ເສີມຂະຫຍາຍວຽກງານການຄ້າ ລະຫວ່າງ ສປປ ລາວ ແລະ ສສ ຫວຽດນາມ
ຕອນເຊົ້າ ວັນທີ 08 ເມສາ 2024 ທີ່ ໂຮງແຮມເມືອງແທັງ, ນະຄອນຫຼວງວຽງຈັນ ໄດ້ມີພິທີລົງນາມເຊັນສັນຍາການຄ້າສອງຝ່າຍ ລະຫວ່າງລັດຖະບານ ແຫ່ງ ສປປ ລາວ ແລະ ສສ ຫວຽດນາມ ພ້ອມທັງປຶກສາຫາລືກ່ຽວກັບການຈັດຕັ້ງປະຕິບັດແຜນການຮ່ວມມືດ້ານອຸດສາຫະກໍາ ແລະ ການຄ້າ ປະຈຳປີ 2024 ໂດຍໃຫ້ກຽດກ່າວຕ້ອນຮັບຂອງທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ, ສປປ ລາວ ແລະ ການເຂົ້າຮ່ວມຂອງ ທ່ານ ຫງວຽນ ຫົ່ງ ຢຽນ ລັດຖະມົນຕີກະຊວງອຸດສາຫະກຳ ແລະ ການຄ້າ, ສສ ຫວຽດນາມ ພ້ອມດ້ວຍຄະນະຈາກສອງຝ່າຍເຂົ້າຮ່ວມ.
ການພົບປະຢ່າງເປັນທາງການລະຫວ່າງສອງກະຊວງໃນຄັ້ງນີ້ ແມ່ນຕີລາຄາສູງເຖິງຄວາມໝາຍຄວາມສໍາຄັນໃນການຮ່ວມມືດ້ານອຸດສາຫະກໍາ ແລະ ການຄ້າ ຂອງສອງລັດຖະບານ ໂດຍໄດ້ມີພິທີລົງນາມເຊັນສັນຍາການຄ້າສອງຝ່າຍ(ສະບັບປັບປຸງ) ລະຫວ່າງ ທ່ານ ລັດຖະມົນຕີກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ແລະ ທ່ານ ລັດຖະມົນຕີກະຊວງອຸດສາຫະກຳ ແລະ ການຄ້າ ແຫ່ງ ສສ ຫວຽດນາມ; ລົງນາມບົດບັນທຶກຄວາມເຂົ້າໃຈກ່ຽວກັບຄວາມສໍາຄັນໃນການຄຸ້ມຄອງລັດທີ່ຕິດພັນກັບການຕ້ານ-ສະກັດກັ້ນພຶດຕິກຳການດຳເນີນທຸລະກິດ, ການຄ້າ ທີ່ລະເມີດກົດໝາຍ, ປົກປ້ອງສິດຜົນປະໂຫຍດຂອງຜູ້ຊົມໃຊ້ ແລະ ເພີ່ມທະວີການຮ່ວມມືໃນຂົງເຂດຄຸ້ມຄອງຕະຫຼາດ ຕິດພັນກັບວຽກງານກວດກາການຄ້າ ລະຫວ່າງ ກົມແຂ່ງຂັນທາງທຸລະກິດ ແລະ ກວດກາການຄ້າ, ສປປ ລາວ ແລະ ກົມໃຫຍ່ຄຸ້ມຄອງຕະຫລາດ, ສສ ຫວຽດນາມ; ແລະ ລົງນາມບົດບັນທຶກຄວາມເຂົ້າໃຈ ລະຫວ່າງ ກຸ່ມບໍລິສັດພອນສັກ, ສະຖາບັນ NARIME ແລະ ບໍລິສັດ GP Holdings.
ພ້ອມດຽວກັນ, ຍັງໄດ້ປຶກສາຫາລື ເພື່ອຄົ້ນຄ້ວາປັບປຸງກົນໄກທີ່ເໝາະສົມ ໃນການຈັດຕັ້ງປະຕິບັດແຜນຮ່ວມມືດ້ານອຸດສາຫະກໍາ ແລະ ການຄ້າ ສອງຝ່າຍ ປະຈຳປີ 2024 ໂດຍເນັ້ນໃສ່ 6 ວຽກບູລິມະສິດ ເຊັ່ນ: (1) ເຈລະຈາສັນຍາການຄ້າ, ການຄ້າຕ່າງປະເທດ, ການສົ່ງເສີມການຄ້າ ແລະ ການຜະລິດ ເພື່ອສົ່ງອອກ ພ້ອມທັງ ການອຳນວຍຄວາມສະດວກທາງດ້ານການຄ້າ ແລະ ສູ້ຊົນເພີ່ມມູນຄ່າການຄ້າສອງຝ່າຍໃຫ້ບັນລຸ 10-15% ຕໍ່ປີ; (2) ປຶກສາຫາລືກ່ຽວກັບການຄົ້ນຄວ້າເພື່ອທົດລອງສ້າງເຂດເສດຖະກິດ ແລະ ນິຄົມອຸດສາຫະກຳ ຢູ່ແຂວງເປົ້າໝາຍ ທີ່ມີຊາຍແດນຕິດລະຫວ່າງ ສອງປະເທດ ແລະ ສຶກສາຄວາມເປັນໄປໄດ້ໃນການສ້າງໂຄງການຕົວແບບໃນຂົງເຂດອຸດສາຫະກຳປຸງແຕ່ງທີ່ມີທ່າແຮງ; (3) ປຶກສາຫາລື ກ່ຽວກັບການຄົ້ນຄວ້າ ເພື່ອກຳນົດຈຸດສ້າງສາງນໍ້າມັນທີ່ເໝາະສົມ ຢູ່ ສປປ ລາວ ເພື່ອຮອງຮັບການນຳເຂົ້ານ້ຳມັນຈາກ ສສ ຫວຽດນາມ; ແລະ (4) ປຶກສາຫາລື ກ່ຽວກັບການຮ່ວມມື ແລະ ພັດທະນາວຽກງານການຄ້າ ເອເລັກໂຕຼນິກ, ຊຶ່ງເປັນວຽກທີ່ສຳຄັນໃນຍຸກເສດຖະກິດ ດີຈີຕອນ.
ແຫຼ່ງຂໍ້ມູນຂ່າວສານ:
- ຂ່າວສານອຸດສາຫະກໍາ ແລະ ການຄ້າ (https://www.moic.gov.la/?p=12846&fbclid=IwAR2rtWUbS4qPygStTeFX1v8MdqmSWiz-Fjk_2v197cae9vJ3EAq5wXTmrzQ_aem_AU5Ieucadne9Apj1sh4EkyZneB8mwKIWKjzPg0kob3X48RMPmhpp_0DsMS8fKDNiwjaCSm_7n4ccS11klz4lrKKx)
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.