໍ່ໜ້າ.
ທຶນຈົດທະບຽນ: ກໍານົດຕາມປະເພດລະບົບການຊໍາລະທຸລະກໍາຍ່ອຍ ມີດັ່ງນີ້:
- ລະບົບໂອນເງິນທຸລະກໍາຍ່ອຍລະຫວ່າງສະມາຊິກ ຢ່າງໜ້ອຍ ສິບຕື້ (10,000,000,000) ກີບ
- ລະບົບເຄືອຂ່າຍບັດ ຢ່າງໜ້ອຍ ສິບຕື້ (10,000,000,000) ກີບ
- ລະບົບຫັກບັນຊີ ຢ່າງໜ້ອຍ ສີ່ສິບຕື້ (40,000,000,000) ກີບ
ໝາຍເຫດ: ຜູ້ທີ່ມີຈຸດປະສົງເປັນຜູ້ຄວບຄຸມລະບົບຍ່ອຍ ຫຼາຍກວ່າ ໜຶ່ງປະເພດ ຕ້ອງມີທຶນຈົດທະບຽນຢ່າງໜ້ອຍ ຕາມປະເພດກິດຈະການໃຫ້ບໍລິການລະບົບທີ່ກໍານົດໄວ້ສູງກວ່າ. ທຶນຈົດທະບຽນ ຕ້ອງມີອັດຕາສ່ວນເປັນເງິນສົດບໍ່ຕໍ່າກວ່າ ເຈັດສິບສ່ວນຮ້ອຍ (70%) ຂອງທຶນຈົດທະບຽນທັງໝົດ. ຜູ້ທີ່ມີຈຸດປະສົງເປັນຜູ້ຄວບຄຸມລະບົບຍ່ອຍ ຕ້ອງຖອກທຶນຈົດທະບຽນໃຫ້ຄົບຖ້ວນ ເຂົ້າບັນຊີເງິນຝາກຂອງຕົນຢູ່ກົມບໍລິການທະນາຄານ ນັບແຕ່ວັນທີ່ໄດ້ຮັບອະນຸຍາດ.
ຄ່າທໍານຽມ, ຄ່າບໍລິການ ແລະ ຄ່າຄຸ້ມຄອງປະຈໍາປີ:
- ຄ່າບໍລິການໃນການຄົ້ນຄວ້າອະນຸຍາດ ເປັນຜູ້ຄວບຄຸມລະບົບຍ່ອຍ ຈໍານວນສອງລ້ານ (2,000,000) ກີບ ຕໍ່ຄັ້ງ ສໍາລັບຂໍອະນຸຍາດໃໝ່ ແລະ ສໍາລັບການຕໍ່ໃບອະນຸຍາດ ແມ່ນ ໜຶ່ງລ້ານ (1,000,000) ກີບ ຕໍ່ຄັ້ງ ໂດຍຊໍາລະໃນເວລາຍື່ນສໍານວນຄໍາຮ້ອງ ທີ່ກົມບໍລິການທະນາຄານ
- ຄ່າທໍານຽມໃນການອອກໃບອະນຸຍາດ ເປັນຜູ້ຄວບຄຸມລະບົບຍ່ອຍ ຈໍານວນສູນຈຸດໜຶ່ງສ່ວນຮ້ອຍ (0,1%) ຂອງທຶນຈົດທະບຽນ ໂດຍຊໍາລະພາຍໃນວັນທີໄດ້ຮັບອະນຸຍາດ ທີ່ກົມບໍລິການທະນາຄານ
- ຄ່າຄຸ້ມຄອງປະຈໍາປີ ຈໍານວນ ສູນຈຸດໜຶ່ງສ່ວນຮ້ອຍ (0,1%) ຂອງລາຍຮັບທັງໝົດປະຈໍາປີ ແຕ່ບໍ່ໃຫ້ຫຼຸດສາມສິບລ້ານ (30,000,000) ກີບ ຕໍ່ປີ ໂດຍຊໍາລະພາຍໃນໄຕມາດທີ່ໜຶ່ງຂອງປີ ຖັດໄປ ທີ່ກົມບໍລິການທະນາຄານ. ການຄິດໄລ່ຄ່າຄຸ້ມຄອງປະຈໍາປີ ແມ່ນເລີ່ມແຕ່ປີໄດ້ຮັບອະນຸຍາດເປັນຜູ້ຄວບຄຸມລະບົບຍ່ອຍເປັນຕົ້ນໄປ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.