ໃນວັນທີ 15 ຕຸລາ 2021 ທີ່ຜ່ານມາ, ກົມການນຳເຂົ້າ ແລະ ສົ່ງອອກ ໄດ້ຈັດກອງປະຊຸມເຜີຍແຜ່ ແລະ ທາບທາມເປີດກວ້າງ (ລະບົບ Video Conference) ຜ່ານ “ຮ່າງດຳລັດວ່າດ້ວຍການຄຸ້ມຄອງສິນຄ້າສອງດ້ານ” ໂດຍການເປັນປະທານຂອງ ທ່ານ ນາງ ມະນີວອນ ວົງໄຊ, ຫົວໜ້າກົມການນຳເຂົ້າ ແລະ ສົ່ງອອກ ຊຶ່ງມີຜູ້ເຂົ້າຮ່ວມຈາກ ກົມພາສີ; ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ; ສະພາການຄ້າ ແລະ ອຸດສາຫະກຳ ແຫ່ງຊາດ/ແຂວງ; ພະແນກອຸດສາຫະກຳ ແລະ ການຄ້າ ແລະ ຫ້ອງການພາສີ ຂອງບັນດາ ແຂວງ, ນະຄອນຫຼວງວຽງຈັນ; ຫ້ອງການບໍລິຫານຄຸ້ມຄອງ (ເຂດນິຄົມອຸດສາຫະກຳ ແລະ ການຄ້າ ວຽງຈັນ-ໂນນທອງ, ເຂດກວມລວມໄຊເສດຖາ ແລະ ເຂດເສດຖະກິດພິເສດ ສະຫວັນ-ເຊໂນ) ພ້ອມດ້ວຍບັນດາບໍລິສັດຈຳນວນໜຶ່ງທີ່ຢູ່ໃນເຂດດັ່ງກ່າວ ລວມທັງໝົດ ຈຳນວນ 118 ທ່ານ.
ການຄຸ້ມຄອງສິນຄ້າສອງດ້ານ ແມ່ນການຈັດຕັ້ງປະຕິບັດບັນດາ ເງື່ອນໄຂ ແລະ ມາດຕະການ ເພື່ອການຄຸ້ມຄອງການສົ່ງອອກ, ການສົ່ງອອກຊົ່ວຄາວ, ການຜ່ານແດນ, ການບໍລິການນາຍໜ້າ ແລະ ການຊ່ວຍເຫຼືອທາງດ້ານວິຊາການ ທີ່ຕິດພັນກັບສິນຄ້າສອງດ້ານ. ສິນຄ້າສອງດ້ານ ແມ່ນສິນຄ້າ, ຊອບແວ, ເຕັກໂນໂລຊີ ແລະ ຂໍ້ມູນທາງດ້ານເຕັກນິກ ທີ່ສາມາດນຳໃຊ້ໄດ້ທັງໃນທາງພົນລະເຮືອນ ແລະ ທາງການທະຫານ ຊຶ່ງອາດຖືກນຳໃຊ້ໂດຍກົງ ຫຼື ທາງອ້ອມ ເພື່ອອອກ ແບບ, ພັດທະນາ ຫຼື ຜະລິດ ເປັນອາວຸດທໍາລາຍລ້າງຜານ ຫຼື ລະບົບນຳສົ່ງຂອງອາວຸດ ທໍາລາຍລ້າງຜານ.
ປະທານກອງປະຊຸມໄດ້ກ່າວວ່າ: ການສ້າງນິຕິກໍາເພື່ອຄຸ້ມຄອງສິນຄ້າສອງດ້ານ ແມ່ນພັນທະໃນນາມທີ່ ສປປ ລາວ ເປັນສະມາຊິກຂອງ ອົງການສະຫະປະຊາຊາດ (ສປຊ), ໂດຍສະເພາະແມ່ນການຜັນຂະຫຍາຍບັນດາຍັດຕິຕ່າງໆທີ່ ອົງການສະຫະປະຊາຊາດ ໄດ້ຮັບຮອງມາ. ໃນນີ້, ໜຶ່ງໃນບັນດາຍັດຕິຂອງ ສປຊ ທີ່ສຳຄັນ ແມ່ນຍັດຕິຂອງສະພາຄວາມໝັ້ນຄົງຂອງອົງການສະຫະປະຊາຊາດ ປີ 2004 (United Nations Security Council – UNSC) ວ່າດ້ວຍການບໍ່ແຜ່ຜາຍອາວຸດທຳລາຍລ້າງຜານ. ຍັດຕິດັ່ງກ່າວ ໄດ້ຮຽກຮ້ອງໃຫ້ບັນດາປະເທດສະມາຊິກ ຕ້ອງໄດ້ ສ້າງກົນໄກ ແລະ ລະບຽບການ ໃນການສະກັດກັ້ນ ແລະ ຫຼຸດຜ່ອນການສະສົມ ອາວຸດນິວເຄຣຍ, ອາວຸດເຄມີ ແລະ ອາວຸດຊີວະພາບ, ລວມທັງວັດຖຸ, ອຸປະກອນອື່ນໆ (ຊຶ່ງກວມເອົາສິນຄ້າສອງດ້ານ) ທີ່ສາມາດເປັນອົງປະກອບເພື່ອນຳໃຊ້ໃນການພັດທະນາອາວຸດທຳລາຍລ້າງຜານ. ສຳລັບສິນຄ້າປະເພດ ອາວຸດນິວເຄຣຍ, ອາວຸດເຄມີ ແລະ ອາວຸດຊີວະພາບ ທີ່ໄດ້ກຳນົດໄວ້ຕາມຍັດຕິດັ່ງກ່າວ ແມ່ນໄດ້ຖືກຄວບຄຸມການສົ່ງອອກ ໂດຍ ລາຍການສິນຄ້າເກືອດຫ້າມ. ນອກຈາກນີ້ການຄວບຄຸມສິນຄ້າທີ່ກ່າວມານັ້ນ, ຍັດຕິດັ່ງກ່າວ ຍັງຮຽກຮ້ອງໃຫ້ມີການຄວບຄຸມ, ຄຸ້ມຄອງ ສິນຄ້າສອງດ້ານ.
ທ່ານ ຍັງກ່າວຕື່ມວ່າ: ນອກຈາກປະເທດເຮົາແລ້ວ ສະພາບການຄຸ້ມຄອງສິນຄ້າສອງດ້ານ ຂອງບັນດາສະມາຊິກອາຊຽນສາມາດແບ່ງ ອອກເປັນແຕ່ລະກຸ່ມ ຄື:ກຸ່ມທີ 1: ມາເລເຊຍ, ສິງກະໂປ ແລະ ຟິລິບປິນ ແມ່ນໄດ້ຈັດຕັ້ງປະຕິບັດແລ້ວ; ກຸ່ມທີ 2: ໄທ (ມີນິຕິກຳ ແລະ ຮັບຮອງແລ້ວໃນປີ 2020); ກຸ່ມທີ 3: ສປປລາວ, ກຳປູເຈຍ, ມຽນມ້າ ແລະ ອິນໂດເນເຊຍ (ກຳລັງສ້າງນິຕິກຳ); ແລະ ກຸ່ມທີ 4: ສສ ຫວຽດນາມ ແລະ ບຣູໄນ (ກຳລັງສຶກສາຂໍ້ມູນ ແລະ ພິຈາລະນາ).
ກອງປະຊຸມຄັ້ງນີ້ດຳເນີນໄປໃນບັນຍາກາດອັນຟົດຟື້ນ ແຕ່ລະພາກສ່ວນ ມີການປະກອບຄຳເຫັນຢ່າງສ້າງສັນ ແລະ ປຶກສາຫາລືກັນຢ່າງກົງໄປກົງມາ ເຊິ່ງກອງເລຂາໄດ້ສັງລວມ ແລະ ນໍາໄປປັບປຸງເນື້ອໃນດໍາລັດໃຫ້ສົມບຸນ ເຊິ່ງອີງຕາມແຜນວຽກທີ່ຄະນະຮັບຜິດຊອບສ້າງດຳລັດໄດ້ຄົ້ນຄວ້າ ແລະ ປຶກສາຫາລືກັນ ທີ່ຈະຍື່ນສະເໜີຮ່າງດຳລັດວ່າດ້ວຍການຄຸ້ມຄອງສິນຄ້າສອງດ້ານໃຫ້ ລັດຖະບານ ພິຈາະລະນາ ໃນເດືອນພະຈິກ 2021 ທີ່ຈະມາເຖິງນີ້.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.