ຕົ້ນຢາງພາລາທີ່ປູກໂດຍຊາວກະສິກອນໃນຫລາຍໆເມືອງ ແມ່ນພ້ອມສຳຫລັບການເກັບກູ້ ແຕ່ວ່າຍັງບໍ່ທັນມີບໍລິສັດໃດເຂົ້າມາຕິດຕໍ່ສັ່ງຊື້, ຢາງພາລາດິບຂອງຊາວກະສິກອນໄດ້ຖືກກັກໄວ້ ໂດຍເຈົ້າໜ້າທີ່ພາສີຂອງຈີນຢູ່ທີ່ດ່ານຊາຍແດນ ເນື່ອງຈາກປະເທດຈີນບໍ່ໄດ້ກຳນົດໃຫ້ໂກຕ້ານຳເຂົ້າຢາງພາລາ, ທ່ານ ໄນເພັດ ບຸບຜາ ຫົວໜ້າຂະແໜງປ່າໄມ້ແຂວງ ໄດ້ກ່າວໃນມື້ວານນີ້.
ບັນດາຊາວກະກອນຍັງໄດ້ກ່າວວ່າ: ໃນປະຈຸບັນ, ພວກເຂົາຍັງໄດ້ຖືກເອົາປຽບຈາກການກົດລາຄາ ໂດຍພໍ່ຄ້າຊາວຈີນ ໃນເວລາທີ່ພວກເຂົານຳເອົາສິນຄ້າໄປຂາຍຕາມຈຸດຊາຍແດນ. ທ່ານ ໄນເພັດກ່າວຕື່ມວ່າ: ເພື່ອເປັນການແກ້ໄຂ, ອຳນາດປົກຄອງແຂວງເຈົ້າໜ້າທີ່ລາວ ໂດຍສະເພາະຂະແໜງອຸດສາຫະກຳ ແລະ ການຄ້າ ແລະ ກະສິກຳ ແລະ ປ່າໄມ້ ກຳລັງວາງແຜນສ້າງຕັ້ງກຸ່ມຊາວກະກອນທີ່ປູກຢາງພາລາຂຶ້ນ. ການສ້າງຕັ້ງກຸ່ມດັ່ງກ່າວນີ້ ຈະເປັນການສ້າງຄວາມສະດວກງ່າຍດາຍ ໃຫ້ຊາວກະສິກອນໃນການຮັບປະກັນລາຄາຂາຍຢາງພາລາຂອງເຂົາເຈົ້າ. ນອກນີ້, ເຈົ້າໜ້າທີ່, ອຳນາດການປົກຄອງແຂວງ ຍັງຈະໄດ້ປະຊຸມກັບທາງເຈົ້າໜ້າທີ່ ຂອງ ສປ ຈີນ ເພື່ອປຶກສາຫາລື ກ່ຽວກັບ ການຄ້າຂາຍຢາງພາລາ. ໃນໄລຍະຜ່ານມາ, ຊາວກະສິກອນລາວ ໄດ້ຂາຍຢາງພາລາແບບເອກະລາດ ໂດຍບໍ່ໄດ້ມີການເຊັນສັນຍາກັບບໍລິສັດ ແລະ ຕົວແທນຈາກລັດຖະບານ. ຫລາຍໆຄອບຄົວທີ່ປູກຢາງພາລາປະຈຸບັນໄດ້ປະສົບກັບບັນຫາການຊອກຫາຜູ້ຊື້.
ບໍລິສັດຂອງຈີນກຳລັງສ້າງໂຮງງານປຸງແຕ່ງຢາງພາລາຂື້ນໃນແຂວງຜົ້ງສາລີ ແລະ ຫວັງວ່າ ໂຮງງານດັ່ງກ່າວນີ້ຈະສາມາດເລີ່ມຕົ້ນທຳການຜະລິດໃນຕົ້ນປີໜ້າ, ຊາວກະສິກອນຕ່າງກໍ່ຫວັງວ່າ ໂຮງງານດັ່ງກ່າວຈະສຳເລັດການກໍ່ສ້າງໃນໄວໆນີ້ ເພື່ອຈະເຮັດໃຫ້ເຂົາເຈົ້າສາມາດຂາຍຜົນຜະລິດຂອງຕົນໃຫ້ແກ່ບໍລິສັດ.
ທ່ານ ໄນເພັດ ຍັງໃຫ້ຮູ້ຕື່ມອີກວ່າ ເນື້ອທີ່ປູກຢາງພາລາຂອງແຂວງ ໃນປະຈຸບັນ ກວມເອົາຫລາຍກວ່າ 17,000 ເຮັກຕາ ຂອງເນື້ອທີ່ແຂວງ ໃນນີ້ລວມມີເນື້ອທີ່ຂອງຊາວກະສິກອນໃນທ້ອງຖິ່ນ ແລະ ເນື້ອທີ່ຂອງບໍລິສັດຕ່າງປະເທດ.
ການປູກຢາງພາລາ ໄດ້ສ້າງລາຍຮັບເພີ່ມໃຫ້ແກ່ຊາວກະສິກອນ ນອກຈາກການປູກເຂົ້າ. ແຕ່ເຖິງຢ່າງໃດກໍ່ຕາມ, ປະຈຸບັນ ລັດຖະບານໄດ້ຮຽກຮ້ອງໃຫ້ມີການຈັດສັນການສຳປະທານເນື້ອທີ່ດິນ ສຳຫລັບປູກຢາງພາລາ ແລະ ປູກຕົ້ນໄມ້ທີ່ໃຫ້ນໍ້າມັນ, ເລັງໃສ່ນຳໃຊ້ເນື້ອທີ່ດິນໃຫ້ເໝາະສົມ ແລະ ປົກປັກຮັກສາສິ່ງແວດລ້ອມໄປພ້ອມກັນ.
ແຫລ່ງຂໍ້ມູນ: ໜັງສືພິມວຽງຈັນທາມ໌ມ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.