ທ່ານ ສາຍທອງ ພິມບ່າວ ຮອງຫົວໜ້າຂະແໜງລ້ຽງສັດ ແລະ ການປະມົງ ພະແນກກະສິກຳ-ປ່າໄມ້ ແຂວງວຽງຈັນ ກ່າວວ່າ: ໃນວັນທີ 29 ເມສາຜ່ານມານີ້ ໄດ້ຮັບການລາຍງານຈາກພົນລະເມືອງດີວ່າ ມີການລັກລອບຂົນສົ່ງຊິ້ນສ່ວນສັດປີກຈາກແຂວງຫຼວງພະບາງ ມຸ່ງໜ້າເຂົ້າສູ່ນະຄອນຫຼວງວຽງຈັນ ດັ່ງນັ້ນ ເຈົ້າໜ້າທີ່ຂະແໜງລ້ຽງສັດ ແລະ ການປະມົງ ຈຶ່ງໄດ້ເຂົ້າກວດຄົ້ນ ລົດບັນທຸກໝາຍເລກທະບຽນ ບກ 0248 ແລະ ໄດ້ກວດພົບຊິ້ນສ່ວນສັດປີກຄື: ເປັດປອກ 700 ກິໂລ ແລະ ອົ້ງເປັດ 160 ກິໂລ ຊຶ່ງບໍ່ຮູ້ແຫຼ່ງທີ່ມາ ແລະ ບໍ່ມີເອກະສານຢັ້ງຢືນ ມີພຽງສິ່ງຫຸ້ມຫໍ່ ທີ່ມີພາສາປະເທດໃກ້ຄຽງຂຽນຕິດໄວ້ ດັ່ງນັ້ນ ເຈົ້າໜ້າທີ່ຈຶ່ງໄດ້ຢຶດ ແລະ ນຳໄປທຳລາຍຖິ້ມ ດ້ວຍວິທີຕາມຫຼັກວິຊາການ ທີ່ປ່າຊ້າບ້ານນາທອງ ເມືອງໂພງໂຮງ ເພື່ອເປັນການສະກັດກັ້ນເຊື້ອພະຍາດໄຂ້ຫວັດສັດປີກ H7N9 ທີ່ມີການລະບາດຢູ່ປະເທດໃກ້ຄຽງ ຊຶ່ງສາມາດຕິດຈາກສັດສູ່ຄົນໄດ້.
ທ່ານຮອງຫົວໜ້າຂະແໜງກ່າວອີກວ່າ: ປັດຈຸບັນແຂວງວຽງຈັນ ໄດ້ມີການເຝົ້າລະວັງສະກັດກັ້ນທຸກຮູບການກະທຳ ທີ່ຈະນຳໄປສູ່ການແຜ່ລະບາດຂອງພະຍາດດັ່ງກ່າວ ແລະ ທ່ານຍັງໄດ້ຮຽກຮ້ອງໄປຍັງປະຊາຊົນ ພໍ່ຄ້າຊາວຂາຍຕະຫຼອດຮອດພະນັກງານລັດຖະກອນ ຈົ່ງໃຫ້ຄວາມຮ່ວມມື ຫ້າມຊື້ ຫ້າມກິນ ຜະລິດຕະພັນສັດປີກທີ່ບໍ່ຮູ້ແຫຼ່ງທີ່ມາຢ່າງລະອຽດ ເພື່ອປ້ອງກັນບໍ່ໃຫ້ມີການລະບາດຂອງພະຍາດດັ່ງກ່າວຢູ່ ສປປ ລາວ.
ແຫລ່ງຂໍ້ມູນ: ໜັງສືພິມເສດຖະກິດ-ສັງຄົມ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.