ກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ, ໃນນາມເປັນຫ້ອງການປະຈຳການ ຂອງກອງເລຂາອຳນວຍຄວາມສະດວກທາງດ້ານການຄ້າ ໄດ້ຈັດ ກອງປະຊຸມກອງເລຂາອຳນວຍຄວາມສະດວກທາງດ້ານການຄ້າ ເພື່ອຮັບຮອງແນວທາງ ປັບປຸງຂັ້ນຕອນ ທາງດ້ານການຄ້າ ໃຫ້ມີຄວາມງ່າຍດາຍ ແລະ ກົມກຽວຂື້ນ ໃນວັນທີ 25 ມີນາ 2013 ທີ່ໂຮງແຮມເມີກຽວ, ນະຄອນຫລວງວຽງຈັນ, ພາຍໃຕ້ການເປັນປະທານຂອງ ທ່ານ ນາງ ເຂັມມະນີ ພົນເສນາ, ລັດຖະມົນຕີຊ່ວຍວ່າການ ກະຊວງອຸດສາຫະກຳ ແລະ ການຄ້າ, ຫົວໜ້າກອງເລຂາຄະນະອຳນວຍຄວາມສະດວກທາງດ້ານການຄ້າ, ໂດຍໄດ້ເຊື້ອເຊີນ ບັນດາສະມາຊິກ ກອງເລຂາອຳນວຍຄວາມສະດວກທາງດ້ານການຄ້າ ແລະ ຂະແໜງ ອື່ນໆ ທີ່ເຮັດວຽກປິ່ນອ້ອມວຽກງານອຳນວຍຄວາມສະດວກທາງດ້ານການຄ້າ. ຈຸດປະສົງ ຂອງກອງປະຊຸມໃນຄັ້ງນີ້ແມ່ນ ເພື່ອຮັບຮອງແນວທາງປັບປຸງ ຂັ້ນຕອນ ທາງດ້ານການຄ້າໃຫ້ມີຄວາມງ່າຍດາຍ ແລະ ກົມກຽວ.
ໂດຍແນ່ໃສ່ການຫັນເປັນອັດຕະໂນມັດ ເພື່ອຊ່ວຍໃຫ້ຜູ້ດຳເນີນການຄ້າ ສາມາດຍື່ນໃບຄໍາຮ້ອງຂໍໃບອະນຸຍາດ ນຳກົມນຳເຂົ້າ ແລະ ສົ່ງອອກ ແລະ ຂະແໜງການລັດຖະບານອື່ນໆ ໂດຍຜ່ານອິນເຕີ້ເນັດ. ທັງນີ້ກໍ່ເພື່ອ ເຮັດໃຫ້ການດຳເນີນຂະບວນການ ອອກອະນຸຍາດນຳເຂົ້າ-ສົ່ງອອກ ມີຄວາມສະດວກ, ງ່າຍດາຍ, ວ່ອງໄວ, ໂປ່ງໃສ ແລະ ເປັນລະບົບ, ເພື່ອຫລຸດຜ່ອນຂັ້ນຕອນ ແລະ ຈຳນວນເອກະສານທີ່ບໍ່ຈຳເປັນ, ການນຳສະເໜີລະບົບອັດຕະໂນມັດ ຢູ່ແຕ່ລະຂະແໜງ ອາດຈະເປັນວິທີ ເຊື່ອມໂຍງຖານຂໍ້ມູນລະຫວ່າງຂະແໜງການ ທີ່ມີປະສິດທິຜົນສູງສຸດ. ທັງໝົດນັ້ນ ເປັນບາດກ້າວ ອັນສຳຄັນ ຂອງການສ້າງລະບົບ ແຈ້ງເອກະສານປະຕູດຽວແຫ່ງຊາດ ຫລື Lao National Single Window (LNSW).
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.