ອີງຕາມ ຂໍ້ຕົກລົງ ວ່າດ້ວຍການຄູ້ມຄອງໂຮງງານ, ເລກທີ 0264/ອຄ.ກອຫ, ລົງວັນທີ 15 ມີນາ 2019 ເຊິ່ງສະຫຼຸບຂັ້ນຕອນການປະກອບເອກະສານ ຂໍໃບຢັ້ງຢືນອະນຸຍາດດໍາເນີນກິດຈະການໂຮງງານໄດ້ດັ່ງນີ້:
ຂັ້ນຕອນທີ 1. ການປະກອບເອກະສານສະເໜີອອກໃບຢັ້ງຢືນດຳເນີນກິດຈະການໂຮງງານ:
ພາຍຫຼັງຜ່ານການຜະລິດທົດລອງ ກ່ອນດຳເນີນການຜະລິດຖາວອນ ຜູ້ດຳເນີນກິດຈະກຳານ ຕ້ອງປະກອບຄຳຮ້ອງຂໍດຳເນີນກິດຈະການໂຮງງານ ຕາມແບບພິມ ຮ/ງ 1 ຈຳນວນ 3 ຊຸດ ຍື່ນຕໍ່ຂະແໜງການອຸດສາຫະກຳ ແລະ ການຄ້າ ຕາມການແບ່ງຂັ້ນຄຸ້ມຄອງ ຄື: ໂຮງງານຂະໜາດໃຫຍ່ ໃຫ້ຍື່ນຢູ່ກົມອຸດສາຫະກຳ ແລະ ຫັດຖະກຳ, ກະຊວງອຸດສາຫະກຳ ແລະ ການຄ້າ.
1. ໃບຄຳຮ້ອງຂໍດຳເນີນກິດຈະການໂຮງງານ ຕາມແບບພິມ ຮ/ງ 1;
2. ໃບມອບສິດໃຫ້ຜູ້ມາພົວພັນປະກອບເອກະສານ ກໍລະນີທີ່ບໍ່ໄດ້ມາພົວພັນດ້ວຍຕົນເອງ;
3. ແຜນວາດຂະບວນການຜະລິດ ພ້ອມບົດອະທິບາຍ;
4. ລາຍການເຄື່ອງຈັກໃນໂຮງງານ;
5. ແຜນວາດການເຄື່ອໄຫວປະຈຳປີຂອງໂຮງງານ ຕາມແບບພິມ ອ;
6. ແຜນຜັງການກໍ່ສ້າງ ແລະ ລະບົບເຕັກນິກເຄື່ອງຈັກໂຮງງານ ຂະໜາດເຈ້ຍ A3 ທີ່ຖືກຕ້ອງຕາມລະບຽບການກ່ຽວກັບການປຸກສ້າງ ເຊັ່ນ:
- ແຜນຜັງສະແດງໃຫ້ເຫັນທີ່ຕັ້ງໂຮງງານ ໃນຂອບເຂດລັດສະໝີ 500 ແມັດ;
- ແຜນຜັງສະແດງສິ່ງປຸກສ້າງໃນບໍລິເວນໂຮງງານ;
- ແຜນຜັງກໍ່ສ້າງອາຄານຜະລິດ ຮູບດ້ານໜ້າ, ຂ້າງ, ຫຼັງ ແລະ ຮູບຕັດ;
- ແຜນຜັງຕິດຕັ້ງເຄື່ອງຈັກ ແລະ ເຄື່ອງຍົກນ້ຳໜັກ ຕາມເລກໝາຍຂອງລາຍການເຄື່ອງຈັກຂໍ້ທີ 4;
- ແຜນຜັງຕິດຕັ້ງເຕົາອົບ ແລະ ໝໍ້ຕົ້ມນ້ຳ ຫຼື ເຕົາສະຕີມ, ຖ້າມີ;
- ແຜນຜັງຕິດຕັ້ງລະບົບໄຟຟ້າ, ພັດລົມ ແລະ ລະບົບລະບາຍອາກາດ;
- ແຜນຜັງຕິດຕັ້ງລະບົບປ້ອງກັນອັນຕະລາຍ, ອັກຄີໄພ ແລະ ທາງອອກສຸກເສີນ.
7. ຮູບຖ່າຍຂະໜາດ 3x4 ຊັງຕີແມັດ ຈຳນວນ 4 ໃບ ຮູບຖ່າຍຕ້ອງບໍ່ເກີນ 3 ເດືອນ.
ສຳເນົາຄັດຕິດ ມີດັ່ງນີ້:
1. ໃບທະບຽນວິສາຫະກິດ ແລະ ໃບອະນຸຍາດດຳເນີນທຸລະກິດ ຫຼື ໃບອະນຸຍາດລົງທຶນ;
2. ໃບຢັ້ງຢືນການມອບເລກບັດປະຈຳຕົວຜູ້ເສັຍອາກອນ ຫຼື ໃບຢັ້ງຢືນການມອບພັນທະອາກອນ;
3. ໃບຢັ້ງຢືນກ່ຽວກັບສິ່ງແວດລ້ອມ ສຳລັບໂຮງງານທີ່ຢູ່ໃນບັນຊີການປະເມີນຜົນກະທົບຕໍ່ສິ່ງແວດລ້ອມ;
4. ໃບອະນຸຍາດປຸກສ້າງໂຮງງານ;
5. ໃບຢັ້ງຢືນແຜນການຕິດຕັ້ງລະບົບບຳບັດ ແລະ/ຫຼື ໃບຢັ້ງຢືນການປ່ອຍສິ່ງເສດເຫຼືອ ອອກຈາກໂຮງງານ ຕາມທີ່ໄດ້ກຳນົດໄວ້ໃນລະບຽບກົດໝາຍ ທີ່ກ່ຽວຂ້ອງ;
6. ໃບສັນຍາເຊົ່າທີ່ດິນ/ອາຄານ ຫຼື ໃບມອບກຳມະສິດທີ່ດິນ ແລະ ໃບຕາດິນ;
7. ໃບຢັ້ງຢືນຄຸນນະພາບຜະລິດຕະພັນ ສຳລັບຜະລິດຕະພັນອາຫານ, ເຄື່ອງດື່ມ ແລະ ຢາປົວພະຍາດ.
ຂັ້ນຕອນທີ 2 ການຍື່ນເອກະສານ ຂໍໃບອະນຸຍາດດໍາເນີນກິດຈະການໂຮງງານ.
ຖ້າເປັນໂຮງງານຂະໜາດໃຫຍ່ ແມ່ນໂຮງງານທີ່ມີກຳລັງແຮງຂອງເຄື່ອງຈັກແຕ່ 201 ແຮງມ້າຂຶ້ນໄປ ຫຼື ຈຳນວນແຮງງານແຕ່ 201 ຄົນຂຶ້ນໄປ ຫຼື ມູນຄ່າການລົງທຶນທັງໝົດແຕ່ 1 ຕື້ກີບຂຶ້ນໄປ ແມ່ນໃຫ້ຍືນເອກະສານຢູ່ກົມອຸດສາຫະກໍາ ແລະ ຫັດຖະກໍາ, ກະຊວງອຸດສາຫະກໍາ ແລະ ການຄ້າ.
ສໍາລັບໂຮງງານຂະໜາດນ້ອຍ ແລະ ກາງ ແມ່ນໃຫ້ຍື່ນເອກະສານຢູ່ຂະແໜງອຸດສາຫະກໍາ ແລະ ຫັດຖະກໍາ, ພະແນກອຸດສາຫະກໍາ ແລະ ການຄ້າແຂວງ/ນະຄອນຫຼວງ.
ຂັ້ນຕອນທີ 3. ການລົງກວດກາ ເພື່ອພິຈາລະນາອອກໃບຢັ້ງຢືນດໍາເນີນກິດຈະການໂຮງງານ
ເມື່ອໄດ້ຮັບເອກະສານຄົບຖ້ວນ ແລະ ຖືກຕ້ອງຕາມຂັ້ນຕອນທີ່ໜຶ່ງແລ້ວ ຂະແໜງການອຸດສາຫະກຳ ແລະ ການຄ້າ ຈະສົມທົບກັບຂະແໜງການທີ່ກ່ຽວຂ້ອງ ລົງກວດກາມາດຕະຖານເຕັກນິກໂຮງງານ ຕາມທີ່ໄດ້ກຳນົດໄວ້ໃນແຜນຜັງການກໍ່ສ້າງ, ແຜນຜັງລະບົບເຕັກນິກເຄື່ອງຈັກໂຮງງານ, ແຜນຜັງລະບົບກຳຈັດ ແລະ ບຳບັດສິ່ງເສດເຫຼືອ ແລະ ບົດວິພາກເສດຖະກິດ-ເຕັກນິກໂຮງງານ ທຽບໃສ່ຕົວຈິງ. ການລົງກວດກາຕ້ອງເຮັດບົດບັນທຶກ ຕາມແບບພິມ ຮ/ງ 7. ຜ່ານການກວດກາ ຫາກເຫັນວ່າ ຍັງບໍ່ສາມາດໃຫ້ດຳເນີນການຜະລິດໄດ້ ຍ້ອນວ່າຍັງບໍ່ທັນຮັບປະກັນດ້ານມາດຕະຖານເຕັກນິກ ສ່ວນໃດໜຶ່ງຂອງໂຮງງານ, ຄະນະກຳມະການກວດກາ ຕ້ອງແນະນຳເພື່ອປັບປຸງຄືນ ໂດຍໃຫ້ກຳນົດເວລາທີ່ຊັດເຈນໃນບົດບັນທຶກ.
ພາຍຫຼັງໄດ້ປັບປຸງຕາມຄຳແນະນຳໃນບົດບັນທຶກແລ້ວ ໃຫ້ສະເໜີຕໍ່ຂະແໜງການອຸດສາຫະກຳ ແລະ ການຄ້າ ເພື່ອລົງກວດກາຄືນ ແລະ ເຮັດບົດບັນທຶກຜົນການປັບປຸງໂຮງງານ ຕາມແບບພິມ ຮ/ງ 8. ໃນກໍລະນີ ບໍ່ສາມາດປັບປຸງທັນຕາມກຳນົດເວລາ ຕ້ອງແຈ້ງເຫດຜົນຕໍ່ຂະແໜງການອຸດສາຫະກຳ ແລະ ການຄ້າ ຊາບພາຍໃນ 5 ວັນລັດຖະການ ນັບແຕ່ມື້ໝົດກຳນົດເວລາໃນການບັນທຶກກວດກາໂຮງງານ.
ຂັ້ນຕອນທີ 4. ຮັບໃບຢັ້ງຢືນ
ພາຍຫຼັງໄດ້ອອກໃບຢັ້ງຢືນດຳເນີນກິດຂະການໂຮງງານແລ້ວ ສຳລັບໂຮງງານຂະໜາດໃຫຍ່ ຕ້ອງຈ້ຳກາຂອງກົມໃສ່ເອກະສານທັງໝົດ ແລະ ສຳເນົາໄວ້ກົມອຸດສາຫະກຳ ແລະ ຫັດຖະກຳ 1 ຊຸດ, ພະແນກອຸດສາຫະກຳ ແລະ ການຄ້າ ແຂວງ, ນະຄອນຫຼວງວຽງຈັນ 1 ຊຸດ, ຫ້ອງການອຸດສາຫະກຳ ແລະ ການຄ້າ ເມືອງ, ນະຄອນ 1 ຊຸດ ແລະ ໂຮງງານ 1 ຊຸດ ເພື່ອຄຸ້ມຄອງ, ຕິດຕາມ ແລະ ກວດກາ ຕາມລະບຽບກົດໝາຍ.
ຄ່າທໍານຽມ
1 ໃຊ້ຄົນງານແຕ່ 10-25 ຄົນ ຫຼື ໃຊ້ເຄື່ອງຈັກຕໍ່າກວ່າ 10 ແຮງມ້າ ກີບ/ຄັ້ງ 20.000
2 ໃຊ້ຄົນງານແຕ່ 26 ຄົນຂຶ້ນໄປ ຫຼື ໃຊ້ເຄື່ອງຈັກຕໍ່າກວ່າ 10 ແຮງມ້າ ກີບ/ຄັ້ງ 33.000
3 ໃຊ້ເຄື່ອງຈັກແຕ່ 10 ແຮງມ້າຂຶ້ນໄປ ແຕ່ບໍ່ເຖິງ 20 ແຮງມ້າ ກີບ/ຄັ້ງ 40.000
4 ໃຊ້ເຄື່ອງຈັກແຕ່ 20 ແຮງມ້າຂຶ້ນໄປ ແຕ່ບໍ່ເຖິງ 50 ແຮງມ້າ ກີບ/ຄັ້ງ 65.000
5 ໃຊ້ເຄື່ອງຈັກແຕ່ 50 ແຮງມ້າຂຶ້ນໄປ ແຕ່ບໍ່ເຖີງ 100 ແຮງມ້າ ກີບ/ຄັ້ງ 130.000
6 ໃຊ້ເຄື່ອງຈັກແຕ່ 100 ແຮງມ້າຂຶ້ນໄປ ແຕ່ບໍ່ເຖິງ 200 ແຮງມ້າ ກີບ/ຄັ້ງ 190.000
7 ໃຊ້ເຄື່ອງຈັກແຕ່ 200 ແຮງມ້າຂຶ້ນໄປ ແຕ່ບໍ່ເຖິງ 300 ແຮງມ້າ ກີບ/ຄັ້ງ 260.000
8 ໃຊ້ເຄື່ອງຈັກແຕ່ 300 ແຮງມ້າຂຶ້ນໄປ ແຕ່ບໍ່ເຖິງ 400 ແຮງມ້າ ກີບ/ຄັ້ງ 320.000
9 ໃຊ້ເຄື່ອງຈັກແຕ່ 400 ແຮງມ້າຂຶ້ນໄປ ແຕ່ບໍ່ເຖິງ 600 ແຮງມ້າ ກີບ/ຄັ້ງ 450.000
10 ໃຊ້ເຄື່ອງຈັກແຕ່ 600 ແຮງມ້າຂຶ້ນໄປ ແຕ່ບໍ່ເຖິງ 800 ແຮງມ້າ ກີບ/ຄັ້ງ 650.000
11 ໃຊ້ເຄື່ອງຈັກແຕ່ 800 ແຮງມ້າຂຶ້ນໄປ ແຕ່ບໍ່ເຖິງ 1,000 ແຮງມ້າ ກີບ/ຄັ້ງ 970.000
12 ໃຊ້ເຄື່ອງຈັກແຕ່ 1,000 ແຮງມ້າຂຶ້ນໄປ ແຕ່ບໍ່ເຖິງ 2,000 ແຮງມ້າ ກີບ/ຄັ້ງ 1.250.000
13 ໃຊ້ເຄື່ອງຈັກແຕ່ 2,000 ແຮງມ້າຂຶ້ນໄປ ແຕ່ບໍ່ເຖິງ 3,000 ແຮງມ້າ ກີບ/ຄັ້ງ 1.500.000
14 ໃຊ້ເຄື່ອງຈັກແຕ່ 3,000 ແຮງມ້າຂຶ້ນໄປ ແຕ່ບໍ່ເຖິງ 4,000 ແຮງມ້າ ກີບ/ຄັ້ງ 1.750.000
15 ໃຊ້ເຄື່ອງຈັກແຕ່ 4,000 ແຮງມ້າຂຶ້ນໄປ ແຕ່ບໍ່ເຖິງ 5,000 ແຮງມ້າ ກີບ/ຄັ້ງ 2.000.000
16 ໃຊ້ເຄື່ອງຈັກແຕ່ 5,000 ແຮງມ້າຂຶ້ນໄປ ແຕ່ບໍ່ເຖິງ 6,000 ແຮງມ້າ ກີບ/ຄັ້ງ 2.200.000
17 ໃຊ້ເຄື່ອງຈັກແຕ່ 6,000 ແຮງມ້າຂຶ້ນໄປ ແຕ່ບໍ່ເຖິງ 7,000 ແຮງມ້າ ກີບ/ຄັ້ງ 2.400.000
18 ໃຊ້ເຄື່ອງຈັກແຕ່ 7,000 ແຮງມ້າຂຶ້ນໄປ ແຕ່ບໍ່ເຖິງ 8,000 ແຮງມ້າ ກີບ/ຄັ້ງ 2.600.000
19 ໃຊ້ເຄື່ອງຈັກແຕ່ 8,000 ແຮງມ້າຂຶ້ນໄປ ແຕ່ບໍ່ເຖິງ 9,000 ແຮງມ້າ ກີບ/ຄັ້ງ 2.800.000
20 ໃຊ້ເຄື່ອງຈັກແຕ່ 9,000 ແຮງມ້າຂຶ້ນໄປ ແຕ່ບໍ່ເຖິງ 10,000 ແຮງມ້າ ກີບ/ຄັ້ງ 3.000.000
21 ໃຊ້ເຄື່ອງຈັກແຕ່ 10,000 ແຮງມ້າຂຶ້ນໄປ ກີບ/ຄັ້ງ 3.200.000
ຂໍ້ມູນເພີ່ມເຕີບພົວພັນ ພະແນກ ຄຸ້ມຄອງໂຮງງານ, ກົມອຸດສາຫະກໍາ ແລະ ຫັດຖະກໍາ, ກະຊວງອຸດສາຫະກໍາ ແລະ ການຄ້າ. ໂທ: 021 453493; ແຟັກ: 021 452425
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.