ໃນປະຈຸບັນນີ້ ປະເທດຕ່າງໆທົ່ວໂລກໄດ້ເພີ່ມທະວີຄວາມເອົາໃຈໃສ່ ໃນການສະກັດກັ້ນສັດຕູພືດຈາກປະເທດອື່ນ ເພື່ອບໍ່ໃຫ້ເຂົ້າມາທໍາລາຍພືດຜົນໃນປະເທດຂອງຕົນ ໂດຍຜ່ານການນໍາໃຊ້ມາດຕະການສຸຂານາໄມພືດ ຕໍ່ກັບການເຄື່ອນຍ້າຍວັດຖຸທີ່ມີຄວາມສ່ຽງຕໍ່ສັດຕູພືດ ທີ່ເປັນອັນຕະລາຍຕິດແປດໄປນໍາ, ໂດຍສະເພາະແມ່ນພັດສະດຸຫຸ້ມຫໍ່ ຫຼື ຕູ້ບັນຈຸສິນຄ້າທີ່ເຮັດດ້ວຍໄມ້ ຊຶ່ງກໍາລັງຖືກຄວບຄຸມຢ່າງເຂັ້ມງວດທາງດ້ານ ການນໍາໃຊ້ມາດຕະການສຸຂານາໄມພືດ ກ່ອນການນໍາເຂົ້າຈາກຫຼາຍປະເທດ ບົນພື້ນຖານປະຕິບັດຕາມມາດຕະຖານສາກົນ ດ້ານສຸຂານາໄມພືດທີ່ໄດ້ກໍານົດໄວ້ ໃນສົນທິສັນຍາປ້ອງກັນພືດສາກົນ.
ດັ່ງນັ້ນ, ເພື່ອອໍານວຍຄວາມສະດວກທາງດ້ານການຄ້າ ແລະ ສອດຄ່ອງກັບລະບຽບຫຼັກການ ແລະ ເງື່ອນໄຂຂອງປະເທດນໍາເຂົ້າ, ກົມປູກຝັງຈຶ່ງແຈ້ງບາງຂໍ້ມູນທີ່ຈໍາເປັນ ໃນການປະຕິບັດຕໍ່ກັບພັດສະດຸຫຸ້ມຫໍ່ທີ່ເປັນເປົ້າໝາຍຄືດັ່ງນີ້:
- ປະເທດທີ່ນໍາໃຊ້ຂໍ້ບັງຄັບໃນການຄວບຄຸມການນໍາໃຊ້ ພັດສະດຸຫຸ້ມຫໍ່ ແລະ ຜະລິດຕະພັນໄມ້ ໃນການເຄື່ອນຍ້າຍວັດຖຸຕ່າງໆເຂົ້າມາໃນປະເທດ ປະກອບມີຄື: Argentina [ARG], Australia [AUS], Belgium [BEL], Canada [CAN], Chile [CHL], China [CHN], Colombia [COL], Costa Rica [CRI], Czech Republic [CZE], Denmark [DNK], Estonia [EST], Finland [FIN], France [FRA], Germany [DEU], Greece [GRC], Hungary [HUN], India [IND], Japan [JPN], Korea, Republic of [KOR], Latvia [LVA], Malaysia [MYS], Netherlands [NLD], Peru [PER], Poland [POL], Spain [ESP], Tunisia [TUN], United Kingdom [GBR], United States of America [USA].
- ພັດສະດຸຫຸ້ມຫໍ່ ແລະ ຜະລິດຕະພັນໄມ້ ທີ່ເປັນເປົ້າໝາຍຄວບຄຸມປະກອບມີ: ໄມ້ໝອນຮອງພື້ນ, ຖ້ານໄມ້ວາງພື້ນ ຫຼື ໄມ້ປາແລັດ (Pallets), ກັບ ຫຼື ກ່ອງທີ່ເຮັດດ້ວຍໄມ້ (Wooden Cases ຫຼື Wooden Crates), ໄມ້ຄໍ້າ ແລະ ຂັ້ນສິນຄ້າ (Wooden Crates) ຕ່າງໆ ແລະ ກໍ້ສາຍເຄເບີ້ນ (Cable Drums).
ພັດສະດຸຫຸ້ມຫໍ່ ແລະ ຜະລິດຕະພັນໄມ້ ທີ່ກ່າວມາຂ້າງເທິງນັ້ນ ແມ່ນມີຂໍ້ຍົກເວັ້ນຊຶ່ງບໍ່ໄດ້ກວມເອົາຄື:
- ພັດສະດຸຫຸ້ມຫໍ່ ແລະ ຜະລິດຕະພັນໄມ້ ທີ່ມີຄວາມໜາເທົ່າກັບ ຫຼື ໜ້ອຍກວ່າ 6 ມິນລີແມັດ;
- ຜະລິດຕະພັນໄມ້ທີ່ຜ່ານການປຸງແຕ່ງເຊັ່ນ: ໄມ້ຝານບາງ, ໄມ້ອັດ (Plywood or veneer, Particle board, oriented strand board) ຊຶ່ງຜ່ານການປຸງແຕ່ງໂດຍໃຊ້ກາວໜຽວ, ຄວາມຮ້ອນ ຫຼື ແຮງດັນ;
- ຖັງເຫຼົ້າວາຍ ແລະ ກະດອນອັດເຮັດດ້ວຍໄມ້ ທີ່ຖືກຜ່ານຄວາມຮ້ອນໃນຂະບວນການຜະລິດ;
- ກັບ ຫຼື ກ່ອງຂອງຂວັນສໍາລັບເຫຼົ້າວາຍ, ຢາສູບຊິກກາ ແລະ ສິນຄ້າອື່ນໆທີ່ເຮັດດ້ວຍໄມ້ ແລະ ໄດ້ຜ່ານການປຸງແຕ່ງໂດຍປາສະຈາກສັດຕູພືດ;
- ຂີ້ເລື່ອຍໄມ້ (Sawdust), ຂີ້ກົບໄມ້ (Wood shavings) ແລະ ເສດໄມ້ທີ່ເປັນເສັ້ນ (Wood wool);
- ຜະລິດຕະພັນໄມ້ທີ່ໄດ້ປະກອບໂດຍຖາວອນ ຕິດກັບພາຫະນະຂົນສົ່ງເຄື່ອງ ຫຼື ຕູ້ບັນຈຸ.
- ສັດຕູພືດເປົ້າໝາຍທີ່ຕ້ອງຫ້າມ ຕິດແປດໄປກັບວັດຖຸຄວບຄຸມຄື:
- ມອດເຈາະເປືອກໄມ້ ຕະກູນ Anobiidae, ມອດເຈາະໄມ້ ຕະກູນ Bostrichidae, ມອດເຈາະໄມ້ ຕະກູນ Buprestidae, ດ້ວງງວງເຈາະລໍາຕົ້ນ ຕະກູນ Cerambydae, ມອດງວງເຈາະໄມ້ ຕະກູນ Curculionidae, ແມງປວກ ໃນໝວດ Isoptera, ມອດເຈາະໄມ້ ຕະກູນ Lyctidae, ແມງດ້ວງເຈາະເປືອກ ຕະກູນ Scolytidae ແລະ ແມງໄມ້ປີກບາງ ຕະກູນ Sricidae.
- ມາດຕະການປະຕິບັດໃນການນໍາໃຊ້ພັດສະດຸຫຸ້ມຫໍ່ ແລະ ຜະລິດຕະພັນໄມ້, ກ່ອນສົ່ງອອກຈາກ ສປປ ລາວ ໄປຕ່າງປະເທດ.
- ອີງຕາມມາດຕະຖານສາກົນ ເລກທີ 15 ທີ່ກໍານົດໂດຍ ອົງການປ້ອງກັນພືດແຫ່ງຊາດ ແມ່ນຕ້ອງຈັດຕັ້ງການບໍາບັດ ຫຼື ກໍາຈັດສັດຕູພືດດ້ວຍການຮົມຢາເມທີນໂບມາຍ (Methyl Bromide) ແລະ ການອົບອາຍຮ້ອນ (Heat Treatment) ຫຼັງຈາກນັ້ນມີການຈໍ້າກາຢັ້ງຢືນ ໃສ່ເທິງພັດສະດຸໄມ້ດັ່ງກ່າວ.
- ນິຕິບຸກຄົນ ຫຼື ການຈັດຕັ້ງທີ່ຕ້ອງການດໍາເນີນທຸລະກິດ ຫຼື ຈັດຕັ້ງການບໍາບັດ ດ້ວຍການຮົມຢາເມທີນໂບມາຍ ແລະ ການອົບອາຍຮ້ອນ ຕ້ອງປະຕິບັດຕາມຂໍ້ແນະນໍາເຕັກນິກຂອງກົມປູກຝັງ ສະບັບເລກທີ 053/ປຝ.06 ລົງວັນທີ 23/1/2006 ແລະ ໄດ້ຮັບອະນຸຍາດຂຶ້ນທະບຽນວິຊາການຢູ່ກົມປູກຝັງ ຊຶ່ງເປັນຕົວແທນຂອງອົງການປ້ອງກັນພືດແຫ່ງຊາດ.
- ສໍາລັບຜູ້ສົ່ງອອກ ທີ່ມີຈຸດປະສົງຕ້ອງການຮັບບໍລິການບໍາບັດ ພັດສະດຸຫຸ້ມຫໍ່ ແລະ ຜະລິດຕະພັນໄມ້ທີ່ເປັນເປົ້າໝາຍຄວບຄຸມ, ກະລຸນາພົວພັນ ຫຼື ສອບຖາມມາຍັງກົມປູກຝັງ ກ່ຽວກັບບໍລິສັດທີ່ໄດ້ຮັບການຂຶ້ນທະບຽນ.
- ຂໍ້ມູນປະກອບໃນແຈ້ງການສະບັບນີ້ ເປັນບ່ອນອີງພື້ນຖານໃນການຈັດຕັ້ງປະຕິບັດ. ແຕ່ເຖິງຢ່າງໃດກໍຕາມ ໃນການສົ່ງອອກຕົວຈິງແມ່ນຮຽກຮ້ອງໃຫ້ ຜູ້ສົ່ງອອກຕ້ອງໄດ້ຊອກຫາຂໍ້ມູນ ລະບຽບການບັງຄັບໃຊ້ຕົວຈິງເພີ່ມເຕີມຢ່າງລະອຽດ ໃນແຕ່ລະໄລຍະ ພ້ອມທັງແຈ້ງລາຍງານໃຫ້ ກົມປູກຝັງຊາບເພື່ອຊອກຫາມາດຕະການແກ້ໄຂ ໃຫ້ທັນເວລາ ແລະ ສອດຄ່ອງກັບຂໍ້ກໍານົດຂອງປະເທດນໍາເຂົ້າ ແລະ ສົ່ງຜ່ານ.
- ມອບໃຫ້ຂະແໜງປູກຝັງທົ່ວປະເທດ ເຜີຍແຜ່ຂໍ້ມູນແຈ້ງການສະບັບນີ້ ໃຫ້ພາກສ່ວນທີ່ກ່ຽວຂ້ອງຊາບຢ່າງທົ່ວເຖິງ ແລະ ລາຍງານໃຫ້ກົມປູກຝັງກ່ຽວກັບຜົນໄດ້ຮັບ, ບັນຫາ ແລະ ຂໍ້ຫຍຸ້ງຍາກເປັນແຕ່ລະໄລຍະ.
ດັ່ງນັ້ນ, ຈຶ່ງແຈ້ງມາຍັງທ່ານເພື່ອຊາບ ແລະ ຈັດຕັ້ງຜັນຂະຫຍາຍ ເນື້ອໃນແຈ້ງການແນະນໍາສະບັບນີ້ ໃຫ້ມີປະສິດທິພາບສູງ.
| # | ຫົວຂໍ້ | ດາວໂຫຼດ |
|---|---|---|
| 1 | Notice on the regulation of wood packaging material and wood products for export from LAO PDR to abroad |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.