ມູນຄ່າການນຳເຂົ້າ ແລະ ສົ່ງອອກ ຂອງ ສປປ ລາວ ໃນ 6 ເດືອນຕົ້ນປີ 2021 ບັນລຸໄດ້ທັງໝົດປະມານ 6.784 ລ້ານໂດລາສະຫະລັດ (ລວມທັງຕົວເລກການນໍາເຂົ້າ ແລະ ສົ່ງອອກ ໄຟຟ້າ) ເທົ່າກັບ 52,3% ຂອງແຜນການປີ 2021 ທຽບໃສ່ໄລຍະດຽວກັນຂອງ ປີ 2020 ແມ່ນເພີ່ມຂຶ້ນ 27,2%; ເຊິ່ງໃນນີ້, ມູນຄ່າການສົ່ງອອກບັນລຸໄດ້ປະມານ 3.760 ລ້ານໂດລາສະຫະລັດ, ເພີ່ມຂຶ້ນ 33,4% ແລະ ປະຕິບັດໄດ້ 57,1% ຂອງແຜນການປີ 2021, ສ່ວນມູນຄ່າການນຳເຂົ້າບັນລຸໄດ້ 3.025 ລ້ານໂດລາສະຫະລັດ, ເພີ່ມຂຶ້ນ 20,2% ແລະ ປະຕິບັດໄດ້ 47,4% ຂອງແຜນການປີ 2021 ຈາກຕົວເລກດັ່ງກ່າວແມ່ນເຫັນວ່າມູນຄ່າການຄ້າ 6 ເດືອນຕົ້ນປີ ເກີນດູນ 735 ລ້ານໂດລາສະຫະລັດ; ຢ່າງໃດກໍ່ຕາມ, ຖ້າຫາກບໍ່ລວມຕົວເລກນຳເຂົ້າ ແລະ ສົ່ງອອກໄຟຟ້າແມ່ນຍັງຈະຂາດດຸນ ປະມານ 85 ລ້ານໂດລາສະຫະລັດ.
ຕົວເລກສົມທຽບມູນຄ່າການສົ່ງອອກ ຂອງ ສປປ ລາວ ໃນໄລຍະ 6 ເດືອນຕົ້ນປີ 2020 ແລະ 2021.
ຕົວເລກຂ້າງເທິງນັ້ນ ເຫັນວ່າ ສິນຄ້າສົ່ງອອກຕົ້ນຕໍຂອງ ສປປ ລາວ ແມ່ນ ໄຟຟ້າ, ຄຳ, ມັນຕົ້ນ, ແຮ່ທອງ, ເຈ້ຍ, ໝາກກ້ວຍ ແລະ ເຄື່ອງນຸ່ງຫົ່ມ. ສ່ວນສິນຄ້ານຳເຂົ້າສ່ວນໃຫຍ່ແມ່ນ ນໍ້າມັນເຊື້ອໄຟ, ພາຫະນະ ແລະ ຊິ້ນສ່ວນອາໄຫຼ່, ອຸປະກອນກົນຈັກ, ອຸປະກອນກໍ່ສ້າງ ແລະ ເຄື່ອງໃຊ້ໄຟຟ້າ. ນອກຈາກນັ້ນ, ໃນໄລຍະ 6 ເດືອນຕົ້ນປີນີ້ ແມ່ນມີສິນຄ້າບາງປະເພດມີການຜະລິດ ແລະ ສົ່ງອອກຫລາຍ ເຊັ່ນ: ຄຳ ເພີ່ມຂຶ້ນຫຼາຍກວ່າ 4 ເທົ່າ ເມື່ອທຽບໃສ່ໄລຍະດຽວກັນຂອງປີຜ່ານມາ, ເຄື່ອງໄຟຟ້າ ເພີ່ມຂຶ້ນ 50.8% ມັນຕົ້ນ 31%, ໝາກກ້ວຍ 26% ແລະ ຢາງພາລາ ເພີ່ມຂຶ້ນ 103% ເປັນຕົ້ນ.
5 ປະເທດທີ່ ສປປ ລາວ ສົ່ງອອກຫຼັກ
ບັນດາປະເທດທີ່ ສປປ ລາວ ສົ່ງອອກຫຼັກ ມີມູນຄ່າປະມານ: ໄທ 1.331 ລ້ານໂດລາສະຫະລັດ, ຈີນ ມີມູນຄ່າປະທານ1.314, ຫວຽດນາມ 734 ລ້ານໂດລາສະຫະລັດ, ຍີ່ປຸ່ນ 43 ລ້ານໂດລາສະຫະລັດ ແລະ ເຢຍລະມັນ 39 ລ້ານໂດລາສະຫະລັດ.
5 ປະເທດທີ່ ສປປ ລາວ ນໍາເຂົ້າຫຼັກ
ບັນດາປະເທດທີ່ ສປປ ລາວ ນໍາເຂົ້າຫຼັກ ມີມູນຄ່າປະມານປະມານ: ໄທ 1.480 ລ້ານໂດລາສະຫະລັດ, ຈີນ 660 ລ້ານໂດລາສະຫະລັດ, ຫວຽດນາມ 255 ລ້ານໂດລາສະຫະລັດ, ຢີ່ປຸ່ນ 87 ລ້ານໂດລາສະຫະລັດ ແລະ ສ ອາເມລິກາ 127 ລ້ານໂດລາສະຫະລັດ.
ໝາຍເຫດ: ສະຖິຕິຂ້າງເທິງແມ່ນສັງລວມມາຈາກຂໍ້ມູນດິບ ຈາກກົມພາສີ ເດືອນ 01-06/2021, ສ່ວນຕົວເລກນຳເຂົ້າ ແລະ ສົ່ງອອກໄຟຟ້າ ແມ່ນສັງລວມຈາກບົດສະຫຼຸບ 06 ເດືອນ ຂອງກະຊວງພະລັງງານ ແລະ ບໍ່ແຮ່ ສະບັບເລກທີ 699/ພບ, ລົງວັນທີ 18 ມິຖຸນາ 2021.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.