ສາລະບານ

I. ຈຸດປະສົງ
II. ເນື້ອໃນ
III. ໃບຢັ້ງຢືນແຫຼ່ງກໍາເນີດສິນຄ້າ
IV. ອົງການອອກໃບຢັ້ງຢືນແຫຼ່ງກໍາເນີດສິນຄ້າ
V. ການຂໍໃບຢັ້ງຢືນແຫຼ່ງກໍາເນີດສິນຄ້າ
VI. ການອອກໃບຢັ້ງຢືນແຫຼ່ງກໍາເນີດສິນຄ້າ
VII. ການປະຕິເສດອອກໃບຢັ້ງຢືນແຫຼ່ງກໍາເນີດສິນຄ້າ
VIII. ການຈັດຕັ້ງປະຕິບັດ

ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ

ກະຊວງອຸດສາຫະກໍາ ແລະ ການຄ້າ ເລກທີ 1031/ອຄ.ກຂອ
ນະຄອນຫຼວງວຽງຈັນ, ວັນທີ 25 ພຶດສະພາ 2010

ບົດແນະນໍາ
ກ່ຽວກັບການຈັດຕັ້ງປະຕິບັດດໍາລັດວ່າດ້ວຍແຫຼ່ງກໍາເນີດສິນຄ້ານໍາເຂົ້າ ແລະ ສົ່ງອອກ

  • ອີງຕາມ ດໍາລັດຂອງນາຍົກລັດຖະມົນຕີ ວ່າດ້ວຍແຫຼ່ງກໍາເນີດຂອງສິນຄ້ານໍາເຂົ້າ ແລະ ສົ່ງອອກ ສະບັບເລກທີ 228/ນຍ, ລົງວັນທີ 22/04/2010;
  • ອີງຕາມ ການສະເໜີຂອງກົມການນໍາເຂົ້າ ແລະ ສົ່ງອອກ.

ລັດຖະມົນຕີວ່າການກະຊວງອຸດສາຫະກໍາ ແລະ ການຄ້າ ອອກບົດແນະນໍາ
ກ່ຽວກັບການຈັດຕັ້ງປະຕິບັດດັ່ງນີ້:

I. ຈຸດປະສົງ

   ບົດແນະນໍາສະບັບນີ້ ວາງອອກເພື່ອເຮັດໃຫ້ການຈັດຕັ້ງປະຕິບັດດໍາລັດ ສະບັບເລກທີ 228/ນຍ, ລົງວັນທີ 22/04/2010 ວ່າດ້ວຍແຫຼ່ງກໍາເນີດສິນຄ້ານໍາເຂົ້າ ແລະ ສົ່ງອອກໃຫ້ປະກົດຜົນເປັນຈິງ ແລະ ເປັນເອກະພາບທົ່ວປະເທດ. ຂ້າງເທິງ

II. ເນື້ອໃນ

   ເນື້ອໃນຂອງບົດແນະນໍາສະບັບນີ້ ກວມເອົາລະບຽບແຫຼ່ງກໍາເນີດສິນຄ້າທີ່ບໍ່ໄດ້ສິດພິເສດ ແລະ ລະບຽບແຫຼ່ງກໍາເນີດສິນຄ້າທີ່ໄດ້ສິດພິເສດ.

1). ລະບຽບແຫຼ່ງກໍາເນີດສິນຄ້າທີ່ບໍ່ໄດ້ສິດພິເສດ

(ກ) ລະບຽບແຫຼ່ງກໍາເນີດສິນຄ້າທີ່ບໍ່ໄດ້ສິດພິເສດ ຖືກນໍາໃຊ້ເພື່ອ:

  • ກໍານົດສິນຄ້ານໍາເຂົ້າທີ່ຈະໄດ້ຮັບການປະຕິບັດຫຼັກການ ຊາດທີ່ໄດ້ຮັບອະນຸເຄາະຫຼາຍທີ່ສຸດ;
  • ປະຕິບັດບັນດາມາດຕະການ ແລະ ເຄື່ອງມືທາງດ້ານນະໂຍບາຍການຄ້າເຊັ່ນ: ມາດຕະການຕອບໂຕ້ການທຸ່ມຕະຫຼາດ ແລະ ມາດຕະການປົກປ້ອງຜູ້ຜະລິດພາຍໃນ;
  • ເກັບກໍາສະຖິຕິທາງດ້ານການຄ້າ; ແລະ
  • ການຈັດຊື້ຂອງລັດຖະບານ.

(ຂ) ບົດແນະນໍາສະບັບນີ້ ໄດ້ອີງໃສ່ຫຼັກການຕໍ່ໄປນີ້ ເພື່ອກໍານົດແຫຼ່ງກໍາເນີດຂອງສິນຄ້າ:

  • ສິນຄ້າທີ່ໄດ້ມາ ຫຼື ຜະລິດຂຶ້ນໂດຍໃຊ້ວັດຖຸດິບພາຍໃນປະເທດທັງໝົດ: ລວມມີສັດທີ່ມີຊີວິດທີ່ເກີດ ແລະ ລ້ຽງໃນປະເທດນັ້ນ, ຜັກ ແລະ ພືດທີ່ເກັບກ່ຽວໃນປະເທດນັ້ນ; ສິ້ນສ່ວນ, ອາໄຫລ່ ແລະ ວັດຖຸດິບທີ່ນໍາມາໃຊ້ຄືນ ຈາກສິນຄ້າທີ່ບໍ່ສາມາດນໍາໃຊ້ ແລະ ສ້ອມແປງອີກແລ້ວ ແລະ ສິນຄ້າທີ່ໄດ້ຈາກພື້ນນໍ້າ ແລະ ພື້ນທະເລນອກເຂດນ່ານນໍ້າຂອງປະເທດຜູ້ສົ່ງອອກ ຖ້າວ່າປະເທດນັ້ນຫາກມີສິດໃຊ້ປະໂຫຍດຈາກພື້ນນໍ້າ ແລະ ພື້ນທະເລນັ້ນ.
  • ການປ່ຽນແປງຢ່າງຫຼວງຫຼາຍຂອງສິນຄ້າ: ໝາຍເຖິງສິນຄ້າສໍາເລັດຮູບທີ່ຜະລິດຂຶ້ນ ທີ່ມີການປ່ຽນແປງລະຫັດສິນຄ້າ ໃນລະດັບ 4 ຕົວເລກທີ່ແຕກຕ່າງກັບລະຫັດສິນຄ້າ ຂອງວັດຖຸດິບນໍາເຂົ້າທີ່ໃຊ້ໃນການຜະລິດສິນຄ້ານັ້ນ. ໃນກໍລະນີທີ່ສິນຄ້າ ໄດ້ຜ່ານຂະບວນການຜະລິດຢູ່ຫຼາຍປະເທດ, ປະເທດທີ່ດໍາເນີນການປ່ຽນແປງຢ່າງຫຼວງຫຼາຍຂອງສິນຄ້າເທື່ອສຸດທ້າຍ ໃຫ້ຖືເປັນປະເທດແຫຼ່ງກໍາເນີດຂອງສິນຄ້ານັ້ນ.

(ຄ) ສິນຄ້າທີ່ມີການປ່ຽນແປງພຽງເລັກນ້ອຍ ຕາມມາດຕາ 8 ຂອງດໍາລັດ ສະບັບເລກທີ 228/ນຍ, ລົງວັນທີ 22/04/2010 ຈະບໍ່ຖືວ່າເປັນສິນຄ້າທີ່ໄດ້ແຫຼ່ງກໍາເນີດ.

(ງ) ປັດໄຈທີ່ບໍ່ມີຜົນກະທົບຕໍ່ກັບແຫຼ່ງກໍາເນີດສິນຄ້າ ມາດຕາ 9 ແລະ 10 ຂອງດໍາລັດ ສະບັບເລກທີ 228/ນຍ, ລົງວັນທີ 22/04/2010 ໄດ້ກໍານົດບັນດາປັດໄຈທີ່ບໍ່ມີຜົນກະທົບ ຕໍ່ກັບການກໍານົດແຫຼ່ງກໍາເນີດສິນຄ້າເຊັ່ນ: ການຫຸ້ມຫໍ່ສິນຄ້າ, ເຄື່ອງອຸປະກອນ, ເອກະສານຄູ່ມືການນໍາໃຊ້, ພະລັງງານທີ່ໃຊ້ເຂົ້າໃນການຜະລິດສິນຄ້າ, ໂຮງງານ, ເຄື່ອງຈັກ ແລະ ເຄື່ອງມືທີ່ໃຊ້ເຂົ້າໃນການຜະລິດສິນຄ້າ.

2). ລະບຽບແຫຼ່ງກໍາເນີດສິນຄ້າທີ່ບໍ່ໄດ້ສິດພິເສດ

   ສປປ ລາວ ຈະນໍາໃຊ້ລະບຽບແຫຼ່ງກໍາເນີດສິນຄ້າທີ່ໄດ້ສິດພິເສດ ຕໍ່ສິນຄ້າຂອງປະເທດ ແລະ ກຸ່ມປະເທດພາຍໃຕ້ສັນຍາການຄ້າທີ່ ສປປ ລາວ ເປັນພາຄີ (ດັ່ງທີ່ໄດ້ກໍານົດໃນ ມາດຕາ 5 ຂອງດໍາລັດ ສະບັບເລກທີ 228/ນຍ, ລົງວັນທີ 22/04/2010).

   ປະເທດ ແລະ ກຸ່ມປະເທດຕ່າງໆຕໍ່ໄປນີ້ ມີສິດທີ່ຈະໄດ້ສິດພິເສດໃນການຍົກເວັ້ນ ຫຼື ຫຼຸດຜ່ອນອັດຕາພາສີນໍາເຂົ້າຈາກ ສປປ ລາວ ຖ້າວ່າສິນຄ້າທີ່ນໍາເຂົ້າຈາກປະເທດ ຫຼື ກຸ່ມປະເທດເຫຼົ່ານັ້ນ ຫາກໄດ້ເງື່ອນໄຂຕາມລະບຽບແຫຼ່ງກໍາເນີດສິນຄ້າທີ່ໄດ້ສິດພິເສດດັ່ງນີ້:

  1. ລະບົບການຫຼຸດອັດຕາພາສີທີ່ມີຜົນບັງຄັບໃຊ້ຮ່ວມກັນ ຂອງເຂດການຄ້າເສລີອາຊຽນ;
  2. ເຂດການຄ້າເສລີອາຊຽນ-ຈີນ;
  3. ເຂດການຄ້າເສລີອາຊຽນ-ຍີ່ປຸ່ນ;
  4. ເຂດການຄ້າເສລີອາຊຽນ-ອິນເດຍ;
  5. ເຂດການຄ້າເສລີອາຊຽນ-ອົດສະຕາລີ-ນິວຊີແລນ;
  6. ເຂດການຄ້າເສລີອາຊຽນ-ເກົາຫຼີ;
  7. ສັນຍາການຄ້າລາວ-ຫວຽດ. ຂ້າງເທິງ

III. ໃບຢັ້ງຢືນແຫຼ່ງກໍາເນີດສິນຄ້າ

   ໃບຢັ້ງຢືນແຫຼ່ງກໍາເນີດສິນຄ້າມີສອງຮູບແບບຄື: ໃບຢັ້ງຢືນແຫຼ່ງກໍາເນີດສິນຄ້າແບບທໍາມະດາ ແລະ ໃບຢັ້ງຢືນແຫຼ່ງກໍາເນີດສິນຄ້າແບບໄດ້ສິດພິເສດທາງດ້ານການຄ້າ.

(ກ) ໃບຢັ້ງຢືນແຫຼ່ງກໍາເນີດສິນຄ້າແບບທໍາມະດາ: ແມ່ນເອກະສານໜຶ່ງທີ່ໃຊ້ເພື່ອເຮັດໃຫ້ຜູ້ຊື້ ໝັ້ນໃຈວ່າສິນຄ້າທີ່ສົ່ງອອກແມ່ນສິນຄ້າທີ່ໄດ້ມາທັງໝົດ, ຜະລິດ ຫຼື ປຸງແຕ່ງຂຶ້ນຢູ່ໃນ ສປປ ລາວ.

(ຂ) ໃບຢັ້ງຢືນແຫຼ່ງກໍາເນີດສິນຄ້າ ແບບໄດ້ສິດພິເສດທາງດ້ານການຄ້າ: ແມ່ນເອກະສານໜຶ່ງທີ່ຊ່ວຍປັບປຸງຄວາມໄດ້ປຽບ ໃນການແຂ່ງຂັນຂອງການສົ່ງອອກສິນຄ້າໃຫ້ດີຂຶ້ນ ໂດຍຜູ້ຊື້ມີສິດທີ່ຈະໄດ້ຮັບການຍົກເວັ້ນ ຫຼື ການຫຼຸດຜ່ອນອັດຕາພາສີຈາກການນໍາເຂົ້າສິນຄ້າ ພາຍໃຕ້ໂຄງການໃຫ້ສິດພິເສດທາງການຄ້າ ຖືກແບ່ງອອກເປັນປະເພດຕ່າງໆດັ່ງນີ້:

  1. ໃບຢັ້ງຢືນແຫຼ່ງກໍາເນີດສິນຄ້າ ຟອມ A: ແມ່ນອອກໃຫ້ແກ່ສິນຄ້າທີ່ຈະໄດ້ຮັບການຍົກເວັ້ນ ຫຼື ຫຼຸດຜ່ອນອັດຕາພາສີນໍາເຂົ້າ ພາຍໃຕ້ໂຄງການໄດ້ຮັບສິດພິເສດຝ່າຍດຽວ ທີ່ໃຫ້ໂດຍບັນດາປະເທດ ຫຼື ກຸ່ມປະເທດຕ່າງໆ ຕົວຢ່າງ: ສະຫະພາບເອີຣົບ, ສະວິດເຊີແລນ, ຍີ່ປຸ່ນ, ນໍເວ ແລະອື່ນໆ;
  2. ໃບຢັ້ງຢືນແຫຼ່ງກໍາເນີດສິນຄ້າ ຟອມ CO Korea: ແມ່ນອອກໃຫ້ສໍາລັບສິນຄ້າ ທີ່ຈະໄດ້ຮັບການຍົກເວັ້ນອັດຕາພາສີນໍາເຂົ້າຈາກ ສ.ເກົາຫຼີ ພາຍໃຕ້ລະບົບສິດພິເສດທາງດ້ານການຄ້າທີ່ ສ.ເກົາຫຼີ ໃຫ້ແກ່ບັນດາປະເທດດ້ອຍພັດທະນາ;
  3. ໃບຢັ້ງຢືນແຫຼ່ງກໍາເນີດສິນຄ້າ ຟອມ DFTP: ແມ່ນອອກໃຫ້ສໍາລັບສິນຄ້າ ທີ່ຈະໄດ້ຮັບການຍົກເວັ້ນອັດຕາພາສີນໍາເຂົ້າຈາກອິນເດຍ ພາຍໃຕ້ລະບົບສິດພິເສດທາງດ້ານການຄ້າ ທີ່ອິນເດຍໃຫ້ແກ່ບັນດາປະເທດດ້ອຍພັດທະນາ;
  4. ໃບຢັ້ງຢືນແຫຼ່ງກໍາເນີດສິນຄ້າ ຟອມ D (CEPT/ATIGA): ແມ່ນອອກໃຫ້ສໍາລັບສິນຄ້າ ທີ່ຈະໄດ້ຮັບການຍົກເວັ້ນ ຫຼື ຫຼຸດຜ່ອນອັດຕາພາສີນໍາເຂົ້າ ພາຍໃຕ້ລະບົບການຫຼຸດຜ່ອນອັດຕາພາສີ ທີ່ມີຜົນບັງຄັບໃຊ້ຮ່ວມກັນ (ຫຼື ສັນຍາການຄ້າດ້ານເສລີຂອງອາຊຽນ) ສໍາລັບບັນດາປະເທດສະມາຊິກອາຊຽນ;
  5. ໃບຢັ້ງຢືນແຫຼ່ງກໍາເນີດສິນຄ້າ ຟອມ E: ແມ່ນອອກໃຫ້ສໍາລັບສິນຄ້າ ທີ່ຈະໄດ້ຮັບການຍົກເວັ້ນ ຫຼື ຫຼຸດຜ່ອນອັດຕາພາສີນໍາເຂົ້າ ພາຍໃຕ້ເຂດການຄ້າເສລີອາຊຽນ-ຈີນ;
  6. ໃບຢັ້ງຢືນແຫຼ່ງກໍາເນີດສິນຄ້າ ຟອມ APTA: ແມ່ນອອກໃຫ້ສໍາລັບສິນຄ້າ ທີ່ຈະໄດ້ຮັບການຍົກເວັ້ນ ຫຼື ຫຼຸດຜ່ອນອັດຕາພາສີນໍາເຂົ້າ ພາຍໃຕ້ສັນຍາການຄ້າອາຊີ-ປາຊີຟິກ;
  7. ໃບຢັ້ງຢືນແຫຼ່ງກໍາເນີດສິນຄ້າ ຟອມ AK: ແມ່ນອອກໃຫ້ສໍາລັບສິນຄ້າ ທີ່ຈະໄດ້ຮັບການຍົກເວັ້ນ ຫຼື ຫຼຸດຜ່ອນອັດຕາພາສີນໍາເຂົ້າ ພາຍໃຕ້ເຂດການຄ້າເສລີອາຊຽນ-ເກົາຫຼີ;
  8. ໃບຢັ້ງຢືນແຫຼ່ງກໍາເນີດສິນຄ້າ ຟອມ AJ: ແມ່ນອອກໃຫ້ສໍາລັບສິນຄ້າ ທີ່ຈະໄດ້ຮັບການຍົກເວັ້ນ ຫຼື ຫຼຸດຜ່ອນອັດຕາພາສີນໍາເຂົ້າ ພາຍໃຕ້ເຂດການຄ້າເສລີອາຊຽນ-ຍີ່ປຸ່ນ;
  9. ໃບຢັ້ງຢືນແຫຼ່ງກໍາເນີດສິນຄ້າ ຟອມ AI: ແມ່ນອອກໃຫ້ສໍາລັບສິນຄ້າ ທີ່ຈະໄດ້ຮັບການຍົກເວັ້ນ ຫຼື ຫຼຸດຜ່ອນອັດຕາພາສີສິນຄ້ານໍາເຂົ້າ ພາຍໃຕ້ເຂດການຄ້າເສລີອາຊຽນ-ອິນເດຍ;
  10. ໃບຢັ້ງຢືນແຫຼ່ງກໍາເນີດສິນຄ້າ ຟອມ SPT: ແມ່ນອອກໃຫ້ສໍາລັບສິນຄ້າ ທີ່ຈະໄດ້ຮັບການຍົກເວັ້ນ ຫຼື ຫຼຸດຜ່ອນອັດຕາພາສີນໍາເຂົ້າຈາກ ສປ.ຈີນ ພາຍໃຕ້ໂຄງການສ້າງຜົນເກັບກ່ຽວເບື້ອງຕົ້ນ;
  11. ໃບຢັ້ງຢືນແຫຼ່ງກໍາເນີດສິນຄ້າ ຟອມ AANZ: ແມ່ນອອກໃຫ້ສໍາລັບສິນຄ້າ ທີ່ຈະໄດ້ຮັບການຍົກເວັ້ນ ຫຼື ຫຼຸດຜ່ອນອັດຕາາພສີນໍາເຂົ້າ ພາຍໃຕ້ເຂດການຄ້າເສລີອາຊຽນ-ອົດສະຕາລີ-ນິວຊີແລນ;
  12. ໃບຢັ້ງຢືນແຫຼ່ງກໍາເນີດສິນຄ້າ ຟອມ AISP: ແມ່ນອອກໃຫ້ສໍາລັບສິນຄ້າ ທີ່ຈະໄດ້ຮັບການຍົກເວັ້ນ ຫຼື ຫຼຸດຜ່ອນອັດຕາພາສີນໍາເຂົ້າ ພາຍໃຕ້ລະບົບສິດພິເສດ ເພື່ອການເຊື່ອມໂຍງເສດຖະກິດເຂົ້າອາຊຽນ ທີ່ປະເທດສະມາຊິກເກົ່າໃຫ້ແກ່ປະເທດສະມາຊິກໃໝ່;
  13. ໃບຢັ້ງຢືນແຫຼ່ງກໍາເນີດສິນຄ້າ ຟອມ S: ແມ່ນອອກໃຫ້ສໍາລັບສິນຄ້າ ທີ່ຈະໄດ້ຮັບການຍົກເວັ້ນ ຫຼື ຫຼຸດຜ່ອນອັດຕາພາສີນໍາເຂົ້າ ພາຍໃຕ້ສັນຍາກ່ຽວກັບການໃຫ້ບູລິມະສິດພາສີຂາເຂົ້າ ເຊິ່ງກັນ ແລະ ກັນລະຫວ່າງ ສປປ ລາວ ແລະ ສສ ຫວຽດນາມ. ຂ້າງເທິງ

IV. ອົງການອອກໃບຢັ້ງຢືນແຫຼ່ງກໍາເນີດສິນຄ້າ

  1. ກົມການນໍາເຂົ້າ ແລະ ສົ່ງອອກ, ກະຊວງອຸດສາຫະກໍາ ແລະ ການຄ້າ ແລະ ພະແນກອຸດສາຫະກໍາ ແລະ ການຄ້ານະຄອນຫຼວງ ແລະ ແຂວງທົ່ວປະເທດ ແມ່ນໜ່ວຍງານຂອງລັດທີ່ມີສິດ ໃນການອອກໃບຢັ້ງຢືນແຫຼ່ງກໍາເນີດສິນຄ້າ ທີ່ໄດ້ສິດພິເສດທາງດ້ານການຄ້າ;
  2. ສະພາການຄ້າ ແລະ ອຸດສາຫະກໍາແຫ່ງຊາດ ແລະ ສະພາການຄ້າ ແລະ ອຸດສາຫະກໍາແຂວງທົ່ວປະເທດ ແມ່ນໜ່ວຍງານທີ່ໄດ້ຮັບການມອບໝາຍຈາກ ກະຊວງອຸດສາຫະກໍາ ແລະ ການຄ້າ ໃຫ້ເປັນຜູ້ອອກໃບຢັ້ງຢືນແຫຼ່ງກໍາເນີດສິນຄ້າ ແບບທໍາມະດາ ຫຼື ແບບບໍ່ໄດ້ສິດິພເສດ. ຂ້າງເທິງ

V. ການຂໍໃບຢັ້ງຢືນແຫຼ່ງກໍາເນີດສິນຄ້າ

  1. ຜູ້ທີ່ຕ້ອງການຂໍໃບຢັ້ງຢືນແຫຼ່ງກໍາເນີດສິນຄ້າ ທີ່ໄດ້ສິດພິເສດທາງດ້ານການຄ້າ ຕ້ອງປະກອບຊຸດເອກະສານທີ່ຄົບຖ້ວນ ແລະ ຖືກຕ້ອງ ແລ້ວສະເໜີຕໍ່ເຈົ້າໜ້າທີ່ທີ່ກ່ຽວຂ້ອງຢູ່ ກະຊວງອຸດສາຫະກໍາ ແລະ ການຄ້າ ຫຼື ພະແນກອຸດສາຫະກໍາ ແລະ ການຄ້າແຂວງທົ່ວປະເທດ;
  2. ຜູ້ທີ່ຕ້ອງການຂໍໃບຢັ້ງຢືນແຫຼ່ງກໍາເນີດສິນຄ້າ ທີ່ບໍ່ໄດ້ສິດພິເສດທາງດ້ານການຄ້າ ຕ້ອງປະກອບຊຸດເອກະສານທີ່ຄົບຖ້ວນ ແລະ ຖືກຕ້ອງ ແລ້ວສະເໜີຕໍ່ເຈົ້າໜ້າທີ່ທີ່ກ່ຽວຂ້ອງຢູ່ ສະພາການຄ້າ ແລະ ອຸດສາຫະກໍາແຫ່ງຊາດ ຫຼື ສະພາການຄ້າ ແລະ ອຸດສາຫະກໍາແຂວງ. ຂ້າງເທິງ

VI. ການອອກໃບຢັ້ງຢືນແຫຼ່ງກໍາເນີດສິນຄ້າ

   ອົງການ ຫຼື ໜ່ວຍງານທີ່ກ່ຽວຂ້ອງ ຈະຕ້ອງອອກໃບຢັ້ງຢືນແຫຼ່ງກໍາເນີດສິນຄ້າ ພາຍໃນຂອບເຂດເວລາ 3 ວັນລັດຖະການ ຫາກຜູ້ນໍາເຂົ້າ ແລະ ສົ່ງອອກປະກອບເອກະສານຖືກຕ້ອງ ແລະ ຄົບຖ້ວນ ຫຼື ກໍລະນີມີຄວາມຈໍາເປັນໃນການກວດກາຄືນ ຊ້າສຸດບໍ່ໃຫ້ເກີນ 7 ວັນລັດຖະການ. ຂ້າງເທິງ

VII. ການປະຕິເສດອອກໃບຢັ້ງຢືນແຫຼ່ງກໍາເນີດສິນຄ້າ

ໜ່ວຍງານອອກໃບຢັ້ງຢືນແຫຼ່ງກໍາເນີດສິນຄ້າ ມີສິດປະຕິເສດບໍ່ອອກໃບຢັ້ງຢືນແຫຼ່ງກໍາເນີດສິນຄ້າ ໃນກໍລະນີດັ່ງລຸ່ມນີ້:

  • ຜູ້ສະເໜີຂໍອອກໃບຢັ້ງຢືນແຫຼ່ງກໍາເນີດສິນຄ້າ ປະກອບເອກະສານຂໍບໍ່ຖືກຕ້ອງ, ບໍ່ຄົບຖ້ວນຕາມທີ່ກໍານົດໄວ້;
  • ມີຂໍ້ມູນທີ່ເຊື່ອຖືໄດ້ວ່າສິນຄ້າດັ່ງກ່າວ ບໍ່ມີແຫຼ່ງກໍາເນີດຢູ່ ສປປ ລາວ;

   ເມື່ອປະຕິເສດບໍ່ອອກໃບຢັ້ງຢືນແຫຼ່ງກໍາເນີດສິນຄ້າ; ເຈົ້າໜ້າທີ່ອອກໃບຢັ້ງຢືນແຫຼ່ງກໍາເນີດສິນຄ້າ ຕ້ອງແຈ້ງເປັນລາຍລັກອັກສອນ ໃຫ້ຜູ້ສະເໜີຊາບເຖິງເຫດຜົນໃນການປະຕິເສດດັ່ງກ່າວ. ຂ້າງເທິງ

VIII. ການຈັດຕັ້ງປະຕິບັດ

  1. ບົດແນະນໍາສະບັບນີ້ ມີຜົນນໍາໃຊ້ຈາກມື້ທີ່ດໍາລັດ ສະບັບເລກທີ 228/ນຍ, ລົງວັນທີ 22 ເມສາ 2010 ມີຜົນບັງຄັບໃຊ້;
  2. ຖ້າວ່າມີບັນຫາເກີດຂຶ້ນກ່ຽວກັບ ການຈັດຕັ້ງປະຕິບັດບົດແນະນໍາສະບັບນີ້ ໜ່ວຍງານຂອງລັດ ແລະ ຜູ້ດໍາເນີນທຸລະກິດທີ່ກ່ຽວຂ້ອງ ຕ້ອງລາຍງານຕໍ່ກະຊວງອຸດສາຫະກໍາ ແລະ ການຄ້າ ເພື່ອແກ້ໄຂໂດຍທັນທີ. ຂ້າງເທິງ

ລັດຖະມົນຕີວ່າການ
ກະຊວງອຸດສາຫະກໍາ ແລະ ການຄ້າ
ດຣ. ນາມ ວິຍະເກດ
 

ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.