ກະຊວງອຸດສາຫະກຳ ແລະ ການຄ້າ ຈະເລັ່ງປັບປຸງຂອດນະໂຍບາຍ ດ້ານການສົ່ງອອກສິນຄ້າ ພາຍຫລັງເຂົ້າເປັນສະມາຊິກອົງການການຄ້າໂລກ ແລະ ກຽມເຂົ້າເປັນປະຊາຄົມເສດຖະກິດອາຊຽນໃນປີ 2015 ທັງນີ້ກໍ່ເພື່ອການເຊື່ອມໂຍງກັບພາກພື້ນ ແລະ ສາກົນຢ່າງເປັນລະບົບ, ດຶງດູດການລົງທຶນທັງພາຍໃນ ແລະ ຕ່າງປະເທດ ຫຼໍ່ລ້ຽງເສດຖະກິດຢູ່ໃນໄລຍະຂາຂຶ້ນ. ຂະນະທີ່ທ່ານລັດຖະມົນຕີວ່າການກະຊວງ ອຸດສາຫະກຳ ແລະ ການຄ້າ ຢ້ຳວ່າ ຜູ້ເຮັດການຄ້າຍຸກໃໝ່ຕ້ອງແມ່ນຊາວໜຸ່ມທີ່ມີຄວາມໃຝ່ຝັນດ້ານ ທຸລະກິດພອ້ມທີ່ຈະເປັນຜູ້ປະກອບການຢ່າງເຕັມຕົວ.
ທ່ານ ດຣ ນາມ ວິຍະເກດ ລັດຖະມົນຕີວ່າການ ກະຊວງອຸດສະຫະກຳ ແລະ ການຄ້າ ລາຍງານຕໍ່ກອງປະຊຸມ ຄະນະປະຈຳສະພາແຫ່ງຊາດທີ່ມີຂຶ້ນໃນຕອນເຊົ້າວັນທີ 27 ມີຖຸນາ 2013 ທີ່ສະພາແຫ່ງຊາດກ່ຽວກັບຄວາມພອ້ມຂອງ ສປປ ລາວ ໃນການເຂົ້າເປັນສາມະຊິກອົງການການຄ້າໂລກ ແລະ ການເຂົ້າຮວ່ມປະຊາຄົມເສດຖະກິດອາຊຽນໃນປີ 2015. ທ່ານ ກ່າວວ່າ : ນັບແຕ່ປີ 2007 ເປັນຕົ້ນມາ ສປປ ລາວ ໄດ້ເຂົ້າຮວ່ມເຈລະຈາເປີດການຄ້າເສລີດ້ານການບໍລິການກັບ ອາຊຽນພາຍໃຕ້ສັນຍາ AFAS.
ປະຈຸບັນໄດ້ສະຫຼຸບຜົນການເຈລະຈາໃນ ຮອບທີ 5 ພູດທີ 8 ເຊິ່ງບັນດາປະເທດສະມາຊິກຈະຕ້ອງເປີດ ກ້ວາງ ຕາມຄາດໝາຍຢ່າງນ້ອຍ 80 ຂະແໜງການຍອ່ຍໂດຍ ສປປ ລາວ ໄດ້ເປີດແລ້ວ 89 ຂະແໜງການຍ່ອຍຈາກ 10 ຂະແໜງຫຼັກ. ສວ່ນພູດທີ 9 ແລະ ທີ 10 ຈະຕອ້ງເປີດຕື່ມ ພູດລະ 24 ຂະແໜງການຍອ່ຍ ເພື່ອໃຫ້ບັນລຸເປົ້າໝາຍທັງໝົດ 128 ຂະແໜງການຍ່ອຍໃນປີ 2015. ທ່ານລາຍງາຍຕື່ມວ່າ:
ເພື່ອສ້າງໃຫ້ໄດ້ຜົນປະໂຫຍດຈາກການເຊື່ອມໂຍງເສດຖະກິດກັບສາກົນຂອງ ສປປ ລາວ ນັ້ນ, ສິ່ງທີ່ສຳຄັນທີ່ສຸດມີຢູ່ 2 ປະເດັນດວ້ຍກັນຄື: 1.) ເຄົາລົບ ແລະ ປະຕິບັດ ບັນດານິຕິກຳ (ກົດໝາຍ, ດຳລັດແລະ ລະບຽບການຕ່າງ) ແລະ ບັນດາຂໍ້ຜູກພັນທີ່ລາວເຮົາມີກັບສາກົນໃຫ້ເຂັ້ມງວດ. 2.) ສົ່ງເສີມພາກທຸລະກິດຢ່າງແຂງແຮງເພື່ອດຳເນີນທຸລະກິດ ເພາະມີແຕ່ບັນດາຫົວໜວ່ຍທຸລະກິດເທົ່ານັ້ນຈະເປັນຜູ້ສ້າງຜົນປະໂຫຍດຕົວຈິງໃຫ້ແກ່ປະເທດເຮົາ
ເນື້ອໃນລາຍລະອຽດເພື່ອປະຕິບັດເພື່ອຍາດແຍ່ງໃຫ້ໄດ້ຜົນປະໂຫຍດນັ້ນ ນອກຈາກພວກເຮົາຈະໄດ້ຫັນມະຕິຂອງພັກ, ແຜນການຈັດຕັ້ງປະຕິບັດຂອງລັດລວມທັງຂະແໜງການທີ່ກ່ຽວຂອ້ງ ກໍ່ໄດ້ຫັນນະໂຍບາຍ, ຍຸດທະສາດ, ແຜນການພັດທະນາລະອຽດໃນແຕ່ລະດ້ານ, ອັນທີ່ສຳຄັນໄປກວານັ້ນຈະຕອ້ງລົບລ້າງສິ່ງຈຳກັດ ແລະ ກີດຂວາງທາງດ້ານການຄ້າ.
ໄລຍະຜ່ານມາກະຊວງອຸດສາຫະກຳ ແລະ ການຄ້າເອງ ກໍ່ໄດ້ມີຄວາມພະຍາຍາມປັບປຸງບັນດານິຕິກຳ ສ້າງສິ່ງອຳນວຍຄວາມສະດວກໃຫ້ແກ່ການຄ້າ ແລະ ການບໍລິການເຮັດໃຫ້ການຈັດອັນດັບຄວາມງ່າຍໃນການດຳເນີນທຸລະກິດໂລກຂອງ ສປປ ລາວ ໄດ້ຮັບການຍົກລະດັບດີຂຶ້ນຈາກອັນດັບ 168 ໃນປີ 2011 ມາເປັນອັນດັບທີ 163 ໃນປີ 2013 ທຽບໃສ່ 158 ປະເທດໃນໂລກ.
ທ່ານ ລັດຖະມົນຕີວ່າການ ໄດ້ລາຍງານຕື່ມກ່ຽວກັບການເຂົ້າຫາ ແລະ ຂະຫຍາຍຕະຫຼາດວ່າ: ລາວເຮົາຕອ້ງເລັ່ງກໍ່ສ້າງຜູ້ປະກອບກິດຈະການໃໝ່ໃຫ້ມີຄວາມສາມາດໃນການຜະລິດ, ການຄິດ ແລະ ການບໍລິການກັບນັກທຸລະກິດພາກພື້ນ ແລະ ສາກົນ ໂດຍເນັ້ນໃສ່ຊາວໜຸ່ມທີ່ມີການສຶກສາລະດັບດີ. ມີຄວາມສາມາດດ້ານພາສາຕ່າງປະເທດ ແລະ ມີຄວາມຊຳນານໃນການນຳໃຊ້ເທັກໂນໂລຊີຂ່າວສານ (IT), ເພີ້ມວິທີການບໍລິການດ້ານວິຊາການ ເພື່ອຍົກລະດັບຄວາມຊຳນານງານໃນການບໍລິການທຸລະກິດ, ປັບປຸງມາດຕະຖານ ແລະ ຄຸນນະພາບຜະລິດຕະພັນ.
ສະພາບການຂະຫຍາຍຕົວຂອງເສດຖະກິດລາວ ນັບແຕ່ພັກ-ລັດຖະບານ ປະຕິບັດນະໂຍບາຍເປີດປະຕູແຕ່ປີ 1986 ເປັນຕົ້ນມາ, ສິ່ງທີ່ສະແດງໃຫ້ເຫັນພາບການເຊື່ອມໂຍງຢ່າງຊັດເຈນແມ່ນເສດຖະກິດ ມະຫາພາກມີການຂະຫຍາຍຕົວຢ່າງຕໍ່ເນື່ອງ ໄປຕາມທິດຫັນເປັນອຸດສາຫະກຳ ແລະ ທັນສະໄໝເທື່ອລະກ້າວ ໂດຍອັດຕາການຂະຫຍາຍຕົວຂອງເສດຖະກິດໃນ 5 ປີ (1986-1990) ເພີ້ມຂຶ້ນສະເລ່ຍ 4,8% ຕໍ່ປີ, ປີ 2001-2005 ເພີ້ມຂຶ້ນສະເລ່ຍ 6,24% ຕໍ່ປີ ແລະ ໄລຍະປີ 2006-2010 ເພີ້ມຂຶ້ນສະເລ່ຍ 7,9% ຕໍ່ປີ.
ລວມຍອດຜະລິດຕະພັນພາຍໃນ ຈີດີພີ ສະເລ່ຍຫົວຄົນໃນປີ 1985 ເທົ່າກັບ 114 ໂດລາສະຫະລັດ, ປີ 2000 ເທົ່າກັບ 325 ໂດລາສະຫາະລັດ, 2009-2010 ເທົ່າກັບ 1.069 ໂດລາສະຫະລັດ ແລະ ສົກປີ 2011-2012 ເພີ້ມຂຶ້ນມາເປັນ 1.349 ໂດລາສະຫະລັດ. ສ່ວນມູນຄ່າການຄ້າຕ່າງປະເທດ (ນຳເຂົ້າ-ສົ່ງອອກ) ໃນປີ 1990 ບັນລຸ 246 ລ້ານໂດລາສະຫະລັດ, ການສົ່ງອອກບັນລຸ 75 ລ້ານໂດລາ, ມາຮອດປີ 2012 ບັນລຸ 4.322,2 ລ້ານໂດລາສະຫະລັດ ໃນນີ້ມູນຄ້າການສົ່ງອອກບັນລຸ 1.602 ລ້ານໂດລາສະຫະລັດ ທຽບໃສ່ປີ 1990 ເພີ້ມຂຶ້ນ 21 ເທົ່າຕົວ. ໃນຂະນະທີ່ການລົງທຶນຂອງຕ່າງປະເທດນັບແຕ່ປີ 2000 ລວມ 64 ໂຄງການ, ມູນຄ່າການລົງທຶນ 51,42 ລ້ານໂດລາສະຫະລັດ ແຕ່ປີ 2012 ມູນຄ່າການລົງທຶນເພີ້ມຂຶ້ນເປັນ 2.899 ລ້ານໂດລາສະຫະລັດ.
ດ້ານ ດຣ. ກຸແກ້ວ ອັກຄະມົນຕີ ຄະນະປະຈຳສະພາແຫ່ງຊາດ, ປະທານກຳມາທິການ ການຕ່າງປະເທດ ສະພາແຫ່ງຊາດ ກໍ່ໄດ້ສະເໜີຕໍ່ ກະຊວງອຸດສາຫະກຳ ແລະ ການຄ້າ ໃນການເຂົ້າເປັນສາມະຊິກອົງການການຄ້າໂລກ ເມື່ອຕົ້ນປີ 2013 ແລະ ການກະກຽມເຂົ້າເປັນສະມາຊິກປະຊາຄົມເສດຖະກິດ ອາຊຽນໃນປີ 2015 ວ່າ: ຕະຫຼອດໄລຍະເວລາ 15 ປີ ຂອງການຕອບຄຳຖາມ ຂອງສະມາຊິກອົງການການຄ້າໂລກ 1300 ຫົວຂໍ້ ແລະ ລັດຖະບານ ໄດ້ປັບປຸງນິຕິກຳທີ່ສອດຄ່ອງກັບສັນຍາອົງການການຄ້າໂລກຫຼາຍກວ່າ 90 ສະບັບ ລວມມີກົດໝາຍ 26 ສະບັບ ແລະ ດຳລັດ 18 ສະບັບ ຈຶ່ງເຮັດໃຫ້ ສປປ ລາວ ກາຍເປັນສະມາຊິກອົງການການຄ້າໂລກ ຢ່າງເປັນທາງການ.
ສິ່ງທີ່ສະເໜີໃຫ້ລັດຖະບານທົບທວນຄືນໃນການຈັດຕັ້ງປະຕິບັດນະໂຍບາຍເຊື່ອມໂຍງ ກັບພາກພື້ນ ແລະ ສາກົນຂອງ ສປປ ລາວ ຈະຕ້ອງໄດ້ຄົ້ນຄ້ວາເບິ່ງອການຂະຫຍາຍຕະຫຼາດຢ່າງມີສະຖຽນລະພາບກວ່າເກົ່າ, ໂອກາດໃນການສ້າງບຸກຄະລາກອນຂອງ ສປປ ລາວ ທີ່ຈະພັດທະນາຄວາມຮູ້ ແລະ ຄວາມສາມາດກ່ຽວກັບການເຈລະຈາດຳເນີນທຸລະກິດ ໃນລະດັບສາກົນ, ສ່ວນການໂຄສະນາເຜີຍແຜ່ ວຽກງານການເຊື່ອມໂຍງເສດຖະກິດກັບພາກພື້ນ ແລະ ສາກົນ ຍັງບໍ່ທັນຟົດຟື້ນ ແລະ ເປັນຂະບວນການກວ້າງຂວາງເທົ່າທີ່ຄວນ.
ແຫລ່ງຂ່າວ: ໜັງສືພິມເສດຖະກິດ-ການຄ້າ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.