ອີງຕາມ ຄໍາແນະນໍາ ກ່ຽວກັບການຄຸ້ມຄອງການຂົນສົ່ງສິນຄ້າ, ຕູ້ສິນຄ້າ ແລະ ເອກະສານ ຂົນສົ່ງສິນຄ້າດ້ວຍລະບົບຄຸ້ມຄອງການຂົນສົ່ງຂ້າມແດນ ເອເລັກໂຕຣນິກ, ເລກທີ 2525/ຍທຂ, ລົງວັນທີ 30 ມັງກອນ 2023.
ການຈັດຕັ້ງປະຕິບັດຂັ້ນຕອນຄຸ້ມຄອງໃຫ້ລົດຂົນສົ່ງສິນຄ້າຕ່າງປະເທດ ຜ່ານເຂົ້າຊົ່ວຄາວໃນອານາເຂດພາສີລາວ ຜູ້ຂົນສົ່ງສິນຄ້າຕ້ອງປະຕິບັດຕາມເງື່ອນໄຂ ດັ່ງນີ້:
- ຕ້ອງເປັນສະມາຊິກຂອງສະມາຄົມຜູ້ຂົນສົ່ງ ແລະ ຈັດສົ່ງສິນຄ້າລະຫວ່າງປະເທດ ສປປ ລາວ LITFA ຕາມປະເພດທີ່ໄດ້ຮັບອະນຸມັດ ແລະ ໄດ້ເສຍຄ່າບໍາລຸງສະມາຄົມຄົບຖ້ວນພາຍໃນໄຕມາດໜຶ່ງ (ສໍາລັບສະມາຊິກເກົ່າ) ຫຼື ຖ້າເປັນສະມາຊິກສາມັນໃໝ່ແມ່ນພາຍຫຼັງໄດ້ຮັບການອະນຸມັດເປັນສະມາຊິກສາມັນ ແລະ ເສຍຄ່າລົງທະບຽນ ແລະ ຄ່າບໍາລຸງສະມາຄົມ ຢ່າງຄົບຖ້ວນ;
- ເປັນຄູ່ສັນຍາກັບບໍລິສັດຂົນສົ່ງຕ່າງປະເທດ ທີ່ໄດ້ອະນຸຍາດການດໍາເນີນທຸລະກິດການຂົນສົ່ງຢ່າງຖືກຕ້ອງ ແລະ ມີເອກະສານຢັ້ງຢືນການເປັນຜູ້ຄໍ້າປະກັນໃຫ້ແກ່ຄູ່ສັນຍາຕາມແບບຟອມຂໍ້ຕົກລົງ LITFA ໃນລະບົບ CBTM;
- ຮັບຜິດຊອບຄ່າໃຊ້ຈ່າຍ, ຄ່ານໍາໃຊ້ລະບົບ ແລະ ຄ່າພັນທະອື່ນ ທີ່ອອກໂດຍສະມາຄົມຜູ້ຂົນສົ່ງ ແລະ ຈັດສົ່ງສິນຄ້າລະຫວ່າງປະເທດ ສປປ ລາວ LITFA;
- ຕ້ອງໄດ້ຜ່ານການຝຶກອົບຮົມການນໍາໃຊ້ລະບົບ CBTM, ຜ່ານສອບເສັງ ແລະ ມີລະຫັດເຂົ້າລະບົບເປັນຂອງຕົວເອງ;
- ຮັບຜິດຊອບອອກເອກະສານຂົນສົ່ງໃນນາມຜູ້ຂົນສົ່ງຕ່າງປະເທດ ແລະ ຮັບຜິດຊອບໃນການຄໍ້າປະກັນການຂົນສົ່ງພ້ອມທັງປະກັນໄພ ໃນແຕ່ລະຖ້ຽວ;
- ບໍ່ຖືກດໍາເນີນຄະດີ ຫຼື ບໍ່ຖືກສານຕັດສິນລົງໂທດ ຕັດສິນອິດສະລະພາບ ກ່ຽວກັບການດໍາເນີນທຸລະກິດການຂົນສົ່ງສິນຄ້າ, ກົດໝາຍ ແລະ ລະບຽບການທີ່ກ່ຽວຂ້ອງ.
ການດໍາເນີນການຄຸ້ມຄອງຕູ້ສິນຄ້າ, ນໍາເຂົ້າ, ເກັບຮັກສາ ແລະ ສົ່ງອອກ ຕ້ອງປະຕິບັດ ດັ່ງນີ້:
- ຕູ້ສິນຄ້າຂອງຜູ້ປະກອບການທີ່ໄດ້ລົງທະບຽນຖືກຕ້ອງມາກ່ອນແລ້ວ ແລະ ມີອາຍຸການໃຊ້ງານທີ່ນໍາໃຊ້ໄດ້ຢູ່ຕາມເງື່ອນໄຂການຂົນສົ່ງສາກົນ ແມ່ນໃຫ້ປະຕິບັດຄືພາຫະນະ;
- ຕູ້ສິນຄ້າສ່ວນຕົວ (ທີ່ບໍ່ໄດ້ລົງທະບຽນມາກ່ອນ ຫຼື ໝົດອາຍຸການໃຊ້ງານ) ແມ່ນຕ້ອງໄດ້ມາລົງທະບຽນໃນລະບົບ CBTM ກ່ອນ ໂດຍການໃຊ້ລະຫັດຕູ້ສະເພາະຂອງຜູ້ປະກອບການເພື່ອຕິດຕາມການເຂົ້າມາຂອງ ຕູ້ບັນຈຸສິນຄ້າ ແລະ ຕູ້ເປົ່າ ໃນການເກັບຮັກສາ ແລະ ການນໍາໃຊ້ຕູ້ບັນຈຸສິນຄ້າໂດຍຜູ້ປະກອບການຕ່າງໆໃນການເຄື່ອນໄຫວຂົນສົ່ງສິນຄ້າໃນອານາເຂດພາສີລາວ;
- ການເກັບຮັກສາຕູ້ສິນຄ້າເປົ່າແມ່ນໃຫ້ເກັບຢູ່ໃນເຂດທ່າບົກ ຫຼື ລະບົບສາງ ທີ່ໄດ້ຮັບການອະນຸຍາດຈາກກົມຂົນສົ່ງ, ກົມພາສີ ແລະ ດໍາເນີນການຄຸ້ມຄອງດ້ວຍລະບົບ CBTM;
- ສະຖານທີ່ເກັບມ້ຽນຕູ້ທີ່ຖືກຮັບຮອງເປັນລະບົບສາງຕາມກົດໝາຍພາສີ ແມ່ນໃຫ້ຖືເອົາໄລຍະເວລາສູງສຸດຂອງລະບົບສາງເປັນໄລຍະເວລາສູງສຸດຂອງການເກັບຮັກສາຕູ້ (ຖ້າເກີນໃຫ້ປະຕິບັດຕາມລະບຽບການຂອງພາສີ).
ສຳລັບຜູ້ນໍາໃຊ້ລະບົບ User ID ຢູ່ໃນລະບົບ CBTM ໄດ້ກໍານົດການຄຸ້ມຄອງໄວ້ຢູ່ 3 ລະດັບ ຄື: (1) User ID ຂອງກອງເລຂາຄະນະກໍາມະການອໍານວຍຄວາມສະດວກທາງດ້ານການຄ້າ ແລະ ການຂົນສົ່ງ; (2) User ID ຂອງດ່ານສາກົນ; ແລະ (3) User ID ຂອງຜູ້ປະກອບການ.
ລາຍລະອຽດເພີ່ມເຕີມ ສາມາດຕິດຕໍ່ພົວພັນກັບ ກະຊວງໂຍທາທິການ ແລະ ຂົນສົ່ງ, ເບີໂທ: 856-21 412255, ສາຍດ່ວນ: 1518, ແຟັກ: 856-21 412250 ແລະ ເວັບໄຊ໌ທ https://www.mpwt.gov.la/
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.