ຂໍ້ຕົກລົງ ວ່າດ້ວຍ ການມອບສິດໃຫ້ພະແນກອຸດສາຫະກໍາ ແລະ ການຄ້າ ແຂວງ, ນະຄອນຫຼວງ ອອກ ແລະ ຄຸ້ມຄອງໃບຢັ້ງຢືນແຫຼ່ງກໍາເນີດສິນຄ້າທີ່ໄດ້ຮັບສິດທິພິເສດ, ເລກທີ 1197/ອຄ, ລົງວັນທີ 08 ກັນຍາ 2022.

ສາທາລະນະລັດ ປະຊາທິປະໄຕ ປະຊາຊົນລາວ

ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ

ກະຊວງອຸດສາຫະກໍາ ແລະ ການຄ້າ

ເລກທີ 1197/ອຄ

ນະຄອນຫຼວງວຽງຈັນ, ວັນທີ 08 ກັນຍາ 2022

ຂໍ້ຕົກລົງ

ວ່າດ້ວຍ ການມອບສິດໃຫ້ພະແນກອຸດສາຫະກຳ ແລະ ການຄ້າ ແຂວງ, ນະຄອນຫຼວງ

ອອກ ແລະ ຄຸ້ມຄອງໃບຢັ້ງຢືນແຫຼ່ງກຳເນີດສິນຄ້າທີ່ໄດ້ຮັບສິດທິພິເສດ

ອີງຕາມ ດຳລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ກະຊວງອຸດສາຫະກຳ ແລະ ການຄ້າ ສະບັບເລກທີ 604/ນຍ, ລົງວັນທີ 15 ຕຸລາ 2021;
ອີງຕາມ ດຳລັດວ່າດ້ວຍແຫຼ່ງກຳເນີດສິນຄ້ານຳເຂົ້າ ແລະ ສົ່ງອອກ ສະບັັບເລກທີ 228/ນຍ, ລົງວັນທີ 22 ເມສາ 2010;
ອີງຕາມ ໜັງສືສະເໜີຂອງ ກົມການນຳເຂົ້າ ແລະ ສົ່ງອອກ ສະບັບເລກທີ 2638/ກຂອ, ລົງວັນທີ 30 ສິງຫາ 2022.

ລັດຖະມົນຕີ ກະຊວງອຸດສາຫະກໍາ ແລະ ການຄ້າ ອອກຂໍ້ຕົກລົງ:

ມາດຕາ 1 ມອບສິດໃຫ້ພະແນກອຸດສາຫະກຳ ແລະ ການຄ້າ ແຂວງ, ນະຄອນຫຼວງ ອອກ ແລະ ຄຸ້ມຄອງໃບຢັ້ງຢືນແຫຼ່ງກຳເນີດສິນຄ້າທີ່ໄດ້ຮັບສິດທິພິເສດ ປະເພດຕ່າງໆ ດັ່ງນີ້:

ແບບພິມ ເອ (Form A) ອອກໃຫ້ແກ່ສິນຄ້າທີ່ໄດ້ເງື່ອນໄຂລະບຽບແຫຼ່ງກໍາເນີດສິນຄ້າພາຍໃຕ້ ສິດທິພິເສດທາງການຄ້າແບບທົ່ວໄປ;
ແບບພິມ ດີ (Form D) ອອກໃຫ້ແກ່ສິນຄ້າທີ່ໄດ້ເງື່ອນໄຂລະບຽບແຫຼ່ງກໍາເນີດສິນຄ້າພາຍໃຕ້ ສັນຍາການຄ້າດ້ານສິນຄ້າອາຊຽນ;
ແບບພິມ ເອສ໌ (Form S) ອອກໃຫ້ແກ່ສິນຄ້າທີ່ໄດ້ເງື່ອນໄຂລະບຽບແຫຼ່ງກໍາເນີດສິນຄ້າພາຍໃຕ້ ສັນຍາການຄ້າ ລະຫວ່າງ ລັດຖະບານແຫ່ງ ສປປ ລາວ ແລະ ລັດຖະບານແຫ່ງ ສສ ຫວຽດນາມ;
ແບບພິມ ດີເອັຟທີພີ (Form DFTP) ອອກໃຫ້ແກ່ສິນຄ້າທີ່ໄດ້ເງື່ອນໄຂລະບຽບແຫຼ່ງກໍາເນີດສິນຄ້າພາຍໃຕ້ ສິດທິພິເສດທາງການຄ້າແບບຝ່າຍດຽວຈາກ ປະເທດອິນເດຍ;
ແບບພິມ ເອພີທີເອ (Form APTA) ອອກໃຫ້ແກ່ສິນຄ້າທີ່ໄດ້ເງື່ອນໄຂລະບຽບແຫຼ່ງກໍາເນີດສິນຄ້າພາຍໃຕ້ ສັນຍາການຄ້າ ອາຊີ-ປາຊີຟິກ;
ແບບພິມ ເອໄອ (Form AI) ອອກໃຫ້ແກ່ສິນຄ້າທີ່ໄດ້ເງື່ອນໄຂລະບຽບແຫຼ່ງກໍາເນີດສິນຄ້າພາຍໃຕ້ ສັນຍາເຂດການຄ້າເສລີ ອາຊຽນ-ອິນເດຍ;
ແບບພິມ ເອເຮັດເຄ (Form AHK) ອອກໃຫ້ແກ່ສິນຄ້າທີ່ໄດ້ເງື່ອນໄຂລະບຽບແຫຼ່ງກໍາເນີດສິນຄ້າພາຍໃຕ້ ສັນຍາເຂດການຄ້າເສລີ ອາຊຽນ-ຮົງກົງ, ສປ ຈີນ;
ແບບພິມ ອາຊີອີພີ (Form RCEP) ອອກໃຫ້ແກ່ສິນຄ້າທີ່ໄດ້ເງື່ອນໄຂລະບຽບແຫຼ່ງກໍາເນີດສິນຄ້າພາຍໃຕ້ ສັນຍາການຮ່ວມມືເສດຖະກິດແບບຮອບດ້ານລະດັບພາກພື້ນ.

ມາດຕາ 2 ການພິຈາລະນາອອກໃບຢັ້ງຢືນແຫຼ່ງກຳເນີດສິນຄ້າທີ່ໄດ້ຮັບສິດທິພິເສດ ໃຫ້ປະຕິບັດຕາມຄຳແນະນຳກ່ຽວກັບການຢັ້ງຢືນແຫຼ່ງກຳເນີດສິນຄ້າທີ່ໄດ້ຮັບສິດທິພິເສດ ທີ່ປະກາດໃຊ້ໃນແຕ່ລະໄລຍະ ແລະ ເງື່ອນໄຂລະບຽບແຫຼ່ງກຳເນີດສິນຄ້າ ຕາມທີ່ໄດ້ກຳນົດໄວ້ໃນແຕ່ລະຂອບສັນຍາ.

ມາດຕາ 3 ມອບໃຫ້ ກົມການນຳເຂົ້າ ແລະ ສົ່ງອອກ ເປັນເຈົ້າການສົມທົບ ແລະ ຊີ້ນຳ ພະແນກອຸດສາຫະກຳ ແລະ ການຄ້າແຂວງ, ນະຄອນຫຼວງ ເພື່ອຈັດຕັ້ງປະຕິບັດຂໍ້ຕົກລົງສະບັບນີ້ ໃຫ້ໄດ້ຮັບປະສິດທິຜົນສູງ.

ມາດຕາ 4 ຂໍ້ຕົກລົງສະບັບນີ້ ມີຜົນສັກສິດ ນັບແຕ່ມື້ລົງລາຍເຊັນ ເປັນຕົ້ນໄປ.

ຂໍ້ຕົກລົງສະບັບນີ້ ປ່ຽນແທນ ຂໍ້ຕົກລົງວ່າດ້ວຍການມອບສິດໃຫ້ພະແນກອຸດສາຫະກຳ ແລະ ການຄ້າໃນທົ່ວປະເທດອອກໃບຢັ້ງຢືນແຫຼ່ງກຳເນີດສິນຄ້າທີ່ໄດ້ຮັບສິດພິເສດ ສະບັບເລກທີ 2036/ອຄ.ກຂອ, ລົງວັນທີ 12 ຕຸລາ 2010 ແລະ ຂໍ້ຕົກລົງວ່າດ້ວຍການມອບສິດໃຫ້ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ອອກ ແລະ ຄຸ້ມຄອງໃບຢັ້ງຢືນແຫຼ່ງກຳເນີດສິນຄ້າທີ່ໄດ້ສິດພິເສດ ສະບັບເລກທີ 1880/ອຄ.ກຂອ, ລົງວັນທີ 05 ກັນຍາ 2012.

ລັດຖະມົນຕີ

ມະໄລທອງ ກົມມະສິດ

#	ຫົວຂໍ້	ດາວໂຫຼດ
1	The decision to authorize the Division of Industry and Commerce of Provinces and the Capital in issuing and managing the Certificate of Origin under the Preferential, No.1197/MOIC, date 08 September 2022.	PDF
2	ຂໍ້ຕົກລົງ ວ່າດ້ວຍ ການມອບສິດໃຫ້ພະແນກອຸດສາຫະກໍາ ແລະ ການຄ້າ ແຂວງ, ນະຄອນຫຼວງ ອອກ ແລະ ຄຸ້ມຄອງໃບຢັ້ງຢືນແຫຼ່ງກໍາເນີດສິນຄ້າທີ່ໄດ້ຮັບສິດທິພິເສດ, ເລກທີ 1197/ອຄ, ລົງວັນທີ 08 ກັນຍາ 2022.	PDF

ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.

Your opinion matters!

ຂອບໃຈ ສຳລັບຄຳຄິດເຫັນຂອງທ່ານ.