ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ
ກະຊວງການເງິນ
ເລກທີ 5642/ກງ
ນະຄອນຫຼວງວຽງຈັນ, ວັນທີ 10 ພະຈິກ 2021
ແຈ້ງການແນະນຳ
ເຖິງ: - ຫົວໜ້າ ກົມພາສີ, ກົມສ່ວຍສາອາກອນ ແລະ ກົມຄຸ້ມຄອງຊັບສິນແຫ່ງລັດ,
- ບັນດາຫົວໜ້າ ພະແນກການເງິນແຂວງ, ນະຄອນຫຼວງວຽງຈັນ,
- ນິຕິບຸກຄົນທີ່ດຳເນີນທຸລະກິດການສົ່ງອອກຜະລິດຕະພັນໄມ້.
ເລື່ອງ: ເພີ່ມທະວີການຄຸ້ມຄອງການສົ່ງອອກໄມ້ ແລະ ຜະລິດຕະພັນໄມ້ ເພື່ອເກັບພັນທະລາຍຮັບເຂົ້າງົບປະມານ.
- ອີງຕາມ ດໍາລັດນາຍົກລັດຖະມົນຕີ ສະບັບເລກທີ 600/ນຍ, ລົງວັນທີ 14 ຕຸລາ 2021 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງການເງິນ;
- ອີງຕາມ ຄຳສັ່ງນາຍົກລັດຖະມົນຕີ ສະບັບເລກທີ 15/ນຍ, ລົງວັນທີ 13 ພຶດສະພາ 2016 ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ, ກວດກາການຂຸດຄົ້ນໄມ້ ແລະ ທຸລະກິດໄມ້;
- ອີງຕາມ ຄຳສັ່ງນາຍົກລັດຖະມົນຕີ ສະບັບເລກທີ 18/ນຍ, ລົງວັນທີ 16 ກັນຍາ 2021 ວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ;
- ອີງຕາມ ແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 885/ຫສນຍ. ລົງວັນທີ 28 ກໍລະກົດ 2021.
ເພື່ອຮັບປະກັນໃຫ້ແກ່ການຈັດຕັ້ງປະຕິບັດບັນດາ ກົດໝາຍ, ຄຳສັ່ ແລະ ແຈ້ງການຂອງລັດຖະບານໃນການຄຸ້ມຄອງການສົ່ງອອກໄມ້ ແລະ ຜະລິດຕະພັນໄມ້ໃຫ້ຖືກຕ້ອງ, ເຂັ້ມງວດ ແລະ ເປັນເອກະພາບໃນຂອບເຂດທົ່ວປະເທດ.
ລັດຖະມົນຕີ ອອກແຈ້ງການແນະນຳດັ່ງນີ້:
- ມອບໃຫ້ຫົວໜ້າ ກົມພາສີ, ກົມສ່ວຍສາອາກອນ, ກົມຄຸ້ມຄອງຊັບສິນແຫ່ງລັດ ແລະ ພະແນກການເງິນແຂວງ ນຳພາ-ຊີ້ນຳຂະແໜງສາຍຕັ້ງຂອງຕົນ ແລະ ປະສານສົມທົບກັບຂະແໜງການກ່ຽວຂ້ອງຂັ້ນສູນກາງ ແລະ ທ້ອງຖິນ, ເພີ່ທະວີການຄຸ້ມຄອງການສົ່ງອອກໄມ້ ແລະ ຜະລິດຕະພັນໄມ້ ເພື່ອຈັດຕັ້ງປະຕິບັດ ຄຳສັ່ງນາຍົກລັດຖະມົນຕີ ສະບັບເລກທີ 15/ນຍ, ລົງວັນທີ 13 ພຶດສະພາ 2016, ຄຳສັ່ງນາຍົກລັດຖະມົນຕີ ສະບັບເລກທີ 18/ນຍ, ລົງວັນທີ 6 ກັນຍາ 2021, ແຈ້ງການຂອງ ຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 885/ຫສນຍ, ລົງວັນທີ 28 ກໍລະກົດ 2021, ຂໍ້ຕົກລົງຂອງ ກະຊວງອຸດສາຫະກຳ ແລະ ການຄ້າ ສະບັບເລກທີ 0851/ອຄ, ລົງວັນທີ 14 ກັນຍາ 2021 ວ່າດ້ວຍການຮັບຮອງເອົາລາຍການຜະລິດຕະພັນໄມ້ເພື່ອສົ່ງອອກ ແລະ ນິຕິກຳທີ່ກ່ຽວຂ້ອງ ເພື່ອຄຸ້ມຄອງເກັບລາຍຮັບເຂົ້າງົບປະມານຕາມລະບຽບການ.
- ຂະແໜງຊັບສິນຂອງລັດ:
ເປັນເຈົ້າການສົມທົບກັບຂະແໜງການລັດທີ່ກ່ຽວຂ້ອງ ໃນການຄຸ້ມຄອງກວດກາໄມ້ຂຶ້ນລົດບັນທຸກຢູ່ຕົ້ນທາງ, ໄມ້ຢູ່ສະໜາມ II, ໂຮງງານປຸງແຕ່ງໄມ້ ແລະ ອື່ນໆ ເພື່ອດຳເນີນການຕິດຕາມ, ກວດກາບໍລິມາດ, ປະເພດ, ຊະນິດ, ມູນຄ່າ, ຈຳນວນ ແລະ ຜະລິດຕະພັນໄມ້ຕາມລາຍການໄມ້ຕົວຈິງ ທີ່ໄດ້ຮັບອະນຸຍາດສົ່ງອອກ, ເຮັດບົດບັນທຶກການກວດກາຢັ້ງຢືນຄວາມຖືກຕ້ອງຢູ່ຕົ້ນທາງ, ປົກຜ້າບັດ, ນຳໃຊ້ພາຊະນະຫຸ້ມຫໍ່, ສາຍຮັດ ຫຼື ເຕັກນິກອື່ນ ເພື່ອຮັບປະກັນ ແລະ ປົກປ້ອງບໍ່ໃຫ້ມີການລັກລອບ ໃນເວລາເຄື່ອນຍ້າຍຕາມເສັ້ນທາງໄປຫາດ່ານພາສີສາກົນບ່ອນສົ່ງອອກ.
- ຂະແໜງສ່ວຍສາອາກອນ:
ໃຫ້ຄຸ້ມຄອງ, ຕິດຕາມ ແລະ ກວດກາການແຈ້ງມອບພັນທະ ຈາກການຂຸດຄົ້ນ, ປຸງແຕ່ງ, ຜະລິດ, ຈຳໜ່າຍ ພາຍໃນ ແລະ ສົ່ງອອກຕ່າງປະເທດ ກ່ຽວກັບການສົ່ງອອກໄມ້ ແລະ ຜະລິດຕະພັນໄມ້ ເຊັ່ນ: ຄ່າຊັບພະຍາກອນໄມ້, ຄ່າທຳນຽມຕ່າງໆ ແລະ ອາກອນປະເພດຕ່າງໆຕາມລະບຽບກົດໝາຍກຳນົດ, ເພື່ອຊຳລະພັນທະເຂົ້າງົບປະມານແຫ່ງລັດ ຜ່ານລະບົບຂໍ້ມູນຂ່າວສານລາຍຮັບສ່ວຍສາອາກອນ (TaxRIS) ແລ້ວສົ່ງຂໍ້ມູນໃຫ້ ຂະແໜງຊັບສິນຂອງລັດ ແລະ ຂະແໜງພາສີ ດ່ານພາສີສາກົນບ່ອນສົ່ງອອກ ເພື່ອຄຸ້ມຄອງ ແລະ ກວດກາ ການສົ່ງອອກ ຕາມລະບຽບການ.
- ຂະແໜງພາສີ
ໃຫ້ຄຸ້ມຄອງ, ຕິດຕາມ ແລະ ເປັນເຈົ້າການດຳເນີນການກວດກາຕາມເຕັກນິກວິຊາສະເພາະ ກວດກາໂດຍກົງ ແລະ ນຳໃຊ້ເຄື່ອງມືທັນສະໄໝ (ສະແກນເນີ, ຊິງຊັ່ງ ແລະ ອື່ນໆ ໃນການວິນິໃສຂໍ້ມູນສົມທຽບ) ກວດກາລົດ ບັນທຸກໄມ້ແຕ່ລະຄັນທີ່ເຄື່ອນຍ້າຍມາເຖິງດ່ານ, ເອກະສານອະນຸຍາດສົ່ງອອກ, ລາຍການໄມ້ຕ່າງໆຢ່າງລະອຽດ ແລະ ການມອບພັນທະໄມ້ ເມື່ອເຫັນວ່າຖືກຕ້ອງຈຶ່ງອະນຸຍາດສົ່ງອອກ, ແຕ່ຖ້າຫາກພົບເຫັນການລັກລອບ ຊຸກເຊື່ອງໄມ້ໜີພາສີໃຫ້ປະຕິບັດມາດຕະການຢ່າງເຂັ້ມງວດ ຕາມກົດໝາຍວ່າດ້ວຍພາສີ ສະບັບເລກທີ 81/ສພຊ, ລົງວັນທີ 29 ມິຖຸນາ 2020, ພ້ອມທັງຍຶດໄມ້ຈຳນວນດັ່ງກ່າວເປັນຂອງລັດ ເພື່ອດຳເນີນຄະດີຕາມ ລະບຽບກົດໝາຍ; ສຳລັບລາຍຮັບທີ່ໄດ້ຈາກການປະມູນຂາຍໄມ້ທີ່ເປັນຄະດີທາງພາສີ ແມ່ນໃຫ້ມອບເຂົ້າງົບປະມານເປັນລາຍຮັບຂອງ ຂະແໜງພາສີ.
- ເຈົ້າໜ້າທີ່ພາສີປະຈຳດ່ານພາສີຊາຍແດນ ໃຫ້ປະຕິບັດໜ້າທີ່, ກວດກາບັນດາຂໍ້ມູນຄື:
- ສັນຍາການຊື້-ຂາຍໄມ້ ແລະ ຜະລິດຕະພັນໄມ້ ທີ່ຈົດທະບຽນຖືກຕ້ອງ ເພື່ອສົ່ງອອກໄປຕ່າງປະເທດ, ມີການຢັ້ງຢືນການຊຳລະພັນທະຕ່າງໆເຊັ່ນ: ຄ່າຊັບພະຍາກອນໄມ້, ຄ່າທຳນຽມຕ່າງໆ, ອາກອນປະເພດຕ່າງໆ ຕາມລະບຽບກົດໝາຍກຳນົດ.
- ພາຍຫຼັງກວດກາຂໍ້ມູນຖືກຕ້ອງຄົບຖ້ວນແລ້ວ ໃຫ້ດຳເນີນການຄິດໄລ່ພາສີຂາອອກໃນອັດຕາ 30% ສຳລັບ ຜະລິດຕະພັນໄມ້ເລື່ອຍແປຮູບ (ໄມ້ເລື່ອຍແປຮູບ, ໄມ້ຕີຕັບ ແລະ ໄມ້ຊອຍ), ປລະ ຜະລິດຕະພັນໄມ້ເຄື່ອງສຳເລັດຮູບໃນອັດຕາ 15% ຂອງມູນຄ່າສົ່ງອອກ;
- ການສົ່ງອອກສິນຄ້າ, ເຄື່ອງຂອງ ແລະ ຜະລິດຕະພັນອື່ນ ແມ່ນໃຫ້ປະຕິບັດຕາມ ລັດຖະບັນຍັດປະທານປະເທດ ສະບັບເລກທີ 002/ປປທ, ລົງວັນທີ 27 ເມສາ 2012.
- ສຳລັບການອະນຸຍາດສົ່ງອອກໄມ້ຕົກຄ້າງອື່ນ ທີ່ເປັນໄມ້ທ່ອນ, ຕໍໄມ້, ປູດໄມ້ ແລະ ອື່ນໆ ຕ້ອງໄດ້ຮັບອະນຸຍາດເປັນກໍລະນີສະເພາະຈາກ ລັດຖະບານ.
- ນະໂຍບາຍຕໍ່ຜູ້ທີ່ມີຜົນງານ:
- ສຳລັບເຈົ້າໜ້າທີ່, ພະນັກງານ-ລັດຖະກອນ, ບຸກຄົນ, ນິຕິບຸກຄົນ, ການຈັດຕັ້ງ ແລະ ປະຊາຊົນ ທີ່ປະອກບສ່ວນທທາງກົງ ຫຼື ທາງອ້ອມກ່ຽວກັບການລະເມີດກົດໝາຍ, ມີຜົນງານໃນການສະກັດກັ້ນ ການລັກລອບຫຼົບຫຼີກພັນທະຕ່າງໆ ຈະໄດ້ຮັບການຍ້ອງຍໍ ຫຼື ນະໂຍບາຍຕອບແທນ ຕາມກົດໝາຍ ກຳນົດ.
- ມາດຕະການຕໍ່ຜູ້ລະເມີດ:
- ສຳລັບເຈົ້າໜ້າທີ່, ພະນັກງານ-ລັດຖະກອນ, ຫາກກວດພົບເຫັນວ່າມີການລະເລີຍຕໍ່ໜ້າທີ່, ຮັບສິນບົນ, ສົມຮູ້ຮ່ວມຄິດເຮັດໃຫ້ການສົ່ງອອກມີການຫຼົບຫຼີກຊຸກເຊື່ອງໜີພາສີ ດ້ານບໍລິມາດ, ປະເພດ, ຊະນິດ, ມູນຄ່າ, ຈຳນວນໄມ້ ຈະຖືກລົງວິໄນ ແລະ ຖືກດຳເນີນຄະດີປະຕິບັດມາດຕະການຕາມແຕ່ລະກໍລະນີ ຕາມກົດໝາຍ ແລະ ລະບຽບການ;
- ສຳລັບຕໍ່ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ລະເມີດ ຈະຖືກສຶກສາອົບຮົມ, ກ່າວເຕືອນ, ປັບໄໝ ແລະ ຖືກດຳເນີນຄະດີທາງພາສີ ຮັບຜິດຊອບຕໍ່ຄ່າພາສີ-ອາກອນ ແລະ ພັນທະອື່ນ ໃຫ້ຄົບຖ້ວນ, ຖ້າເກີດຈາກການກະທຳຂອງຕົນດ້ວຍການເຈດຕະນາ ຈະຖືກດຳເນີນຄະດີທາງແພ່ງ ແລະ ທາງອາຍາ ຕາມກົດໝາຍ.
- ສຳລັບຂອງກາງ ທີ່ເປັນປະເພດໄມ້ ແລະ ຜະລິດຕະພັນໄມ້ ໃຫ້ດຳເນີນການຕາມຂັ້ນຕອນຢຶດ ແລະ ຕົກເປັນຂອງລັດ; ໃນກໍລະນີທີ່ມີການດັດແປງເສີມແຕ່ງຍານພາຫະນະ, ພາຊະນະບັນຈຸ, ຕູ້ສິນຄ້າ ຫຼື ສ້າງວິທີການອຳພາງເຊື່ອງອຳອື່ນ ດ້ວຍການເຈດຕະນາທີ່ສົ່ງຜົນເສຍຫາຍຮ້າຍແຮງຕໍ່ຄວາມປອດໄພ, ການຂົນສົ່ງສິນຄ້າ, ການເກັບລາຍຮັບ ແລະ ອື່ນໆ ໃຫ້ປະຕິບັດມາດຕະການທຳລາຍຖິ້ມ ຕາມກົດໝາຍ ແລະ ລະບຽບການ.
- ມອບໃຫ້ ຫົວໜ້າກົມພາສີ, ກົມສ່ວຍສາອາກອນ, ກົມຄຸ້ມຄອງຊັບສິນແຫ່ງລັດ ແລະ ພະແນກການເງິນນະຄອນຫຼວງ, ບັນດາແຂວງ ຈັດຕັ້ງໂຄສະນາເຜີຍແຜ່, ຕິດຕາມ ແລະ ກວດກາການປະຕິບັດ ແຈ້ງການ ແນະນຳສະບັບນີ້ ຕາມໜ້າທີ່ໃຜບາວຢ່າງເປັນເອກະພາບ ແລະ ເຂັ້ມງວດ.
- ແຈ້ງການສະບັບນີ້ ປ່ຽນແທນ ຄຳສັ່ງແນະນຳ ເລກທີ 1765/ກງ, ລົງວັນທີ 4 ກໍລະກົດ 2013 ແລະ ມີຜົນສັກສິດນັບແຕ່ວັນລົງລາຍເຊັນເປັນຕົ້ນໄປ.
ລັດຖະມົນຕີ
ບຸນໂຈມ ອຸບົນປະເສີດ
PDF
PDFກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.