ສາທາລະນະ​ລັດ ປະຊາທິ​ປະ​ໄຕ ປະຊາຊົນ​ລາວ
ສັນຕິພາບ ​ເອກະລາດ ປະຊາທິປະ​ໄຕ​ ​ເອກະພາບ ວັດທະນາ​ຖາວອນ

ຫ້ອງວ່າການສຳນັກງານນາຍົກລັດຖະມົນຕີ    ເລກ​ທີ 267/ຫສນຍ
ນະຄອນຫຼວງ​ວຽງ​ຈັນ, ວັນ​ທີ​ 17 ມີນາ 2021

ແຈ້ງການ

ຮຽນ: -  ທ່ານ ລັດຖະມົນຕີ ກະຊວງການຕ່າງປະເທດ ທີ່ນັບຖື.

   - ທ່ານ ລັດຖະມົນຕີ ກະຊວງອຸດສາຫະກຳ ແລະ ການຄ້າ ທີ່ນັບຖື.

   - ທ່ານ ເຈົ້າແຂວງໆ ຈຳປາສັກ ທີ່ນັບຖື.

ເລື່ອງ: ການສະເໜີຂໍອະນຸຍາດນໍາໃຊ້ລົດຂົນສົ່ງຈາກປະເທດເພື່ອນບ້ານໃກ້ຄຽງ ເພື່ອເຂົ້າມາລະບາຍສິນຄ້າກະສິກຳ ປະເພດມັນຕົ້ນ.

  • ອີງຕາມ ດຳລັດວ່າດ້ວຍ ການຈັດຕັ້ງ ແລະ ການເຄື່ອນໄຫວ ຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 93/ນຍ, ລົງວັນທີ 03 ມີນາ 2017.
  • ອີງຕາມ ໜັງສືສະເໜີ ຂອງສະມາຄົມມັນຕົ້ນລາວ ສະບັບເລກທີ 144/ສມລ, ລົງວັນທີ 12 ກຸມພາ 2021.
  • ອີງຕາມການຊິ້ນຳ ຂອງທ່ານ ຮອງນາຍົກລັດຖະມົນ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດພະຍາດຂອງ Covid-19 ຄັ້ງວັນທີ 05 ມີນາ 2021.

   ຫ້ອງວ່າການສຳນັກງານນາຍົກລັດຖະມົນຕີ ຂໍຖືເປັນກຽດແຈ້ງທິດຊິ້ນຳ ຂອງທ່ານ ຮອງນາຍົກລັດມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດພະຍາດຂອງ Covid-19 ມາຍັງມທານຊາບ ດັ່ງນີ້:

  1. ເຫັນດີໃຫ້ສືບຕໍ່ໂຈະການອະນຸຍາດໃຫ້ລົດຂົນສົ່ງ ຂອງປະເທດດພື່ອນບ້ານໃກ້ຄ້ຽງ ເຂົ້າມາຂົນສົ່ງມັນຕົ້ນຢູ່ພາຍໃນ ຕາມການຕົກລົງ ຂອງເຈົ້າແຂວງຈຳປາສັກ ທີ່ລະບຸໄວ້ໃນແຈ້ງການ ສະບັບເລກທີ  04/ຈຂ.ຈສ, ລົງວັນທີ 23 ມັງກອນ 2021 ເນື່ອງຈາກໄລຍະນີ້ ຍັງມີຄວາມສ່ຽງສູງແຜ່ລະບາດພະຍາດ Covid-19.
  2. ສຳລັບການຂົນສົ່ງມັນຕົ້ນໄລຍະນີ້ ແມ່ນໃຫ້ນຳໃຊ້ລົດຂົນສົ່ງພາຍໃນ ໂດຍມອບໃຫ້ເຈົ້າແຂວງຈຳປາສັກ ເປັນໃຈກາງຮີບຮ້ອນສົມທົບກັບ ບັນດາແຂວງພາກໃຕ້ຂອງລາວ, ສະມາຄົມຂົນສົ່ງພາຍໃນແຂວງຈຳປາສັກ ແລະ ພາກສ່ວນທີ່ກ່ຽວຂ້ອງ ເພື່ອປຶກສາຫາລື ແລະ ແກ້ໄຂບັນດາຂໍ້ສະເໜີ ຂອງສະມາຄົມມັນຕົ້ນລາວ ໂດຍໄວ ເປັນຕົ້ນ ກ່ຽວກັບການເພີ່ມຈໍານວນລົດຂົນສົ່ງໃຫ້ພຽງພໍ, ປັບປຸງມາດຕະຖານຂອງລົດຂົນສົ່ງ ແລະ ລາຄາຄ່າບໍລິການທີ່ສົມເຫດສົມຜົນ ແລະ ເປັນທີ່ຮັບໄດ້.

ດັ່ງນັ້ນ, ຈື່ງຂໍແຈ້ງມາຍັງທ່ານ ເພື່ອຊາບ ແລະ ປະຕິບັດຕາມເນື້ອໃນແຈ້ງການສະບັບນີ້ດ້ວຍ.

ລັດຖະມົນຕີ,

ຫົວໜ້າຫ້ອງວ່າການສຳນັກງານນາຍົກລັດຖະມົນຕີ

ຄໍາເຈນ ວົງໂພສີ

 

ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.